1 Uyo Abasi kabaŋa Babylon, emi Isaiah eyen Amoz okokutde.

2 Mbufo emenede banner ke ŋkoŋkoŋ obot, emenede uyo enɔ mmɔ, efuŋ ubɔk, man mmɔ eduk ke mme inua otop mbɔŋ.

3 Ami mmɔnɔ mme ndisana owo mi uyo, ami ŋko mmokot mbon uko mi, koro iyaresit mi idihe ye mmɔ emi edarade ke ubɔŋ mi.

4 Uyom otu owo ke mme obot ebiet eke mme akwa owo, uyom ndutime mme obio idut esobo kiet, Jehovah mme Udim otim udim ekɔŋ.

5 Mmɔ eto ke anyan obio, eto ke utit enyɔŋ, iŋ, Jehovah, ye mme ŋkpɔ ekɔŋ iyaresit esie, ndisobo ofuri isɔŋ.

6 Mbufo etuaŋa, koro usen Jehovah ekpere; enye eyedi nte nsobo emi otode Abasi Ibom.

7 Ke ntre ke kpukpru ubɔk edimem, kpukpru esit owo eyemede;

8 Ndien mmɔ eyefehe ndik, mme ubiak ye mme ndutuhɔ oyomum mmɔ; mmɔ eyeyik ye kiet eken; iso mmɔ ayasak nte mme ikaŋ.

9 Sese, usen Jehovah kedi, abak-ibak ye iyaresit ye ufiop iyaresit mbiba, man enim isɔŋ ke ŋwure; ndien enye oyosobo mme anam idiɔk osio ke enye.

10 Koro mme ntantaɔfiɔŋ ye mme enyɔŋ idinɔhɔ uŋwana mmɔ; utin eyekim ke ini enye ediwɔrɔde, ndien ɔfiɔŋ idinamke uŋwana esie ayama.

11 Ndien ami nyemia ererimbot ufen mbaŋa idiɔk, ye mme anam idiɔk ke ntak ukwaŋ ŋkpɔ mmɔ; ami nyanam iseri ataŋidem etre, nyuŋ nsuhɔde ntaŋidem mbon afai.

12 Ami nyanam owo ɔsɔŋ urua akan edisana gold; tutu owo akan ubak gold Ophir.

13 Ke ntre, ami nyanam mme enyɔŋ enyek, ndien isɔŋ ayadaha ɔkpɔŋ ebiet esie, ke iyaresit Jehovah mme Udim, ye ke usen ufiop iyaresit esie.

14 Ndien enye eyetie nte ebet emi ebinede, ye nte erɔŋ emi owo mibonke; ndien mmɔ kiet kiet eyenyɔŋ ebine mme owo esie, enyuŋ efehe owo kiet kiet eka isɔŋ esie.

15 Eyekim kpukpru owo emi etaŋde idem; iŋ, ndien kpukpru owo emi edianade ye idiɔk owo eyeduɔ ke ofut.

16 Eyeyibi nditɔ mmɔ mbio-mbio ke iso mmɔ; eyebume ufɔk mmɔ enyuŋ edɔ iban mmɔ ke nkan-ubɔk.

17 Sese, ami nyedemede mme Mede nnɔ mmɔ, emi midikereke silver ye gold, ndien mmɔ idinemke esit ke enye.

18 Mme utiha mmɔ eyenuak mkparawa mmɔ mbio-mbio; ndien mmɔ idituaha mfri idibi mbɔm; enyin mmɔ idituaha nditɔwɔŋ mbɔm.

19 Ndien Babylon, ubɔŋ mme idut, uyai mbana mme Chaldee, eyetie nte ini Abasi okosobode Sodom ye Gomorrah.

20 Owo ididuhe ke enye tutu amama, ndien owo ididuŋke ke enye tɔŋɔ ke emana ye emana; nditɔ Arabia idiwukke tent do; ŋko mme ekpeme-erɔŋ idinaha do.

21 Edi unam ikɔt eke desert ayana do; ndien ufɔk mmɔ ɔyɔyɔhɔ ye mme mbɔm-mbɔm unam; ndien mme ŋkurikut eyeduŋ do, ndien mme odusu ebot eyenek do.

22 Ndien mme unam isuo inyaŋ eyetuaŋa ke mme ufɔk mmɔ emi owo miduŋke, ndien mme dragon ke mme ediye okure akwa oku mmɔ; ndien ini esie ekpere ndidi, ndien ini esie idibihike. Koro ami nyɔsɔp nsobo enye; iŋ, koro nyenyene mbɔm mbaŋa ikɔt mi, edi mme idiɔk owo eyetak.