Waraka tiko na Turaga
Na vakabauta e kena ibalebale na vakararavi vua na Kalou ena veigauna vinaka se ca, kevaka sara mada ga ena okati kina eso na rarawa me yacova ni da qai raica na Ligana ni vakatakilai mai ena vukuda.
Kemuni na taciqu kei na ganequ lomani, eda nanamaki kece tiko—e sega e dua e vakalevu cake mai vei au—me rogoca na itinitini ni vosa mai vua na noda parofita lomani, o Peresitedi Russell M. Nelson. Oqo e sa bau dua na koniferedi talei, ia e sa ikarua ni gauna me vukica kina na noda ituvatuva ni soqoni matau na matedewa na COVID-19. Eda sa rui vakaocai sara ena matedewa oqo ka vaka me drutilaka tani na drauniuluda. E laurai votu, ni so vei ira na Taciqu era sa vakayacora oti oqori. Yalovinaka ka kila ni keimami sa dau masulaki ira era sa vakaleqai ena sala cava ga, vakabibi vei ira sa yali na nodra daulomani. Na veitamata yadua e duavata kece ni toso ka balavu na kena tiko.
Ena vakacava beka na dede ni noda waraka na veivakacegui mai na dredre e tarai keda. Vakacava beka na vosoti tiko ni noda veivakatovolei yadua ni da wawa ka wawa ka vaka me berabera na veivuke? Na cava ebera kina ni vaka me sa qai bibi cake ga na icolacola me da colata?
Ni da taroga na taro eso va oqori, ena rawa, ke da tovolea, ka rogoca na tagi mai na vanua suasua, valeniveivesu butobuto donua na draki batabata ena gauna kei na vanua oya.
“Oi kemuni na Kalou, ko ni sa tiko evei?” eda rogoca mai na boto ni Valeniveivesu e Liberty. “Evei na vale ni vakaruru sa ubia na nomuni ivunivuni? A cava na kena dede ko ni na tarova tiko kina na ligamuni?” 1 A cava na kena dede, Oi kemuni na Turaga, a cava na kena dede?
Okoya gona, eda sega ni kenai imatai se iotioti me taroga na taro vaka oya ni bikai keda sobu na rarawa se na kena toso tikoga e dua na mosi ni lomada. Au sega ni vosa tiko oqo baleta na tete ni matedewa se na valeniveivesu ia baleti iko, nomu matavuvale, kei na wekamu era sotava e vuqa na bolebole eso. Au vosa tiko baleta na gagadre ni lewevuqa era vinakata me ra vakamau qai sega rawa era sa vakamau ka diva tu me vakasilesitieli cake na nodra bula vakawati. Au vosa ena vukudra o ira era sa lako curuma na veika drede ni mate eso—sega ni wali rawa—se sotava tu mai ena gauna balavu na veika dredre ni bula sega ni wali rawa. Au vosa baleta na sasaga tomani tiko ni bolebole vakayalo ka vaka-vakasama eso ka bika vakabibi tu na yalodra e lewevuqa era vosota tiko, kei na lomadra o ira era lomani ira ka vosota vata kei ira. Au vosa baleti ira na dravudravua, o ira a tukuna na iVakabula me da kakua ni guilecava, ka’u vosa tiko baleti iko ni o waraka tiko na nona lesu mai ni dua na gone, veitalia na nona yabaki, ka a digitaka e dua na salatu e duidui mai na kena o a masulaka me a taura o koya.
Me kena ikuri, au vakadinata na levu ni veika eda rairai waraka vaka yadudua tiko e sega ni walia na kauwai levu eso vaka-rawailavo, vaka-politiki, ka vaka-veimaliwai ka sotavi keda kece tu. Na Tamada mai Lomalagi e gadreva meda raica na leqa lelevu eda sotava vata tu vaka kina na noda dui leqa, ia ena so na gauna na noda dui bula vakayalo se na sasaga, na noda masu ena sega ni yacova na qaqa ena noda gagadre se na leqa lelevu e sotavi tu e vuravura se na noda dui leqa yadudua. Okoya gona ni da cakacaka ka waraka tiko na isau na noda masu, au sa solia vei iko na noqu yalayala vakai-apositolo ena rogoci ka na saumi mai, ia e sega beka ena gauna se ena sala eda vinakata kina. Ia era sa dau saumi tu ga mai ena gauna kei na sala e dodonu me ka dau sauma me vaka e sauma edua na itubutubu dauloloma. Kemuni na taciqu kei na ganequ lomani, yalovinaka mo ni kila ni o Koya ka sega vakadua ni moce se sosovu 2 e kauwaitaka vakalevu nodra marau bula kei na bula cereceri ni Luvena mai na ka kece e vakalou. O Koya na dau loloma dina, lagilagi vakaikoya, kei Tamada Dauloloma ena Yacana.
“Ke sa vaka oya,” ona kaya, “sega ni Nona loloma kei yalo loloma e tawasea kina na noda dui Wasawasa Damudamu ka vakatarai ira me ra lako sivita na dredre ena vanua mamaca? E sega beka ni dodonu me tala mai o Koya eso na kasaqa ni ka 21 ni senitiuri me ra vuka mai na dua na vanua me tiloma kece na noda vodre dauvakacaca ni ka 21 ni senitiuri?”
Na isau ni taro eso vaka oqori e “Io, na Kalou e rawa ni vakarautaka na cakamana ena gauna vata ga oya, ia eda na qai vulica totolo sara se emuri ni veigauna kei na itabagauna ni noda ilakolako vakayago e sa Nona ka Nona duadua ga me dusimaka.” E dau vakatulewataka o Koya na ivolanivula oya kivei keda vakayadudua kece sara. Vei ira yadua na tamata tauvimate ka vakabulai vakasauri ni waraka tiko me curu ki nai Silisili i Peceseita, 3 e dua tani tale ena tu mada me 40 na yabaki ena lekutu ni waraka tiko me curu ki na vanua yalataki. 4 Vei ira yadua na Nifai kei na Liai ka taqomaki vakalou mai na dua na bukawaqa vei vakavolivoliti baleta na nodrau vakabauta, 5 e dua kina na noda Apinatai a vakamai ena dua na duru bukawaqa me baleta na nona vakabauta. 6 Ka da qai nanuma ni o Ilaija vataga ka a kaciva sobu mai na bukawaqa mai lomalagi me ivakadinadina vei ira na bete i Peali 7 sa ikoya vata ga na Ilaija ka a vosota ena dua na gauna ni a sega tu kina na uca me vica na yabaki ka, ena dua na gauna, a vakani wale tu ga o koya ena kakana lailai sara ka rawa ni tuberi ena iqaqalo ni dua na reveni. 8 Ena noqu nanuma, oya e sega sara ni dua ga na ka e rawa me da vakatoka me dua na “ivaqa marautaki.”
Na tikina bibi? Na tikina bibi sa ikoya ni vakabauta e kena ibalebale na vakararavi vua na Kalou ena veigauna vinaka se ca, kevaka sara mada ga ena okati kina eso na rarawa me yacova ni da qai raica na Ligana ni vakatakilai mai ena vukuda. 9 Oya ena rawa ni dredre toka ena noda vuravura vou oqo ni lewevuqa era sa mai vakabauta ni vinaka cecere duadua ni bula oya me levei na rarawa kecega, ni sega ni dua e dodonu me yaluma sara ena veika cava ga. 10 Ia na vakabauta oya ena sega sara ni veimuataki ki “nai vakarau ni tamata dina, era sa sinai sara kei Karisito.” 11
Ena kere veivosoti vei Elder Neal A. Maxwell baleta noqu doudou me veisautaka ka semata e dua na ka a kaya ena dua na gauna, au talega au vakatura ni “nona bula e dua … e sega ni rawa me vakasinaiti-ena-vakabauta ka galala-ena-lomaocaoca.” Ena sega ga ni na cakacaka “me da vuka ena lecaika ena bula qo,” ka kaya tiko ni da todrou mai na dua tale na bilo wainimoli: “Turaga, ni solia vei au na nomuni itovo savasava digitaki kece, ia mo ni kua ga ni solia vei au na yalobibi, se rarawa, se mosi, se veivorati. Yalovinaka ni kakua ni laiva e dua ga me cati au se cakitaki au, ka vakauasivi duadua, kakua sara ni laivi au me vakila ni’u sa vakanadakui mai vei Kemuni se o ira au lomana. Vakaidina, Turaga, ni qarauna mo ni maroroi au mai na veika sotavi kece ka a vakavuna na Nomuni vakalou. Ia ni mai cava na vakasisisi voravora mai vei ira na tani, yalovinaka ni laivi au me lako yani ka tiko kei Kemuni, me’u rawa ni raqataka me baleta na sala edaru sa tautauvata kina ni’u vakaciriciri voli ena reki ena noqu o ni Lotu Vakarisito dakoba vinaka.” 12
Kemuni na taciqu kei na ganequ lomani, na Lotu Vakarisito e veivakacegui, ia e vakavuqa e sega ni dau logaloga vinaka. Na salatu ki na bula vakalou ka mamarau eke ka vakakina ni oti eke, e balavu ka sukusukura ena so na gauna. E dau taura na gauna kei na yalodei me taubaletaki. Ia, e dina, na isau ni kena caka oqori e vakaitamera sara. Na dina oqo e vakatavulici vakamatata ena sala veivakauqeti enai ka 32 ni iwase i Alama ena iVola i Momani. E kea e vakatavulica na bete levu cecere oqo ni kevaka e teivaki na vosa ni Kalou e lomada vaka dua na sorenikau walega, ka kevaka eda qarava vinaka me da suiya, samaka, vakabulabulataka, ka vakauqeta, ena gauna e muri ena vuataka na vuana “na ka sa taleitaki duadua, … kamica duadua vei ira na ka kamikamica taucoko,” ia na kena laukana ena veimuataki ki na dua na ituvaki ni sega ni viagunu se viakana tale. 13
E vuqa na lesoni e vakatavulici ena iwase totoka oqo, ia e loma kece qori oya na itukutukuni ni sorenikau me na vakabulabulataki ka me da qai waraka me matua, “ka rai ki liuena mata ni vakabauta ki na vuanikau ko ya.” 14 Na noda tatamusuki, e kaya o Alama, me “qai yaco na gauna.” 15 E sega ni veivakurabuitaki ni tinia o koya na nona ivakaro ni tukuna tale vakatolu na kaci ni gugumatua kei na vosotaena kena vakabulabulataki na vosa ni Kalou ena lomada, ni da“waraka tikoena “vosota-vakadede,” me vaka e kaya o koya, “na vunikau me vuataka na vuana vei kemuni.” 16
Na COVID kei na kenisa, vakatitiqa kei na taqaya, leqa vakailavo kei na veivakatovolei ni matavuvale. Ena qai laveti beka ni naica na icolacola eso oqo? Na kena isau oya na “qai yaco na gauna.” 17 Ia ke na lekaleka na gauna oya se na balavu e sega ni dau noda me da na kaya, ia mai na loloma soliwale ni Kalou, na veivakalougatataki ena yaco mai vei ira era kukube matua ki na kosipeli i Jisu Karisito. Na kauwai oya a wali rawa ena dua na were vuni sara ka ena dua na delana raraba sara e Jerusalemi ena dua na gauna balavu sa oti.
Ni da na rogoca oqo na noda parofita lomani ni tinia na koniferedi oqo, me da qai nanuma, me vaka sa dau vakaraitaka o Russell Nelson ena nona bula taucoko, ni o ira era “sa waraki Jiova era na vakaukauwataki tale [ka] cabe cake me vaka era vakatabana vakaikeli; era na cici, ka sega ni oca; era na lako tu, ka sega ni malumalumu.” 18 Au masuta ni “qai yaco na gauna”—totolo se berabera—na veivakalougatataki eso oqori ena lako mai vei kemuni kece sara o ni vakasaqara na veivakacegui mai na nomuni rarawa kei na galala mai na nomuni yalobibi. Au vakadinadinataka na loloma ni Kalou kei na Vakalesuimai ni Nona kosipeli lagilagi, okoya na isaunitaro ki na leqa kecega eda sotava. Ena yaca tabu dauveivueti ni Turaga ko Jisu Karisito, emeni.