1 Idahaemi kini Ammon ye nditɔ eka esie eke ebahare idem mmɔ ke mme adaŋa isɔŋ mme Lamanite, sese Aaron emen isaŋ esie aka isɔŋ emi mme Lamanite ekekotde, Jerusalem, emi ekekotde edian isɔŋ emana mme ete mmɔ; ndien ama oyom-usuŋ onyuŋ enyene adaŋa ye Mormon.

2 Idahaemi mme Lamanite ye mme Amalekite ye ikɔt Amulon ema ebɔp akwa obio, emi ekekotde Jerusalem.

3 Idahaemi mme Lamanite ke idem mmɔ ema esɔŋ esit ekem, edi mme Amalekite ye mme Amulonite ema esɔŋ ekan; ke ntak oro mmɔ ema enam mme Lamanite ete yak mmɔ esɔŋ esit mmɔ, ete mmɔ ekop odudu ke ibak ye mme mbubiam mmɔ.

4 Ndien edikem ete ke Aaron edisim obio Jerusalem, onyuŋ oto ɔtɔŋɔ ndikwɔrɔ ikɔ nnɔ mme Amalekite. Ndien enye ɔtɔŋɔ ndikwɔrɔ ikɔ nnɔ mmɔ ke mme synagogue mmɔ, koro mmɔ ema ebɔp mme synagogue nte utɔ eke mme Nehor; koro ediwak mme Amalekite ye mme Amulonite ekedi nte utɔ eke mme Nehor.

5 Ke ntak oro, nte Aaron okodukde synagogue mmɔ kiet ndikwɔrɔ ikɔ nnɔ mme owo, ndien nte enye eketiŋde ikɔ ɔnɔ mmɔ, sese Amalekite kiet adahada onyuŋ ɔtɔŋɔ ndineni ye enye, ete: Nso idi oro emi afo etiede ntiense? Ndi afo omokut angel? Ntak emi mme angel miwutke nnyin idem? Sese ndi mbon emi ifɔnke nte ikɔt fo?

6 Afo ŋko ɔmɔdɔhɔ, ke ibɔhɔke nnyin ikabare esit ke nnyin iyitak. Afo anam didie ɔfiɔk ekikere ye uduak esit nnyin? Afo anam didie ɔfiɔk ete ke nnyin iminyene ntak ndikabare esit? Afo anam didie ɔfiɔk ke nnyin idighe mme ndinen owo? Sese, nnyin imibɔp mme ndisana ebiet, ndien nnyin imisisobo idem nnyin kiet ndikpono Abasi. Nnyin imibuɔtidem ite ke Abasi ayanyaŋa kpukpru owo.

7 Idahaemi Aaron ɔdɔhɔ enye ete: Ndi mbufo emebuɔt idem ete ke Eyen Abasi eyedi ndifak ubon owo nsio ke mme idiɔk ŋkpɔ mmɔ?

8 Ndien erenowo oro ɔdɔhɔ enye ete: Nnyin inimke-ke-akpanikɔ ite ke afo ɔmɔfiɔk utɔ ŋkpɔ emi. Nnyin inimke-ke-akpanikɔ mme ndisime ido emi. Nnyin inimke-ke-akpanikɔ ke afo ɔmɔfiɔk mme ŋkpɔ emi edidide, ŋko nnyin inimke-ke-akpanikɔ ite ke mme ete mbufo ye ŋko mme ete nnyin ema efiɔk ebaŋa mme ŋkpɔ emi mmɔ eketiŋde, ebaŋa ŋkpɔ emi anade nte edi.

9 Idahaemi Aaron ɔtɔŋɔ ndikot mme ŋwed Abasi nnɔ mmɔ kabaŋa edidi Christ, ye ŋko kabaŋa eriset ke mkpa eke mme akpamkpa, ndien ete ke edifak ididuhe inɔ ubon owo ibɔhɔke oto ke mkpa ye ndutuhɔ Christ, ye usio-isop eke iyip esie.

10 Ndien edikem nte enye ɔtɔŋɔde ndinam mme ŋkpɔ emi aŋwaŋa mmɔ mmɔ eyaresit ye enye, enyuŋ etɔŋɔ ndisak enye; ndien mmɔ ikpaŋke utɔŋ inɔ mme ikɔ emi enye eketiŋde.

11 Ke ntak oro, kini enye okokutde ete ke mmɔ ikpaŋke utɔŋ inɔ mme ikɔ esie, enye ɔwɔrɔ ke synagogue mmɔ, onyuŋ edi ekpri obio kiet emi ekekotde Ani-Anti, ndien do enye okut Muloki nte ɔkwɔrɔde ikɔ ɔnɔ mmɔ; ye ŋko Ammah ye nditɔ eka esie. Ndien mmɔ eneni ye ediwak owo ebaŋa ikɔ.

12 Ndien edikem ete ke mmɔ ekut ete ke mme owo eyesɔŋ esit mmɔ, ke ntak oro mmɔ ewɔrɔ enyuŋ ediduk ke isɔŋ Middoni. Ndien mmɔ ema ekwɔrɔ ikɔ enɔ ediwak owo, ndien ekpri ibat owo ema ebuɔtidem ke mme ikɔ emi mmɔ ekekpepde.

13 Edi, ema emum Aaron ye ibat nditɔ eka esie ifaŋ enyuŋ esin ke ufɔk ŋkpɔkɔbi, ndien mmɔ oro ekesuhɔre ema efehe ewɔrɔ ke isɔŋ Middoni eka ke mme ŋkan-ŋkuk obio.

14 Ndien mbon emi ekesinde ke ufɔk ŋkpɔkɔbi ema ekut ndutuhɔ ke uwak ŋkpɔ, ndien ubɔhɔ mmɔ okoto ke ubɔk Lamoni ye Ammon, ndien enɔ mmɔ udia enyuŋ esine mmɔ ɔfɔŋ.

15 Ndien mmɔ efiak eka ekekwɔrɔ ikɔ, ndien ke ntem ke ekenam mmɔ ebɔhɔ ewɔrɔ ke ufɔk ŋkpɔkɔbi ke akpa ini; ndien ke ntem ke mmɔ ekekut ndutuhɔ.

16 Ndien mmɔ eka ebiet ekededi emi Spirit Jehovah akadade mmɔ aka, ekwɔrɔ ikɔ Abasi ke kpukpru synagogue mme Amalekite, mme ke kpukpru mboho mme Lamanite emi eyakde mmɔ eduk.

17 Ndien edikem ete Jehovah ɔtɔŋɔ ndidiɔŋ mmɔ, tutu ete mmɔ eda ediwak edi ifiɔk akpanikɔ; iŋ, mmɔ ema enam ediwak efiɔk mme idiɔk ŋkpɔ mmɔ, ye mme ido mme ete mmɔ, emi mikidighe nnen nnen.

18 Ndien edikem ete Ammon ye Lamoni enyɔŋ ke isɔŋ Middoni eka isɔŋ Ishmael, emi ekedide isɔŋ inyene mmɔ.

19 Ndien edidem Lamoni iyakke ete Ammon anam utom ɔnɔ enye, mme edi eyen ufɔk esie.

20 Edi enye anam ete ebɔp mme synagogue ke isɔŋ Ishmael; ndien enye anam ete ikɔt esie, mme mme owo emi ekedude ke idak ukara esie, esobo idem mmɔ ɔtɔ kiet.

21 Ndien enye ama adaresit abaŋa mmɔ, ndien enye ama ekpep mmɔ uwak ŋkpɔ. Ndien enye ŋko ama ɔdɔhɔ mmɔ ete ke mmɔ edi mme owo ke idak esie, ndien ke mmɔ edi mbon ubɔhɔ, ete ke mmɔ ema ebɔhɔ mme afai edidem, ete esie; koro ete ke ete esie ama ayak enye ete enye akara mme owo emi ekedude ke isɔŋ Ishmael, ye ke kpukpru isɔŋ emi akanarede okuk.

22 Ndien enye ŋko ama ɔdɔhɔ mmɔ ete ke mmɔ enyene unen ndikpono Jehovah Abasi mmɔ nte udɔŋ mmɔ edide, ke ebiet ekededi emi mmɔ edude, edieke odude ke isɔŋ emi odude ke idak ukara edidem Lamoni.

23 Ndien Ammon ama ɔkwɔrɔ ikɔ ɔnɔ ikɔt edidem Lamoni; ndien edikem ete ke enye ama ekpep mmɔ kpukpru ŋkpɔ ke abaŋa mme ŋkpɔ emi abaŋade nnen nnen ido. Ndien enye ama eteme mmɔ ke usen ke usen, ye ofuri ifik; ndien mmɔ ema ekpaŋ utɔŋ enɔ ikɔ esie, ndien mmɔ ema enyene ɔkpɔsɔŋ udɔŋ ke ndinim mme ibet Abasi.