1 Ndien edikem ke eyo Ahaz eyen Jotham, eyen Uzziah, edidem Judah, ete Rezin, edidem Syria, ye Pekah eyen Remaliah, edidem Israel, edɔk eka Jerusalem ndiŋwana ekɔŋ ye enye, edi mmɔ ikemeke ubɔk ekɔŋ ye enye.

2 Ndien edɔhɔ ke ufɔk David, ete: Syria adiana ye Ephraim. Ndien esit esie enyek, ye esit ikɔt esie, nte ofum enyeŋede mme eto ke akai.

3 Ndien Jehovah ɔdɔhɔ Isaiah ete: Ka idahaemi kosobo ye Ahaz, afo ye Shearjashub eyen fo, ke utit udiɔŋ mmɔŋ ke enyɔŋ enyɔŋ mkpɔdiɔhɔ mmɔŋ ke usuŋ ɔdiɔŋ-ɔfɔŋ;

4 Nyuŋ dɔhɔ enye ete: Kpeme idem, nyuŋ tie suŋ; kufehe ndik, kunyuŋ uyak esit emem fi abaŋa etak ifia ikaŋ iba emi ewɔrɔde nsuŋikaŋ, ke ntak ɔkpɔsɔŋ iyaresit Rezin ye Syria, ye eyen esie Remaliah.

5 Koro Syria, Ephraim, ye eyen esie Remaliah, edukde idiɔk odu ebaŋa fi, ete:

6 Yak nnyin idɔk ke Judah inyuŋ ikituk enye, ndien yak nnyin ikan enye inɔ idem nnyin, inyuŋ inim edidem ke esit esie, kpa, eyen Tabeal.

7 Ntem ke Jehovah Abasi ɔdɔhɔ ete: Ididaha, idinyuŋ itibeke.

8 Koro ibuot Syria edide Damascus, ndien ibuot Damascus, Rezin; ndien ke isua ata ye ition Ephraim ayasuana etre ndidi idut.

9 Ndien ibuot Ephraim edi Samaria, ndien ibuot Samaria edi eyen Remaliah. Edieke mbufo mibuɔtke idem ke akpanikɔ mbufo idinyeneke iwuk.

10 Ndien, Jehovah afiak ɔdɔhɔ Ahaz, ete:

11 Beŋe idiɔŋɔ to Jehovah Abasi fo; beŋe enye ke mme utuŋɔ, mme ke ata enyɔŋ.

12 Edi Ahaz ɔdɔhɔ ete: Ami ndibeŋeke, ndien ami ndidomoke Jehovah.

13 Ndien enye ɔdɔhɔ ete: Mbufo ekop ndien, O ufɔk David; ndi edi ekpri ŋkpɔ mbufo edifek mme owo, edi ndi mbufo eyefek Abasi mi ŋko?

14 Ke ntak oro, Jehovah ke idem esie ɔyɔnɔ mbufo idiɔŋɔ—Sese, eyenɔwɔŋ aŋwan oyoyomo, onyuŋ aman eyen eren, onyuŋ okot enyiŋ esie Immanuel.

15 Edibari mmɔŋ-eba ye aran ɔkwɔk ke enye edidia, man enye ɔfiɔk ndisin idiɔk onyuŋ emek eti.

16 Koro mbemiso eyen oro ɔfiɔk ndisin idiɔk nyuŋ mmek eti, edidem esie iba eyekpɔŋ isɔŋ emi afo asuade.

17 Jehovah ayada etiene fi, ye ikɔt fo, ye ufɔk ete fo, mme usen emi akanam midihe tɔŋɔ ke usen emi Ephraim ɔkɔwɔrɔde ɔkpɔŋ Judah, edidem Assyria.

18 Ndien eyedikem ke usen oro ete Jehovah eyesi okot nsuŋ emi odude ke ofuri Egypt, ye ɔkwɔk emi odude ke isɔŋ Assyria.

19 Ndien mmɔ eyedi, ndien kpukpru mmɔ eyebono ke mme ikpikpu ebedeŋ, ye ke mme nsiaha itiat, ye ke kpukpru ŋkukim, ye ke kpukpru ikɔt.

20 Ke usen oro ke Jehovah edikwat ye akadaŋ enye ekpede, mmɔ emi edude ke edem akpa, kpa edidem Assyria, ibuot, ye idet ikpat; ndien enye ŋko ayakwat ntaŋebek efep.

21 Ndien eyedikem ke usen oro, owo ɔyɔbɔk eyen enaŋ ye erɔŋ iba;

22 Ndien eyedikem, ke ntak ediwak mmɔŋ eba mmɔ edinɔde enye ayadia edibari mmɔŋ eba; koro edibari mmɔŋ eba ye aran ɔkwɔk ke kpukpru owo emi esuhɔde ke isɔŋ oro edidia.

23 Ndien eyedikem ke usen oro, kpukpru ebiet eyedi, emi tɔsin vine eke akpade tɔsin silver, eyekabade edi nte mme akpap ye mme ŋkukim.

24 Ye mme utiha ye mme idaŋ ke mme owo edidi do, koro kpukpru isɔŋ ayakabade edi mme akpap ye mme ŋkukim.

25 Ndien kpukpru mme obot emi editibide ye udɔk, ndik mme akpap ye mme ŋkukim ididuhe; edi enye eyedi ebiet edidɔŋde enaŋ aka, ye ebiet emi ŋkpri ufene edidihide.