1 Ndien edikem ete kini Alma ama eketre nditiŋ ikɔ nnɔ mbon ufɔk Abasi, emi ekesiakde ke obio Zarahemla, enye enim mme oku ye mme ebio-owo, ke ndidori mme ubɔk esie nte asaŋade ye utɔ Abasi, man etie ibuot enyuŋ ese ufɔk Abasi.

2 Ndien edikem ete ke owo ekededi emi mikidukke ufɔk Abasi emi ekekabare esit ke mme idiɔk ŋkpɔ mmɔ ke ema eduɔk mmɔ mmɔŋ man ekabare esit, ndien ema ebɔ mmɔ esin ke ufɔk Abasi.

3 Ndien edikem ŋko ete owo ekededi emi okodukde ufɔk Abasi emi mikikabakere esit ke ibak mmɔ inyuŋ isuhɔrede idem ke iso Abasi—ami ndɔhɔ mbon emi ekemenere ke ntaŋidem esit mmɔ—kpa oro ke ekesin, ndien ema esɔhi enyiŋ mmɔ efep, ndien owo ikibatke enyiŋ mmɔ isin ke otu eke mbon edinen.

4 Ndien ke ntem mmɔ etɔŋɔ ndisiak utɔ ufɔk Abasi ke obio Zarahemla.

5 Idahaemi ami nyom nte mbufo efiɔk ete ke ikɔ Abasi ekedi ke ntat ubɔk ɔnɔ ofuri owo, ete ke owo ikisinke owo ndomo kiet ifet ndisobo idem mmɔ ɔtɔ kiet man ekop ikɔ Abasi.

6 Edi ema enɔ nditɔ Abasi uyo ete mmɔ esobo idem mmɔ ɔtɔ kiet ofuri ofuri ini, enyuŋ ediana kiet ke nditre udia ye ɔkpɔsɔŋ akam nnɔ mme ukpɔŋ mbon emi mikifiɔkke Abasi.

7 Ndien edikem ete kini Alma ama ɔkɔnɔ mme item emi enye adaha ɔkpɔŋ mmɔ, iŋ, ke ufɔk Abasi emi okodude ke obio Zarahemla, onyuŋ aka ke edem usop utin akpa Sidon, oduk ke ebedeŋ Gideon, do ke ekebɔpde obio, emi ekekotde obio Gideon, emi okodude ke ebedeŋ emi ekekotde Gideon, emi ekekotde edian erenowo emi ekewotde ke ubɔk Nehor ye akaŋkaŋ.

8 Ndien Alma aka onyuŋ ɔtɔŋɔ ndikwɔrɔ ikɔ Abasi nnɔ ufɔk Abasi emi ekesiakde ke ebedeŋ Gideon, nte asaŋade ye eriyarare akpanikɔ eke ikɔ emi mme ete esie eketiŋde, ŋko nte asaŋade ye spirit prophecy emi okodude ke enye, nte asaŋade ye ikɔ ntiense Jesus Christ, Eyen Abasi, emi anade nte edifak ikɔt esie ke mme idiɔk ŋkpɔ mmɔ, ye edisana utɔ emi ekekotde enye. Ndien ntem ke ewet. Amen.