1 Ndien idahaemi, ami, Nephi, ntiŋ mbaŋa mme prophecy emi ete mi eketiŋde, abaŋa Joseph, emi ekemende eka Egypt.

2 Koro sese, enye ke akpanikɔ ama etiŋ abaŋa ofuri ubon esie. Ndien mme prophecy emi enye ekewetde, ediwak iduhe emi okponde akan. Ndien enye ama etiŋ prophecy abaŋa nnyin, ye mme emana eyo iso nnyin; ndien ewet mmɔ ke mme usan brass.

3 Ke ntre, ke ini ete mi ama eketre nditiŋ ikɔ mbaŋa mme prophecy Joseph, enye okot nditɔ Laman, nditɔ iren esie, nditɔ iban esie, onyuŋ ɔdɔhɔ mmɔ ete: Sese, nditɔ mi iren, ye nditɔ mi iban, emi edide nditɔ iren ye nditɔ iban akpa eyen mi, ami mmeyom nte yak mbufo ekpaŋutɔŋ enɔ mme ikɔ mi.

4 Koro Jehovah Abasi ama ɔdɔhɔ ete: Adaŋa nte mbufo edinimde mme mbet mi mbufo eyeforo ke isɔŋ; ndien adaŋa nte mbufo midinimke mme mbet mi eyesibe mbufo esio ke iso mi.

5 Edi sese, nditɔ mi iren ye nditɔ mi iban, ami ndikanke nsuhɔre ŋka udi mi ke mibɔhɔke ami ŋkpɔŋ edidiɔŋ mi nnɔ mbufo; koro sese, ami mmefiɔk nte ke edieke enamde mbufo ekɔri ke usuŋ emi anade nte mbufo eka mbufo idiwɔrɔke ikpɔŋ enye.

6 Ke ntre, edieke esuŋide mbufo, sese, ami mkpɔŋ edidiɔŋ mi ye mbufo, man emen isuŋi emi ekpɔŋ mbufo enyuŋ edori ke ibuot ete ye eka mbufo.

7 Ke ntre, ke ntak edidiɔŋ mi Jehovah Abasi idiyakke ete mbufo etak; ke ntre, enye eyenyene mbɔm abaŋa mbufo ye ubon mbufo ke nsinsi.

8 Ndien edikem ete ke ini ete mi ama eketre nditiŋ ikɔ nnɔ nditɔ iren ye nditɔ iban Laman, enye anam eda nditɔ iren ye nditɔ iban Lemuel edi ke iso esie.

9 Ndien enye ɔdɔhɔ mmɔ, ete: Sese, nditɔ mi iren ye nditɔ mi iban, emi edide nditɔ iren ye nditɔ iban udiana eyen mi eren; sese ami mkpɔŋ nnɔ mbufo ukem ukem edidiɔŋ emi ami ŋkɔkpɔŋde nnɔ nditɔ iren ye nitɔ iban Laman; ke ntre, owo idisoboke mbufo ofuri ofuri; edi ke akpatre eyediɔŋ ubon mbufo.

10 Ndien edikem ete ke ini ete mi ama eketre nditiŋ ikɔ nnɔ mmɔ, sese, enye etiŋ ikɔ ɔnɔ nditɔ iren Ishmael, iŋ, kpa ye kpukpru ikɔt ufɔk esie.

11 Ndien ke ini enye ama eketre nditiŋ ikɔ nnɔ mmɔ, enye etiŋ ikɔ ɔnɔ Sam, ete: Ɔfɔfɔn ɔnɔ fi, ye ubon fo; koro afo ayeada isɔŋ oro enyene nte eyen eka fo Nephi. Ndien eyebat ubon fo ye ubon esie; ndien afo eyedi ukem ukem ye eyen eka fo, ndien ubon fo nte ubon esie; ndien eyediɔŋ fi ke kpukpru eyo uwem fo.

12 Ndien edikem ke ini ete mi, Lehi, ama eketiŋ ikɔ ɔnɔ kpukpru ikɔt ufɔk esie, nte ekemde ye udɔŋ esit esie ye Spirit Jehovah emi okodude ke enye, enye ɔkɔri ɔsɔŋ. Ndien edikem ete enye akpa, enyuŋ ebuk enye.

13 Ndien edikem ete ke usen ikiwakke ke enye ama akakpa, Laman ye Lemuel ye nditɔ iren Ishmael ema eyat esit ye ami ke ntak mme item Jehovah.

14 Koro ami, Nephi, ŋketiŋde ikɔ ye mmɔ ke ifik, ntiene ikɔ esie; koro ami mma ntiŋ ediwak ŋkpɔ nnɔ mmɔ, ndien ŋko ete mi, mbemiso enye akpa; ediwak mme ikɔ emi ewet ke mme usan mi eken; koro akamba ubak abaŋade mbuk eset ewet ke mme usan mi eken.

15 Ndien ke enyɔŋ emi ami ŋwet mme ŋkpɔ ukpɔŋ mi, ye ediwak ŋwed Abasi emi emiŋde ke mme usan brass. Koro ukpɔŋ mi okop inemesit ke ŋwet Abasi, ndien esit mi ekere abaŋa mmɔ, onyuŋ ewet mmɔ ɔnɔ ukpep-ŋkpɔ ye udori nditɔ mi.

16 Sese, ukpɔŋ mi enem esit abaŋa mme ŋkpɔ Jehovah; ndien esit mi ekere kpukpru ini abaŋa mme ŋkpɔ emi ami ŋkutde nnyuŋ ŋkopde.

17 Edi, ke misehe akwa mfɔn Jehovah, ke ndiwut mi akwa ye mme utibe utom esie, esit mi ofiori ete: O owo nditahade eke ami ndide! Iŋ, esit mi ɔfuhɔ ke ntak obukidem mi; ukpɔŋ mi ɔfuhɔ ke ntak mme ukwaŋ-ŋkpɔ mi.

18 Ekanare mi ekuk, ke ntak mme idomo ye mme idiɔk-ŋkpɔ emi esɔpde esim mi.

19 Ndien ke ini ami nyenede udɔŋ ndinem esit, esit mi eseme ke ntak mme idiɔk-ŋkpɔ mi; edi, ami mmefiɔk enyemi ami mbuɔtde idem.

20 Abasi mi ekedi iberedem mi; enye ama ada mi ebe mme ukut mi ke ikɔt; ndien enye etim mi enim ke enyɔŋ mme mmɔŋ eke akwa utuŋɔ mmɔŋ.

21 Enye ama ɔyɔhɔ mi ye ima esie, tutu esim ndisobo obukidem mi.

22 Enye ama etimere mme asua mi, tutu anam mmɔ eyek idem ke iso mi.

23 Sese, enye ama okop eseme mi ke uwemeyo, ndien enye ama ɔnɔ mi ifiɔk ke ŋkukut oto ke okoneyo.

24 Ndien ke uwemeyo ke ami nsɔŋɔ ke ɔkpɔsɔŋ akam ke iso esie; iŋ, uyo mi ke ami nnɔ ɔdɔk enyɔŋ; ndien mme angel ema edi enyuŋ enam utom enɔ mi.

25 Ndien ke mba Spirit esie ke ekemen idem mi ewɔrɔ edɔk mme ata edikoŋ obot. Ndien mme enyin mi ama okut mme ikpɔ ŋkpɔ, iŋ, esim emi okponde akan owo; ke ntak oro ema edɔhɔ mi ete yak ami nkuwet mmɔ.

26 O ndien, edieke ami ŋkokutde mme ikpɔ ŋkpɔ emi, edieke Jehovah ke usuhɔre idem esie nnɔ nditɔ owo ama edise mme owo ye akwa mbɔm, ntak esit mi atuade ndien ukpɔŋ mi ebetde ke itihede mfuhɔ, ndien obukidem mi atak, ndien odudu mi emem, ke ntak mme ukut mi?

27 Ndien ntak emi ami mkpeyakde idem mi nnɔ idiɔk-ŋkpɔ, ke ntak obukidem mi? Iŋ, ntak emi ami nyakde usuŋ nnɔ mme idomo, emi idiɔk owo esinde ke esit mi man abiat emem mi onyuŋ anam ukut esim ukpɔŋ mi? Ntak emi ami nyatde esit ke ntak asua mi?

28 Demere, ukpɔŋ mi! Kusuhɔre uduk ke idiɔk-ŋkpɔ aba. Dara, O esit mi, ndien kunɔ asua ukpɔŋ mi ufaŋ aba.

29 Kuyat esit aba ke ntak mme asua mi. Kuyak odudu mi emem ke ntak mme ukut mi.

30 Dara, O esit mi, nnyuŋ seme nnɔ Jehovah, nnyuŋ dɔhɔ ete: O Jehovah, ami nyetoro fi ke nsinsi; iŋ, ukpɔŋ mi eyedara ke afo, Abasi mi, ye itiat erinyaŋa mi.

31 O Jehovah, ndi afo eyefak ukpɔŋ mi? Ndi afo eyenam mi mbɔhɔ ŋwɔrɔ ke mme ubɔk mme asua mi? Ndi afo eyenam mi ete nyek idem ke idiɔk-ŋkpɔ edide?

32 Yak eberi mme inua otop hell kpukpru ini ke iso mi, ke ntak emi esit mi ɔbuŋɔde ye spirit mi anuahade! O Jehovah, ndi afo uduberike mme inua otop edinen ido fo ke iso mi, man ami nsaŋa ke usuŋ usuhɔre itihede, man ami ntim nsaŋa ke eti usuŋ!

33 O Jehovah, ndi afo eyekanare mi okuk ke ɔfɔŋ edinen ido fo! O Jehovah, ndi afo eyenam usuŋ ɔnɔ ubɔhɔ mi ke iso mme asua mi! Ndi afo eyenam usuŋ mi enen ke iso mi! Ndi afo udunimke ŋkpɔ ntuaha nduɔ ke usuŋ mi—edi ete ke afo eyeneŋere usuŋ mi ke iso mi, ndien kusiri usuŋ mi, edi siri mme usuŋ asua mi.

34 O Jehovah, ami mmenyene idorenyin ke afo, ndien ami nyedori enyin ke afo ke nsinsi. Ami ndidorike enyin ke odudu obukidem; koro ami mmefiɔk nte ke esuŋi enyemi odoride enyin ke odudu obukidem. Iŋ, esuŋi enyemi odoride enyin ke owo mme anamde obukidem odudu esie.

35 Iŋ, ami mmɔfiɔk nte ke Abasi ɔyɔnɔ ke ntat ubɔk owo emi ebeŋede. Iŋ, Abasi mi ɔyɔnɔ mi, edieke mibeŋeke ke idiɔk; ke ntre ami nyemenede uyo mi nnɔ fi; iŋ, ami nyeseme nnɔ fi, Abasi mi, itiat edinen ido mi. Sese, uyo mi ke nsinsi ɔyɔdɔk ebine fi, itiat mi ye nsinsi Abasi mi. Amen.