1 Ndien idahaemi edikem ete Alma ɔnyɔŋ ke isɔŋ Gideon edi, kini enye ama ekekpep ikɔt Gideon ediwak ŋkpɔ emi owo mikemeke ndiwet, ke amakasiak utɔ ke ufɔk Abasi, nte enye ekebemde iso anam ke isɔŋ Zarahemla, iŋ, enye ɔnyɔŋ edi ufɔk esie ke Zarahemla man ɔduɔk odudu ke mme utom emi enye akanamde.

2 Ndien ke ntem ke ɔyɔhɔ isua ukara usukkiet mme ebiere ikpe eketre ɔnɔ ikɔt Nephi.

3 Ndien edikem ke ntɔŋɔ ɔyɔhɔ isua ukara duop mme ebiere ikpe nnɔ ikɔt Nephi, ete Alma adaha ke ebiet oro onyuŋ emen isaŋ esie aka ke isɔŋ Melek, ke edem usiaha utin akpa Sidon, ke edem usiaha utin ke mme adaŋa wilderness.

4 Ndien enye ɔtɔŋɔ ndikpep mme owo ke isɔŋ Melek nte asaŋade ye edisana utɔ Abasi, emi ekekotde enye; ndien enye ɔtɔŋɔ ndikpep mme owo ke ofuri isɔŋ Melek.

5 Ndien edikem ete mme owo edi tiene enye ke ofuri mme adaŋa isɔŋ emi ekedude ke nkaŋ wilderness oro. Ndien ema enim mmɔ uduɔk mmɔŋ ke ofuri isɔŋ;

6 Ke ntak oro kini enye amakekure utom esie ke Melek enye ɔwɔrɔ ke ebiet oro, onyuŋ asaŋa isaŋ usen ita ke edem edere ke isɔŋ Melek; ndien enye edisim obio emi ekekotde Ammonihah.

7 Idahaemi ekedi ido ikɔt Nephi ndikot mme isɔŋ mmɔ, ye mme obio mmɔ, ye mme efak mmɔ, iŋ, kpa kpukpru mkpri efak mmɔ, ndian owo emi okotode enyene mmɔ; ndien ntem ke ekedi ye isɔŋ Ammonihah.

8 Ndien edikem ete kini Alma ama ekedisim obio Ammonihah enye ɔtɔŋɔ ndikwɔrɔ ikɔ Abasi nnɔ mmɔ.

9 Idahaemi Satan ama enyene akwa odudu ke mme esit mbon obio Ammonihah; ke ntak oro mmɔ esin ndikpaŋ utɔŋ nnɔ mme ikɔ Alma.

10 Edi Alma ama anam utom eti eti ke spirit, aŋwana ye Abasi ke ɔkpɔsɔŋ akam, man enye aŋwaŋa Spirit esie ɔnɔ mme owo emi ekedude ke obio oro; man enye ayak ŋko ete enye enim mmɔ uduɔk mmɔŋ ɔnɔ erikabare esit.

11 Edi, mmɔ esɔŋ esit mmɔ, edɔhɔ enye ete: Sese, nnyin imifiɔk ite ke afo edi Alma; ndien nnyin imifiɔk ite ke afo edi akwa oku ke ufɔk Abasi emi afo asiakde ke ediwak ebiet ke isɔŋ emi, nte ido fo edide; ndien nnyin idige mbon ufɔk Abasi fo, ndien nnyin ibuɔtke idem ke mme utɔ ndisime ido oro.

12 Ndien idahaemi nnyin imifiɔk ite ke ntak emi nnyin midige mbon ufɔk Abasi fo ite ke afo unyeneke odudu ke idem nnyin; ndien ke afo amayak itie ikpe ɔnɔ Nephihah; ke ntak oro afo udige ada ibuot mme ebiere ikpe unɔ nnyin.

13 Idahaemi kini mme owo ema eketiŋ emi, enyuŋ efaŋa ye kpukpru ikɔ esie, enyuŋ esuŋi enye, enyuŋ efiari enye etap, enyuŋ enam ete ebin enye esio ke obio mmɔ, enye ɔwɔrɔ do onyuŋ emen isaŋ esie aka obio emi ekekotde Aaron.

14 Ndien edikem ete kini enye akasaŋade aka ebiet oro, ɔyɔhɔde ye mfuhɔ, ɔwɔkde ebe uwak ukut ye ndutuhɔ ukpɔŋ, ke ntak ibak mme owo emi ekedude ke obio Ammonihah, edikem kini Alma ɔkɔyɔhɔde ye mfuhɔ ntem, sese angel Jehovah ɔbiɔŋɔre enye ke iso, ɔdɔhɔ ete:

15 Ɔfɔfɔn ɔnɔ fi, Alma; ke ntak oro, menere ibuot fo nyuŋ dara, koro afo emenyene akwa ntak ndidara; koro afo etiŋde-enyin ke ndinim mme ibet Abasi tɔŋɔ ke ini emi afo ɔkɔbɔde akpa etop fo oto enye. Sese, ami ndi enye emi ŋketiŋde enye nnɔ fi.

16 Ndien sese, edɔŋ mi ete nnɔ fi uyo ete afo afiak aka obio Ammonihah, onyuŋ afiak ɔkwɔrɔ ikɔ ɔnɔ mbon obio oro; iŋ, kwɔrɔ ikɔ nnɔ mmɔ. Iŋ, dɔhɔ mmɔ ete, ke ibɔhɔke mmɔ ekabare esit Jehovah Abasi oyowot mmɔ.

17 Koro sese, mmɔ ekɔk ibuot idahaemi man mmɔ ekpan uwɔrɔ ufin ikɔt fo, (koro ntem ke Jehovah ɔdɔhɔ) emi misaŋake ye mme ewuhɔ, ye mme ubiere ikpe, ye mme ibet emi enye ɔnɔde ikɔt esie.

18 Idahaemi edikem ete kini Alma ama ɔkɔbɔ etop esie oto angel Jehovah enye ɔsɔp afiak edem aka isɔŋ Ammonihah. Ndien enye oto ke usuŋ efen oduk obio oro, ihŋ, ke usuŋ emi odude ke usuk obio Ammonihah.

19 Ndien nte enye odukde obio oro biɔŋ ɔdɔŋ enye, ndien enye ɔdɔhɔ erenowo kiet ete: Ndi afo ɔyɔnɔ ɔsuhɔre-idem owo Abasi ŋkpɔ adia?

20 Ndien erenowo oro ɔdɔhɔ enye ete: Ami ndi owo Nephi, ndien ami mɔfiɔk ke afo edi edisana prophet Abasi, koro afo edi owo emi angel kiet ɔkɔdɔhɔde ke ŋkukut ete: Afo ɔyɔbɔ enye esin. Ke ntak oro, saŋa ye ami duk esit ufɔk mi ndien ami nyenɔ fi udia mi; ndien ami mɔfiɔk ke afo eyedi edidiɔŋ ɔnɔ mi ye ufɔk mi.

21 Ndien edikem ete owo oro ɔbɔ enye esin ke esit ufɔk esie; ndien ekekot owo oro Amulek; ndien enye ada uyo ye unam edi onyuŋ enim ke iso Alma.

22 Ndien edikem ete Alma adia udia onyuŋ ɔyuhɔ; ndien enye ɔdiɔŋ Amulek ye ufɔk esie, ndien enye ɔnɔ Abasi ekɔm.

23 Ndien kini enye amakadia onyuŋ ɔyuhɔ enye ɔdɔhɔ Amulek ete: Ami ndi Alma, ndien ami ndi akwa oku ke ufɔk Abasi Abasi ke ofuri isɔŋ emi.

24 Ndien sese, ekot mi ete ŋkwɔrɔ ikɔ Abasi ke otu kpukpru mbon emi, nte asaŋade ye spirit eriyarare ye prophecy; ndien ami mmandu ke isɔŋ emi ndien mmɔ ibɔhɔ mi isin, edi mmɔ ebin mi esio ndien ami nkoyom ndiŋwɔŋɔre edem mi nwut isɔŋ emi ke nsinsi.

25 Edi sese, enɔ mi uyo ete ami mfiak edem nyuŋ ntiŋ nte prophet nnɔ mbon emi, iŋ, nyuŋ ntie ntiense nnɔ mmɔ mbaŋa mme ukwaŋ-ŋkpɔ mmɔ.

26 Ndien idahaemi, Amulek, ke ntak emi afo ɔnɔde mi udia onyuŋ adade mi esin, ediɔŋ fi; koro biɔŋ ama ɔdɔŋ mi, ke ntak emi ami nketrede udia ke ediwak usen.

27 Ndien Alma odu ye Amulek ke ediwak usen mbemiso enye ɔtɔŋɔ ndikwɔrɔ ikɔ nnɔ mme owo.

28 Ndien edikem ete mme owo ema etim ekɔri ke mme ukwaŋ-ŋkpɔ mmɔ.

29 Ndien ikɔ esim Alma, ete: Ka; ŋko nyuŋ dɔhɔ owo utom mi Amulek, ka nyuŋ tiŋ nte prophet nnɔ mbon emi, ete—Mbufo ekabare esit, koro ntem ke Jehovah ɔdɔhɔ, ibɔhɔke mbufo ekabare esit ami nyedise mbon emi ye iyaresit mi; iŋ, ndien ami ndimenke ɔkpɔsɔŋ iyaresit mi mfep.

30 Ndien Alma aka, ŋko ye Amulek, ke otu mme owo, man ekwɔrɔ mme ikɔ Abasi enɔ mmɔ; ndien Edisana Spirit ɔyɔhɔ mmɔ ke idem.

31 Ndien mmɔ enyene odudu emi enɔde mmɔ, tutu ete ke owo ikanke isin mmɔ ke mme ufɔk ŋkpɔkɔbi; ŋko erenowo ndomo kiet ikikanke iwot mmɔ; edi mmɔ ikiwutke odudu mmɔ tutu ebɔp mmɔ ke mme uruk enyuŋ etop mmɔ esin ke ufɔk ŋkpɔkɔbi. Idahaemi, ekenam emi man Jehovah owut odudu esie ke mmɔ.

32 Ndien edikem ete mmɔ eka enyuŋ etɔŋɔ ndikwɔrɔ nyuŋ ntiŋ nte prophet nnɔ mme owo, nte asaŋade ye spirit ye odudu emi Jehovah ɔkɔnɔde mmɔ.