Avanoa i le Faletalimalo

Saunia e Elder Gerrit W. Gong

O Le Korama a Aposetolo e Toasefululua

I lenei vaitau o le Eseta, o loo valaaulia i tatou e Iesu Keriso ia avea, e faapei o Ia, o se Samaria agalelei, ia fai Lona faletalimalo (Lana Ekalesia) o se lafitaga mo tagata uma.

Uso e ma tuafafine pele, e ui ina ua 20 tausaga talu ona maliu o ia, ae e i ai taimi ou te misia ai lo’u tama. Ua folafola mai e le Eseta, o le a ou toe vaai ia te ia.

I le taimi na ou i ai i le iunivesite i Egelani, sa alu atu lo’u tama e asiasi atu. Na iloa i ona lagona faaletamā, sa ou misia lo’u aiga.

Sa fiafia lo’u tama e vailiili mea fou sei vagana ai meaai. E oo lava i Farani, na ia matauina le kukaina o meaai, ma e faapea mai sana tala, “Ai tatou meaai faaSaina.” Na umi ona galue o se peteriaka i le Ekalesia, ma o lo’u tama sa faaleagaga ma loloto lona agaalofa. I se tasi po, a o femasaua’i ma feei leotetele sailini o taavale mo faalavelave faafuasei i le atu Pale, na ia fai mai, “Gerrit, o tagisaga na a manu’aga o se aai.”

I lena malaga, sa ou lagonaina ai isi tagisaga ma ni manu’aga. Sa faatau atu e se tamaitai talavou aisakulimi mai se tama’i taavale tulei. O ana ipu o le aisakulimi sa fetaui lelei ma le tele o le asuga e tasi o le aisakulimi. Ou te le iloa pe aisea, ae sa faafeto’ai e se tamaloa lapo’a le tamaitai talavou. Sa soona leotele ma tautulei, ma sa ia fuliina lana taavale, ma masaasaa ai ana ipu o aisakulimi. Sa leai se mea ou te mafaia, aua na ia solipalaina ia ipu o aisakulimi i ona seevae mamafa. O loo mafai lava ona ou vaai atu i le tamaitai talavou i ona tulivae i luga o le auala, o taumafai e faasao fasi nutiga ipu o aisakulimi, ma loimata o le mafatia o tafe ifo i ona foliga. E tele ina ou mafaufau pea ma le faanoanoa i lenei mea, o se faamanatu o le agaleaga, leai o se manatu alofa, le malamalama e tele taimi tatou te faia i le tasi ma le isi.

I se tasi aoauli, e lata i Pale, sa ma asiasi ai ma lo’u tama i le falelotu tele i Chartres. O Malcolm Miller,¹ o se tagata poto faapitoa i le lalolagi i mea tau falelotu, na ia ta’ua patino ni seti se tolu o faamalama o atalanu o Chartres. Na fai mai a ia o loo faamatala mai ai se tala.

O faamalama muamua o loo faaali mai ai Atamu ma Eva ua tuua le Faatoaga o Etena.

O le lona lua o loo faamatala mai ai le faataoto i le Samaria agalelei.

O le lona tolu o loo faamatala mai ai le Afio Mai Faalua o le Alii.

A tuufaatasi, o nei faamalama o atalanu o loo faamatala mai ai la tatou faigamalaga i le ola e faavavau. O loo latou valaaulia i tatou ia talileleia tagata uma ma ia mautinoa o loo i ai se avanoa mo tagata uma i le malo o le Alii.²

E pei o Atamu ma Eva, ua tatou o mai i se lalolagi o mea matuitui ma le lavelave.³

I luga o o tatou auala pefupefua i Ieriko, e faasalaveia i tatou e puapuaga o le olaga, ma faamanu’alia, ma tuua ai ma le tiga.⁴

E ui e ao ina tatou fesoasoani le tasi i le isi, ae tele taimi tatou te ui ese atu ai i le isi ituala, po o le a lava le mafuaaga.

Ae peitai, faatasi ai ma le agaalofa, sa tu le Samaria agalelei ma fusifusi o tatou manu’anu’a i le uaina ma le suauu. O faatusa o le faamanatuga ma isi sauniga, o le uaina ma le suauu e faasino atu ai i tatou i le faamalologa faaleagaga ia Iesu Keriso.⁵ Na tuuina e le Samaria Agalelei i tatou i luga o Lana lava asini po o le, i isi tala o faamalama o atalanu, o tauave i tatou i luga o Ona tau’au. Na te aumaia i tatou i le faletalimalo, lea e mafai ona faatusa i Lana Ekalesia. I le faletalimalo, na fai atu ai le Samaria Agalelei, “Tausi ia te ia; … ou te taui atu ia te oe pe a ou toe sau.”⁶ Na folafola mai le Samaria Agalelei, o se faatusa o lo tatou Faaola, ua folafola mai, o le taimi lea e foi mai i le tulaga tautupu ma le mamalu.

Aemaise lava i lenei vaitau o le Eseta, o loo valaaulia i tatou e Iesu Keriso ia avea, e faapei o Ia, o se Samaria agalelei, ia fai Lona Faletalimalo (Lana Ekalesia) o se lafitaga mai uno’oa uma ma afa o le olaga.⁷ Tatou te saunia mo Lona Afio Mai Faalua ua folafola mai a o tatou faia i aso taitasi “i se aupito itiiti o i latou nei”⁸ e faapei ona tatou faia ia te Ia. “O se aupito itiiti o i latou nei” o i tatou ia taitoatasi.

A o tatou o mai faatasi ma le Samaria Agalelei i le Faletalimalo, tatou te aoao ai ni mea se lima e uiga ia Iesu Keriso ma i tatou lava.

Muamua, tatou te o mai i le faletalimalo e pei ona tatou i ai, faatasi ai ma uiga faalenatura ma lē atoatoa o ia i tatou uma. Ae, e tofu uma lava i tatou ma se mea e manaomia ona foai atu. E tele ina tatou maua lo tatou ala e foi atu ai i le Atua e ala i sootaga ma isi. O i tatou o se nuu soofaatasi—pe o fetaiai ma faama’i oti, afa, afimumu, lamala, po o le taulimaina e aunoa ma se leo o manaoga o aso taitasi. Tatou te maua musumusuga pe a tatou fefautuaai faatasi, faalogologo i tagata taitasi, e aofia ai tuafafine taitasi, ma le Agaga.

A o suia o tatou loto ma maua Ona foliga i o tatou mata,⁹ tatou te vaaia o Ia ma i tatou lava i Lana Ekalesia. E ala ia te Ia, tatou te maua ai le manino, ae le o le fevaevaea’i. E ala ia te Ia, tatou te maua ai le faamoemoe e fai mea lelei, mafuaaga ia lelei ai, ma le gafatia faateleina e lelei atili ai. E ala ia te Ia, tatou te iloa ai le faatuatua tumau, o le le manatu faapito e tuusaoloto ai, suia i le manatu alofa, ma le faalagolago i le Atua. I Lona Faletalimalo, tatou te maua ai ma faalolotoina la tatou sootaga patino ma le Atua lo tatou Tama ma Iesu Keriso.

Na te faatuatuaina i tatou ia tatou fesoasoani ia faia le faletalimalo ma nofoaga Na te moomia ona i ai. A tatou ofoina atu a tatou taleni ma taumafaiga aupito sili, o Ana meaalofa faaleagaga foi o le a faamalolosia ma faamanuiaina ai.¹⁰

Sa ta’u mai e se faamatalaupu o le gagana Sipaniolo, “Elder Gong, sa ou iloaina e ala i le Agaga mea o le a e saunoa i ai ina ia mafai ai ona ou faaliliuina,” na fai mai lenei uso faamaoni, “e ala i le meaalofa o gagana.

E oo mai meaalofa o le faatuatua ma le faamautinoaga, e eseese lona faaalia mai i tulaga eseese. Sa maua e se tasi tuafafine pele le faamafanafanaga faaleagaga ina ua maliu lona toalua mai le KOVITI-19. Na fai mai a ia, “Ou te iloa o le a ma toe faatasi ma lo’u toalua pele.” I se tulaga e ese o le KOVITI, na fai mai ai se isi tuafafine pele, “Sa ou lagona e tatau ona ou aioi atu i le Alii ma fomai e toe tuu mai i lo’u toalua sina taimi faaumiumi.

Lona lua, ua finagalo o Ia ia tatou faia Lona Faletalimalo o se nofoaga o le agaalofa ma se avanoa, ia e mafai ona faapotopoto ai tagata taitasi, ma maua se avanoa mo tagata uma. I le avea ai o ni soo o Iesu Keriso, e tutusa tagata uma, e leai ni vaega e tulagalua.

E talia tagata uma e auai i sauniga faamanatuga, o isi sauniga i le Aso Sa, ma gaoioiga faaagafesootai.¹¹ Tatou te tapuai ma le migao i lo tatou Faaola, e mafaufau ma amanaia e le tasi le isi. Tatou te vaai ma aloaia tagata taitasi. Tatou te soisoi, nonofo faatasi ma ē e nonofo na o i latou, aoao ia iloa igoa, e aofia ai tagata faatoa liliu mai, o uso ma tuafafine ua toe foi mai, o tamaitai talavou ma alii talavou, o tamaiti pele taitasi o le Peraimeri.

Manatu faapea o tatou i ai i o latou tulaga, tatou talileleia uo, tagata asiasi mai, tagata faatoa masii mai i o tatou eria, o tagata e pisi i le fetosoa’iina i le mau mea. Tatou te faanoanoa, olioli, ma e tatou te i ai iina mo le tasi ma le isi. Pe a tatou lape i le faatinoga o o tatou tiute ma ua fenatia’i, ua lē mautonu, ua faamasinosino, pe ua faafiasili, tatou te sailia le faamagaloga a le tasi ma le isi ma faia ia sili atu.

Fai mai se aiga mai Aferika ua nonofo nei i le Iunaite Setete, “Mai lava i le aso muamua, sa agalelei ma talileleia i matou e tagata o le Ekalesia. Sa faia e tagata uma ia matou lagonaina lo matou i ai i lo matou aiga. E leai se tasi na vaai maualalo ia i matou.” Fai mai le tama, “O loo aoao mai e le Tusi Paia o fua o le talalelei e mai a’a o le talalelei.” “O faifeautalai foi,” na fai mai ai le tama ma le tina, “ma te mananao i lo ma atalii ma lo ma afafine ia ola a’e e faapei o na faifeautalai.” Uso e ma tuafafine, ina se’i o tatou faaulufale maia tagata taitasi uma i Lona Faletalimalo.

Lona tolu, i Lona Faletalimalo, tatou te aoao ai o loo ia Iesu Keriso le atoatoa, ae le o i le lalolagi. O mea e le moni ma e le tinoa, o mea ua manatu le lalolagi ua atoatoa ma tatou manatu ai ua tatau ona faalele i peaulagi, tatou te lagona ai le le agavaa, ma nofopologa ai i taga e fai i fesootaiga faaagafesootai. I se tulaga e ese ai, e silafia e lo tatou Faaola o Iesu Keriso mea uma e uiga ia i tatou ia tatou te le mananao ia iloa e isi, ma e alofa pea lava o Ia ia te i tatou. O Lana talalelei o ni avanoa tatou te faaleleia ma foia ai mea sese, ua mafai ona o Lana taulaga togiola.¹² Na te valaaulia i tatou taitasi ia avea ma Samaria agalelei, ia tuuitiitia le faamasinosino ma ia tele le lotofaamagalo mo i tatou lava ma faapea ma isi, e pei ona tatou tauivi atoatoa e tausi Ana poloaiga.

Tatou te fesoasoani ia i tatou lava pe a tatou fesoasoani le tasi i le isi. E i ai se aiga ou te iloa sa nonofo e lata i se auala pisi. E tele ina tutu ai tagata faimalaga ma fesili mo se fesoasoani. I se tasi taeao po, sa faalogoina ai e le aiga se tu’itu’i leotele i lo latou faitotoa. I le vaivai ma le popole pe mata o ai i le ta o le 2:00 i le vaveao, sa latou taumanatunatu ai pe a, pe a tau lava o le taimi lea e tasi, ia fesoasoani ane i ai se isi tagata. A o faifai pea lea tu’itu’i, sa latou faalogoina, “O le afi—o loo sasao le afi i tua o le tou fale!” O Samaria Agalelei e fesoasoani le tasi i le isi.

Lona fa, i Lona Faletalimalo, e avea ai i tatou o se itutino o se nuu o le talalelei e faaogatotonu ia Iesu Keriso, e taulai i le upumoni toefuatai, o perofeta soifua ma aposetolo, ma o se tasi molimau ia Iesu Keriso—o le Tusi Mamona. Na te aumaia i tatou i Lona Faletalimalo ma faapea foi i Lona maota—o le malumalu paia lea. O le maota o le Alii o se nofoaga, e pei o le tagata na faamanu’alia i le ala i Ieriko, e mafai e le Samaria Agalelei ona faamama, faalavalava, ma saunia i tatou e toe foi atu i le afioaga o le Atua ma tuufaatasia i tatou e faavavau i le aiga o le Atua. E tatala Ona malumalu i tagata uma o e Ola i Lana talalelei ma le faatuatua ma le usiusitai.

O le olioli i le malumalu e aofia ai le lotogatasi i le talalelei e ui i talatuu eseese, aganuu, gagana, ma augatupulaga. I le suatiaina o le eleele mo le Malumalu o Taylorsville Iuta, sa faamatala mai ai e Max Harker, e 17 tausaga, se talatuu o le faatuatua o le aiga na amata i augatupulaga e ono na muamua atu e le tama, o le tama, o le tama o le tama o lona tamamatua o Joseph Harker ma lona toalua, o Susana Sneath. I le talalelei toefuataiina a Iesu Keriso, e mafai ona avea i tatou taitoatasi ma sooga malosi i augatupulaga a o tatou aiga.

O le mea mulimuli, lona lima, tatou te olioli aua e alofa le Atua i Ana fanau i o tatou talaaga ma tulaga eseese uma, i atunuu uma, ituaiga, ma gagana, faatasi ai ma se avanoa mo tagata uma i Lona Faletalimalo.

I le silia ma le 40 tausaga ua mavae, na faateleina ai le salalau faavaomalo o tagata o le Ekalesia. Talu mai le 1998, ua tele atu tagata o le Ekalesia ua nonofo i fafo atu o le Iunaite Setete ma Kanata. E oo atu i le 2025, ua tatou faamoemoe e oo atu le toatele o tagata o le Ekalesia e nonofo i Amerika Latina e pei o le Iunaite Setete ma Kanata. Ua faataunuuina e valoaga o le faapotopotoina o e faamaoni e tupuga mai i le Tama o Liae. O le Au Paia faamaoni, e aofia ai mea na faamautu ai paionia, o loo tumau pea le avea ai ma punavai o le faatuatua ma le auaunaga mo le Ekalesia i le lalolagi atoa.

E le gata i lea, o le toatele o tagata matutua o le Ekalesia e le o faaipoipo i le taimi nei, ua oti a latou tane, pe ua tatala faaipoipoga. O se suiga maoae lea. E aofia ai le silia ma le afa o o tatou tuafafine o le Aualofa ma e silia ma le afa o o tatou uso matutua o le perisitua. O lea mamanu o le faitau aofai o tagata o le tulaga lea i le Ekalesia i le lalolagi atoa talu mai le 1992, ma i totonu o le Ekalesia i le Iunaite Setete talu mai le 2019.

O lo tatou tulaga i luma o le Alii ma Lana Ekalesia e le o se mataupu tau le tulaga faalefaaipoipoga, ae o le maualuga o le avea ai ma soo, o lona uiga, o lo tatou totoa ia tatou molimau ia Iesu Keriso.¹³ E mananao tagata matutua ia vaai atu i ai o ni tagata matutua, ma ia faia ni tiute ma saofagā atu o ni tagata matutua. O soo o Iesu Keriso e o mai i soo se mea, i foliga uma, o le aofai, o lanu, o le matutua, e tofu ma le faatuatua, naunauga amiotonu, taleni, ma gafatia maoae e faamanuia ma auauna atu ai. Tatou te saili i aso uma e mulimuli ia Iesu Keriso ma le faatuatua e salamo ai¹⁴ ma le olioli tumau.

I le aluga o lenei olaga, o nisi taimi tatou te faatalitali ai i le Alii. Atonu tatou te lei oo lava i le mea tatou te moomoo i ai i le lumanai. Fai mai se tasi tuafafine tuuto, “O le faatalitali ma le faamaoni i le Alii mo Ana faamanuiaga o se tulaga e paia. E le tatau ona faia ma le manatu oi se pagā, manatu faasausili, po o le faamasinosino, ae nai lo lena ia faia ma le migao paia.”¹⁵ I le taimi nei, o loo tatou ola nei, e le o faatalitali mo le olaga ia amata.

Ua folafola mai Isaia, “O ē faatalitali ia Ieova, e toe faafouina lo latou malosi, latou te sii ae apaau e pei o aeto, latou te femoeai, a e le vaivai, latou te savavali, a e le tigaina.”¹⁶

Ua folafola mai e lo tatou Samaria Agalelei e toe foi mai. E tutupu vavega pe a tatou tausia le tasi ma le isi e pei ona Ia faia. Pe a tatou o mai ma loto momomo ma agaga salamo,¹⁷ tatou te maua le siufofoga o Iesu Keriso, ua siomia i Ona aao malamalama o le saogalemu.¹⁸ O sauniga paia e ofoina atu le i ai i le feagaiga ma le “mana o le faale-atua”¹⁹ e faapaiaina ai le faamoemoe i totonu [o le loto] ma le faatinoga i fafo. Faatasi ai ma Lona alofa agalelei ma le tali-tiga, ua avea ai Lana Ekalesia ma o matou Faletalimalo.

A o tatou fatuina se avanoa i Lona Faletalimalo, e talileleia ai tagata uma, e mafai e lo tatou Samaria Agalelei ona faamalolo i tatou i luga o o tatou auala pefupefua i le olaga nei. Faatasi ai ma le alofa atoatoa, ua folafola mai e lo tatou Tama ma Lona Alo, o Iesu Keriso, le “filemu i le lalolagi lenei, ma le ola e faavavau i le lalolagi a sau”²⁰—“ina ia outou i ai foi i le mea Ou te i ai.”²¹ Ou te molimau atu ai ma tautino atu ma le lotofaafetai i le suafa paia o Iesu Keriso, amene.