1 Ndien edikem ete edidem Lamoni anam ete nditɔ ufɔk esie eda enyuŋ etie ntiense ebaŋa kpukpru ŋkpɔ emi mmɔ ekekutde kabaŋade ŋkpɔ oro.

2 Ndien kini kpukpru mmɔ ema eketie ntiense ebaŋa mme ŋkpɔ emi mmɔ ekekutde, ndien enye enyene ifiɔk abaŋa ntiŋ-enyin Ammon ke nditim mme ufene esie nnim, ŋko ye akwa odudu esie ke ndiŋwana ye mbon emi ekeyomde ndiwot enye, idem ama akpa enye eti eti, ndien enye ɔdɔhɔ ete: Ke akpanikɔ, emi akan erenowo. Sese, ndi emi idihe Akwa Spirit emi ɔdɔŋde mme utɔ ɔkpɔsɔŋ ufen ɔnɔ mbon emi, ke ntak uwot owo mmɔ?

3 Ndien mmɔ ebɔrɔ edidem, enyuŋ edɔhɔ ete: Mme enye edi Akwa Spirit mme erenowo, nnyin ifiɔkke; edi emi nnyin imifiɔk, ite ke mme asua edidem ikemeke ndiwot enye; ŋko ke mmɔ ikemeke ndisuan mme ufene edidem kini enye odude ye nnyin, ke ntak ukeme ye akwa odudu esie; ke ntak oro, nnyin imifiɔk ite ke enye edi ufan edidem. Ndien idahaemi, nnyin ikereke ite ke owo enyene utɔ akwa odudu oro, koro nnyin imifiɔk ke owo ikemeke ndiwot enye.

4 Ndien idahaemi, kini edidem okopde mme ikɔ emi, enye ɔdɔhɔ mmɔ ete: Idahaemi ami mɔfiɔk ke enye edi Akwa Spirit oro; ndien ke enye ɔsuhɔre edi kini emi nditim uwem mbufo nnim, man ami ŋkuwot mbufo nte ŋkowotde nditɔ eka mbufo. Idahaemi emi edi Akwa Spirit emi mme ete nnyin eketiŋde ebaŋa.

5 Idahaemi emi ekedi ido Lamoni, emi enye ɔkɔbɔde oto ete esie, ete ke Akwa Spirit amadu. Ke misehe mme mmɔ ema ebuɔtidem ke Akwa Spirit, mmɔ ema ekere ete ke se ekpededi emi mmɔ ekenamde ekedi nnen nnen; edi, Lamoni ɔtɔŋɔ ndifehe ndik ata eti eti, ye ndik ete ke enye ama anam idiɔk ke ndiwot nditɔ ufɔk esie;

6 Koro enye ama owot ediwak mmɔ ke ntak emi nditɔ eka mmɔ ekesuande mme ufene mmɔ ke ebiet mmɔŋ; ndien ke ntem, ke ntak emi ekesuandasuan mme ufene mmɔ ema ewot mmɔ.

7 Idahaemi ekedi ido mme Lamanite emi ndida ke mme mmɔŋ Sebus man esuan mme ufene owo, man oto do mmɔ ebin ediwak emi esuanade edɔŋ ke isɔŋ mmɔ, emi ekedi ido nkan ubɔk ke otu mmɔ.

8 Ndien edikem ete edidem Lamoni obup nditɔ ufɔk esie, ete: Enye owo emi emi enyenede utɔ akwa odudu emi?

9 Ndien mmɔ edɔhɔ enye ete: Sese, enye kɔnɔ mme enaŋmbakara fo udia. Idahaemi edidem ama ɔnɔ nditɔ ufɔk esie uyo, mbemiso ini emi mmɔ ekenɔde mme ufene mmɔŋ, ete mmɔ ebeŋe mme enaŋmbakara ye mme chariot esie idem, man eda enye eka isɔŋ Nephi; koro akamba usɔrɔ amadu ke isɔŋ Nephi, emi ete Lamoni ekenimde, emi ekedide edidem ke ofuri isɔŋ oro.

10 Idahaemi kini Lamoni okokopde ete ke Ammon kebeŋe mme enaŋmbakara ye mme chariot esie idem idem ama etim akpa enye, ke ntak ntiŋenyin Ammon, ete: Ke akpanikɔ eyen ufɔk ndomo kiet iduhe ke otu kpukpru nditɔ ufɔk mi emi etiŋde enyin nte erenowo emi; koro enye eti kpukpru ibet mi ndinam mmɔ.

11 Idahaemi ke akpanikɔ ami mɔfiɔk nte ke emi edi Akwa Spirit, ndien ami menyene udɔŋ nte enye ediduk mi idem, edi ami nyeneke uko.

12 Ndien edikem ete kini Ammon ama akanam mme enaŋmbakara ye mme chariot ebeŋe idem ɔnɔ edidem ye nditɔ ufɔk esie, enye oduk ebine edidem, ndien enye okut ete ke iso edidem ama ɔkpuhɔre; ke ntak oro enye ama oyom ndiwɔrɔ ŋkpɔŋ iso edidem.

13 Ndien eyen ufɔk edidem kiet ɔdɔhɔ enye ete, Rabbanah, emi edide, ke ekabarede, enyene odudu mme akwa edidem, ke ekerede edidem mmɔ nte enyenede odudu; ndien ke ntem enye edɔhɔ enye ete: Rabbanah, edidem oyom ete afo ebet.

14 Ke ntak oro Ammon ɔŋwɔŋɔde idem esie ɔnɔ edidem, onyuŋ ɔdɔhɔ enye ete: Nso ke afo oyom mi nnam nnɔ fi, O edidem? Ndien edidem ikibɔrɔke enye ke ufaŋ hour kiet, nte asaŋade ye ini mmɔ, koro enye ikifiɔkke se anade nte enye ɔbɔrɔ enye.

15 Ndien edikem ete Ammon afiak ɔdɔhɔ enye ete: Nso ke afo oyom oto mi? Edi edidem ikibɔrɔke enye.

16 Ndien edikem ete Ammon, ke ɔyɔhɔde ye Spirit Abasi, ke ntak oro enye ɔfiɔk mme ekikere edidem. Ndien enye ɔdɔhɔ enye ete: Ndi edi koro afo omokop ke ami mma mkpeme nditɔ ufɔk fo ye mme ufene fo, nyuŋ ŋwot nditɔ eka mmɔ itiaba ye ikaŋ ɔkpɔ ye akaŋkaŋ, nyuŋ nsibe ubɔk mbon eken nsio, man mkpeme mme ufene fo ye nditɔ ufɔk fo; sese, ndi edi emi anam idem akpa fi?

17 Ami ndɔhɔ fi, mme nso idi ntak, emi mme mkpaidem fo okponde ntem? Sese, ami ndi erenowo, ndien ami ndi eyen ufɔk fo; ke ntak oro, ŋkpɔ ekededi emi afo oyomde emi edide nnen nnen, oro ke ami ndinam.

18 Idahaemi kini edidem ama okokop mme ikɔ emi, idem afiak akpa enye, koro enye okut ete ke Ammon ekeme ndifiɔk mme ekikere esie; edi ke misehe emi, edidem Lamoni ama ɔkubɔre inua esie, onyuŋ ɔdɔhɔ enye ete: Afo edi anie owo? Ndi afo edi Akwa Spirit oro, emi ɔfiɔkde kpukpru ŋkpɔ?

19 Ammon ɔbɔrɔ onyuŋ ɔdɔhɔ enye ete: Idihe ami.

20 Ndien edidem ɔdɔhɔ ete: Afo anam didie ɔfiɔk mme ekikere esit mi? Afo emekeme nditiŋ ikɔ uko uko, ndien tiŋ nnɔ mi kabaŋade mme ŋkpɔ emi; ndien ŋko dɔhɔ mi mme nso odudu ke afo akada owot onyuŋ esibe ubɔk nditɔ eka mi osio emi ekesuande mme ufene mi—

21 Ndien idahaemi, edieke afo editiŋde ikɔ inɔ mi kabaŋade mme ŋkpɔ emi, ŋkpɔ ekededi emi afo oyomde ami nyɔnɔ fi; ndien edieke oyomde, ami nyekpeme fi ye mbon ekɔŋ mi; edi ami mɔfiɔk ke afo emenyene odudu akan kpukpru mmɔ; edi, ŋkpɔ ekededi emi afo oyomde oto mi ami nyɔnɔ fi.

22 Idahaemi Ammon sia ɔfiɔkde nkari, edi inamke ibak, enye ɔdɔhɔ Lamoni ete: Ndi afo ayakpaŋ utɔŋ ɔnɔ mme ikɔ mi, edieke ntiŋde nnɔ fi odudu emi ami ndade nnam mme ŋkpɔ emi? Ndien emi edi ŋkpɔ emi ami nyomde nto fi.

23 Ndien edidem ɔbɔrɔ enye, onyuŋ ɔdɔhɔ ete: Iŋ, ami nyebuɔt idem ke kpukpru ikɔ fo. Ndien ke ntem ke ekemum enye ye ŋkari.

24 Ndien Ammon ɔtɔŋɔ nditiŋ ikɔ nnɔ enye uko uko, onyuŋ ɔdɔhɔ enye ete: Ndi afo ɔmɔbuɔtidem ete ke Abasi odu?

25 Ndien enye ɔbɔrɔ, onyuŋ ɔdɔhɔ enye ete: Ami mfiɔkke se oro ɔwɔrɔde.

26 Ndien Ammon ɔdɔhɔ ete: Ndi afo ɔmɔbuɔtidem ete ke Akwa Spirit odu?

27 Ndien enye ɔdɔhɔ ete, Iŋ.

28 Ndien Ammon ɔdɔhɔ ete: Emi edi Abasi. Ndien Ammon afiak ɔdɔhɔ enye ete: Ndi afo ɔmɔbuɔtidem ete ke Akwa Spirit emi, emi edide Abasi, okobot kpukpru ŋkpɔ emi edude ke heaven ye ke ererimbot?

29 Ndien enye ɔdɔhɔ ete: Iŋ, ami mɔbuɔtidem nte ke enye okobot kpukpru ŋkpɔ emi edude ke ererimbot; edi ami mfiɔkke mme heaven.

30 Ndien Ammon ɔdɔhɔ enye ete: mme heaven edi ebiet emi Abasi oduŋde ye kpukpru ndisana angel esie.

31 Ndien edidem Lamoni ɔdɔhɔ ete: Ndi enye odu ke enyɔŋ isɔŋ?

32 Ndien Ammon ɔdɔhɔ ete: Iŋ, ndien enye osuk enyin ese kpukpru nditɔ owo; ndien enye ɔfiɔk kpukpru ekikere ye mme uduak esit; koro ke ubɔk esie ke ekebot kpukpru mmɔ tɔŋɔ ke eritɔŋ.

33 Ndien edidem Lamoni ɔdɔhɔ ete: Ami mɔbuɔtidem ke kpukpru mme ŋkpɔ emi emi afo etiŋde. Ndi edɔŋ fi eto Abasi?

34 Ammon ɔdɔhɔ enye ete: Ami ndi erenowo; ndien ekebot owo ke eritɔŋɔ ke mbiet Abasi, ndien edi Edisana Spirit esie okot mi ete mkpep mme owo emi mme ŋkpɔ emi, man eda mmɔ edi ke ifiɔk enye emi edide edinen ye akpanikɔ;

35 Ndien ubak Spirit oro odu mi ke idem, emi ɔnɔde mi ifiɔk, ndien ye odudu nte mbuɔtidem mi edide ye mme udɔŋ emi odude ke Abasi.

36 Idahaemi kini Ammon amaketiŋ mme ikɔ emi, enye ɔtɔŋɔ ke eribot ererimbot, ŋko ye eribot Adam, onyuŋ ɔdɔhɔ enye kpukpru ŋkpɔ abaŋade iduɔ owo, onyuŋ etiŋ onyuŋ enim ke iso esie mme ŋwed ye mme edisana ŋwed Abasi eke mme owo, emi mme prophet eketiŋde ebaŋa, tutu esim ini emi ete mmɔ, Lehi, ɔkɔkpɔŋde Jerusalem.

37 Ndien enye ŋko etiŋ ɔnɔ mmɔ (koro eketiŋ ɔnɔ edidem ye nditɔ ufɔk esie) kpukpru mme isaŋ mme ete mmɔ ke wilderness, ye kpukpru ufen mmɔ ye biɔŋ ye nsat itɔŋ, ye ukut mmɔ, ye mme efen ntre.

38 Ndien enye ŋko etiŋ ɔnɔ mmɔ abaŋa mme nsɔŋ ibuot Laman ye Lemuel, ye nditɔ iren Ishmael, iŋ, kpukpru nsɔŋ ibuot mmɔ ke enye eketiŋ ɔnɔ mmɔ; ndien enye ama anam kpukpru mme ŋwed aŋwaŋa mmɔ ye mme ŋwed Abasi tɔŋɔ ke ini emi Lehi ɔkɔkpɔŋde Jerusalem tutu esim idahaemi.

39 Edi emi idihe kpukpru; koro enye ama anam uduak erifak aŋwaŋa mmɔ, emi ekenimde tɔŋɔ ke eritɔŋɔ ererimbot; ndien enye ŋko ama anam mmɔ efiɔk ebaŋa edidi Christ, ye kpukpru utom Jehovah ke enye akanam mmɔ efiɔk.

40 Ndien edikem ete kini enye amaketiŋ kpukpru mme ŋkpɔ emi, onyuŋ anam mmɔ eŋwaŋa edidem, ete ke edidem ɔbuɔtidem ke kpukpru mme ikɔ esie.

41 Ndien enye ɔtɔŋɔ ndiseme nnɔ Jehovah, ete: O Jehovah, tua mbɔm; nte asaŋade ye uwak mbɔm fo emi afo ekenyenede ɔnɔ ikɔt Nephi, nyene nnɔ mi, ye ikɔt mi.

42 Ndien idahaemi, kini enye amaketiŋ emi, enye ɔduɔ ke isɔŋ, nte enye ama akpa.

43 Ndien edikem ete nditɔ ufɔk esie emum enye enyuŋ emen enye eduk esɔk ŋwan esie, enyuŋ enim enye ke ŋkpɔ nna; ndien enye ana nte enye ama akpa ke ufaŋ usen iba ye okoneyo iba; ndien ŋwan esie, ye nditɔ iren esie, ye nditɔ iban esie efuhɔ enye, ke ukem usuŋ nte mme Lamanite, etim eseme mkpa esie.