1 Ndien ŋko, ami, Alma, ke mma nkɔbɔ uyo nto Abasi ete yak ami nda Amulek nyuŋ nka nkafiak ŋkwɔrɔ ikɔ nnɔ mbon emi, mme mme owo emi ekedude ke obio Ammonihah, edikem ke ami mma nkɔtɔŋɔ ndikwɔrɔ ikɔ nnɔ mmɔ, mmɔ etɔŋɔ ndineni eneni ye ami, ete:

2 Afo edi anie? Afo ekere ete ke nnyin iyinim ke akpanikɔ ikɔ ntiense owo kiet, okposuk edi ke enye ɔkwɔrɔ ɔnɔ nnyin ete ke ererimbot eyebe efep?

3 Idahaemi mmɔ ikifiɔke mme ikɔ emi mmɔ eketiŋde; koro mmɔ ikɔfiɔke ete ke ana ererimbot ebe efep.

4 Ndien mmɔ edɔhɔ ŋko ete: Nnyin idinimke ke akpanikɔ mme ikɔ fo edieke afo etiŋde nte prophet ete ke ana esobo akwa obio emi.

5 Idahaemi mmɔ ikɔfiɔke ete ke Abasi ekeme ndinam mme utɔ utibe ŋkpɔ oro, koro mmɔ ekedi mme ɔsɔŋ esit ye mbon nsɔŋ-ibuot.

6 Ndien mmɔ edɔhɔ ete: Anie edi Abasi, emi ɔnɔde unen ke owo kiet ikpɔŋ ke ufɔt mbon emi, ete ɔkwɔrɔ akpanikɔ ɔnɔ mmɔ abaŋa utɔ akwa ye mme utibe ŋkpɔ emi?

7 Ndien mmɔ eda ndimum mi; edi sese, mmɔ ikikemeke. Ndien ami nda uko uko ŋkwɔrɔ nnɔ mmɔ, iŋ, ami mma ntie ntiense uko uko nnɔ mmɔ, nte:

8 Sese, O mbufo idiɔk ye ukwaŋ emana, didie ke mbufo efre ido mme ete mbufo; iŋ, didie ke mbufo esɔp efre mme ibet Abasi.

9 Ndi nte mbufo itihi ite ke ete nnyin, Lehi, ke edi ubɔk Abasi akada enye ɔwɔrɔ ke Jerusalem? Ndi mbufo itihi ite ke edi enye akada kpukpru mmɔ ebe ke wilderness?

10 Ndien mbufo emesɔp efre ini ifaŋ emi enye akanamde mme ete nnyin ebɔhɔ ke ubɔk mme asua mmɔ, onyuŋ etim mmɔ enim osio ke mkpa, tutu ke ubɔk nditɔ eka mmɔ?

11 Iŋ, ndien mikidighe ke ntak anana mbiet odudu esie, ye mbɔm esie, ye anyan ime esie ke abaŋa nnyin, ekpe ekesibe nnyin esio ke iso isɔŋ ke anyan mbemiso idaha ini emi, ndien mikpemeke ekpesin ke itie anana utit ukut ye idiɔk.

12 Sese, idahaemi nte ami ndɔhɔde mbufo nte ke enye ɔnɔ mbufo uyo ete ekabare esit; ndien ibɔhɔke mbufo ekabare esit, mbufo ikemeke ndida obio ubɔŋ Abasi nnyene. Edi sese, emi idighe kpukpru—enye ɔnɔ mbufo uyo ete ekabare esit, midighe ntre enye oyowot mbufo ofuri ofuri osio ke iso isɔŋ; iŋ, enye eyedise mbufo ke iyaresit esie, ndien ke ufiop iyaresit esie enye idifiakke edem.

13 Sese, ndi mbufo itihi mme ikɔ emi enye eketiŋde ɔnɔ Lehi, ete ke: Adaŋa nte mbufo edinimde mme ibet mi, mbufo eyeforo ke isɔŋ? Ndien ŋko edɔhɔ ete: Adaŋa nte mbufo midinimke mme ibet mi eyesibe mbufo esio ke iso Jehovah.

14 Idahaemi ami nyom yak mbufo eti, ete ke adaŋa nte mme Lamanite minimke mme ibet Abasi, esibe mmɔ esio ke iso Jehovah. Idahaemi nnyin imikut ite ke esɔŋɔ ikɔ Jehovah ke abaŋa ŋkpɔ emi, ndien ke esibe mme Lamanite esio ke iso esie, tɔŋɔ ke eritɔŋɔ mme ndudue mmɔ ke isɔŋ.

15 Edi ami ndɔhɔ mbufo, nte ke ɔyɔfɔn ɔnɔ mmɔ ke usen ubiere ikpe akan mbufo, edieke mbufo ekade iso edu ke mme idiɔk ŋkpɔ mbufo, iŋ, ndien etim ɔfɔn ɔnɔ mmɔ ke uwem emi akan mbufo, ibɔhɔke mbufo ekabare esit.

16 Koro ediwak eŋwɔŋɔ edu emi enɔde mme Lamanite; koro edi ke ntak ido mme ete mmɔ anam mmɔ eka iso edu ke idaha unana ifiɔk; ke ntak oro Jehovah eyenyene mbɔm abaŋa mmɔ onyuŋ anam ini mmɔ ebighi ke isɔŋ.

17 Ndien ke ini ke iso eyeda mmɔ edibuɔt idem ke ikɔ esie, ye ndifiɔk unana ndidi nnen nnen eke mme ido mme ete mmɔ; ndien eyenyaŋa ediwak mmɔ, koro Jehovah eyenyene mbɔm abaŋa kpukpru owo emi ekotde enyiŋ esie.

18 Edi sese, ami ndɔhɔ mbufo nte ke edieke mbufo ekade iso eyire ke ibak mbufo, nte ke usen mbufo idibighike ke isɔŋ, koro eyedɔŋ mme Lamanite enɔ mbufo; ndien edieke mbufo mikabakere esit mmɔ eyedi ke ini emi mbufo midifiɔkke, ndien eyedise mbufo ye ata nsobo; ndien enye eyedi nte asaŋade ye ufiop iyaresit Jehovah.

19 Koro enye idiyakke ete mbufo edu ye mme ukwaŋ-ŋkpɔ mbufo, man esobo ikɔt esie. Ami ndɔhɔ mbufo, Iŋ iŋ; enye akpama ete yak mme Lamanite esobo kpukpru ikɔt esie emi ekotde ikɔt Nephi, edieke ekpedide mmem mmem ete mmɔ ekeme eduɔ eduk ke mme idiɔk ŋkpɔ ye mme ndudue, ke ini mmɔ ema ekenyene akamba uŋwana ye ifiɔk eto Jehovah Abasi mmɔ;

20 Iŋ, ke ini ema ekedi mbon emi Jehovah ɔkɔdiɔŋde ata eti eti; iŋ, ke ini ama ɔkɔdiɔŋ akan kpukpru idut, iman, usem, mme mme owo eken; ke ini ema ekenam mmɔ efiɔk kpukpru ŋkpɔ, nte asaŋade ye se mmɔ eyomde, ye mbuɔtidem mmɔ, ye mme akam mmɔ, ke abaŋade se ikidude, ye se idude, ye se ididide;

21 Ke ini Spirit Abasi ama ekedise mmɔ; ke ini ema eketiŋ ikɔ ye mme angel, ndien ke ini uyo Jehovah ama eketiŋ ikɔ ɔnɔ mmɔ; ndien ke ini ema ekenyene spirit prophecy, ye spirit eriyarare, ŋko ye ediwak enɔ, enɔ nditiŋ mme usem, ye enɔ ukwɔrɔ ikɔ, ye enɔ Edisana Spirit, ye enɔ ndikabare nsin ke usem efen;

22 Iŋ, ndien ke ini Abasi ama akanam mmɔ ebɔhɔ ewɔrɔ ke isɔŋ Jerusalem, oto ke ubɔk Jehovah; ke ini ema ekenyaŋa ke akaŋ, ye ke udɔŋɔ, ye ke kpukpru oruk udɔŋɔ ke utɔ ke utɔ; ndien mmɔ ke ema ekekop odudu ke ekɔŋ, man mme Lamanite ekuwot mmɔ; ke ini ema ekeda mmɔ ewɔrɔ ke ufin ke ini ke ini, ndien ke ini ema ekekpeme enyuŋ etim mmɔ enim tutu idahaemi; ndien enam mmɔ eforo tutu mmɔ enyene inyene ke kpukpru ŋkpɔ—

23 Ndien idahaemi ami ndɔhɔ mbufo, nte ke edieke mbon emi, emi ebɔde ata ediwak edidiɔŋ eto ubɔk Jehovah, eduede ke nte misaŋake ye uŋwana ye ifiɔk emi mmɔ enyenede, ami ndɔhɔ mbufo nte ke edieke emi edide ntre, nte ke edieke mmɔ eduɔde eduk ke ndudue, ke ɔyɔfɔn eti eti ɔnɔ mme Lamanite akan mmɔ.

24 Koro sese, enɔ mme Lamanite mme eŋwɔŋɔ Jehovah, edi mmɔ iduhe inɔ mbufo edieke mbufo eduede; koro ndi Jehovah iŋwɔŋɔke iŋwaŋ iŋwaŋ inyuŋ isɔŋɔke iwuk, ite edieke mbufo edisɔŋde ibuot ye enye ete ke enye oyowot mbufo ofuri ofuri osio ke iso isɔŋ?

25 Ndien idahaemi ke ntak emi, man owo ukuwot mbufo, Jehovah ɔdɔŋ angel esie edise ediwak ikɔt esie, ɔdɔhɔ mmɔ ete ke ana mmɔ eka enyuŋ eseme kɔkpɔsɔŋ enɔ mbon emi, ete: Mbufo ekabare esit, koro obio ubɔŋ heaven ekpere;

26 Ndien usen iwakke aba tɔŋɔ ke emi, Eyen Abasi eyedi ke ubɔŋ esie; ndien ubɔŋ esie eyedi ubɔŋ Ikpɔŋ Eyen Ete, ɔyɔhɔ ye mfɔn, edinen, ye akpanikɔ, ɔyɔhɔ ye ime, mbɔm, ye anyan ime, ɔsɔp ndikop mme eseme ikɔt esie ye ndibɔrɔ mme akam mmɔ.

27 Ndien sese, enye edi ndifak mbon emi edinade uduɔk mmɔŋ man ekabare esit, oto ke mbuɔtidem ke enyiŋ esie.

28 Ke ntak oro, mbufo ediɔŋ usuŋ Jehovah, koro ini ke ekpere emi kpukpru owo edidɔkde utip utom mmɔ, nte asaŋade ye se mmɔ ekedide—edieke mmɔ ekedide nnen nnen mmɔ eyedɔk erinyaŋa enɔ ukpɔŋ mmɔ, nte asaŋade ye odudu ye ubɔhɔ Jesus Christ; ndien edieke mmɔ ekedide idiɔk mmɔ eyedɔk ubiom ikpe enɔ ukpɔŋ mmɔ, nte asaŋade ye odudu ye nkpɔkɔbi satan.

29 Idahaemi sese, emi edi uyo angel, emi etiŋde ɔnɔ mme owo.

30 Ndien idahaemi, ndima nditɔ eka mi, koro mbufo edi nditɔ eka mi, ndien ana nte mbufo edi ndima, ndien ana nte mbufo enam nti utom emi ekemde ye erikabare esit, ke ntak emi esit mbufo ɔsɔŋde ata eti eti ye ikɔ Abasi, ye ke ntak emi mbufo edide mbon esopde ye emi eduɔde.

31 Idahaemi edikem ete ke ini emi ami, Alma, mma nketiŋ mme ikɔ emi, sese, mme owo ema eyaresit ye ami ke ntak emi ami nkɔdɔhɔde mmɔ nte ke mmɔ edi mbon isɔŋ esit ye mbon nsɔŋ ibuot.

32 Ndien ŋko ke ntak emi ami nkɔdɔhɔde mmɔ nte ke mmɔ ekedi mbon ekesopde ye emi ekeduɔde mmɔ ema eyaresit ye ami, ndien eyom ndimum mi, man mmɔ esin mi ke ufɔk ŋkpɔkɔbi.

33 Edi edikem ete ke Jehovah ikiyakke ete mmɔ emum mi ke ini oro enyuŋ esin mi ke ufɔk ŋkpɔkɔbi.

34 Ndien edikem ete Amulek ɔwɔrɔ onyuŋ ada, onyuŋ ɔtɔŋɔ ndikwɔrɔ ikɔ nnɔ mmɔ ŋko. Ndien idahaemi owo iwetke kpukpru ikɔ Amulek, edi ewet ubak mme ikɔ esie ke ŋwed emi.