1 Ndien edikem ete kini mmɔ ema ekesiak ufɔk Abasi ke isɔŋ oro, ete edidem Lamoni enyene udɔŋ ete yak Ammon asaŋa ye enye eka isɔŋ Nephi, man enye okowut ete esie enye.

2 Ndien uyo Jehovah esim Ammon, ete: Afo ududɔkke uka isɔŋ Nephi, koro sese, edidem oyoyom uwem fo; edi afo ayaka isɔŋ Middoni; koro sese, eyen eka fo Aaron, ŋko ye Muloki ye Ammah edu ke ufɔk ŋkpɔkɔbi.

3 Idahaemi edikem ete kini Ammon okokopde emi, enye ɔdɔhɔ Lamoni ete: Sese, eyen eka mi ye nditɔ eka mi edu ke ufɔk ŋkpɔkɔbi ke Middoni, ndien ami ŋka man nnam mmɔ ebɔhɔ.

4 Idahaemi Lamoni ɔdɔhɔ Ammon ete: Ami mɔfiɔk, ke odudu Jehovah ke afo emekeme ndinam kpukpru ŋkpɔ. Edi sese, ami nyasaŋa ye afo ŋka isɔŋ Middoni; koro edidem isɔŋ Middoni, emi enyiŋ esie edide Antiomno, edi ufan mi; ke ntak oro ami nyaka isɔŋ Middoni,man ami mbiaŋa edidem isɔŋ oro, ndien enye oyosio nditɔ eka fo ke ufɔk ŋkpɔkɔbi. Idahaemi Lamoni obup enye ete: Anie owo ɔdɔhɔ fi ete ke nditɔ eka fo edu ke ufɔk ŋkpɔkɔbi?

5 Ndien Ammon ɔdɔhɔ enye ete: Owo ndomo kiet idɔhɔke mi, ibɔhɔke Abasi; ndien enye ɔkɔdɔhɔ mi ete—Ka knam nditɔ eka fo ebɔhɔ, koro mmɔ edu ke ufɔk ŋkpɔkɔbi ke isɔŋ Middoni.

6 Idahaemi kini Lamoni okokopde emi enye anam ete yak nditɔ ufɔk esie ebeŋe mme enaŋmbakara esie ye mme chariot esie idem.

7 Ndien enye ɔdɔhɔ Ammon ete: Di, ami nyesuhɔre ŋka isɔŋ Middoni ye afo, ndien do ami nyekpe edidem ubɔk man enye osio nditɔ eka fo ke ufɔk ŋkpɔkɔbi efep.

8 Ndien edikem ete nte Ammon ye Lamoni ekesaŋade eka do, mmɔ esobo ye ete Lamoni, emi ekedide edidem ke ofuri isɔŋ oro.

9 Ndien sese, ete Lamoni ɔdɔhɔ enye ete: Ntak emi afo mukudighe usɔrɔ ke akwa usen emi ami nkanamde usɔrɔ nnɔ nditɔ iren mi, ye ikɔt mi?

10 Ndien enye ɔdɔhɔ ŋko ete: Afo aka mmɔŋ ye Nephite emi, emi edide kiet ke otu nditɔ osu nsu?

11 Ndien edikem ete Lamoni ama ɔdɔhɔ enye ebiet emi enye akade, koro enye okop ndik ndinam esit ayat enye.

12 Ndien enye ŋko ama ɔdɔhɔ enye ofuri ntak emi enye akabiatde ini ke obio esie, man enye okuka ubine ete esie ukudia usɔrɔ emi enye ekenimde.

13 Ndien idahaemi kini Lamoni amaketiŋ ɔnɔ enye kpukpru mme ŋkpɔ emi, sese, ke mkpaidem esie, ete esie ayat esit ye enye, onyuŋ ɔdɔhɔ ete: Lamoni, afo ayanam mme Nephite emi ebɔhɔ, emi edide nditɔ iren osu nsu. Sese, enye ekeyip oto mme ete nnyin; ndien idahaemi nditɔ esie ŋko edi ke otu nnyin man mmɔ, ke ŋkari mmɔ ye mme nsu mmɔ, ebiaŋa nnyin, man mmɔ efiak eyip inyene nnyin.

14 Idahaemi ete Lamoni ɔnɔ enye uyo ete yak enye owot Ammon ye akaŋkaŋ. Ndien enye ŋko ɔnɔ enye uyo ete yak enye okuka isɔŋ Middoni, edi yak enye ɔnyɔŋ ye enye aka isɔŋ Ishmael.

15 Edi Lamoni ɔdɔhɔ enye ete: Ami ndiwotke Ammon, ŋko ami ndinyɔŋke ŋka isɔŋ Ishmael, edi ami nka isɔŋ Middoni man ami nkanam nditɔ eka Ammon ebɔhɔ, koro ami mɔfiɔk nte ke mmɔ edi ndinen owo ye ndisana prophet eke ata Abasi.

16 Idahaemi kini ete esie ama kokop mme ikɔ emi, enye ama ayat esit ye enye, ndien enye osio akaŋkaŋ esie man enye amia enye enim ke isɔŋ.

17 Edi Ammon ɔwɔrɔ ada onyuŋ ɔdɔhɔ enye ete: Sese, afo uduwotke eyen erenowo fo; edi, ɔkpɔfɔn ete enye ɔduɔ akan fi, koro sese, enye akabare esit abaŋa mme idiɔk ŋkpɔ esie; edi edieke afo ɔduɔde ke idahaemi, ke iyaresit fo, ukpɔŋ fo ikpibɔhɔ eriyaŋa.

18 Ndien ŋko, ɔfɔn ete yak afo etre; koro edieke afo owotde eyen eren fo, ke enye edide owo emi miduehe, iyip esie oyosioro uyo oto ke isɔŋ esim Jehovah Abasi esie, man usiene edisim fi; ndien ndusuk afo ayanana ukpɔŋ fo.

19 Idahaemi kini Ammon ama eketiŋ mme ikɔ emi ɔnɔ enye, enye ɔbɔrɔ enye, ete: Ami mɔfiɔk nte ke edieke ami nwotde eyen eren mi, ke ami nyeduɔk iyip owo emi miduehe; koro edi afo oyom ndiwot enye.

20 Ndien enye anyan ubɔk esie ndiwot Ammon. Edi Ammon ɔyɔ mme ita esie, ndien ŋko amia ubɔk esie tutu enye ikanke ida enye inam ŋkpɔ.

21 Idahaemi kini edidem okokutde ete ke Ammon ekeme ndiwot enye, enye ɔtɔŋɔ ndikpe Ammon ubɔk ete enye ɔsuhɔ uwem esie.

22 Edi Ammon emenere akaŋkaŋ esie, onyuŋ ɔdɔhɔ enye ete: Sese, ami nyamia fi ibɔhɔke afo enyime ɔnɔ mi ete ebin nditɔ eka mi esio ke ufɔk ŋkpɔkɔbi.

23 Idahaemi edidem, ke efehede ndik ete ke enye ayanana uwem esie, ɔdɔhɔ ete: Edieke afo ɔsuhɔre uwem mi ami nyɔnɔ fi ŋkpɔ ekededi emi afo oyomde, kpa kiet ke mbahare iba ubɔŋ.

24 Idahaemi kini Ammon okokutde ete ke enye anam akani edidem emi nte udɔŋ esie edide, enye ɔdɔhɔ enye ete: Edieke afo edinyimede ete ebin nditɔ eka mi esio ke ufɔk ŋkpɔkɔbi, ndien ŋko yak Lamoni enyene ubɔŋ esie, ndien ete ke afo uyatke esit ye enye, edi enyime ete enye anam nte asaŋade ye mme udɔŋ esie ŋkpɔ ekededi emi enye ekerede, ndien ami nyesuhɔ uwem fo; midihe ntre ami nyemia fi nnim ke isɔŋ.

25 Idahaemi kini Ammon amaketiŋ mme ikɔ emi, edidem ɔtɔŋɔ ndi daresit ke ntak uwem esie.

26 Ndien kini enye okokutde ete ke Ammon ikinyeneke udɔŋ ndiwot enye, ndien kini enye ŋko okokutde akwa ima emi enye ekenyenede ɔnɔ eyen eren esie Lamoni, idem ama akpa enye ata eti eti, ndien ɔdɔhɔ ete: Ke ntak emi edide kpukpru sidide udɔŋ fo, ete ami nsana nditɔ eka fo nyak, nyuŋ nyak eyen eren mi Lamoni enyene ubɔŋ esie, sese, ami nyenyime nnɔ fi nte eyen eren mi enyene ubɔŋ esie tɔŋɔ ke idahaemi ye ke nsinsi; ndien ami ndikarake enye aba—

27 Ndien ami nyenyime nnɔ fi ŋko nte ebin nditɔ eka fo esio ke ufɔk ŋkpɔkɔbi, ndien afo ye nditɔ eka fo ekeme ndi sobo ye ami, ke obio mi; koro ami nyetim nyom ndikut fi. Koro idem ama etim akpa edidem ke mme ikɔ emi enye eketiŋde, ŋko ye ke mme ikɔ emi eyen eren esie Lamoni eketiŋde, ke ntak oro enye ama enyene udɔŋ ndifiɔk mme ŋkpɔ emi.

28 Ndien edikem ete Ammon ye Lamoni eka iso ke isaŋ mmɔ eka isɔŋ Middoni. Ndien Ammon okut mfɔn-iso ke iso edidem isɔŋ oro; ke ntak oro ema esio nditɔ eka Ammon ke ufɔk ŋkpɔkɔbi.

29 Ndien kini Ammon okosobode ye mmɔ enye ama ɔfuhɔ ata eti eti, koro sese mmɔ ekedi iferi, ndien ikpa idem mmɔ ama ataha ata eti eti ke ntak emi ekebɔpde mmɔ ye ɔkpɔsɔŋ uruk. Ndien mmɔ ŋko ema ekop biɔŋ, nsat itɔŋ, ye kpukpru utɔ ukut; edi mmɔ ema enyene ime ke kpukpru ndutuhɔ mmɔ.

30 Ndien, nte eketibede, ekedi akaŋammɔ ndiduɔ nduk ke ubɔk mbon emi ekesɔŋde esit enyuŋ esɔŋde ibuot ekan; ke ntak oro mmɔ ikpaŋke utɔŋ inɔ mme ikɔ mmɔ, ndien mmɔ ema ebin mmɔ esio, ema enyuŋ emia mmɔ, ndien ema ebin mmɔ ke ufɔk ke ufɔk, ye ke ebiet ke ebiet, tutu mmɔ edisim ke isɔŋ Middoni; ndien do ema emum mmɔ enyuŋ esin ke ufɔk ŋkpɔkɔbi, enyuŋ ebɔp ye mme ɔkpɔsɔŋ uruk, enyuŋ enim mmɔ ke ufɔk ŋkpɔkɔbi ediwak usen, ndien Lamoni ye Ammon enam mmɔ ebɔhɔ.