1 Ikɔ emi Isaiah, eyen eren Amoz, okokutde abaŋa Judah ye Jerusalem:

2 Ndien eyedikem ke mme akpatre usen, ke ini edisiakde obot ufɔk Jehovah ke enyɔŋ mme obot, ndien eyemenede enye okoŋ akan mme obot, ndien kpukpru idut eyeka do.

3 Ndien ediwak owo eyeka enyuŋ edɔhɔ, mbufo edi, enyuŋ eyak nnyin idɔk ika obot Jehovah, ika ufɔk Abasi Jacob; ndien enye eyekpep nnyin abaŋa mme usuŋ esie, ndien nnyin iyisaŋa ke mme usuŋ esie; koro ke Zion ke mbet edito iwɔrɔ; ndien ikɔ Jehovah oto Jerusalem.

4 Ndien enye eyebiere ikpe ke otu mme idut, onyuŋ asua ɔnɔ ediwak owo: ndien mmɔ eyeda mme ofut mmɔ edom ŋkpɔ ufuŋ isɔŋ, ndien eda mme eduat mmɔ edom mme ikwa udiɔŋ ikɔt—idut idimenke ofut itiene idut, mmɔ idinyuŋ ikpepke ekɔŋ aba.

5 O ufɔk Jacob, mbufo edi enyuŋ eyak nnyin isaŋa ke uŋwana Jehovah; iŋ, edi, koro kpukpru mbufo emewɔrɔ ekpɔŋ usuŋ, kpukpru owo eduk ke mme idiɔk usuŋ mmɔ.

6 Ke ntak oro, O Jehovah, afo ɔmɔkpɔŋ ikɔt fo, ufɔk Jacob, koro mmɔ eyɔhɔde ye se itode edem usiaha-utin, enyuŋ ekpaŋde utɔŋ enɔ mme ebre idiɔŋ nte mme Philistine, enyuŋ enem idem mmɔ esit ke nditɔ esien-owo.

7 Isɔŋ mmɔ ŋko ɔyɔhɔ ye silver ye gold, ndien mme inyene mmɔ inyeneke utit; isɔŋ mmɔ ŋko ɔyɔhɔ ye mme horse, ndien mme chariot mmɔ inyeneke utit.

8 Isɔŋ mmɔ ŋko ɔyɔhɔ ye mme ndem; mmɔ ekpono utom ubɔk mmɔ, emi nnuen-ubɔk mmɔ enamde.

9 Ndien owo usuhɔde itie isukke ibuot inɔ isɔŋ, ndien ɔkpɔsɔŋ owo isuhɔkede idem, ke ntre, kufen unɔ enye.

10 O mbufo mme idiɔk owo, eduk ke itiat, enyuŋ edibe ke ntan, kabaŋa uteŋe Jehovah ndien ubɔŋ ubom esie ayamia mbufo.

11 Ndien eyedikem ete ke mme emenede-enyin owo eyesuhɔde-idem, ntaŋ-idem mme owo esuk ibuot ke isɔŋ, ndien Jehovah ikpɔŋ ke edimenede ke usen oro.

12 Koro usen Jehovah mme Udim ke ɔsɔp edi ɔnɔ kpukpru idut, iŋ, ɔnɔ kpukpru owo; iŋ, ɔnɔ ataŋidem ye owo iseri, ye kpukpru owo emi emenede idem, ndien eyesuhɔde mmɔ.

13 Iŋ, ndien usen Jehovah eyedi kabaŋa kpukpru cedar Lebanon, koro mmɔ ekoŋde enyuŋ emenedede ke enyɔŋ; onyuŋ abaŋa kpukpru ofriyo Bashan;

14 Onyuŋ abaŋa kpukpru ŋkoŋkoŋ obot, ye kpukpru obot, ye kpukpru idut emi emenedede ke enyɔŋ, ye kpukpru owo;

15 Onyuŋ abaŋa kpukpru edikoŋ tower, ye kpukpru ɔkpɔsɔŋ ibibene;

16 Onyuŋ abaŋa kpukpru ubom ke inyaŋ, ye kpukpru ubom Tarshish, ye kpukpru mme ndise emi enemde owo esit.

17 Ndien mme emenede idem owo eyesuhɔde, ndien ntaŋ-idem mme owo eyeduɔ; ndien Jehovah ikpɔŋ ke edimenede ke usen oro.

18 Ndien mme ndem enye ayabiat ofuri ofuri.

19 Ndien mmɔ eyeduk ke mme aba itiat, ye ke mme ndudu isɔŋ, koro uteŋe Jehovah eyesim mmɔ ndien ubɔŋ ubom esie ayamia mmɔ, ke ini enye adahade ada ndinyeŋe isɔŋ ke ɔkpɔsɔŋ.

20 Ke usen oro owo ɔyɔduɔk mme ndem silver esie, ye mme ndem gold esie, emi enye akanamde ɔnɔ idem esie ndikpono, ɔnɔ mme oyot ye mme emiaŋ;

21 Man oduk ke mme aba itiat, ye ke mme enyɔŋ nsiaha itiat, koro uteŋe Jehovah eyesim mmɔ ndien ubom ubɔŋ esie ayamia mmɔ, ke ini enye adahade ada ndinyeŋe isɔŋ ke ɔkpɔsɔŋ.

22 Mbufo ekubuɔt aba idem ye owo emi ibifik esie odude enye ke ibuo; koro ebat enye ke nso?