1 Ndien esaŋ kiet ɔyɔwɔrɔ ke itak Jesse, ndien ŋkɔk ɔyɔkɔri ɔwɔrɔ ke mme oruŋ esie.

2 Ndien Spirit Jehovah oyodoro enye ke idem, spirit ifiɔk ye eti ibuot, spirit item ye odudu, sprit ifiɔk ye uteŋe Abasi;

3 Ndien eyenam enye enyene odu-uwem ifiɔk ke uteŋe Jehovah; ndien enye idibiereke ikpe ito se enyin esie okutde, inyuŋ isuaha inɔ ito se mme utɔŋ esie ekopde.

4 Edi ke nnen nnen ke enye edibiere ikpe inɔ ubuene, onyuŋ asua nte enende ɔnɔ suŋ-suŋ mbio ererimbot; onyuŋ amia ererimbot ye esaŋ inua esie, ndien ye ibifik mkpɔk-inua esie ke enye ediwot idiɔk owo.

5 Ndien nnen nnen ido eyedi ubɔp-ŋkpɔ isin esie, ndien akpanikɔ edi ubɔp-ŋkpɔ idem esie.

6 Wolf ŋko oyoduŋ ye eyen-erɔŋ, anawuri-ekpe ɔyɔsuhɔre ana ye eyen-ebot, eyen-enaŋ ye abak lion ye enaŋ ubom; ndien ekpri eyenɔwɔŋ ayada mmɔ usuŋ.

7 Ndien enaŋ ye bear ayata mbiet; nditɔ mmɔ eyesuhɔde ena kiet; ndien lion eyeta nnyanyaŋa nte enaŋ.

8 Ndien eyen-nsek eyebre mbre ke enyɔŋ odudu okuŋ, ndien eyen emi esiode ke eba oyodori ubɔk esie ke odudu ibɔm.

9 Mmɔ idinamke idiɔk inyuŋ isoboke ke kpukpru ndisana obot mi, koro ererimbot ɔyɔyɔhɔ ye ifiɔk Jehovah, nte mme mmɔŋ ofukde inyaŋ.

10 Ndien ke usen oro oruŋ Jesse oyodu, emi edidade nte banner inɔ mme owo; enye ke mme Gentile ediyom; ndien nduɔk odudu esie eyedi ediye.

11 Ndien eyedikem ke usen oro ete Jehovah ɔyɔtɔŋɔ ntak esin ubɔk esie afak nsuhɔ ikɔt esie emi edisuhɔde, ito Assyria, inyuŋ ito Egypt, inyuŋ ito Pathros, inyuŋ ito Cush, inyuŋ ito Elam, inyuŋ ito Shinar, inyuŋ ito Hamath, inyuŋ ito mme isuo inyaŋ.

12 Ndien enye eyemenede banner ke enyɔŋ ɔnɔ mme idut, onyuŋ ataŋ nditɔ Israel emi ekebinde efep obon, onyuŋ ataŋ obon kiet nditɔ Judah emi ekesuande oto ke edem isɔŋ mbinaŋ.

13 Ufup Ephraim ŋko eyetre, ndien eyesibe mme asua Judah esio; Ephraim idifubeke ufup ye Judah, ndien Judah idituhɔkede Ephraim.

14 Edi mmɔ eyefe ke afara mme Philistine eka edem usop-utin; mmɔ eyedi ebume nditɔ edem usiaha-utin; mmɔ eyedori ubɔk mmɔ ke idem Edom ye Moab; ndien nditɔ Ammon eyesuk ibuot enɔ mmɔ.

15 Ndien Jehovah oyosobo ofuri ofuri edeme inyaŋ Egypt; ndien ye ɔkpɔsɔŋ ofum esie enye oyofuŋ ubɔk esie ke enyɔŋ akpa, onyuŋ amia enye ke idim itiaba, onyuŋ anam mme owo esaŋa ebe ye nsat ikpa-ukot.

16 Ndien ɔkpɔ-usuŋ ayana ɔnɔ nsuhɔ ikɔt esie emi edisuhɔde, tɔŋɔ ke Assyria, nte eketiede ɔnɔ Israel ke eyo enye ɔkɔdɔkde ɔwɔrɔ ke isɔŋ Egypt.