1 Koro Jehovah eyenyene mbɔm ɔnɔ Jacob, ndien ɔtɔŋɔ ntak emek Israel, onyuŋ enim mmɔ ke isɔŋ mmɔ; ndien eyedian isenowo ye mmɔ, ndien mmɔ eyeyire ye ufɔk Jacob.

2 Ndien mbio-obio eyemum mmɔ enyuŋ eda mmɔ eka ke ebiet mmɔ; iŋ, eto anyan ebiet tutu ke utit ererimbot; ndien mmɔ eyenyɔŋ eka mme isɔŋ eŋwɔŋɔ mmɔ. Ndien ufɔk Israel ayada mmɔ enyene, ndien isɔŋ Jehovah eyedi eke ifin iren ye ifin iban; ndien mmɔ eyeda nte mme owo ŋkpɔkɔbi mmɔ emi ekedade mmɔ nte mme owo ŋkpɔkɔbi; ndien mmɔ eyekara mmɔ emi eketukde mmɔ.

3 Ndien eyedikem ke usen oro ete ke Jehovah eyenɔ fi nduɔk odudu, kabaŋa mfuhɔ fo, ye ndik fo, ye ɔkpɔsɔŋ ufin emi akanamde fi anam utom.

4 Ndien eyedikem ke usen oro, ete ke afo eyetiŋ nke emi ye edidem Babylon, onyuŋ ɔdɔhɔ ete: Didie ke andituhɔre oro etre, obio gold etre!

5 Jehovah obuŋ esaŋ idiɔk owo, mme mmɔnyɔ mbɔŋ.

6 Enye emi akamiade mme owo ye iyaresit ke ikpa emi mitreke, enye emi akarade mme idut ke iyaresit, ekɔbɔ enye, ndien owo ndomo kiet ikpanke.

7 Ofuri ererimbot odu ke emem, onyuŋ odobo; mmɔ etɔŋɔ ndikwɔ ikwɔ.

8 Iŋ, mme eto cypress edaresit ebaŋa fi, ŋko ye mme cedar Lebanon, ete: Sia ekpide fi enim ke isɔŋ owo ndomo kiet emi ekpide idihe itiene nnyin.

9 Hell ke idak etimede abaŋa fi ndisobo ye afo ke ini edidi fo; enye edemede mbukpo ɔnɔ fi, kpa kpukpru mme ada ibuot ererimbot; enye anam ndidem mme idut edaha eda ke ebekpo mmɔ.

10 Kpukpru mmɔ eyetiŋ enyuŋ edɔhɔ fi ete: Afo ŋko amakabade emem nte nnyin? Afo amakabade etie nte nnyin?

11 Eda ubɔŋ esuhɔre edi ke udi; owo ikopke uyom mme viol fo; esuan ndɔŋ ke idak fo, ndien mme ndɔŋ efuk fi.

12 Afo anam didie ɔduɔ oto ke heaven, O Lucifer, eyen usiere! Emekpi fi eduɔk ke isɔŋ, afo emi akanamde mme idut emem!

13 Koro afo ama ɔdɔhɔ ke esit fo ete: Ami nyɔdɔk nduk heaven, ami nyemenede ebekpo mi ŋkan mme ntantafiɔŋ Abasi; ami ŋko nyetie ke obot emi esopde esop, ke mme edem edere-edere.

14 Ami nyɔdɔk ŋkan mme ŋkoŋkoŋ enyɔŋ; ami nyetie nte Ata Edikoŋ.

15 Edi eyesuhɔde fi esin ke hell, tutu esim edem obube.

16 Mmɔ emi edikutde fi eyewuk enyin ese fi, ndien eyetim ekere fi, ndien eyedɔhɔ ete: Nte emi edi owo emi akanamde ererimbot etimede, emi ekenyeŋede mme idut?

17 Onyuŋ anamde ererimbot edi ikɔt, onyuŋ osobode mme obio esie, inyuŋ iberekede ufɔk iyak mbon ŋkpɔkɔbi esie enyɔŋ?

18 Kpukpru ndidem mme idut, iŋ, kpukpru mmɔ, ena ke ubɔŋ, kpukpru mmɔ kiet kiet ke ufɔk esie.

19 Edi ebin fi esio ke udi fo nte mbubiam ŋkɔk, ndien nsuhɔ mmɔ emi ekewotde, ekim ye ofut, emi esuhɔrede esim mme itiat obube; nte okpo emi edigide ke ikpat.

20 Afo ududianake ye mmɔ ke ubuk okpo, ke ntak emi afo osobode isɔŋ fo onyuŋ owotde ikɔt fo; ubon mme anam idiɔk idiwɔrɔke etop ke nsinsi.

21 Etim mkpa afai enɔ nditɔ esie ke ntak mme ukwaŋ-ŋkpɔ mme ete mmɔ, man mmɔ ekudaha-eda, enyuŋ enyene isɔŋ, enyuŋ eyɔhɔ iso ererimbot ye mme obio.

22 Koro ami nyadaha nda ŋwana ye mmɔ, Jehovah mme Udim ɔdɔhɔ, nyuŋ nsibe nsio ke Babylon enyiŋ, ye nsuhɔ, ye eyen, ye eyen eyeneka, Jehovah ɔdɔhɔ.

23 Ami ŋko nyanam enye edi se ebiɔŋ adade enyene, ye mme mkpɔdiɔhɔ-mmɔŋ; ndien ami nyekpɔri enye ye ayaŋ nsobo, Jehovah mme Udim ɔdɔhɔ.

24 Jehovah mme Udim otomo, ete: Ke akpanikɔ nte ami ŋkekerede, kpa ntre ke editibe; ndien nte ami ŋkaduakde, kpa ntre ke edisu—

25 Koro ami nyada Asshur ndi ke isɔŋ mi, ndien ke mme obot mi ke ndidigi enye ke idak ikpat; ndien ɔkpɔnɔ esie ayadaha ɔkpɔŋ mmɔ, ndien mbiomo esie adaha ɔkpɔŋ afara mmɔ.

26 Emi edi uduak emi ekeduakde ebaŋa ofuri ererimbot; ndien emi edi ubɔk emi enyanarede enɔ kpukpru mme idut.

27 Koro Jehovah mme Udim ama aduak, ndien anie edinam okpu? Ndien ubɔk esie anyanade, anie edinyuŋ inam enye afiak edem?

28 Ke isua emi edidem Ahaz ekekpade ke eketiŋ uyo Abasi emi.

29 Mbufo ekudat esit, ofuri Philistia, sia eto owo emi akamiade mbufo ɔbuŋɔde; koro ke oruŋ uruk-ikɔt ke ibɔm edito iwɔrɔ, ndien mfri esie eyedi edisak uruk-ikɔt eke efede.

30 Ndien akpa eyen mme ubuene eyedia, ndien mbon unana eyena ke isɔŋ ke emem; ndien ami nyowot oruŋ fo ye akaŋ, ndien enye oyowot nsuhɔ fo.

31 Tua, O inua otop; seme, O obio; afo, ofuri Philistia, amatara; koro nsuŋikaŋ oyoto edere edi, ndien owo ndomo kiet ididaha ikpɔŋ ke mme ini enye enimde.

32 Nso ndien ke edibɔrɔ mme isuŋutom mme idut? Ete ke Jehovah ama asiak Zion, ndien mme ubuene ikɔt esie eyebuɔt idem ke enye.