1 Ndien edikem ete kini ikɔt Ammon ema eke esiaha ke isɔŋ Jershon, ndien esiak ufɔk Abasi ŋko ke isɔŋ Jershon, ndien enim mbon ekɔŋ mme Nephite ekanare isɔŋ Jershon, iŋ, ke ofuri adaŋa emi akanare isɔŋ Zarahemla; sese mbon ekɔŋ mme Lamanite ema etiene nditɔ eka mmɔ eduk wilderness.

2 Ndien ke ntem utibe eŋwan ama odu; ihŋ, kpa utɔ emi edide akananam miduhe ke otu mme owo ke isɔŋ oro tɔŋɔ kini emi Lehi ɔkɔpɔŋde Jerusalem; ihŋ, ndien ema ewot mme duop eke mme tɔsin mme Lamanite enyuŋ esuan mmɔ.

3 Iŋ, ŋko ye ata uwot owo ama odu ke otu ikɔt Nephi; edi, ema ebin enyuŋ esuan mme Lamanite, ndien ikɔt Nephi efiak enyɔŋ edi isɔŋ mmɔ.

4 Ndien idahaemi emi ekedi ini emi ekekopde akamba mfuhɔ ye eseme ke ofuri isɔŋ, ke otu kpukpru ikɔt Nephi—

5 Iŋ, eseme mme ebekpa efuhɔde mme ebe mmɔ, ye ŋko mme ete efuhɔde nditɔ iren mmɔ, ye eyen aŋwan ɔfuhɔde eyen eka eren esie, ihŋ, eyen eka eren ɔnɔ mme ete mmɔ; ndien ke ntem ema ekop eseme mfuhɔ ke otu kpukpru mmɔ, nte efuhɔde iman mmɔ emi ekewotde.

6 Ndien idahaemi ke akpanikɔ emi ekedi eyo mfuhɔ; ihŋ, ini ndop-uyo, ye ini ɔkpɔsɔŋ utre udia ye akam.

7 Ndien ke ntem ke ɔyɔhɔ isua ukara efit mme ebiere ikpe eke etre ɔnɔ ikɔt Nephi;

8 Ndien emi edi mbuk Ammon ye nditɔ eka esie, mme isaŋ mmɔ ke isɔŋ Nephi, mme ndutuhɔ mmɔ ke isɔŋ oro, mme mfuhɔ mmɔ, ye mme ukut mmɔ, ye idaresit mmɔ emi akande ifiɔk owo, ye ekɔm ye ukpeme nditɔ eka ke isɔŋ Jershon. Ndien idahaemi yak Jehovah, Andifak kpukpru owo, ɔdiɔŋ ukpɔŋ mmɔ ke nsinsi.

9 Ndien emi edi mbuk mme ekɔŋ ye mme eneni ke otu mme Nephite, ye ŋko mme ekɔŋ ke ufɔt mme Nephite ye mme Lamanite; ndien ɔyɔhɔ isua ukara efit mme ebiere ikpe etre.

10 Ndien tɔŋɔ ke akpa isua tutu esim efit ada nsobo uwak tɔsin uwem edi; iŋ, ada uteŋe ŋkpɔ uduɔk iyip edi.

11 Ndien ebuk idem uwak tɔsin ke idak isɔŋ, ndien nko idem uwak tɔsin ke bu ke mme eboho ke iso isɔŋ; ihŋ, ndien uwak tɔsin ke efuhɔ mkpa iman mmɔ, ke ntak emi mmɔ anade nte efehe ndik, nte asaŋade ye mme eŋwɔŋɔ Jehovah, ete ke esin mmɔ ke idaha anana utit idiɔk.

12 Ke nte uwak tɔsin efen ke akpanikɔ efuhɔ mkpa iman mmɔ, edi mmɔ edaresit enyuŋ enemesit ke idorienyin, ye ke kpa efiokde, nte asaŋade ye mme eŋwɔŋɔ Jehovah, ete ke mmɔ eset man eduŋ ke ubɔk nnasia Abasi, ke idaha inemesit emi miditreke.

13 Ndien ke ntem nnyin ikut nte unana ndidi ukem ukem owo okponde ke ntak idiɔk ŋkpɔ ye ndudue, ye odudu satan, emi edide oto mme uduak ŋkari emi enye ekenimde nditap mme esit owo.

14 Ndien ke ntem nnyin ikut ikot ofuri esit eke nsin ifik mme owo ke iŋwaŋ-vine Jehovah; ndien ke ntem nnyin ikut akamba ntak emi mfuhɔ odude, ŋko ye idaresit—mfuhɔ ke ntak mkpa ye nsobo ke otu mme owo, ndien idaresit ke ntak uŋwana Christ ke uwem.