Lav blong God
Papa blong yumi mo Ridima blong yumi oli bin blesem yumi wetem ol komanmen, mo taem yumi obei ol komanmen blong Tufala, yumi filim stret lav blong Tufala moa fulwan mo moa dip.
Papa blong yumi long Heven i lavem bigwan mo long fasin we i stret evriwan.1 From lav blong Hem, Hem i mekem wan plan, wan plan blong pemaot man mo blong gat hapines blong givim yumi evri janis mo glad we yumi glad blong kasem, i go kasem evri samting we Hem i gat mo olsem we Hem i stap.2 Blong kasem hemia, Hem i iven glad blong givim Pikinini blong Hem we Hem i Lavem, Jisas Kraes, olsem Ridima blong yumi. “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”3 Lav blong Papa i klin gud—i blong evriwan long yunives, be yet, i blong wanwan.
Jisas Kraes i serem wetem Papa semfala stret lav ia. Taem fas taem we Papa i talemaot bigfala plan blong hapines, Hem i singaotem wan blong kam Sevya blong pemaot yumi—wan stamba pat blong plan ia. Jisas i talem: “Mi hemia, sendem mi.”4 Sevya “i no mekem eni samting sapos i no blong helpem wol; from hem i lavem wol, go kasem hem i givim laef blong hem bakegen blong hem i save pulum evri man i kam long hem. Taswe, i no gat man we hem i givim oda long olgeta se bae oli no mas tekempat long fasin blong sevem man, we hem i givim.”5
Lav blong heven ia i blong givim yumi plante kamfot mo tras taem yumi stap prea long Papa long nem blong Kraes. I no gat wan long yumi i wan strenja long Tufala. Yumi nid blong no fraet blong singaot long God, iven taem yumi filim se yumi no klin inaf. Yumi save dipen long sore mo ol wok blong Jisas Kraes, blong Hem i harem yumi.6 Taem yumi stap folem lav ia blong God, yumi no stap dipen tumas long tingting blong ol narawan blong lidim yumi.
Lav blong God I No Givim Eskius From Sin; Be, I Pemaot Man
From we lav blong God i kavremap evriwan, sam oli talem se “i no gat kondisen long hem,” mo insaed long maen blong olgeta, oli save tekem se tingting ia i minim se i no gat kondisen long ol blesing blong God, mo fasin blong sevem man i no gat kondisen long hem. I no olsem. Sam, plante taem oli talem: “Sevya i lavem mi olsem we mi stap,” mo hemia i tru. Be Hem i no save tekem eniwan long yumi i go insaed long kingdom blong Hem from huia yumi, “from se i no gat eni samting we i no klin we i save stap ia, o stap long ples we hem i stap long hem.”7 Yumi mas stretem sin blong yumi faswan.
Profesa Hugh Nibley, i bin talem wan taem se kingdom blong God i no save gohed sapos hem i akseptem wan smol sin: “smol mak blong korapsen i minim se, long nara wol ia, bae i save gat korapsen mo bae i no save stap blong taem we i no save finis. Wan smol samting i rong long wan bilding, skul, standet o fasin, bae i save kilimdaon wan long taem we i no save finis.”8 Ol komanmen blong God, oli “strik”9 from kingdom blong Hem mo ol sitisen blong hem oli save stanap nomo sapos oli stap sakemaot ol ivel samting oltaem, mo jusum gud, we i no gat wan eskius i pas.10
Elda Jeffrey R. Holland i talem: “Jisas i andastanem gud wanem fulap man long kalja blong yumi long tedei i stap fogetem: se i gat wan impoten samting i defren bitwin komanmen ia blong fogivim sin (we Hem i gat paoa ia blong mekem, mo paoa ia i no gat en,) mo woning ia agensem blong akseptem sin (we Hem i neva mekem).”11
Nomata ol samting we oli no stret long yumi, bae yumi save stap hop yet blong kasem wan nem mo wan posisen,12 wan ples, insaed long Jos blong Hem mo long selestial wol. Afta we Hem i talemaot klia se Hem i no save akseptem eskius o sarem ae smol long sin, Lod i talem gud long yumi:
“Be, hem we i sakem sin mo i obei ol komanmen blong Lod, hem Lod bae i fogivim.”13
“Yes, mo evri taem we ol pipol blong mi oli sakem sin, bae mi fogivim olgeta long ol rong blong olgeta agensem mi.”14
Fasin blong sakem sin mo gladhat we i kam long heven i stretem problem ia.
“Mo tingbaot tu ol toktok we Amulek i bin talem long Siesrom, long bigtaon blong Amonaeha; from hem i bin talem long hem se, i tru se Lod bae i kam blong pemaot ol pipol blong hem, be, bae hem i no kam blong pemaot olgeta wetem ol sin blong olgeta, be blong pemaot olgeta aot long ol sin blong olgeta.
“Mo hem i gat paoa we Papa i bin givim long hem blong pemaot olgeta aot long ol sin blong olgeta, from fasin blong sakem sin; from hemia, hem i bin sendem ol enjel blong hem blong talemaot ol gud nius blong fasin blong sakem sin, we i karem ol pipol i go long paoa blong Ridima, mekem se hem i save sevem sol blong olgeta.”15
Wetem kondisen blong fasin blong sakem sin, Lod i save givim sore blong Hem mo semtaem i no stilim jastis, mo “God i no stop blong i stap God.”16
Wei blong wol, olsem we yufala i save, i agensem Kraes, o “i eni samting be i no Kraes.” Taem tedei i wan riplei blong histri blong Buk blong Momon, we insaed long hem, ol bigman oli stap wantem kontrolem ol narawan long fasin nogud, oli selebretem fridom long saed blong seks, mo oli promotem fasin blong hivimap mane olsem stamba blong laef blong olgeta. Tingting blong olgeta i “givim eskius blong mekem wan smol sin,”17 o iven plante sin, be i no gat wan i givim fasin blong pemaot man. Hemia i kam nomo tru long blad blong Smol Sipsip. Bes samting we grup blong “eni samting be i no Kraes,” o “eni samting be i no sakem sin” i save givim, i klem ia we i no gat stamba blong hem, se i no gat sin i stap, o sapos i gat, i no gat risal blong fesem. Mi no luk se kaen toktok ia i save pulum eni gud samting long Las Jajmen.18
Yumi no nid blong traem samting we i no posibol blong stap olsem eskius blong ronemaot ol sin blong yumi. Be long nara han, yumi no nid blong traem samting we i no posibol blong waepemaot risal blong sin, from gud wok blong yumi nomo. Relijin blong yumi, i no wan relijin blong eskius, mo i no wan relijin blong stap stret evriwan, be i wan relijin blong fasin blong pemaot man—blong yumi kam fri tru long Jisas Kraes. Sapos yumi stap long medel blong olgeta we i harem nogud from sin, wetem Atonmen blong Hem, sin blong yumi, oli nilim long kros blong Hem, mo “yumi kam oraet tru long ol wip we Hem i tekem.”19
Bigfala Lav blong Ol Profet I Mira blong Lav blong God
Mi bin sapraes, mo tu, mi bin filim bigfala lav blong ol profet blong God insaed long ol woning blong olgeta agensem sin. Ol woning ia oli no kam from oli wantem panisim man. Tru tingting blong hat blong olgeta i soemaot lav blong God; i tru, hem i lav blong God. Oli lavem olgeta we God i sendem olgeta long ol, nomata huia olgeta, mo wanem oli laekem. Semmak olsem Lod, ol wokman blong Hem oli no wantem eniwan blong safa long ol harem nogud blong sin mo ol joes we oli no stret.20
God i sendem Alma blong talemaot mesej blong sakem sin mo fasin blong pemaot man i go long wan pipol we oli no laekem samting mo oli wantem blong mekem nogud, kilim nogud, mo iven kilimded Ol Kristin Man, wetem Alma tu. Yet, hem i lavem olgeta mo i wantem tumas blong Lod i sevem olgeta. Afta we Hem i tokbaot Atonmen blong Kraes long ol pipol blong Amonaeha, Alma i askem strong: “Mo nao, ol brata blong mi, mi wantem wetem ful hat blong mi, yes, wetem wan bigfala wari we i mekem mi soa, se bae yufala i lisin long ol toktok blong mi, mo sakemaot ol sin blong yufala, blong oli save leftemap yufala long las dei mo go insaed long kingdom blong [God].”21
Toktok blong Presiden Russell M. Nelson i talem: “Hem i from mifala i kea bigwan long evri pikinini blong God we mifala i stap talemaot trutok blong Hem.”22
God I Lavem Yufala; ?Yufala I Lavem Hem?
Lav ia, blong Papa mo Pikinini, Tufala i givim i fri, be tu, i gat hop mo samting blong mekem, we i kam wetem. Olsem we Presiden Nelson i tijim: “Ol loa blong God, biaen long ol i gat nomo bigfala lav we Hem i gat long yumi, mo hat blong Hem blong yumi kam evri samting we yumi save kam.”23
From se Tufala i lavem yu, Tufala i no wantem livim yu “olsem we yu stap.” From se Tufala i lavem yu, Tufala i wantem yu blong stap glad mo gat sakses. From se Tufala i lavem yu, Tufala i wantem yu blong sakem sin from se hemia nao i rod we i go long hapines. Be, i joes blong yu—Tufala i respektem joes blong yu. Yu mas jusum blong lavem Tufala, blong wok blong Tufala, blong obei ol komanmen blong Tufala. Afta, Tufala i save blesem yu plante moa, mo tu, lavem yu.
Stamba samting we Tufala i wantem, i blong yumi gat lav tu. “Man we i no save lavem narafala man, hem i no save God, from we God i stamba blong fasin ya blong lavem man.”24 “From we God i lavem yumi olsem, yumi tu i mas lavlavem yumi.”25
Foma Praemeri Jeneral Presiden, Joy D. Jones i tingbaot se, olsem wan yang kapol, oli givim wok long hem mo hasban blong go visit mo givhan long wan famli we oli nomo go long jos blong plante yia. I klia kwik long fas visit blong tufala se oli no wantem luk tufala. Afta we tufala i harem nogud from sam moa visit i no go gud, mo afta we tufala i bin prea mo tingting hevi plante, Brata mo Sista Jones i kasem wan ansa long, from wanem, tufala i stap givim seves, we i stap long ves ia long Doktrin mo Ol Kavenan: “Yu mas lavem Lod God blong yu wetem ful hat blong yu, wetem ful paoa blong tingting, ful maen mo ful paoa blong yu; mo long nem blong Jisas Kraes, bae yu mas wok blong hem.”26 Sista Jones i talem:
“Mitufala i luksave se mitufala i traehad wetem tru hat blong helpem famli ia mo helpem bisop, be mitufala i mas askem mitufalawan bakegen sapos mitufala i stap helpem famli ia from mitufala i lavem Lod, o no.
“ … Mitufala i stat lukluk fored long ol visit wetem dia famli ia from lav blong mitufala long Lod [luk long 1 Nifae 11:22]. Mitufala i stap mekem blong Hem. Hem i mekem traehad ia i nomo wan hadwok. Afta plante manis blong stanap long fored blong haos, famli i stat blong letem mifala i go insaed. Be afta, mitufala i bin gat prea tugeta oltaem mo stap storian tugeta abaot gospel. Wan frensip we i no save finis i bin stat. Mitufala bin wosipim mo lavem Hem taem mitufala i stap lavem ol pikinini blong Hem.”27
Taem yumi luksave se God i lavem yumi long wan stret wei, wanwan i save askem: “?Mi lavem God long stret fasin o no?” ?Hem i save dipen long lav blong mi semmak olsem we mi dipen long lav blong Hem?” ?Bae i no wan gud samting inaf blong wantem laef long wan wei we God i save lavem yumi, i i nomata long ol foldaon blong yumi, be tu, from huia yumi stap kam? O, bae Hem i save talem abaot yu mo mi, olsem we Hem i bin talem abaot Haeram Smit, eksampol: “mi lavem hem from hat blong hem i stap tru.”28 Bae yumi tingbaot kaen woning blong Jon: “Sapos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”29
I tru. Ol komanmen blong Hem oli no strong tumas—i nara wei raon. Oli makem rod blong kam oraet, gat hapines, pis, mo glad. Papa blong yumi mo Ridima blong yumi oli bin blesem yumi wetem ol komanmen, mo taem yumi obei ol komanmen blong Tufala, yumi filim stret lav blong Tufala moa fulwan mo moa dip.30
Hemia i ansa blong stopem ol raorao blong yumi we i no save stop—lav blong God. Long ol gud taem blong histri blong Buk blong Momon we oli stap folem seves blong Sevya, oli raetem se: “I no gat raorao long graon, from lav ia blong God we i bin stastap insaed long hat blong ol pipol.”31 Taem yumi stap traehad blong go from Saeon, tingbaot promes we i stap long Revelesen: “Olgeta ya we oli wasem klos blong olgeta i klin, oli save harem gud. Oli gat raet blong kakae frut blong tri blong laef, mo blong pas insaed long doa blong bigfala taon ya.”32
Mi mi witnes se Papa long Heven mo Ridima blong yumi, Jisas Kraes, oli ril, mo Tufala i gat lav we i stap oltaem mo i no go ded. Long nem blong Jisas Kraes, amen.