1 Ɔyɔdiɔk ɔnɔ mmɔ eke ewukde mme ukwaŋ ewuhɔ, ye emi ewetde ŋwet ukut emi mmɔ esiakde.

2 Man esin ndinɔ ubuene ubiere ikpe, enyuŋ ebɔ ubuene ikɔt mi unen, man mme ebekpa edi mbume mmɔ, mam mmɔ ebɔ eto nditɔ-akpa ke ŋkanubɔk!

3 Ndien nso ke mbufo edinam ke usen ufen, ye ke nsobo emi editode anyan usuŋ idi? Anie ke mbufo edifehe itiene ikiyom uŋwam? Ndien mmɔŋ ke mbufo edinim ubɔŋ mbufo?

4 Mikpidihe ami mmɔ ekpenuhɔ enɔ mbon ŋkpɔkɔbi, ndien mmɔ ekpeduɔ ke otu mme akpaŋa afai. Koro inamke ofuri iyaresit esie afiak edem, edi ubɔk esie osuk anyanyan.

5 O Asshur, esaŋ iyaresit mi, ye eto ke ubɔk mmɔ edi ifuresit mmɔ.

6 Ami nyedɔŋ enye utom ke oburobut idut, ndien ye mbio iyaresit mi ke ami nditobo enye etop nte ada mbume, onyuŋ omum unam emi unam efen omumde man ata, onyuŋ edigi mmɔ nte mbat mme efak.

7 Edi enye ikereke ntre, ndien esit esie iduakke ntre; edi odu enye ke esit ndisobo nyuŋ nsibe ediwak mme idut nsio.

8 Koro enye ɔdɔhɔ ete: Ndi kpukpru ikpɔ owo mi idihe ndidem?

9 Nte Calno ibietke Carchemish? Nte Hamath ibietke Arpad? Nte Samaria ibietke Damascus?

10 Kpa nte ubɔk mi akasiakde mme idut ndem, emi edisɔi mbiet mmɔ ekewakde ekan eke Jerusalem ye Samaria;

11 Ndi ami ndinamke, kpa nte ŋkanamde ye Samaria ye mme ndem esie, ye Jerusalem ye mme ndem esie?

12 Ke ntre eyedikem ete ke ini Jehovah ama anam ofuri utom esie ke Obot Zion ye ke Jerusalem, ami nyemia mfri iseri esit edidem Assyria ufen, ye ubɔŋ emenede iso esie.

13 Koro enye ɔdɔhɔ ete: Ke odudu ubɔk mi ye ifiɔk mi ke ami nnam mme ŋkpɔ emi; koro ami nyenede eti ibuot; ndien ami mesik mme adaŋa mme idut, nyuŋ mbɔ mme inyene mmɔ ke ŋkanubɔk, ndien nsuhɔde mme andiduŋ nte ɔkpɔsɔŋ owo.

14 Ndien ubɔk mi esime mme inyene mme idut nte efɔk inuen; ndien kpa nte etaŋde mme nsen eke ekpɔŋde ke ami ntaŋ ofuri ererimbot; ndien baba kiet iduhe eke enyeŋede mba, mme atatde inua, mme osiorode uyo.

15 Nte ekuri ekeme ndiburɔ mburɔ ye andida enye ŋkpi? Nte uyɔk-ŋkpɔ ekeme ndimenede idem nkan andida enye nyɔk? Nte esaŋ ekeme ndifuŋ idem esie ye mmɔ emi emenede enye, mme nte esaŋ ekeme ndimenede idem esie nte enye idighe eto!

16 Ke ntak oro ke Jehovah, Jehovah mme Udim, ɔnɔ mbon ubom, ndiɔk-idem; ndien ke idak ubɔŋ esie ke enye edisak nte ikaŋ asakde.

17 Ndien uŋwana Israel ayakabade edi ikaŋ, ndien Ata Edisana esie nte edeme-ikaŋ, ndien ɔfɔp onyuŋ ata mme akpap ye mme ŋkukim ke usen kiet;

18 Ndien eyeta ubɔŋ akai esie, ye eke eti iŋwaŋ esie, ukpɔŋ ye obukidem mbiba; ndien mmɔ eyetie nte ini idem ememde ada-iso.

19 Ndien mme eto ke akai esie emi esuhɔde eyedi esisit, tutu eyen-ɔwɔŋ ekeme ndiwet mmɔ.

20 Ndien eyedikem ke usen oro, ete nsuhɔ Israel, ye mbon ekebɔhɔde ke ufɔk Jacob, iditɔŋɔke ntak aba ibere-edem ke enye emi akamiade mmɔ, edi eyebere-edem ye Jehovah, Edisana Abasi Israel, ke akpanikɔ.

21 Nsuhɔ eyefiak etiene, iŋ, kpa nsuhɔ Jacob, etiene Abasi andikpon nkan.

22 Koro okposuk edi ke nditɔ fo Israel ewakde nte ntan mben inyaŋ, edi nsuhɔ mmɔ eyefiak edi; nsobo ekewukde ɔyɔyɔhɔ ye nnen nnen ido.

23 Koro Jehovah mme Udim eyenam nsobo, kpa emi enimde ke kpukpru ererimbot.

24 Ke ntak oro, ntem ke Jehovah Abasi mme Udim ɔdɔhɔ ete: O ikɔt mi emi eduŋde ke Zion, ekufehe Asshur; enye ayamia mbufo ye esaŋ, onyuŋ emenede eto esie etiene mbufo, kpa nte Egypt akanamde.

25 Koro ɔsuhɔ ata esisit ini, ndien iyaresit eyetre, ye iyaresit mi ke nsobo mmɔ.

26 Ndien Jehovah mme Udim eyedemede ikpa ese enye ebiet nsobo Midian ke itiat Oreb; ndien nte esaŋ esie okodorode ke inyaŋ ke enye edimenede enye nte akanamde ke Egypt.

27 Ndien eyedikem ke usen oro ete eyemen mbiomo esie efep ke afara mbufo, ndien ɔkpɔnɔ esie efep ke itɔŋ mbufo, ndien eyebiat ɔkpɔnɔ oro ke ntak uyet aran.

28 Enye edi ke Aiath, enye ebe aka Migron; ke Michmash ke enye enim mme mbiomo esie.

29 Mmɔ ebe mfafaha usuŋ; mmɔ ena ke Geba; ndik anam Ramath; Gibeah eke Saul efehe.

30 Menede uyo fo, O eyen-aŋwan Gallim; nam ekop enye ke Laish, O ubuene Anathoth.

31 Madmenah efeŋe; mme andiduŋ ke Gebim eboho idem mmɔ ndifehe.

32 Enye osuk etie ke Nob ke usen oro; enye enyeŋe ubɔk esie ese obot eyen-aŋwan Zion, kpa obot Jerusalem.

33 Sese, Jehovah, Jehovah mme Udim ayawai ŋkɔk ye ndik; ndien eyesibe mmɔ ekekponde eyesuhɔde idaha; ndien mmɔ ekekoŋde eyesuhɔde.

34 Ndien enye eyetem mfufuhɔ akai ye ukwak, ndien Lebanon ɔyɔduɔ oto ɔkpɔsɔŋ owo.