1 Ke isua edidem Uzziah akakpade, ami nkut ŋko Jehovah nte etiede ke ebekpo, okoŋde onyuŋ emenede, ndien ewura esie ɔyɔhɔ temple.

2 Ke enyɔŋ esie mme seraphim eda, kiet kiet enyene mba itiokiet, ye iba enye ofuk iso esie, ndien ye iba enye ofuk ikpat esie, ndien enye efe ye iba.

3 Ndien kiet eseme ɔnɔ kiet, onyuŋ ɔdɔhɔ ete: Edisana, edisana, edisana, edi Jehovah mme Udim; kpukpru ererimbot ɔyɔhɔ ye ubɔŋ esie.

4 Ndien mme udori-asaŋa-udɔk ema enyeŋe ke uyo esie emi ekesemede, ndien ufɔk ama ɔyɔhɔ ye nsuŋikaŋ.

5 Ndien ami ndɔhɔ nte: Ɔyɔdiɔk ɔnɔ mi! koro ami mmakpa; ke ntak emi ami ndide owo ndedehe mkpɔk-inua; ndien ami nduŋ ke otu mme owo ndedehe mkpɔk-inua; koro mme enyin mi ekut Edidem, Jehovah mme Udim.

6 Ndien kiet ke otu mme seraphim efe etiene mi, ye mbubek ikaŋ ke ubɔk esie, emi enye akadade ufat-ikaŋ osio ke itie uwa;

7 Ndien enye odori enye ke mkpɔk-inua mi, onyuŋ ɔdɔhɔ ete: Sese, emi otuk mkpɔ-inua fo; ndien emen ukwaŋ-ŋkpɔ fo efep, enyuŋ esio isop idiɔk ŋkpɔ fo.

8 Ŋko ami ŋkop uyo Jehovah, ɔdɔhɔde ete: Anie ke ndidɔŋ, ndien anie idika inɔ nnyin? Ndien ami ndɔhɔ nte: Se mi mi; dɔŋ mi.

9 Ndien enye ɔdɔhɔ ete: Ka kɔdɔhɔ mbio emi ete—Mbufo etim ekpaŋutɔŋ, edi iŋwaŋake mmɔ; ndien etim ese, edi mmɔ ifiɔkke.

10 Nam esit mbio emi esɔŋ, nyuŋ nam mme utɔŋ mmɔ edobi, nyuŋ tibi mmɔ enyin—man mmɔ idikut ye enyin mmɔ, enyuŋ ekop ye mme utɔŋ mmɔ, enyuŋ efiɔk ke esit mmɔ, enyuŋ ekabade esit man ekɔk mmɔ.

11 Ndien ami ndɔhɔ nte: Jehovah, ebigi didie? Ndien enye ɔdɔhɔ ete: Tutu mme obio ewure enana mme andiduŋ, ndien mme ufɔk enana owo, ndien isɔŋ ana ukpɔk ofuri ofuri.

12 Ndien Jehovah osio mme owo enim ke anyan ebiet, koro akamba edikpɔŋ oyodu ke ufɔt isɔŋ.

13 Edi ɔyɔhɔ ubak duop oyodu, ndien mmɔ eyenyɔŋ edi, ndien eyeta mmɔ, nte eto teil, ye nte ofriyo emi inyene odude ke mmɔ ke ini mme ikɔŋ mmɔ ebehede; man edisana mkpasip edi inyene do.