1 Ndien edikem ke ini enye ama eketre nditiŋ ikɔ nnɔ mme owo ediwak mmɔ ema ebuɔtidem ke mme ikɔ esie, enyuŋ etɔŋɔ ndikabare esit, ye ndiduŋɔre mme ŋwed Abasi.

2 Edi ediwak mmɔ ema enyene udɔŋ ete mmɔ ewot Alma ye Amulek; koro mmɔ ema eyaresit ye Alma, ke ntak mme iŋwaŋ-iŋwaŋ ikɔ esie ye Zeezrom; ndien mmɔ ŋko ema edɔhɔ ete ke Amulek ama osu nsu ɔnɔ mmɔ, onyuŋ osuŋi mbet mmɔ ŋko ye mme ɔfiɔk mbet ye mme ebiere ikpe mmɔ.

3 Ndien mmɔ ŋko ema eyaresit ye Alma ye Amulek; ye ke ntak emi mmɔ eketiede ntiense iŋwaŋ-iŋwaŋ ebaŋa mme ibak mmɔ, mmɔ eyom ndiwot mmɔ ke ndibe.

4 Edi edikem ete mmɔ ikiwotke; edi mmɔ emum mmɔ enyuŋ ebɔp mmɔ ye mme ɔkpɔsɔŋ uruk, enyuŋ eda mmɔ eka ke iso ada ibuot mme ebiere ikpe ke obio.

5 Ndien mme owo ewɔrɔ eka enyuŋ etie ntiense ebaŋa mmɔ—etie ntiense ete ke mmɔ ema esuŋi mbet, ye mme ɔfiɔk mbet mmɔ ye mme ebiere ikpe obio, ŋko ye kpukpru owo emi ekedude ke obio; nko ema enyuŋ etie ntiense ete ke edi Abasi kiet odu, ndien ete ke enye ɔyɔdɔŋ Eyen esie edi ke ufɔt mme owo, edi enye idinyaŋake mmɔ; ndien ediwak utɔ ŋkpɔ emi ke mme owo eketie ntiense ebaŋa Alma ye Amulek. Idahaemi ekenam emi ke iso ada ibuot mme ebiere ikpe obio.

6 Ndien edikem ete idem akpa Zeezrom abaŋa mme ikɔ emi eketiŋde; ndien enye ŋko ama ɔfiɔk abaŋa nnan mme esit mmɔ, emi enye akanamde ke ufɔt mme owo ke mme ikɔ nsu esie; ndien ukpɔŋ esie ɔtɔŋɔ nditimere nto ifiɔk ndudue esie; iŋ, mme ubiak hell etɔŋɔ ndikanare enye nkuk.

7 Ndien edikem ete enye ɔtɔŋɔ ndiseme nnɔ mme owo, ete: Esese, ami medue, ndien mme owo emi enana ntɔi ke iso Abasi. Ndien enye ɔtɔŋɔ ndikpe ubɔk mbaŋa mmɔ tɔŋɔ ke ini oro ka iso; edi mmɔ esuŋi enye, ete: Ndi andidiɔk omum fi ŋko? Ndien mmɔ efiari enye etap, enyuŋ ebin enye esio ke otu mmɔ, ŋko ye kpukpru mbon emi ekebuɔtde ke mme ikɔ emi Alma ye Amulek eketiŋde; ndien mmɔ ebin mmɔ esio, enyuŋ edɔŋ mme owo ete etɔ mmɔ ke itiat.

8 Ndien mmɔ eda iban ye nditɔ mmɔ edi ɔtɔ kiet, ndien owo ekededi emi ɔkɔbuɔtde idem mme emi ekekpepde ete ebuɔtdidem ke ikɔ Abasi mmɔ enam ete esin ke ikaŋ; ndien mmɔ ŋko eda mme ŋwed mmɔ edi emi eke ɔdɔŋɔde mme edisana ŋwed Abasi, enyuŋ esin mmɔ ke ikaŋ ŋko, man ikaŋ ata onyuŋ abiat mmɔ.

9 Ndien edikem ete mmɔ emum Alma ye Amulek, enyuŋ emen mmɔ eka ebiet mkpa ke usuŋ Abasi, man mmɔ edi ntiense ebaŋa nsobo mbon emi ikaŋ akatade.

10 Ndien ke ini Amulek okokutde mme ubiak iban ye nditɔ emi ikaŋ akatade, ama abiak enye ŋko; ndien enye ɔdɔhɔ Alma ete: Didie ke nnyin itieise utɔ idiɔk ŋkpɔ emi? Ke ntak oro yak nnyin inyan ubɔk nnyin, inyuŋ iwut odudu Abasi emi odude ke nnyin, inyuŋ inyaŋa mmɔ isio ke edeme ikaŋ.

11 Edi Alma ɔdɔhɔ enye ete: Spirit akpan mi ete ami nkunyan ubɔk mi; koro sese Jehovah ɔbɔ mmɔ ɔnɔ idem esie, ke ubɔŋ; ndien enye ayak ete mmɔ enam ŋkpɔ emi, mme ete mme owo enam mmɔ ŋkpɔ emi, nte asaŋade ye isɔŋesit mmɔ, man mme ubiere ikpe emi edinɔde mmɔ ke iyaresit esie ekpedi edinen; ndien iyip mbon emi miduehe ayada nte ntiense abaŋa mmɔ, iŋ, onyuŋ eseme ke ɔkpɔsɔŋ uyo abaŋa mmɔ ke akpatre usen.

12 Idahaemi Amulek ɔdɔhɔ Alma ete: Sese, ekeme ndidi ke mmɔ eyefɔp nnyin ŋko.

13 Ndien Alma ɔdɔhɔ ete: Yak edi nte asaŋade ye uduak Jehovah. Edi, sese, utom nnyin ikureke; ke ntak oro mmɔ ifɔpke nnyin.

14 Idahaemi edikem ete ke ini ikaŋ ama akata idem mme owo emi ekesinde ke ikaŋ, ŋko ye mme ŋwed emi ekesinde ye mmɔ, ada ibuot mme ebiere ikpe edi onyuŋ ada ke iso Alma ye Amulek, nte ekebɔpde mmɔ; ndien enye amia mmɔ ke mbaŋ mmɔ ye ubɔk esie, onyuŋ ɔdɔhɔ mmɔ ete: Ke esede se mbufo ekutde, ndi mbufo eyefiak ekwɔrɔ ikɔ enɔ mbon emi, man esin mmɔ ke mkpɔdiɔhɔ ikaŋ ye brimston?

15 Esese, mbufo emekut ete ke mbufo inyeneke odudu ndinyaŋa mbon emi ekesinde ke ikaŋ; nko Abasi inyaŋake mmɔ ke ntak emi mmɔ ekedide mbon mbuɔtidem mbufo. Ndien ebiere ikpe afiak amia mmɔ ke mbaŋ mmɔ, onyuŋ obup ete: Nso ke mbufo etiŋ ebaŋa idem mbufo?

16 Idahaemi ebiere ikpe emi ekedi eke utɔ ye eke mbuɔtidem Nehor, emi okowotde Gideon.

17 Ndien edikem ete Alma ye Amulek ikibɔrɔke enye ŋkpɔ ndomo kiet; ndien enye afiak amia mmɔ, onyuŋ ayak mmɔ ɔnɔ mme anam utom ete esin ke ufɔk ŋkpɔkɔbi.

18 Ndien ke ini ema ekesin mmɔ ke ufɔk ŋkpɔkɔbi ke usen ita, ediwak ɔfiɔk ibet ema edi, ye mme ebiere ikpe, ye mme oku, ye mme andikpep, emi ekedide eke mbuɔtidem Nehor; ndien mmɔ edi ufɔk ŋkpɔkɔbi ndise mmɔ, ndien mmɔ ebup mmɔ mbume ebaŋa ediwak ikɔ; edi mmɔ ikibɔrɔke mmɔ ŋkpɔ ndomo kiet.

19 Ndien edikem ete ebiere ikpe ada ke iso mmɔ, onyuŋ obup ete: Ntak emi mbufo mibɔrɔke mme ikɔ mbon emi? Nte mbufo ifiɔkke ete ke ami menyene odudu ndiyak mbufo nnɔ edeme ikaŋ? Ndien enye ɔnɔ mmɔ uyo ete etiŋ ikɔ; edi mmɔ ikibɔrɔke ŋkpɔ ndomo kiet.

20 Ndien edikem ete mmɔ ewɔrɔ enyuŋ eka mme usuŋ mmɔ, edi efiak edi mkpɔŋ; ndien ebiere ikpe afiak amia mmɔ ke mbaŋ mmɔ. Ndien ediwak edi ŋko, enyuŋ emia mmɔ, ebup ete: Ndi mbufo eyefiak eda enyuŋ ebiere ikpe enɔ mbon emi, enyuŋ emiom mbet nnyin? Edieke mbufo enyenede utɔ akwa odudu oro ntak emi mbufo minyaŋake idem mbufo?

21 Ndien ediwak ŋkpɔ ntre ke mmɔ eketiŋ ye mmɔ, eta edet mmɔ ese mmɔ, enyuŋ efiari mmɔ etap, enyuŋ edɔhɔ ete: Nnyin iditie didie ke ini edibiomde nnyin ikpe?

22 Ndien ediwak ŋkpɔ ntre, iŋ, kpukpru utɔ ŋkpɔ ntre ke mmɔ eketiŋ ye mmɔ; ndien ke ntem ke mmɔ ekesak mmɔ ke ediwak usen. Ndien mmɔ esin mmɔ udia man biɔŋ ɔdɔŋ mmɔ, ye mmɔŋ man itɔŋ asat mmɔ; ndien mmɔ ŋko ebɔ mmɔ ɔfɔŋ mmɔ man edi iferi; ndien ke ntem ke ekebɔp mmɔ ye mme ɔkpɔsɔŋ uruk, enyuŋ esin ke ufɔk ŋkpɔkɔbi.

23 Ndien edikem ke ini mmɔ ema ekebɔ ndutuhɔ ntem ke ediwak usen, (ndien ekedi ke ɔyɔhɔ usen duopeba, ke ɔyɔhɔ ɔfiɔŋ duop, ke ɔyɔhɔ isua duop ke ukara mme ebiere ikpe nnɔ ikɔt Nephi) ete ke ada ibuot mme ebiere ikpe ke isɔŋ Ammonihah ye ediwak andikpep mmɔ ye mme ɔfiɔk ibet mmɔ eduk eka ke ufɔk ŋkpɔkɔbi emi ekebɔpde Alma ye Amulek ye mme uruk.

24 Ndien ada ibuot mme ebiere ikpe ada ke iso mmɔ, onyuŋ afiak amia mmɔ, onyuŋ ɔdɔhɔ mmɔ ete: Edieke mbufo enyenede odudu Abasi enam idem mbufo ebɔhɔ ke mme uruk emi, ndien ini oro ke nnyin idinim ite ke Jehovah oyowot mbon emi nte asaŋade ye mme ikɔ fo.

25 Ndien edikem ete kpukpru mmɔ eka enyuŋ emia mmɔ, etiŋ mme ukem ukem ikɔ, kpa tutu ke akpatre; ndien ke ini akpatre owo eketiŋde ikɔ ɔnɔ mmɔ odudu Abasi ama odoro Alma ye Amulek ke idem, ndien mmɔ edaha eda enyuŋ eda ke ukot mmɔ.

26 Ndien Alma eseme, ete: Adaŋa didie ke nnyin idiyɔ mme akamba ukut emi, O Jehovah? O Jehovah, nɔ nnyin ukeme nte mbuɔtidem nnyin edide emi edide ke Christ, tutu ke ndibɔhɔ. Ndien mmɔ ekibi mme uruk emi ekebɔpde mmɔ; ndien ke ini mme owo ekekutde emi, mmɔ etɔŋɔ ndifehe, koro ndik nsobo ama esim mmɔ.

27 Ndien edikem ete ke ndik mmɔ ama okpon eti eti tutu mmɔ eduɔ ke isɔŋ, ikinyuŋ isimke usuŋ esien ufɔk ŋkpɔkɔbi; ndien isɔŋ enyeŋe ɔkpɔsɔŋ-ɔkpɔsɔŋ, ndien mme ibibene ufɔk ŋkpɔkɔbi asiaha iba, ke ntak oro mmɔ eduɔ ke isɔŋ; ndien ada ibuot mme ebiere ikpe, ye mme ɔfiɔk ibet, ye mme oku, ye mme andikpep, emi ekemiade Alma ye Amulek, ema ekpa ke iduɔ oro.

28 Ndien Alma ye Amulek ema ewɔrɔ ke ufɔk ŋkpɔkɔbi oro, ndien ŋkpɔ ikinamke mmɔ; koro Jehovah ama ɔnɔ mmɔ odudu, nte mbuɔtidem mmɔ edide emi ekedide ke Christ. Ndien ke ndo ndo oro mmɔ ewɔrɔ ke ufɔk ŋkpɔkɔbi; ndien ema etat mmɔ ke mme uruk mmɔ; ndien ufɔk ŋkpɔkɔbi ama ɔduɔ ke isɔŋ, ndien kpukpru owo emi ekedude ke esit oro, ibɔhɔke ekedi Alma ye Amulek, ema ekpa; ndien ke ndo ndo oro mmɔ ediduk ke obio.

29 Idahaemi mme owo ke ekekopde akwa uyom ema efehe ke mme otu edi ndifiɔk se idide ntak esie; ndien ke ini mmɔ ekekutde Alma ye Amulek nte ewɔrɔde ke ufɔk ŋkpɔkɔbi edi, ndien mme ibibene esie ema eduɔ ke isɔŋ, akamba ndik ama omum mmɔ, ndien mmɔ efehe ekpɔŋ iso Alma ye Amulek kpa nte ebot ye eyen esie efehede lion iba; ndien ke ntem ke mmɔ ekefehe ekpɔŋ iso Alma ye Amulek.