1 Ndien edikem ke ɔyɔhɔ isua ukara duop ye kiet mme ebiere ikpe nnɔ ikɔt Nephi, ke ɔyɔhɔ usen ition ke ɔyɔhɔ ɔfiɔŋ iba, ke ata emem ama okodu ke isɔŋ Zarahemla, ke mme ekɔŋ mme mme eneni mikiduhe ke ibat isua ifaŋ, kpa tutu ɔyɔhɔ usen ition ke ɔyɔhɔ ɔfiɔŋ iba ke ɔyɔhɔ isua duop ye kiet, ema ekop mkpoyo ekɔŋ ke ofuri isɔŋ.

2 Koro sese, mbon ekɔŋ mme Lamanite ema edi ke nkaŋ wilderness, eduk ke mme adaŋa isɔŋ, tutu ke obio Ammonihah, enyuŋ etɔŋɔ ndiwot mme owo ye ndisobo obio oro.

3 Ndien edikem, mbemiso mme Nephite ekeme ndinyene mbon ekɔŋ nte ekemde ndibin mmɔ nsio ke isɔŋ oro, mmɔ ema ewot mme owo emi ekedude ke obio Ammonihah, ŋko ye usuk ke nkan nkuk mme adaŋa Noah, enyuŋ etaŋ mbon eken nte mbon ŋkpɔkɔbi eka ke wilderness.

4 Idahaemi edikem ete ke mme Nephite ema enyene udɔŋ ndinyene mbon emi ekemumde ewɔrɔ nte mbon ŋkpɔkɔbi eka wilderness.

5 Ke ntak oro, enye emi ekemekde ada ibuot mme etubom ekɔŋ eke mbon ekɔŋ mme Nephite, (ndien enyiŋ esie ekedi Zoram, ndien enye ekenyene nditɔ iren iba, Lehi ye Aha)—idahaemi Zoram ye nditɔ iren esie iba, ke ekefiɔkde ete ke Alma ekedi akwa oku ke ufɔk Abasi, ye ke ekekopde ete ke enye enyene spirit prophecy, ke ntak oro mmɔ eka ebine enye enyuŋ ebup enye ndifiɔk ebiet emi Jehovah oyomde ete mmɔ eka ke wilderness man ekeyom nditɔ eka mmɔ, emi mme Lamanite ekemumde nte mbon ŋkpɔkɔbi.

6 Ndien edikem ete Alma obup Jehovah abaŋa ŋkpɔ emi. Ndien Alma ɔnyɔŋ edi onyuŋ ɔdɔhɔ mmɔ ete: Esese, mme Lamanite eyebe akpa Sidon ke usuk usuk wilderness, ekpɔŋ edɔk ebe mme adaŋa isɔŋ Manti. Ndien sese do ke mbufo edisobo ye mmɔ, ke edem usiaha utin akpa Sidon, ndien do Jehovah ayayak ɔnɔ mbufo nditɔ eka mbufo emi mme Lamanite ekemumde nte mbon ŋkpɔkɔbi.

7 Ndien edikem ete Zoram ye nditɔ iren esie ebe akpa Sidon, ye mbon ekɔŋ mmɔ, enyuŋ esaŋa ebe ekpɔŋ mme adaŋa Manti eduk usuk usuk wilderness, emi okodude ke edem usiaha utin akpa Sidon.

8 Ndien mmɔ edisobo mbon ekɔŋ mme Lamanite, ndien ema esuan enyuŋ ebin mme Lamanite esin ke wilderness; ndien mmɔ eda nditɔ eka mmɔ emi mme Lamanite ekemumde nte mbon ŋkpɔkɔbi, ndien ukpɔŋ ndomo kiet ke otu mmɔ emi ekemumde nte mbon ŋkpɔkɔbi ikitakke. Ndien nditɔ eka mmɔ eda mmɔ edi ete edinyene mme isɔŋ mmɔ.

9 Ndien ntem ke ɔyɔhɔ isua duop ye kiet mme ebiere ikpe eketre, ke ema ekebin mme Lamanite esio ke isɔŋ oro, ndien ema ewot mbon Ammonihah; iŋ, ema ewot kpukpru odu uwem mme Ammonihahite, ŋko ye akwa obio mmɔ, emi mmɔ ekedɔhɔde ke Abasi ikemeke ndisobo, ke ntak odudu esie.

10 Edi sese, ke usen kiet enye ama ana nte ndon; ndien mme ebua ye mme unam ikɔt eke wilderness ema ewak okpo mmɔ.

11 Edi, ke ediwak usen ema ekebe ema ebok okpo mmɔ ke iso isɔŋ, ndien ema ebuk mmɔ ke udi emi mikituŋɔke. Ndien utebe mmɔ ama ɔsɔŋ ata etieti tutu ete ke mme owo ikikaha ikiduŋ ke isɔŋ Ammonihah ke ediwak isua. Ndien ekekot enye Ndon mme Nehor; koro mmɔ ekedi eke mbuɔtidem Nehor, emi ekewotde; ndien mme isɔŋ mmɔ ena nte ndon.

12 Ndien mme Lamanite ikidihe ekɔŋ aba ye mme Nephite tutu ɔyɔhɔ isua ukara duopenaŋ mme ebiere ikpe nnɔ ikɔt Nephi. Ndien ke ntem ke isua ita ke ikɔt Nephi eke eka iso enyene emem ke ofuri isɔŋ.

13 Ndien Alma ye Amulek eka iso ekekwɔrɔ erikabare esit enɔ mme owo ke mme temple mmɔ, ye ke mme edisana ebiet mmɔ, ŋko ye ke mme synagogue mmɔ, emi ekebɔpde nte utɔ eke mme Jew.

14 Ndien kpa nte ediwak emi edikopde mme ikɔ mmɔ, mmɔ ke mmɔ ekekwɔrɔ ikɔ Abasi enɔ, iteŋeke owo enyin, kpukpru ini.

15 Ndien ke ntem ke Alma ye Amulek eke eka iso, ŋko ye ediwak emi ekemekde enɔ utom oro, ete ekwɔrɔ ikɔ ke kpukpru ofuri isɔŋ. Ndien usiak ufɔk Abasi ama asuana ke ofuri isɔŋ, ke kpukpru ŋkanŋkuk, ke otu kpukpru mbon mme Nephite.

16 Ndien ubahare ikiduhe ke otu mmɔ; Jehovah ama aŋwaŋa Spirit esie ke ofuri iso isɔŋ ete ebeŋe mme esit nditɔ owo, mme ndibeŋe esit mmɔ ndibɔ ikɔ emi edikpepde ke otu mmɔ kini edidi esie—

17 Man mmɔ ekusɔŋ esit ye ikɔ, man mmɔ ekunana mbuɔtidem, enyuŋ eka tutu nsobo, edi man mmɔ ebɔ ikɔ ye idaresit, ko nte ebaharede ŋkɔk esin ke ata vine, man mmɔ eduk ke nduɔk odudu Jehovah Abasi mmɔ.

18 Idahaemi mme oku oro emi ekekade ke otu mme owo ema ekwɔrɔ ikɔ ekpan kpukpru nsu, ye mme abiaŋa, ye mme ufip, ye mme eŋwan, ye utɔk, ye mme isuŋi, ye inɔ, ŋkan ubɔk, udia ŋwo, uwot owo, usin efibe, ye kpukpru utɔ obukpo ido, ekwɔrɔ ete mme ŋkpɔ emi inaha ete edi ntre—

19 Etiŋ ebaŋa mme ŋkpɔ emi anade nte esɔp edi; iŋ, etiŋ ebaŋa edidi Eyen Abasi, mme ufen ye mkpa esie, ŋko ye eriset ke mkpa eke mme akpamkpa.

20 Ndien ediwak owo ema ebup kabaŋa ebiet emi Eyen Abasi editode idi; ndien ema ekpep mmɔ ete ke enye eye owut mmɔ idem kini enye ama ekeset ke mkpa; ndien emi mme owo ekekop ye akwa idaresit ye inemesit.

21 Ndien idahaemi kini ema ekesiak ufɔk Abasi ke kpukpru ofuri isɔŋ—ke ekekande satan, ye ke ekekwɔrɔde ikɔ Abasi ke akpanikɔ esie ke ofuri isɔŋ, ndien Jehovah aŋwaŋade mme edidiɔŋ esie ɔnɔ mme owo—ke ntem ke ɔyɔhɔ isua ukara duopenaŋ mme ebiere ikpe nnɔ mbon Nephi eketre.