1 Sese, edikem ete ami, Nephi, mma nseme nnɔ Jehovah Abasi mi, ke ntak iyatesit nditɔ eka mi iren.

2 Edi sese, iyatesit mmɔ ama okpon ye ami, tutu ete ke mmɔ eyom ndimen uwem mi mfep.

3 Iŋ, mmɔ ekuni ye ami, ete: Ekpri eyen eka nnyin oyom ndikara nnyin, ndien nnyin ima inyene ediwak idomo ke ntak esie; ke ntre, idahaemi yak nnyin iwot enye, man ukut edifiak esim nnyin ke ntak mme ikɔ esie. Koro sese, nnyin idiyakke enye edi andikara nnyin; sia oro enyene nnyin, emi idide nditɔ eka emi ikponde ikan, ndikara mme owo emi.

4 Idahaemi ami ŋwetke ke mme usan emi kpukpru mme ikɔ emi mmɔ ekekunide ye ami. Edi ekem mi ndidɔhɔ, ete ke mmɔ ema eyom ndimen uwem mi mfep.

5 Ndien edikem ete Jehovah ama oduri mi utɔŋ, ete ami, Nephi, ŋwɔrɔ ŋkpɔŋ mmɔ nnyuŋ mfehe ŋka ikɔt, ye kpukpru mbon emi enyimede ndika ye ami.

6 Ke ntre, edikem ete ami, Nephi, mma mmen ikɔt ufɔk mi, ndien ŋko Zoram ye ikɔt ufɔk esie, ye Sam, akamba eyen eka mi eren ye ikɔt ufɔk esie, ye Jacob, ekpri eyen eka mi eren, ndien ŋko ye nditɔ eka mi iban, ye kpukpru mbon emi enyimede ndika ye ami. Ndien kpukpru mbon emi ekenyimede ndika ye ami ekedi mbon emi ekenimde ke mme item ye eriyarare Abasi; ke ntre, mmɔ ema ekpaŋ-utɔŋ enɔ mme ikɔ mi.

7 Ndien nnyin ima imen mme tent nnyin ye mme ŋkpɔ ekededi emi nnyin ikikande, inyuŋ isaŋa ke ikɔt ke ufaŋ ediwak usen. Ndien ke ini nnyin ima ikisaŋa ke ufaŋ ediwak usen nnyin iwuk mme tent nnyin.

8 Ndien mbon emi ekesaŋade ye ami ekeyom ete yak ekot enyiŋ ebiet oro Nephi; ke ntre, nnyin ima ikot enye Nephi.

9 Ndien kpukpru mbon emi ekedude ye ami ema enyime ke idem mmɔ ndikot idem mmɔ ikɔt Nephi.

10 Ndien nnyin idomo ndinim mme ubiere ikpe, ye mme ewuhɔ, ye mme mbet Jehovah ke kpukpru ŋkpɔ, nte asaŋade ye mbet Moses.

11 Ndien Jehovah ama odu ye nnyin; ndien nnyin iforo eti eti; koro nnyin ima itɔ mkpasip, ndien nnyin inyuŋ idɔk ediwak. Ndien nnyin ima itɔŋɔ ndibɔk mme ufene, ye mme enaŋ, ye unam eke kpukpru oruk.

12 Ndien ami, Nephi, ŋko mma mmen mme ŋwed emi ekemiŋde ke mme usan brass; ndien ŋko nyori oro, mme ŋkpɔ emi ekedade nnyin usuŋ, emi ekenamde enɔ ete mi ke ubɔk Jehovah, nte asaŋade ye se ewetde.

13 Ndien edikem ete nnyin itɔŋɔ ndiforo eti eti, ye nditɔt ke isɔŋ oro.

14 Ndien ami, Nephi, mma mmen ofut Laban, ndien ke mbiet esie nnam ediwak ofut, mbak ke usuŋ eke ekpededi mme owo emi ekotde mmɔ idahaemi mme Lamanite ekusim nnyin nnyuŋ nsobo nnyin; koro ami mma mfiɔk usua mmɔ kabaŋa mi ye nditɔ mi ye mbon oro ekekotde ikɔt mi.

15 Ndien ami mma mkpep ikɔt mi nte ebɔpde mme ufɔk, ye ndinam kpukpru oruk eto, ye ukwak, ye copper, ye brass, ye okpoho, ye gold, ye silver, ye mme ŋsɔŋ urua ukwak, emi okodude awak eti eti.

16 Ndien ami, Nephi, mma mbɔp temple; ndien ami ŋkɔbɔp enye ntiene utɔ temple Solomon ibɔhɔke ke owo ikidaha ediwak nsɔŋ urua ŋkpɔ uto ibɔp; koro mmɔ ikiduhe ke isɔŋ oro, ke ntre, owo ikikemeke ndibɔp enye nte temple Solomon. Edi usuŋ ekedade ebɔp enye eketie nte temple Solomon; ndien ubɔk utom esie ama eye eti eti.

17 Ndien edikem ete ami, Nephi, mma nnam ikɔt mi esin ifik enam utom, enyuŋ enam utom ye ubɔk mmɔ.

18 Ndien edikem ete mmɔ eyom ete ami ndi edidem mmɔ. Edi ami, Nephi, mma nyene udɔŋ nte yak mmɔ ekunyene edidem; edi, ami mma nnam ŋkpɔ nnɔ mmɔ nte ekesaŋade ye odudu mi.

19 Ndien sese, mme ikɔ Jehovah ama osu ɔnɔ nditɔ eka mi iren, emi enye eketiŋde kabaŋa mmɔ, ete ke ami nyedi andikara mmɔ ye andikpep mmɔ. Ke ntre, ami mma ndi andikara mmɔ ye andikpep mmɔ, nte asaŋade ye mme mbet Jehovah, tutu ke ini emi mmɔ ekeyomde ndimen uwem mi mfep.

20 Ke ntre, ikɔ Jehovah ama osu emi enye eketiŋde ɔnɔ mi, ɔdɔhɔ ete: Kadaŋa nte mmɔ midikpaŋke utɔŋ inɔ mme ikɔ fo eyesibe mmɔ esio ke iso Jehovah. Ndien sese, ema esibe mmɔ esio ke iso esie.

21 Ndien enye ama anam isuŋi emi esim mmɔ, iŋ, kpa idiɔk isuŋi, ke ntak ukwaŋ-ŋkpɔ mmɔ. Koro sese, mmɔ ema esɔŋ esit mmɔ ye enye, ndien mmɔ ekabade etie nte itiat; ke ntre, nte mmɔ ekedide afia, enyuŋ esana eti eti enyuŋ edi mbon idaresit, man mmɔ ekutabi ikɔt mi Jehovah Abasi ama anam obubit ikpa idem esim mmɔ.

22 Ndien ntem ke Jehovah Abasi ɔdɔhɔ: Ami nyenam ete mmɔ ediɔk eti eti ye ikɔt fo, ibɔhɔke ete ke mmɔ eyekabade esit ekpɔŋ mme ukwaŋ-ŋkpɔ mmɔ.

23 Ndien eyesuŋi ubon owo emi edibuanade ye ubon mmɔ; koro eyesuŋi mmɔ kpa ye ukem ukem isuŋi. Ndien enye ke Jehovah ɔdɔhɔ, ndien enam oro.

24 Ndien ke ntak isuŋi mmɔ emi okodude mmɔ ke idem mmɔ ema ekabade edi mbon ifu, eyɔhɔ ye idiɔk ido ye ŋkari, ndien eyom ke ikɔt mme unam emi unam efen omumde man ata.

25 Ndien Jehovah Abasi ɔdɔhɔ mi ete: Mmɔ eyedi afanikoŋ enɔ ubon fo, man edemede mmɔ ke nditi mi; ndien kadaŋa nte mmɔ miditihi mi, inyuŋ ikpaŋke-utɔŋ inɔ mme ikɔ mi, mmɔ eyemia mmɔ tutu esim nsobo.

26 Ndien edikem ete ami, Nephi, mma nsio Jacob ye Joseph nnim, man mmɔ edi mme oku ye mme andikpep ke isɔŋ ikɔt mi.

27 Ndien edikem ete nnyin iduŋ ke inemesit.

28 Ndien isua edip ye duop ama ebe tɔŋɔ ke ini nnyin ikikpɔŋde Jerusalem.

29 Ndien ami, Nephi, mma ŋwet mme ŋwed ke mme usan brass mi, emi ami ŋkanamde, mbaŋa ikɔt mi tutu esim emi.

30 Ndien edikem ete Jehovah Abasi ɔdɔhɔ mi ete: Nam mme usan efen; ndien afo eyemiŋ ediwak ŋkpɔ ke mmɔ emi ɔfɔnde ke enyin mi, ɔnɔ udori ikɔt fo.

31 Ke ntre, ami, Nephi, ke ndinim mme mbet Jehovah, mma ŋka nnyuŋ nnam mme usan emi ami mmiŋde mme ŋkpɔ emi.

32 Ndien ami nkemiŋ se inemde Abasi esit. Ndien edieke ikɔt mi enemde esit ye mme ŋkpɔ Abasi mmɔ eyenem esit ye edimiŋ ŋkpɔ mi emi odude ke mme usan emi.

33 Ndien edieke ikɔt mi enyenede udɔŋ ndifiɔk saŋa saŋa ubak mbuk eset ikɔt mi ana nte mmɔ eduŋɔde mme usan mi eken.

34 Ndien ekem mi ndidɔhɔ ete ke isua aba ama ebe efep, ndien nnyin ima inyene mme ekɔŋ ye mme eneni ye nditɔ eka nnyin iren.