1 Edi sese, ediwak eyedu—ke usen oro ke ini ami ndinamde utibe ŋkpɔ ke otu mmɔ, man ami nti mme ediomi mi emi ami nkanamde nnɔ nditɔ owo, man ami ntɔŋɔ ntak nsin ubɔk mi mfak ikɔt mi, emi edide eke ufɔk Israel;

2 Ndien ŋko, man ami nti mme eŋwɔŋɔ emi ami nkanamde nnɔ fi, Nephi, nyuŋ nnɔ ete fo ŋko, nte ke ami nyeti ubon mbufo; ndien ete ke mme ikɔ ubon mbufo eyeto ke inua mi ewɔrɔ enɔ ubon mbufo; ndien ke mme ikɔ mi eyesi ɔwɔrɔ ke mme utit ererimbot, edi udomo enɔ ikɔt mi, emi edide eke ufɔk Israel;

3 Ndien ke ntak emi mme ikɔ mi edisi iwɔrɔ—ediwak mme Gentile eyedɔhɔ ete: Bible! Bible! Nnyin iminyene Bible, ndien Bible efen ikemeke ndidu.

4 Edi ntem ke Jehovah ɔdɔhɔ: O mme ndisime, mmɔ eyenyene Bible; ndien enye edito mme Jew iwɔrɔ, mbio ediomi mi ke eset. Ndien didie ke mmɔ ekɔm mme Jew ke Bible emi mmɔ ekebɔde eto mmɔ? Iŋ, nso ke mme Gentile eyom? Ndi mmɔ eti mme ufen, ye mme utom, ye mme ubiak mme Jew, ye nsin ifik mmɔ ye ami, ke ndida erinyaŋa nnɔ mme Gentile?

5 O mbufo mme Gentile, ndi mbufo emeti mme Jew, mbio ediomi mi ke eset? Iŋ iŋ; edi mbufo emesuŋi mmɔ, enyuŋ esua mmɔ, ndien iyomke ndifiak nnim mmɔ ke itie mmɔ. Edi sese, ami nyayak kpukpru mme ŋkpɔ emi ndori mbufo ke ibuot; koro ami Jehovah mfreke ikɔt mi.

6 Afo ndisime, emi ɔdɔhɔde ete: Bible, nnyin iminyene Bible, ndien nnyin iyomke Bible efen aba. Ndi mbufo emenyene Bible ibɔhɔke emi otode mme Jew?

7 Ndi mbufo ifiɔkke ite ke mme idut ewak ekan kiet? Ndi mbufo ifiɔkke ite ke ami, Jehovah Abasi mbufo, mma mbot mme owo, ndien ke meti mbio emi edude ke mme isuo inyaŋ; ndien ke ami ŋkara ke mme heaven ke enyɔŋ ye ke isɔŋ ke idak; ndien ami nda ikɔ mi nsɔk nditɔ owo, iŋ, nsɔk kpa kpukpru mme idut ke ererimbot?

8 Ntak emi mbufo ekunide, koro mbufo edibɔde ediwak ikɔ mi? Ndi mbufo ifiɔkke ite ke ikɔ ntiense idut iba edi ntiense ɔnɔ mbufo ete ke ami ndi Abasi, ndien ke ami meti idut kiet nte eken? Ke ntre, ami ntiŋ mme ukem ukem ikɔ nnɔ idut kiet nte ntiŋde nnɔ eken. Ndien ke ini mme idut iba emi esaŋade kiet ikɔ ntiense mme idut iba emi eyesaŋa kiet ŋko.

9 Ndien ami nnam emi man nwut ediwak nte ke ami ndi ukem ukem mkpɔŋ, mfin, ye ke nsinsi; ndien nte ke ami ntiŋ mme ikɔ mi nte enemde mi. Ndien ke ntak emi ami ntiŋde ikɔ kiet inaha mbufo ekere ete ke ami nkanke ntiŋ ikɔ efen; koro utom mi ikureke kaŋa; idinyuŋ ikureke tutu utit owo, idinyuŋ ikureke tɔŋɔ ke ini oro ka ye ke nsinsi.

10 Ke ntre, ke ntak emi mbufo enyenede Bible inaha nte mbufo ekere ete ke enye ɔdɔŋɔ kpukpru mme ikɔ mi; ŋko inaha nte mbufo ekere ete ke ami nnamke nte yak ewet ediwak efen.

11 Koro ami nnɔ kpukpru owo uyo, ke edem usiaha utin ye edem usop utin mbiba, ye ke edem edere, ye ke usuk usuk, ye ke mme isuo inyaŋ, nte mmɔ ewet mme ikɔ emi ami ntiŋde nnɔ mmɔ; koro se ewetde ke ŋwed oro ke ami ndida mbiere ikpe nnɔ ererimbot, kpukpru owo nte utom mmɔ edide, nte asaŋade ye se ewetde.

12 Koro sese, ami nyetiŋ ikɔ nnɔ mme Jew ndien mmɔ eyewet enye; ndien ami ŋko nyetiŋ ikɔ nnɔ mme Nephite ndien mmɔ eyewet enye; ndien ami ŋko nyetiŋ ikɔ nnɔ mme ubon ufɔk Israel eken, emi ami ŋkadade ŋwɔrɔ, ndien mmɔ eyewet enye; ndien ami ŋko nyetiŋ ikɔ nnɔ kpukpru mme idut ererimbot ndien mmɔ eyewet enye.

13 Ndien eyedikem ete mme Jew eyenyene mme ikɔ mme Nephite, ndien mme Nephite eyenyene mme ikɔ mme Jew; ndien mme Nephite ye mme Jew eyenyene mme ikɔ mme ubon Israel emi ekesopde; ndien mme ubon Israel emi ekesopde enyenyene mme ikɔ mme Nephite ye mme Jew.

14 Ndien eyedikem ete ikɔt mi, emi edide eke ufɔk Israel, eyetaŋ mmɔ enyɔŋ ufɔk ke mme isɔŋ inyene mmɔ; ndien eyemen ikɔ mi ŋko edian kiet. Ndien ami nyowut mmɔ emi eŋwanade ye ikɔ mi ye emi eŋwanade ye ikɔt mi, emi edide eke ufɔk Israel, nte ke ami ndi Abasi, ndien nte ke ami mma ndiomi ye Abraham nte ke ami nyeti ubon esie ke nsinsi.