1 Idaha emi edikem ete ke ini utit Korihor ama ekebe, ke Alma ama eke ɔbɔ mme etop ete ke mme Zoramite ke ekwaŋa mme usuŋ Jehovah, ndien ete ke Zoram, emi ekedide ada ibuot mmɔ, ke ada mme esit owo ete etuak ibuot ke isɔŋ enɔ mme ndem, esit esie ɔtɔŋɔ nditimere ke ntak ukwaŋ-ŋkpɔ mme owo.

2 Koro ekedi ntak akwa mfuhɔ ɔnɔ Alma ndifiɔk mbaŋa ukwaŋ-ŋkpɔ ke ufɔt ikɔt esie; ke ntak oro esit esie ama ɔfuhɔ eti eti ke ntak ubahare mme Zoramite ye mme Nephite.

3 Idaha emi mme Zoramite ema esobo idem mmɔ ɔtɔ kiet ke isɔŋ emi mmɔ ekekotde Antionum, emi ekedide edem usiaha utin isɔŋ Zarahemla, emi eke anade ekpri ayak ndidi adaŋa ke mben inyaŋ, emi ekedide usuk usuk isɔŋ Jershon, emi ekenyenede adaŋa nko ke usuk usuk wilderness, wilderness emi eke ɔyɔhɔde ye mme Lamanite.

4 Idaha emi mme Nephite ema efehe eti eti ete ke mme Zoramite eye enam ama ye mme Lamanite, ndien ke eye edi ntak akamba atahare ɔnɔ mme Nephite.

5 Ndien idaha emi, ke ntak emi ukwɔrɔ ikɔ ekenyenede akamba ufaŋ ndinam mme owo enam se edide edinen—iŋ, enye ama etim enyene odudu ke esit mme owo akan ofut, mme ŋkpɔ ndomo kiet efen, emi eketibede ɔnɔ mmɔ—ke ntak oro Alma ama ekere ke ama ɔfɔn ete mmɔ edomo eti ido eke ikɔ Abasi ese.

6 Ke ntak oro enye ama emen Ammon, ye Aaron, ye Omner; ndien Himni ke enye eke ɔkpɔŋ ke ufɔk Abasi ke Zarahemla; edi ita oko ke enye ekemen ye enye, nko ye Amulek ye Zeezrom, emi ekedude ke Melek; ndien nko enye ama emen nditɔ iren esie iba.

7 Idaha emi eyen eren esie emi okokponde akan enye ikemenke ye enye, ndien enyiŋ esie ekedi Helaman; edi mme enyiŋ mbon emi enye ekemende ye enye ekedi Shiblon ye Corianton; ndien emi edi mme enyiŋ mbon emi eke esaŋade ye enye ke otu mme Zoramite, ndikwɔrɔ ikɔ nnɔ mmɔ.

8 Idaha emi mme Zoramite ekedi mbon emi eke efehede ɔwɔrɔ ekpɔŋ mme Nephite; ke ntak oro ema edak ekwɔrɔ ikɔ Abasi enɔ mmɔ.

9 Edi mmɔ ema eduɔ eduk mme akamba ndudue, koro mmɔ ike ikpemeke ndinim mme ibet Abasi, ye mme ewuhɔ esie, nte asaŋade ye ibet Moses.

10 Nko mmɔ inamke mme erinam ufɔk Abasi, ndika iso ke akam ye ndibeŋe Abasi ke usen ke usen, man mmɔ ukuduk ke idomo.

11 Iŋ, ke akpatre, mmɔ ema ekwaŋa mme usuŋ Jehovah ke ata ediwak ini; ke ntak oro, ke ntak emi, Alma ye nditɔ eka esie ema eka isɔŋ oro ndikwɔrɔ ikɔ nnɔ mmɔ.

12 Idaha emi, ke ini mmɔ ekedukde ke isɔŋ oro, sese, ke mkpaidem mmɔ mmɔ ekut ete ke mme Zoramite ema ebɔp mme synagogue, ndien ete ke mmɔ ema esobo idem mmɔ ɔtɔ kiet ke usen kiet ke urua, usen emi mmɔ ema ekot usen Jehovah; ndien mmɔ ema ekpono ke utɔ usuŋ emi Alma ye nditɔ eka esie mikwe akpa;

13 Koro mmɔ ema enyene ebiet emi ekebɔpde ke ufɔt synagogue mmɔ, ebiet ndidada, emi eke okoŋde akan ibuot; ndien enyɔŋ esie enyene ufaŋ ɔnɔ owo kiet ikpɔŋ.

14 Ke ntak oro, owo ekededi emi eke oyomde ndikpono ana aka onyuŋ ada ke enyɔŋ esie, onyuŋ anyan ubɔk esie ɔnɔ enyɔŋ, onyuŋ eseme ke ɔkpɔsɔŋ uyo, ete:

15 Edisana, edisana Abasi; nnyin iminim ite ke afo edi Abasi, ndien nnyin iminim ite ke afo edi edisana, ndien ite ke afo ekedi spirit, ndien ite ke afo edi spirit, ndien ite ke afo edidi spirit ke nsinsi.

16 Edisana Abasi, nnyin iminim ite ke afo adiaŋare nnyin ɔkpɔŋ nditɔ eka nnyin; ndien nnyin inimke ke ido nditɔ eka nnyin, emi ekeyakde enɔ mmɔ eto ndisime mme ete mmɔ; edi nnyin iminim ite ke afo ememek nnyin ete idi ndisana nditɔ fo; ndien nko ke afo eme anam nnyin ifiɔk ite ke Christ ididuhe.

17 Edi afo edi ukem ukem mkpɔŋ, mfin, ye ke nsinsi; ndien afo ememek ete enyaŋa nnyin, ke ini emekde kpukpru se ikanare nnyin ete etop ke iyaresit esin ke hell; ke ntak edisana emi, O Abasi, nnyin imikɔm fi; ndien nnyin nko ikɔm fi koro afo emekde nnyin, man owo ukuda nnyin usuŋ ke mme ndisime ido nditɔ eka nnyin, emi ɔbɔpde mmɔ enim ete ebuɔtidem ke Christ, emi adade esit mmɔ ɔwɔrɔ ete eyo ekpɔŋ fi, Abasi nnyin.

18 Ndien nnyin ifiak ikɔm fi, O Abasi, koro nnyin idi mbon emi emekde ye ndisana owo. Amen.

19 Idaha emi edikem ete ke ini Alma ye nditɔ eka esie ye nditɔ esie ema ekekop mme akam emi, idem akpa mmɔ ebe adaŋa.

20 Koro sese, kpukpru owo ema eka enyuŋ ebɔŋ mme ukem emi.

21 Idaha emi mmɔ ekekot ebiet emi Rameumptom, emi, ke ekabare, edi edisana obot.

22 Idaha emi, ke obot emi mmɔ ebɔŋ, kpukpru owo, ukem akam oro enɔ Abasi, ekɔm Abasi mmɔ ete ke enye emek mmɔ, ndien ete ke enye ike idaha mmɔ usuŋ ke ido nditɔ eka mmɔ, ndien ete ke owo ike iyipke esit mmɔ ndinim ke mme ŋkpɔ emi edidide, emi mmɔ mifiɔkke ŋkpɔ ndomo kiet ibaŋa.

23 Idaha emi, ke ini kpukpru owo ema eke enɔ ekɔm ke utɔ usuŋ emi, mmɔ enyɔŋ ufɔk mmɔ, itiŋke ikɔ ibaŋa Abasi mmɔ aba tutu mmɔ efiak esobo idem mmɔ ɔtɔ kiet ke edisana obot oro, ndinɔ ekɔm ke utɔ usuŋ mmɔ.

24 Idaha emi ke ini Alma ekekutde emi esit esie ama ɔfuhɔ; koro enye ama okut ete ke mmɔ ekedi mbon ibak ye mme ukwaŋ owo; iŋ, enye okut ete ke esit mmɔ eke ɔkɔŋɔ ke gold, ye ke silver, ye ke kpukpru utɔ ndiye ŋkpɔ.

25 Iŋ, ndien enye nko okut ete ke esit mmɔ ama emenere ke ɔkpɔsɔŋ unam inua, ye ke ntaŋidem mmɔ.

26 Ndien enye emenere uyo esie ɔnɔ heaven, onyuŋ eseme, ete: O, anyan ini didie, O Jehovah, ke afo ediyak ete ikɔt fo eduŋ mi ke isɔŋ ke obukidem, ndikut utɔ akwa ibak emi ke ufɔt nditɔ owo?

27 Sese, O Abasi, mmɔ eseme enɔ mi, ndien edi esit mmɔ ɔyɔhɔ ye ntaŋidem mmɔ. Sese, O Abasi, mmɔ eseme enɔ mi ye inua mmɔ, ke ini mmɔ etaŋde idem, tutu ekpon, ye mme ikpikpu ŋkpɔ ererimbot emi.

28 Sese, O Abasi mi, nsɔŋ urua ɔfɔŋ mmɔ, ye mme ŋkpainuen mmɔ, ye mme okpoho ubɔk mmɔ, ye mme ŋkpɔ mbana gold mmɔ, ye kpukpru ŋkpɔ uto mmɔ emi mmɔ ebanade idem; ndien sese, esit mmɔ esine ke mmɔ, ndien mmɔ eseme enɔ fi enyuŋ edɔhɔ ete—Nnyin imikɔm fi, O Abasi, koro nnyin idi mbon emi emekde enɔ fi, ke ini mbon efen editakde.

29 Iŋ, ndien mmɔ edɔhɔ ete ke afo eme anam mmɔ efiɔk ete ke Christ ididuhe.

30 O Jehovah Abasi, ke anyan ini didie ke afo ediyak ete utɔ ibak ye unana mbuɔtidem emi odu ke ufɔt mbon emi? O Jehovah, ndi afo eye ɔnɔ mi odudu, man ami nyɔ mme mmem idem mi. Koro idem emem mi, ndien utɔ ibak emi ke ufɔt mbon emi abiak ukpɔŋ mi.

31 O Jehovah, esit mi ɔfuhɔ ata eti eti; ndi afo eye ɔdɔŋ ukpɔŋ mi esit ke Christ. O Jehovah, ndi afo eye ɔnɔ mi ete ami nyene odudu, man ami nyɔ ye ime mme ukut emi edisimde mi, ke ntak ukwaŋ-ŋkpɔ mbon emi.

32 O Jehovah, ndi afo eye ɔdɔŋ ukpɔŋ mi esit, onyuŋ ɔnɔ mi erikan, nko ye mme nsaŋa utom mi emi edude ye ami—iŋ, Ammon, ye Aaron, ye Omner, nko ye Amulek ye Zeezrom, nko ye nditɔ iren mi iba—iŋ, kpa kpukpru emi ke afo edidɔŋ esit, O Jehovah. Iŋ, ndi afo eye ɔdɔŋ mmɔ esit ke Christ.

33 Ndi afo eye ɔnɔ mmɔ ete mmɔ enyene odudu, man mmɔ eyɔ ukut mmɔ emi edisimde mmɔ ke ntak mme ukwaŋ-ŋkpɔ mbon emi.

34 O Jehovah, ndi afo eye ɔnɔ nnyin ete nnyin inyene erikan ke ndifiak nda mmɔ ndi nnɔ fi ke Christ.

35 Sese, O Jehovah, ukpɔŋ mmɔ edi akpan, ndien ediwak mmɔ edi nditɔ eka nnyin; ke ntak oro, nnɔ nnyin, O Jehovah, odudu ye ifiɔk man nnyin ifiak ida, nditɔ eka nnyin emi, inɔ fi.

36 Idaha emi edikem ete ke ini Alma ama eketiŋ mme ikɔ emi, ete enye odori kpukpru mbon emi ekedude ye enye ubɔk ke idem. Ndien sese, nte enye odoride mmɔ ubɔk ke idem, mmɔ eyɔhɔ ye Edisana Spirit.

37 Ndien ke oro ebede mmɔ ediaŋare idem mmɔ ekpɔŋ kiet eken, ikereke ibaŋa idem mmɔ se mmɔ edidiade, mme se mmɔ ediŋwɔŋde, mme se mmɔ edisinede.

38 Ndien Jehovah ɔnɔ mmɔ ete biɔŋ idɔŋke mmɔ, nko itɔŋ isatke mmɔ; iŋ, ndien enye nko ɔnɔ mmɔ odudu, ete mmɔ ukuyɔ utɔ ukut ndomo kiet, ibɔhɔke edi erikan ke idaresit ke Christ. Idaha emi emi ekedi nte akam Alma ekedide; ndien emi ke ntak emi enye eke ɔbɔŋde akam ye mbuɔtidem.