Ongo Irouna
Tamara e ataia bwa ngkana ti otabwaniniaki n te nanokokoraki ao te maaku, te bwai ae na buokiira riki bon te ongo iroun Natina.
Tariu ao mwaneu, I rang ni kakaitau bwa rinanon kabonganakin bwaai n rabakau aika boou, ti a kona ni bootiira n taromauri ni Ingabongin te Tabati aei. Ti rang kakabwaiaki n ataia bwa e a tia ana euangkerio Iesu Kristo ni kaokaki nakon te aonaaba!
Wiiki tabeua n nako, angiina ibuakora ti a tia n rinanon te kamangaongao inanon maiura n tatabemaniira. Mwaiei, urarake, te ieka, buti n aoraki ao mwiia a tia ni kaburetatai karaoan baike ti taneiai ni kakaraoi ao ni karika te tare n te amwarake, kaako mai tinaniku ao karinimwane.
Rinanoan bwaai aikai, ti anga ara kakaitau ao ti karabwai ngkami ibukin nanomi n kan ongo ana taeka te Uea inanon taai ni kamangaongao man raonakira n te maungatabu ni kabuta. Te rotongtong ae rikirake ae raonaki ma te karawawataaki e karakaa riki otan Iesu Krsto bwa e na otamwaaka riki. Ti iangoa te raoiroi ae ti kona ni karaoi ngaira n tatabemaniira inanon tain te aki rau n te aonaaba. Am tangira ao am onimaki iroun te Tia Kamaiu e na kona n riki bwa te kaunga nakon temanna bwa e na kunea Kaokakin bwaninin ana euangkerio Iesu Kristo.
Uoua te ririki n nako, Titita Nelson ao ngai ti a tia ni kaitibo ma ngaa mai buakomi n te aonaaba. Ti a tia ni marooro ma ngkami n taabo ni bobotaki i tinaniku ao inanon outeero. N taabo nako aikai, I a tia n namakinna bwa I a mena irarikiia ana aomata te Uea aika a rineaki ao I a noora bobotakiia Iteraera bwa e a waaki i matau.
Ti maeka n te bong ae “ara bakatibu a tia n tataninga ma te kakantaninga ae korakora.”1 Ti noori bwai bwa a bon riki ni kakoauai raoi bwaai ake e noori te burabeti Nibwaai n tii te mii, bwa mwakan ana Tiibu te Teei te Atua e na ruo “nako aoia ana aomata i nanon te berita ae tabu te Uea, ake a maenako i aon te aonaba ni kabuta; ao a otangaia n te raoiroi ma mwaakan te Atua ao te mimitong ae korakora.”2
Ngkami, tariu ao mwaneu, kam mena ibuakoia mwaane, aine, ao ataei ake e noori Nibwaai. Iangoa aron anne!
N aki tabe bwa tao ko mena iia ke tera nako aromi, te Uea Iesu Kristo bon ami Tia Kamaiu, ao ana burabeti, Iotebwa Timiti, bon ami burabeti. E a kaman katabuaki imwain katean aan te aonaaba bwa te burabeti ibukin te kabanea n tai, are “akea iai te bwai ae e na tauaki”3 mai irouia Aika Itiaki. E reitinako raanganakon te kaotioti mairoun te Uea inanon Kaokan Bwai ae reitinako.
Tera aei nanona iroumi bwa ana Ekaretia Iesu Kristo e a tia ni kaokaki nakon te aonaaba?
Nanona bwa ngkoe ao am utu a na kona ni kabaeaki n aki toki! Nanona bwa ngkai ko a tia ni bwabetitoaki iroun ae iai irouna te kariaiakaki mairoun Iesu Kristo ao n tia ni kamatoaki bwa kain Ana Ekaretia, ko a kona ni kimwareirei n ana iraorao te Tamnei ae Raoiroi. E na kairiko ma ni kawakiniko. Nanona ko aki kona ni katukaki ma te aki rau n akea reitakim nakon mwakan te Atua ae e na buokiko. Nanona bwa mwaakan te nakoanibonga e kona ni kakabwaiako ngkai ko karekei otenanti ake a kainnanoaki ao ni karaoi berita aika tabu ma te Atua ma ni kawakinii. Ai te atinro ni koaua tera aikai nakon tamneira, moarara riki inanon taai ae rang ni korakora iai te buaka.
Ana Boki Moomon e rekotina waeraken ao bwakan uoua te baronga. Rongorongoia e kaota te baeten irouia angiia aomata ni waekoa ni mwanuoka te Atua, kaitarai aia kauring burabeti, ao n ukoukora te mwaaka, te kan kinaaki, ao kakukurein te iriko.4 N ae okioki, burabeti ngkoa a tia ni katanoata “a korakora ma ni moan te kamimi nakoia aomata, ake a bon aki kakoauai”5
Bon akea bitakina inanon ara bong. Rinanon ririki, bwai aika korakora ma ni kamimi a tia n ongoraeakinaki man taabo n taetae aika a tia ni katabuakaki n te aonaaba. Ma angiia aomata a aki nimtii koaua aikai—ibukina bwa tao aki ata te tabo ae na reke maiai6 ke ibukina bwa a ongo irouia naake akea te koaua ae bwanin irouia ke ibukina bwa a totokoa te koaua n tangira riki ukeran bwain te aonaaba.
Moan te wanawana te tia kakaitara. Inanon ngaa n ririki e a tia n karaoa te raoiroi ba e na taraa n buakaka ao te buakaka n taraa n raoiroi.7 Ana rongorongo a kona n rang ni karongoa, matoa, ao ni kamoamoa.
E ngae n anne, rongorongo mairoun Tamara are i karawa a bon rang kaokoro. Ana reitaki a bebete, a rau, ao ma te itiaki are ko na bon aki kona n aki oota iai.8
Te katotoo, ngkana E kaotiota Ana Riki Temanna nakoia aomata n te aonaaba, E a tia ni karaoia n ti tabeua taeka n te aro ae tamaroa. Iaon te Maunga n Oneaki ao nakoia Betero, Iakobo, ao Ioane, e taku te Atua, “Natiu ae tangiraki Teuaei: kam na ongo Irouna.”9 Ana taeka nakoia Nibwaite i Bountiful ngkoa e kangai “Nooria Natiu ae Moan te Tangiraki, are I kakatonga irouna, are e a tia ni mimitong arau irouna—kam na ongo irouna.”10 Ao nakon Iotebwa Timiti, n te katanoata ae nano are e kauka te tai n tokin boong, e taku te Atua, “Aio Natiu ae Tatangiraki. Ongo Irouna!”11
Ngkai, tariu ao mwaneu, iangoa te koaua bwa ni bwaai aika teniua aika a tibwa taekinaki, imwain ae kaota Natina, aomata ake a mena ikekei a rinanon te maaku ao, n atakina a ingainga.
A maaku Abotoro ngke a noora Iesu Kristo ni katobibiaki n te nang iaon te Maunga n Oneaki.
Nibwaite a maaku ibukina bwa a tia n rinanon te urubekebeke ao te rotongtong inanon tabeua te bong.
Iotebwa Timiti e mwaneaua n korakoran ana tautau te rotongtong bon imwain ae uki karawa.
Tamara e ataia bwa ti otabwaniniaki n te nanokokoraki ao te maaku, ae na buokiira riki bon te ongo iroun Natina.
Ibukina bwa ngkana ti ukeuke n kan ongora – n ongora ni koaua –iroun Natina, ti na kairaki bwa ti na atai bwaai ake ti na karaoi n arora nako.
Te moan taeka n Reirei ao Berita aika Tabu bon ongora.12 Nanona “kona kakauongo ma te nano ni kan ongeaba.”13 Te ongora nanona te “Ongo Irouna”—te ongo ni bwaai ake e taekin te Tia Kamaiu ao ngkanne ko na ongora raoi Ana reirei. N taeka aika uoua—“Ongo Irouna”—E anganiira te Atua te banna ibukin te kabwaia, te kukurei, ao te kimwareirei n te maiu aei. Ti na ongo ana taeka te Uea, ongora raoi nakoia, ao karaoi bwaai ake E tuangiira!
Ngkai ngaira ana reirei Iesu Kristo, ara mwakuri n ongo Irouna e riai riki bwa e na nako mai nanora. E anaa te nanoraoi ao te tatauraoi ni kanoa maeura ni katoa bong ma Ana taeka, reirei ao Ana koaua.
Ti bon aki kona n ti katan iaon rongorongo ake ti bo ma ngaai iaon bwaai n reitaki. Ma birion taeka iaonrain ao n te aonaaba ae a onrake ni bwaai ni bobwai are e aki toki n niniaki n te karongoa, ao ana mwakuri te tia kakaitara aika bubuaka, ti na nakea bwa ti aonga n ongo mairouna?
Ti kona n nakon booki aika tabu. A reireiniira taekan Iesu Kristo ao Ana euangkerio, korakoran ana Mwakuri ni Kamaiu, ao ana baire ni kakukurei ao ni kamaiu te Tama ae korakora. Te inako inanon ana taeka te Atua ni katoa bong a kakawaki ibukin kamaiuakira n tamnei e moara riki ni boong ae rikirake iai te kakumekume. Ngkana ti kanuaira ni katoa bong n ana taeka Kristo, ana taeka Kristo e na tuangiira arora ni kaeka nakon kangaanga ake ti aki atai bwa ti na kaitarai.
Ti kona naba n ongo Irouna inanon te tembora. Umwan te Uea bon te umwanreirei. Ikekei e reirei te Uea n oin ana kawai. Ikekei otenanti nako a reirei iaon te Tia Kamaiu. Ikekei, ti reiakinna arora ni katabwena te rabuna ao ni reitaki ma karawa n te aro ae itiaki riki. Ikekei, ti reiakinna arora ni boa te tia kakaitara ao ni karekea mwaakan ana nakoanibonga te Uea bwa e na kakorakoraira ao nake ti tangiriia. Mwaitira ingaingara n tatabemaniira n ukora te kamanoaki ikekei.
Ngkana a katokaki tiatianakin te CONVID 19 aika a aki teimatoa, taiaoka karekea am tai n taromauri ao n ibuobuoki n te tembora. Te miniti teuana ma teuana n te tai anne e na kakabwaiako ma am utu ni kawai ae akea riki ae na kona. Karekea am tai ni kanenea iangoan bwaai ake ko ongo ao n namakin ngkana ko mena ikekei. Butiia te Uea bwa E na reireiniko arom ni kauka karawa bwa e na kakabwaia maium ao maiuiia naake ko tangiriia man beku ibukiia.
Ngkana te nebonebo n te tembora e katokaki moa n te tai aei, I kaoko bwa ko na kamwaiti karaoan rongorongon te utu, ni ikotaki ma te kakae n rongorongon te utu ao te indexing. I berita bwa n am tai ni kamwaita am tai n te tembora ao ni mwakuria rongorongon te utu, ko na karaka man katamaroa riki am kona n ongo irouna.
Ti ongo Irouna naba ae mataata riki ngkana ti katamaroa ara kona ni kina ana wirikiriki te Tamnei ae Raoiroi. E bon tuai n rangi ni kakaawaki atakina bwa e kanga n taetae te Tamnei nakoim ma are ngkai. N te Atu n Atua, te Tamnei ae Raoiroi bon te tia uarongorongo. E angan ara kantaninga iango ake a tangiria te Tama ao te Nati bwa e na reke iroura. Bon ngaia te Tia Karaunano. E na uota namakinan te rau nakon nanom. E kakoaua te koaua ao e na kamatoa ae koaua ngkana ko ongo man wareka ana taeka te Uea.
I kaboua au bubuti nakoimi bwa kam na karaoa are e reke iroumi ni karaka ami konabwai n tamnei ni karekei oin ami kaotioti.
Karaoan aei e na buoki ngkami n atai aromi ni waakirake ma maiumii, tera ae kam na karaoi n taai ni kangaanga, ao kam na kanga ni kina ao man birinako man te kaririaki ao ana kewe te tia kakaitara.
Ao te kabanea, ti na ongo Irouna ngkana ti mutiakini aia taeka burabeti, taan mamata, ao taan karekei kaotioti. Ana Abotoro Iesu Kristo aika a katabuaki a kakoaua Iesu Kristo n taainako. A kaota te kawai ngkai ti karaoa kawaira rinanon te kawai ni kamwaninga ae kakatika te nano ni bwaai ake ti rinanoi ni maiura ae mamate.
Tera ae n riki ngkana bon nanom n ongo, kakauongo raoi, karaoa ae taku te Tia Kamaiu ao are e taekin ngkai rinanon ana burabeti? I berita bwa ko na kakabwaiaki ma te mwaaka ae raka riki ni buakana te karirii, keiakimwaaka, ao te mamara. I beritanii taian kakai nakon ami mare, ao ami iraorao n ami utu, ao ami mwakuri ni katoa bong. Ao I berita ami kona n namakinna te kukurei e na rikirake e ngae ngke e rikirake te mangaongao.
Te maungatabu ni kabuta n Eberi 2020 bon ara tai ni kauringa te bwai ae bita te aonaaba. Ngkai ti kantaninga ana ka 200 n ririki ana Moa ni Mii ni Burabeti Iotebwa Timiti, te Moan Beretitentii ao te Kauntira n Abotoro n te Tengaun ma Uoman a iangoa te bwai ae ti na karaoia ni kauringa raoi te tai aei.
Kaotin te Atua anne e moan ni kaota Kaokan bwaninin ana euangkerio Iesu Kristo ao ni butimwaia aomata ni koron raoi bongina.
Ti mimi ngkana e na tabekaki rake te kauring anne. Ma ngkai ti iangoa te rongorongo ae onoti ngkoa ao mwiin te Moan Kaotioti ae tabangaki, ti namakina te kukurei ni katea te kauring tiaki n te kurainaite ke te atibu ma n taian taeka—taeka aika mimitong ao n tabu—ni koreaki, n aki kaaraki iaon “baaba aika atibu” ma e na korotamneiaki iaon “baaba aika iriko” aika inanomi.14
Man te tai are e moan kateaki iai te Ekaretia, ti nimaua katanoata aika a tia ni kanakoaki, ma te kabanea ae “Te Utu: Te Katanoata nakon te Aonaaba,” e kanakoaki iroun Beretitenti Gordon B. Hinckley n 1995.
Ngkai ti kauringa te tai ae kakawaki aei n rongorongon te aonaaba ao taben te Uea ni ikotia kaain Iteraera aika a maenako ibukin te katauraoi ni Manga okin Iesu Kristo, ngaira, kaain te Moan Beretitentii ao Kauntira n Abotoro n te Tengaun ma Uoman, ti kanakoa te katanoata aei. Atuuna e kangai “The Restoration of the Fulness of the Gospel of Jesus Christ: A Bicentennial Proclamation to the World.” E koreaki man te Moan Beretitentii ao te Kauntira n Abotoro n te Tengaun ma Uoman n Ana Ekaretia Iesu Kristo ibukiia Aika Itiaki ni Boong aika Kaitira. E bonginaki n Eberi 2020. Ni katauraoi ibukin te bong aei, I a kaman n tia ni korea te katanoata aei n te Buakonikai ae Tabu, te tabo are e moan n noora iai te Tama ao te Nati Iotebwa Timiti.
“Ti kakoaua raoi bwa e tangiriia Natina te Atua n taabo nako n te aonaaba. E a tia te Atua te Tama n anganira te bungiaki maieta, te maiu ae akea kabotauana, ao ana karea ni kamaiu ae akea tokina Natina ae Tangiraki, Iesu Kristo. Man mwakan te Tama, e a tia ni mangauti Iesu ao ni karekea te tokanikai iaon te mate. Bon Ngaia te Tia Kamaiu, ara Banna ni Katooto, ao te Tia Kabooi maiura.
“Uabubua te ririki n nako, ni moaningabongin te tiburing n 1820, te kairake Iotebwa Timiti, e ukoria ni kan ataia bwa enga te ekaretia ae na iria, e nakon te buakonikai n tataro irarikin mwengana i New York, USA. Iai ana titiraki ni kaineti ma kamaiuan tamneina ao ni kakoaua bwa te Atua e na bon kairia.
“Ma te nanorinano, ti katanoata bwa te kaeka nakon ana tataro, te Atua te Tama ao Natina, Iesu Kristo, a kaoti nakon Iotebwa ao ni moana “kaokan bwai ni kabane’(Makuri 3:21) n aron are e a kaman taekinaki n te Baibara. N te mii aei, e reiakinna bwa imwiin maten te moan Abotoro, Ana Ekaretia Kristo n te Nu Tetemanti e bua man te aonaaba. E na riki Iotebwa bwa te bwai ni mwakuri n okina.
“Ti kakoaua bwa iaan ana kairiiri te Tama ao Natina, taan uarongorongo mai karawa a roko n tuanga Iotebwa ao ni manga katea ana Ekaretia Iesu Kristo. Ioane te tia Bwabetito ae kaokaki e kaoka te kariaia ni bwabetito man te kateboaki inanon te ran ibukin kabwaraan buure. Teniman mai ibuakoia moan Abotoro ake tengaun ma uoman—Betero, Iakobo, ao Ioane—a kaoka te mwakuri n abotoro ao kiing n te kariaia n te nakoanibonga. A roko naba tabeman, n raonaki ma Eria, are e kaoka te kariaiakaki bwa utu a na ikotaki n akea tokina n te reitaki n te maiu are akea tokina are e karika te mate.
“Ti kakoaua riki bwa Iotebwa Timiti e anganaki te bwaintangira ao mwakan te Atua n raira te rekooti are rimoa—Ana Boki Moomon: Kakoauan Taekan Iesu Kristo. Iteraniba n te koroboki ae tabu aei e irianaki ma rongorongon ana mwakuri Iesu Kristo ibuakoia aomata n iteran te Aonaaba are i maeao imwiin Manga Utina. E reirei bukin te maiu aei ao e kabwarabwarai ana reirei Kristo, are e kakawaki nakon te kantaninga anne. Ngkai te boki ae tabu ae reitaki ma te Baibara, Ana Boki Moomon e kakoaua bwa aomata ni kabane bon naati mwaane ao aine iroun Tamara are i Karawa aika a tangiraki, ao iai Ana babaire mai ieta ibukin maiura, ao bwa Natina, Iesu Kristo, e taetae n te bong aei n aron taai ake rimoa.
“Ti katanoata bwa Ana Ekaretia Iesu Kristo ibukiia Aika Itiaki ni Boong aika Kaitira, are e barongaaki n Eberi 6, 1830, bon Kakoauan ana Ekaretia Kristo ae Boou ae kaokaki. E boboto te Ekaretia aei iaon te maiu ae kororaoi ni maninganingan te atibu, Iesu Kristo, ao Ana mwakuri ni kamaiu ae akea tokina ma Mangautina. E a tia Iesu Kristo ni manga weteia Abotoro ao e a tia n anganiia te kariaia n te nakoanibonga. E kaoira ni kabane bwa ti na Nakoina ao n nakon Ana Ekaretia, ni karekea te Tamnei ae Raoiroi, otenanti ni kamaiu, ao ni karekea te kimwareirei ae teimatoa.
“Uabubua te ririki e a tia ngkai n toki ni moa man te tai are a Kaokaki iai bwai iroun te Atua te Tama ao Natina ae Tangiraki, Iesu Kristo. Mirion ni kabuta te aonaaba a tia ni kamoamoa te bwai ae a tia n rinanona burabeti aikai.
“Ti kukurei ni katanoata bwa Kaokan bwai ake a tia ni beritanaki ae a bon waaki nako rinanon kaotioti aika teimatoa. E aki kona te aonaaba ni manga titebo, ngkai te Atua e na “katiteuanai bwaai ni kabane iroun Kristo’ (I-Ebeto 1:10).
“Ma te rau ao te kakaitau, ngaira Ana Aboroto ti kaoi ngkami bwa kam na ataia—n aron ae ti ataia—bwa a na kaukaki karawa. Ti kamatoa bwa te Atua e katanoata Ana kantaninga ibukiia Natina mwaane ao aine aika tangiraki bwa a na ataia. Ti kakoaua bwa naake a tataromwaka ni kamatebwaia rongorongon Kaokakin bwaai ao ni karaoia ma te onimaki a na kakabwaiaaki ni karekei oin aia koaua ni mimitongina ao te kantaninga ni katauraoa te aonaba ibukin te berita ibukin Manga Okin ara Uea ao ara Tia Kamaiu, Iesu Kristo.”15
Tariu ao mwaneu aika kam tangiraki, anne bon ara katanoata nakon te aonaaba ni kaineti ma Kaokan bwai n ana euangkerio Iesu Kristo ae bwanin. E a tia n rairaki n taetae aika 12. Taetae ake tabeua ana karaoaki n te tai ae waekoa. Ana tauraoi iaon ana webutiate te Ekaretia n te tai ae waekoa, are kam kona ni karekei iai ami kaobi. Kamatebwaia bon iroum ao am utu ao raoraom. Iangoi koauana ao iangoi mwiin koaua aikanne aika a na riki nakon maium ngkana kam na ongoraai, ongo nako iai, ao ni karinei tuua ao berita ake a raonaki iai.
I ataia bwa Iotebwa Timiti bon te burabeti ae e a kaman katabuaki ae e rineia te Uea bwa e na kauka te kabanea ni bong aei. Rinanona te Uea e kaoka ana Ekaretia nakon te aonaaba. Iotebwa e kabaea ana koaua ma oin raraana. I rang tangiria man karinea!
E maiu te Atua! Iesu bon te Kristo! E tia ni kaokaki ana Ekaretia! Ngaia ao Tamana, are Tamara naba are i Karawa, a tararuaira. I kakoaua n aran Iesu Kristo ae tabu, amen.