1 Ndien edikem ete mmɔ ema eka, enyuŋ etɔŋɔ ndikwɔrɔ ikɔ Abasi nnɔ mme owo, eduk ke mme synagogue mmɔ, ye ke mme ufɔk mmɔ; iŋ, ndien tutu mmɔ ekwɔrɔ ikɔ ke mme efak mmɔ.

2 Ndien edikem ete ke ini ema ekenam ɔkpɔsɔŋ utom ke ufɔt mmɔ, mmɔ etɔŋɔ ndikan ke otu mme ubuene; koro sese, ema ebin mmɔ esio ke mme synagogue ke ntak ntaha ɔfɔŋ mmɔ—

3 Ke ntak oro owo ike iyakke mmɔ eduk mme synagogue mmɔ ekpono Abasi, ke ekesede nte ndek; ke ntak oro mmɔ ekedi ubuene; iŋ, nditɔ eka mmɔ ekese mmɔ nte mbio; ke ntak oro mmɔ ekedi ubuene ke mme ŋkpɔ ererimbot; ndien nko mmɔ ekedi ubuene ke esit.

4 Idaha emi, nte Alma ekekpepde ŋkpɔ onyuŋ etiŋde ikɔ ɔnɔ mme owo ke obot Onidah, otu owo edi etiene enye, emi ekedide mbon emi nnyin ike itiŋde ibaŋa, emi ekedide ubuene ke esit, ke ntak unana mmɔ ke mme ŋkpɔ ererimbot.

5 Ndien mmɔ edi ebine Alma; ndien enye emi ekedide ada iso ke otu mmɔ ɔdɔhɔ enye ete: Sese, nso ke nditɔ eka mi emi edinam, koro kpukpru owo esinde mmɔ ke ntak unana mmɔ, iŋ, ndien akpan akpan mme oku nnyin; koro mmɔ ebin nnyin esio ke mme synagogue nnyin emi nnyin ike inamde utom eti eti ndibɔp ye mme ubɔk nnyin; ndien mmɔ ebin nnyin esio ke ntak ata unana nnyin; ndien nnyin inyeneke ebiet ndikpono Abasi nnyin; ndien sese, nso ke nnyin idinam?

6 Idaha emi ke ini Alma ama ekekop emi, enye ɔŋwɔŋɔre idem esie, iso esie ese enye nnen nnen, ndien enye ama okut akwa idaresit; koro enye ama okut ete ke mme ukut mmɔ ke akpanikɔ ama anam mmɔ esuhɔre-idem, ndien ke mmɔ ekedu ke mbeŋe idem ndikop ikɔ.

7 Ke ntak oro enye itiŋke ikɔ aba inɔ otu enyeken; edi enye anyan ubɔk esie, onyuŋ eseme ɔnɔ mbon emi enye eke okutde, emi eke etuade ŋkpɔfiɔk ke akpanikɔ, onyuŋ ɔdɔhɔ mmɔ ete:

8 Ami mekut nte ke mbufo emesuhɔre-idem ke esit, ɔfɔfɔn ɔnɔ mbufo.

9 Sese eyen eka fo ama ɔdɔhɔ ete, Nso ke nnyin idinam?—koro ebin nnyin esio ke mme synagogue nnyin, man nnyin ukukan ukpono Abasi nnyin.

10 Sese ami ndɔhɔ mbufo, ndi mbufo ekere ete ke mbufo ikemeke ndikpono Abasi ibɔhɔke edi ke mme synagogue mbufo ikpɔŋ?

11 Ndien ke ndidian do, ami nyom ndibup, ndi mbufo ekere ete ke inaha mbufo ekpono Abasi ini kiet ke urua ikpɔŋ?

12 Ami ndɔhɔ mbufo, ɔfɔn ete ke ebin mbufo esio ke mme synagogue mbufo, man mbufo esuhɔre idem, ndien man mbufo ekpep ifiɔk; koro ɔfɔn ete mbufo ekpep ifiɔk; koro edi ke ntak emi ebinde mbufo esio, ntak emi nditɔ eka mbufo esinde mbufo ke ntak ata unana mbufo, ke eda mbufo edi nsuhɔre idem ke esit; koro eda mbufo edi ete esuhɔre idem.

13 Ndien idaha emi, ke ntak emi ekpakde mbufo ete esuhɔre idem ɔfɔfɔn ɔnɔ mbufo; koro owo usuk ini, edieke ekpakde enye ete ɔsuhɔre idem, oyom erikabare esit; ndien idaha emi ke akpanikɔ, owo ekededi emi akabare esit eye okut mbɔm; ndien enye emi okutde mbɔm onyuŋ emede tutu esim utit ukem oro ke erinyaŋa.

14 Ndien idaha emi, nte ami nketiŋde nnɔ mbufo, nte ke ntak emi ekpakde mbufo ete esuhɔre idem ɔfɔfɔn ɔnɔ mbufo, ndi mbufo ikere ite ke etim ediɔŋ mmɔ emi esuhɔre idem mmɔ ke akpanikɔ ke ntak ikɔ emi?

15 Iŋ, enye emi ɔsuhɔre idem esie ke akpanikɔ, onyuŋ akabare esit ke mme idiɔk ŋkpɔ esie, onyuŋ eme tutu esim utit, ukem oro ke edidiɔŋ—iŋ, ediɔŋ ekan mmɔ emi ekpakde ete esuhɔre idem ke ntak ata unana mmɔ.

16 Ke ntak oro, ɔfɔfɔn ɔnɔ mmɔ emi esuhɔre idem mmɔ ke ini owo mikpakke mmɔ ete esuhɔre idem; mme midighe, ke usuŋ efen, ɔfɔfɔn ɔnɔ enye emi ɔbuɔtde idem ke ikɔ Abasi, onyuŋ anade baptism idighe ke isɔŋ esit, iŋ, ke owo midaha mmɔ edifiɔk ikɔ, mme ekpakde mmɔ ete ɔfiɔk, mbemiso mmɔ ebuɔtidem.

17 Iŋ, ediwak edu emi edɔhɔde ete: Edieke afo ediwut nnyin idiɔŋɔ emi otode heaven, ke ini oro ke nnyin idifiɔk ke akpanikɔ; ke ini oro ke nnyin idibuɔt idem.

18 Idaha emi ami mbup, ndi emi edi mbuɔtidem? Sese, ami ndɔhɔ mbufo, Iŋ iŋ; koro edieke owo ɔfiɔkde ŋkpɔ emi enye minyeneke ntak ndinim, koro enye ɔfiɔk enye.

19 Ndien idaha emi, didie ke esuŋi enye emi ɔfiɔkde uduak Abasi ndien inamke enye, ekan enye emi ekerede ikpɔŋ, mme emi enyenede ntak ndikere ikpɔŋ, ndien ɔduɔ oduk ke ndudue?

20 Idaha emi ke abaŋa ŋkpɔ emi ana mbufo ebiere ikpe. Sese, ami ndɔhɔ mbufo, nte ke edi ke ubɔk kiet kpa nte edide ke eken; ndien eyedi ɔnɔ kpukpru owo nte utom esie edide.

21 Ndien ami nkedɔhɔ ke abaŋa mbuɔtidem—mbuɔtidem idighe ndinyene ifiɔk emi ɔfɔnde ama mbaŋa mme ŋkpɔ; ke ntak oro edieke mbufo enyenede mbuɔtidem mbufo edorienyin ke mme ŋkpɔ emi afo mukwe, emi edide akpanikɔ.

22 Ndien idaha emi, sese, ami ndɔhɔ mbufo, ndien ami meyom nte mbufo eti, ete ke Abasi enyene mbɔm abaŋa kpukpru owo emi ebuɔtde idem ke enyiŋ esie; ke ntak oro enye oyom, ke akpa ifet, ete mbufo ebuɔtidem, iŋ, kpa ke ikɔ esie.

23 Ndien idaha emi, enye ada mme angel etiŋ ikɔ esie ɔnɔ mme owo, iŋ, idighe iren owo ikpɔŋ edi ye iban nko. Idaha emi idighe kpukpru edi emi; enɔ mkpri nditɔ mme ikɔ ediwak ini, emi etimere mme ɔfiɔk ŋkpɔ ye mmɔ eke ekpepde ŋkpɔ.

24 Ndien idaha emi, ndima nditɔ eka mi, nte mbufo ebupde mi se mbufo edinamde ke ntak emi ukut esimde mbufo enyuŋ ebinde mbufo esio—idaha emi ami nyomke nte mbufo ekere ete ke ami nyom ndibiere ikpe nnɔ mbufo ikpɔŋ nte asaŋade ye se idide akpanikɔ—

25 Koro ami ndɔhɔke nte ke ekpak mbufo kpukpru mbufo ete esuhɔre-idem mbufo; koro ami ke akpanikɔ mekere nte ke usuk edu ke otu mbufo emi ekpesuhɔre idem mbufo, yak mmɔ edu ke ebiet emi mmɔ ekpedude.

26 Idaha emi, nte nketiŋde mbaŋa mbuɔtidem—ete ke idighe ndinyene ifiɔk ɔfɔnde ama—kpa ntre ke edi ye mme ikɔ mi. Mbufo ikemeke ndifiɔk akpanikɔ mmɔ ke akpa ini, nte mfɔn mma, nkan nte mbuɔtidem edide ifiɔk ɔfɔnde ama.

27 Edi sese, edieke mbufo edaha eda enyuŋ edemere odudu mbufo, tutu ke ndidomo mme ikɔ mi nse, enyuŋ enyene mbeŋe mbuɔtidem, iŋ, okposuk edi ke mbufo ikanke inam ikan ndiduak ndibuɔtidem, yak uduak emi anam utom ke idem mbufo, tutu mbufo ebuɔtidem ke usuŋ emi ekande enɔ mme ikɔ mi ebiet ke idem mbufo.

28 Idaha emi, Nnyin iye idomo ikɔ ye mkpasip. Idaha emi, edieke mbufo enɔde ufaŋ, ete etɔ mkpasip ke esit mbufo, sese, edieke edide ata mkpasip, mme eti mkpasip, edieke mbufo mibinke enye isio ito unana mbuɔtidem, man mbufo esin Spirit Jehovah, sese, enye eye ɔtɔŋɔ ndikpon ke esit mbufo; ndien ke ini mbufo ekopde edikpon emi, mbufo eyetɔŋɔ ndidɔhɔ ke idem mbufo ete—Ana edi ete ke emi edi eti mkpasip, mme ete ke ikɔ oro edi eti, koro ɔtɔŋɔ ndinam ukpɔŋ mi okpon; iŋ, enye ɔtɔŋɔ ndinam ifiɔk mi aŋwaŋa, iŋ, enye ɔtɔŋɔ ndinem mi.

29 Idaha emi sese, ndi emi idinamke mbuɔtidem mbufo ɔkɔri? Iŋ, edi enye ikɔrike isim ifiɔk ɔfɔnde ama.

30 Edi sese, nte mkpasip oro okponde, ndien etibe, onyuŋ ɔtɔŋɔ ndikɔri. Ndien idaha emi, sese, ndi emi idinamke mbuɔtidem mbufo ɔsɔŋ? Iŋ, enye eye anam mbuɔtidem mbufo ɔsɔŋ: koro mbufo eyedɔhɔ ami mefiɔk ke emi edi eti mkpasip; koro sese enye etibe onyuŋ ɔtɔŋɔ ndikɔri.

31 Ndien idaha emi, sese, ndi mbufo emetim efiɔk ete ke emi edi eti mkpasip? Iŋ, koro kpukpru mkpasip oŋwum nte idem esie.

32 Ke ntak oro, edieke mkpasip ɔkɔride enye edi eti, edi edieke mikɔrike, sese enye idighe eti, ke ntak oro etop enye eduɔk.

33 Ndien idaha emi, sese, ke ntak emi mbufo edomode ŋkpɔ emi ese, enyuŋ etɔde mkpasip, ndien enye okpon onyuŋ etibe, onyuŋ ɔtɔŋɔ ndikɔri, ana nte mbufo efiɔk ete ke edi eti mkpasip.

34 Ndien idaha emi, sese, ndi ifiɔk mbufo ɔfɔn ama? Iŋ, ifiɔk mbufo ɔfɔn ama ke ŋkpɔ oro, ndien mbuɔtidem mbufo inamke utom; ndien emi ke ntak emi mbufo efiɔkde, koro mbufo emefiɔk ete ke ikɔ anam esit mbufo okpon, ndien mbufo nko emefiɔk ete ke enye etibe, ete ke etɔŋɔ ndinam ifiɔk mbufo aŋwaŋa, ndien esit mbufo ɔtɔŋɔ nditara.

35 O ndien, ndi emi idighe akpanikɔ? Ami ndɔhɔ mbufo, Iŋ, ke ntak emi enye edide uŋwana, edi eti, koro efiɔk enye, ke ntak oro ana nte mbufo efiɔk ete ke enye edi eti; ndien idaha emi sese, ke ini mbufo etabide uŋwana emi ke ifiɔk mbufo ɔfɔn ama?

36 Sese ami ndɔhɔ mbufo, Iŋ iŋ; nko inaha nte mbufo esin mbuɔtidem mbufo, koro mbufo enam mbuɔtidem mbufo ke nditɔ mkpasip man mbufo edomo ese ndifiɔk mme mkpasip ama ɔfɔn.

37 Ndien sese, nte eto oro ɔtɔŋɔde ndikɔri, mbufo eye edɔhɔ ete: Yak nnyin itim ibɔk enye, man enye enyene oruŋ, man enye ɔkɔri, onyuŋ oŋwum mfri ɔnɔ nnyin. Ndien idaha emi sese, edieke mbufo etimde ebɔk enye enye eyenyene oruŋ, onyuŋ ɔkɔri, onyuŋ oŋwum mfri.

38 Edi edieke mbufo misehe enye enyin, inyuŋ ikereke ibaŋa udia esie, sese enye idinyeneke oruŋ ndomo kiet; ndien ke ini ufiop utin asiahade onyuŋ ɔfɔpde enye, sia enye minyeneke oruŋ enye eyemere, ndien mbufo ewupede enye enyuŋ etop enye eduɔk.

39 Idaha emi, emi idighe ke ntak emi mkpasip mike idighe eti, nko idighe ke ntak emi mfri oro midinemke; edi edi ke ntak emi isɔŋ mbufo mifɔnke, ndien mbufo ibɔkke eto oro, ke ntak oro mbufo ikemeke ndinyene mfri oro.

40 Ndien ke ntem, edieke mbufo midibɔkke ikɔ oro, ese mfri oro ye enyin mbuɔtidem, mbufo idikanke ikibi mfri ito eto uwem.

41 Edi edieke mbufo edibɔkde ikɔ oro, iŋ, ebɔk eto oro nte enye ɔtɔŋɔde ndikɔri, ye mbuɔtidem mbufo ye ata nsin ifik, ye ime, ese mfri esie, enye eye enyene oruŋ; ndien sese enye eyedi eto emi ɔkɔride edi nsinsi uwem.

42 Ndien ke ntak nsin ifik mbufo ye mbuɔtidem mbufo ye ime mbufo ke abaŋa ikɔ oro ke ndibɔk enye, man enye enyene oruŋ ke mbufo, sese, ibighike mbufo eyekibi mfri esie, emi ɔsɔŋde urua akan, emi enemde akan kpukpru se inemde, ye emi afiade akan kpukpru se idide afia, iŋ, onyuŋ asana akan kpukpru se isanade; ndien mbufo eyedia usoro ye mfri emi tutu mbufo eyuhɔ, man mbufo ukukop biɔŋ, nko isatke itɔŋ.

43 Ke ini oro, nditɔ eka mi, ke mbufo edidɔk mme utip mbuɔtidem mbufo, ye nsin ifik mbufo, ye ime, ye anyan ime, ebet eto oro oŋwum mfri ɔnɔ mbufo.