1 Idahaemi emi edi mme ikɔ emi Amulek ɔkɔkwɔrɔde ɔnɔ mme owo emi ekedude ke isɔŋ Ammonihah, ete:

2 Ami ndi Amulek; ami ndi eyen Giddonah, emi ekedide eyen Ishmael, emi okotode ubon Aminadi; ndien ekedi kpa Aminadi oro akakabare se ekewetde emi okodude ke ibibene temple, emi nnuenubɔk Abasi ekewetde.

3 Ndien Aminadi ekedi eke ubon Nephi, emi ekedide eyen Lehi, emi ɔkɔwɔrɔde edi ke isɔŋ Jerusalem, emi ekedide eke ubon Manasseh, emi ekedide eyen Joseph emi ekenyamde esin ke Egypt ke ubɔk nditɔ eka esie.

4 Ndien sese, ami ŋko ndighe ekpiri owo ke ufɔt kpukpru mbon emi efiɔkde mi; iŋ, ndien sese, ami menyene ediwak iman ye mme ufan, ndien ami ŋko menyene ediwak inyene nto ubɔk utom mi.

5 Edi, ke esiode kpukpru emi efep, ami nkɔfiɔkke ediwak mbaŋa mme usuŋ Jehovah, ye mme ndedibe ŋkpɔ ye utibe odudu esie. Ami ndɔhɔ ke ami nkɔfiɔkke ediwak mme ŋkpɔ emi; edi sese, ami medue, koro ami mokut ediwak ndedibe ŋkpɔ esie ye utibe odudu esie; iŋ, kpa ke nditim uwem mbon emi nnim.

6 Edi, ami mma nsɔŋ esit mi, koro ema ekot mi ediwak ini ndien ami nkamaha ndikop; ke ntak oro ami mma mfiɔk mbaŋa mme ŋkpɔ emi, edi ami nkamaha ndifiɔk; ke ntak oro ami nka iso ŋwana ye Abasi, ke ibak esit mi, kpa tutu ɔyɔhɔ usen inan ke ɔfiɔŋ itiaba emi, emi edide ke ɔyɔhɔ isua ukara duop mme ebiere ikpe.

7 Nte ami nkakade ndise ata mkpere iman, sese angel Jehovah ɔbiɔŋɔde ɔnɔ mi onyuŋ ɔdɔhɔ ete: Amulek, fiak nyɔŋ ufɔk fo, koro afo ɔyɔnɔ prophet Jehovah udia; iŋ, edisana owo, emi edide owo emi Abasi emekde; koro enye etre udia ke ediwak usen ke ntak mme idiɔk ŋkpɔ mbon emi, ndien biɔŋ ɔdɔŋ enye, ndien afo ayada enye esin ke ufɔk fo onyuŋ ɔnɔ enye udia, ndien enye ɔyɔdiɔŋ fi ye ufɔk fo; ndien edidiɔŋ Jehovah oyodu ye afo ye ufɔk fo.

8 Ndien edikem ete ami nsuk ibuot nnɔ uyo angel, nyuŋ mfiak nyɔŋ ufɔk mi. Ndien nte ami nkakade ebiet oro ami nkut owo emi angel ɔkɔdɔhɔde mi abaŋa ete: Afo eye ada enye esin ke ufɔk fo—ndien sese ekedi kpa ukem owo emi emi ekesitiŋde ikɔ ɔnɔ mbufo abaŋa mme ŋkpɔ Abasi.

9 Ndien angel oro ɔdɔhɔ mi ke enye edi edisana owo; ke ntre ami mɔfiɔk ke enye edi edisana owo ke ntak emi edide angel Abasi eketiŋ.

10 Ndien ŋko, ami mɔfiɔk ke mme ŋkpɔ emi enye eketiede ntiense abaŋa edi akpanikɔ; koro ami ndɔhɔ mbufo, nte ke adaŋa nte Jehovah odude uwem, kpa ntre ke enye ɔdɔŋ angel esie ete ediyarare mme ŋkpɔ emi ɔnɔ mi; ndien emi enye anam ke ini Alma emi okoduŋde ke ufɔk mi.

11 Koro sese, enye ɔdiɔŋ ufɔk mi, enye ɔdiɔŋ mi, ye iban mi, ye nditɔ mi, ye ete mi ye oruk mi; iŋ, kpa kpukpru iman mi ke enye ɔdiɔŋ, ndien edidiɔŋ Jehovah odu ye nnyin nte asaŋade ye mme ikɔ emi enye eketiŋde.

12 Ndien idahaemi, ke ini Amulek ama eketiŋ mme ikɔ emi idem ɔtɔŋɔ ndikpa mme owo, ke ekutde ete ke ntiense ama awak akan kiet emi eketiede ntiense ebaŋa mme ŋkpɔ emi eketiŋde edian mmɔ, ŋko ye mme ŋkpɔ emi akanade nte edi, nte asaŋade ye sprit prophecy emi okodude mmɔ ke idem.

13 Edi, usuk ema edu ke otu mmɔ emi ekekerede ndibup mmɔ mbume, man oto ke mme ŋkari edinam mmɔ mmɔ ekan emum mmɔ ke mme ikɔ mmɔ, man mmɔ enyene ntiense ebaŋa mmɔ, man mmɔ eyak mmɔ enɔ mme ebiere ikpe mmɔ man edikpe ikpe enɔ mmɔ nte asaŋade ye mbet, ŋko man ewot mmɔ mme esin mmɔ ke ufɔk ŋkpɔkɔbi, nte asaŋade ye idiɔk ŋkpɔ emi mmɔ ekande enam etie nte mme etie ntiense ebaŋa mmɔ.

14 Idahaemi ekedi mme owo emi ekeyom ndiwot mmɔ, emi ekedide mme ɔfiɔk mbet, emi mme owo ekekpede mme ekemekde ete enɔ mbet ke mme ini ikpe mmɔ, mme ke mme ikpe idiɔk ŋkpɔ nnɔ mme owo ke iso mme ebiere ikpe.

15 Idahaemi mme ɔfiɔk ibet emi ema enyene ifiɔk ke kpukpru ɔniɔŋ ye ŋkari mme owo; ndien emi ekedi ndiŋwam ete mmɔ ekeme etim enam utom mmɔ.

16 Ndien edikem ete mmɔ etɔŋɔ ndibup Amulek mbume, man oto do mmɔ enam enye anam ndudue ke mme ikɔ esie, mme mme ikɔ esie emi enye etiŋde ɔnɔ mmɔ ekusaŋa kiet.

17 Idahaemi mmɔ ikifiɔkke ke Amulek ekeme ndifiɔk mme uduak mmɔ. Edi edikem nte mmɔ etɔŋɔde ndibup enye mbume, enye ɔfiɔk mme ekikere mmɔ, onyuŋ ɔdɔhɔ mmɔ ete: O mbufo idiɔk ye ukwaŋ emana, mbufo mme ɔfiɔk mbet ye mbon mbubik, koro mbufo enim mme itiat idak isɔŋ satan; koro mbufo enim mme afia ye mme mfine ndimum ndisana owo Abasi.

18 Mbufo enim mme uduak man ekwaŋa mme usuŋ nnen nnen owo, ye ndimen iyaresit Abasi nsuhɔre ndori ke ibuot mbufo, tutu esobo mbon emi ofuri ofuri.

19 Iŋ, nnen nnen ke Mosiah eketiŋ, emi ekedide akpatre edidem nnyin, ke ini enye okoyomde ndiyak ukara, ke mikinyeneke owo ndinɔ, enyeanam ete ekara mme owo ke uyo mmɔ—iŋ, nnen nnen ke enye eketiŋ ete edieke ini edidide ete uyo mbon emi emek ukwaŋ-ŋkpɔ, oro edi, edieke ini edidide ete mbon emi eduɔ eduk ke ndudue, mmɔ eyetim idem enɔ nsobo.

20 Ndien idahaemi ami ndɔhɔ mbufo nte ke nnen nnen ke Jehovah ebiere ikpe ɔnɔ ukwaŋ-ŋkpɔ mbufo; nnen nnen ke enye eseme ɔnɔ mbon emi, ke uyo mme angel esie ete: Mbufo ekabare esit, ekabare esit, koro obio ubɔŋ heaven ke ekpere.

21 Iŋ, nnen nnen ke enye eseme, ke uyo mme angel esie ete: Ami nyɔsuhɔre ndi ke ufɔt ikɔt mi, ye unen ye nnen nnen ke mme ubɔk mi.

22 Iŋ, ndien ami ndɔhɔ mbufo nte ke ekpedi ikidihe mme akam ndinen owo, emi edude idahaemi ke isɔŋ, ete ke ekpedise mbufo idahaemi ofuri ofuri ye nsobo; edi ikpidihe ye mmɔŋ, nte ekedide ye mme owo ke eyo Noah, edi ekpedi ke akaŋ, ye ke udɔŋɔ, ye ke ofut.

23 Edi, edi ke mme akam ndinen owo ke enyaŋa mbufo; idahaemi ke ntak oro, edieke mbufo edibinde ndinen owo isio ke ufɔt mbufo ndien idaha oro ke Jehovah midifepke ubɔk esie; edi ke ufiop iyaresit esie ke enye edidi ibine mbufo; ndien eyemia mbufo ye akaŋ, ye ke udɔŋɔ, ye ke ofut; ndien ini ke ɔsɔp ekpere ibɔhɔke mbufo ekabare esit.

24 Ndien idahaemi edikem ete mme owo eyaresit ekan akpa ye Amulek, ndien mmɔ efiori, ete: Owo emi osuŋi mbet nnyin emi edide edinen, ye mme ɔfiɔk ŋkpɔ ɔfiɔk ibet nnyin emi nnyin imekde.

25 Edi Amulek anyanare ubɔk esie, onyuŋ ofiori akan akpa ɔnɔ mmɔ, ete: O mbufo idiɔk ye ukwaŋ emana, ntak emi Satan enyenede akwa odudu ke esit mbufo? Ntak emi mbufo eyakde idem mbufo enɔ enye man enye enyene odudu ke idem mbufo, ndinam enyin mbufo edi nnan, man mbufo ekufiɔk mme ikɔ emi etiŋde, nte asaŋade ye akpanikɔ mmɔ.

26 Koro sese, ndi ami metie ntiense mbiat mbet mbufo? Iŋwaŋake mbufo; mbufo edɔhɔ ke ami metiŋ ikɔ mbiat mbet mbufo; edi ami ntiŋke, edi ami ntiŋ ikɔ ke ufɔn mbet mbufo, ndibiom mbufo ikpe.

27 Ndien idahaemi sese, ami ndɔhɔ mbufo, nte ke mme ɔfiɔk mbet mbufo ye mme ebiere ikpe mbufo etɔŋɔ ndinim itiat idak isɔŋ nsobo mbon emi.

28 Ndien idahaemi ke ini Amulek ama eketiŋ mme ikɔ emi mme owo efiori mkpo ye enye, ete: Idahaemi nnyin imifiɔk ke owo emi edi eyen satan, koro enye osu nsu ɔnɔ nnyin; koro enye ama etiŋ ikɔ abiat mbet nnyin. Ndien idahaemi enye ɔdɔhɔ ke enye itiŋke ikɔ ibiat enye.

29 Ndien ŋko, enye osuŋi mme ɔfiɔk mbet nnyin, ye mme ebiere ikpe nnyin.

30 Ndien edikem ete mme ɔfiɔk mbet esin enye ke esit mmɔ man mmɔ eti mme ŋkpɔ emi ebaŋa enye.

31 Ndien kiet ama odu ke otu mmɔ emi enyiŋ esie ekedide Zeezrom. Idahaemi enye akada iso ke ndidori Amulek ye Alma ikɔ, ke enye ekedide kiet ke otu mme ɔfiɔk ŋkpɔ nkan ke otu mmɔ, ke ekenyenede ediwak mbubehe ndinam ke otu mme owo.

32 Idahaemi uduak mme ɔfiɔk mbet emi ekedi ndinyene udori, ndien mmo ema enyene udori nte asaŋade ye utom mmɔ.