Loba Klisichel a Dios er a Ngarbab el Klebkall
A omengull er a telbiil a milid er a llemalt me a klisichel a klebkellel a Dios.
Nglunguchek me a Chedaol Reng bo lomekellomes e lolisechakl er kid el rokui sel dedak el melbedebek el kirel tial meang el ureor lolsobel er a rechad er chelecha el taem er a cherrengelel a rokui el tekoi.
Kot el Odngelel a Moroni el mo er a Joeph Smith
Ng kmeed el edei el rak ruriul er a Kot el Ues, e sel kesus er a September 21, 1823, e a ngeasek el Joseph Smith a milluluuch el kirel a ngbetel a kngtil e mo medengei el kmo ng uangera er medal a Dios. 1 A chad a dilum er bita er a dukellel, e ulemekedong er a ngklel, e dilu el kmo “ngoderuchel el mlodurokl er a rengedel a Dios … e a ngklel a mle Moroni.” Ng millekoi “el kmo a Dios a nga er ngii a ureor el kirel a [Joseph] el mo meruul” 2 e silodii er ngii a urerel a Babier er a Mormon. Ng klou a ultutelel, el Babier er a Mormon a ta er a mle kot el tekoi losaod er ngii a Moroni.
A Babier er a Mormon a ta er a ouchais el kirel a Jesus Kristo e mesisiich el dongu er a bult er chelecha el urirul-klebesei. A moktek er kid e kede omerk er a ebangkelio a siotai er a rokui el chad el mei er a Jesus Kristo, 3 e ngmai a klengeltengat er a mla moluut el ebangkelio, e outekangel el mo er a ulebongel lultuil er a klaumera er kid er a Osobel. 4 Sel dolngeseu er a dersta el chad el mo metik er a mesisiich el beltel a reng 5 el moak el mo er a Rubak lokiu a chedaol telbiil me a ruoll a ngii a kot el uchelel osisechakl er a ebangkelio.
A uchelel omesodel a Moroni el kirel a Babier er a Mormon el mo er a Joseph Smith a milchelii a urerel olsobel me a diak a ulebenglel klengar el mo er a dersta el chad er tia el beluulechad el de nga er ngii er chelecha el taem er a cherrengelel a rokui el tekoi.
Meng millemolem a tekingel mo er a Joseph, e a Moroni a millades a bebil er a bades er a hong er a Malakai er a Chuodel Renged, el telkib el ngodech er a ikel llechukl el nga er a King James Version:
“Me chelechang, e ngak a mo ochotii a Priesthood, el mo er kau, el okiu a chimal a profet el Elijah, er a uchei sel mei sel klou e kdekudell el sils er a Rubak.
“… E ngii a mo dolemii er a rengrir a rengalek sel telbiil milkedmokl el mo er a redemerir, me a rengrir a rengalek a mo obult el kirir a redemerir. E le lak, e tial beluulechad el rokir a mo nguemed er a luut er ngii.” 6
A moktek er kid lomekedechor a templo a mo meruul aika el chedaol basio el mo sebechel chedaol telbiil me a ruoll el mekedmokl el kirel osebelir me a diak a ulebengelel klengar el mo er a rechad el rokui, el kirir a re kiei me a re mla mad. A tekingel a Moroni el mo er a Joseph Smith el kirel a klou el ultutelel a ngerchelel a Elijah me a klisiich er a priesthood a kilungii a ureor er a olsobel me a diak a ulebengelel klengar er tial beluulechad el de nga er ngii e milchelii er chelechal taem a ureor el kirir a re mla mad er sel ta er a beluu.
A dongedeb er ngii, e a osischeklel a Moroni er se er a September er a 1823 el kirel a Babier er a Mormon me a urerel a Elijah a toketekii a dodai er a osisechakl el kirel a urerel a olsobel me a diak a ulebengelel klengar er a ika el eru el beluulechad.
Osischeklel a Profet el Joseph Smith
A suobel el siluub a Joseph Smith er a Moroni a klou a le rirelii er a urerel. Okesiul tiang, sel kldibel el mla er ngii er a Templo er a Kirkland er se er a April 6, 1837, e a Profet a dilu el kmo, “Uriul er a ike el rokui el mo mekedmokl, e sel kot el klou a belkul el ureor a mo omerk er a Ebangkelio.” 7
Kmeed el euid el rak ruriul, er se er a April 7, 1844, e a Joseph Smith a ulsisechakl er sel domekedong er ngii er chelechal sils el kmo King Follett Discourse. Ng millekoi el k mo, “A kot el klou el ureor er tial beluulechad el Dios a mla meskid a mo osiik er a re mla mad el beldeked.” 8
Meng mekerang a osischeklel a ebangkelio me a skir a rebeldeked a di le diul meklou a ultutelel ureor me a ngerachel el Dios a mla meskid? A kuumera el kmo a Profet Joseph Smith a millisiich a belkul aika el eru el tekoi el ngii a dodai er a klemerang er a telbiil, el di mekedmokl lokiu chedaol ruoll er a priesthood, el sebechel rongedid el mo er a Rubak el Jesus Kristo e meklou a kmal techel a ureor er a olsobel me a diak a ulebengelel klengar er a ika el eru el beluulechad.
A urerel a klemisionari me a ureor er a templo me a reksi er a telungalek a dmak e kabekbuk el chimo el klou a ultutelel ureor el melutk el kirel a chedaol telbiil me a ruoll el uchul eng sebeched el nguu a klisichel a kledios el mei er a klengar kid e a, urirul, e kede lmuut el mo soiseb er a rengedel a Demad er a Babeluades. A leuaisei, e aike el eru el tekingel a Profet, el uaia blel kautok er a uchelel, a mera er ngii, a kmal moktek er tial klou el ureor er chelecha el uriul-klebesei.
Rrengodel el mo er a Osobel lokiu a Telbiil me a Chedaol Ruoll
A Osobel a dilung:
“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.
“Le chelngelek a beot, me a berraod el ngar ngak a kebekakl.” 9
Kede nguu a chelngelel Osobel sel dosuub er ngii, e de klikiid el ngmai, e dongull a chedaol telbiil me a ruoll. Kede ulterekokl el rrengodel el mo er a Osobel sel le blak a rengud el melbedebek e doruul el mo er sel tkul rebab el sebeched el kiei loltirakl a ngerachel el bla de kengei. E tiaikid el rrengodel el deleuill er kid el mo er Ngii a uchul a chedoal klisiich er a ngii di el taem er a klengar kid.
Rchedal a Rubak er a Telbiil
Ak siotai er kemiu el mo melatk a mla metib el klengeltengat el mo er tirkel loltirkal a telbiil el chedal a Jesus Kristo. Okesiul tiang, a “Nephi a milsa ikelesia er a Ngelekel a Dios [er a uriul-klebesei], el mle mekesai a rchedal, … el resanto er a Dios, a milkelkelii a beluulechad el rokir; e mla er a kesai … el beluu.” 10
Ng dirrek “el milsa klisichel a Ngelekel a Dios, el mle metengel el me er a resanto el mla er a ikelesia er a Ngelekel a Dios, me a rchedal a Rubak er a telbiil , … e te mle bleiull er a llemalt e oba klisichel me a klebkellel a Dios.” 11
A tekoi el “bleiull er a llemalt me a klisichel me a klebkellel a Dios” a diak di le ko er a ungil tekoi a lechub e di lokesiul a klebokel bades er a chedaol llechukl. Ng bai, ika el klengeltengat a bleketakl er a klengar er a rebetok el uriul-klebesei loltirakl er a Rubak.
A urerek el chedal a Teruich me a terung a ngoikak el mekelkelii a beluulechad. E mla mukngeltengat el mesterir e suub a meklou a belkul suobel er a rebetok er kemiu. Ak kuuchais el kmo a rchedal a Rubak er a telbiil er chelecha el sils a mera el bleiull er a llemalt me a klisiich me a klebkellel a Dios. Ak mla mes a klaumerang, mesisiich el reng, ungil osengir, telkangel, me a deureng el kuk chengelakl er sel di klisichel a chad—el di Dios a sebechel kudmeklii.
Ak mla mesa llemalt me a klisichel a klebkellel a Dios, el mengai lokiu a telbiil me a chedaol ruoll, er a klengar er a ngeasek el chedal a Ikelesia el mlo chitechut el meringel e kdekudel el aksident er a mlai a uchul. Uriul er a tela el buil er a ukeruul e lomeksau er ngii er a beches el klengar el diak el mesisiich louedikel, e ak milsang e mengedecheduch er ngika el mesisiich a rengul chad. Chelsel a cheldechedemam e a kulker, “Ngera ke mla subii er tial teletael el dilubech el me er kau?” A mle mereched el nger ngii a kmo, “Ng diak el mekngit a renguk. Ng diak el kesib a renguk. A rokui el tekoi a di mo ungil BESUL.”
Ak mla mesa llemalt me a klisichel a klebkellel a Dios, el mengai lokiu a telbiil me a chedaol ruoll, er a klengar er a dirke miltecholb e moterekokl el chedal a Ikelesia. Tirka el dirke ulebult el chad a mle semeriar el mesuub e mesiou, e mle sorir eng di dimlak lodengei el kmo te mekerang e chemoit a mekngit el kse me a mesisiich luldelid el siukang, e mo nga er a deureng el “teloi er a resanto, el dmak el nga er a rengedel a Dios.” 12
Ak mla mesa llemalt me a klisiichel a klebkellel a Dios, el mengai lokiu a telbiil me a chedaol ruoll, er a klengar er a telungalek el kmal mle ungil lomekerreu er a bechil a lechub a demal ng delal er a omekodall el secher. Tirka el mesisiich loltirakl a milsaod el kirel a taem el telungalek er tir a ulemelchesiu el cheloit me a taem el blo lodengelii a chimal a Rubak el mesebechakl e melisiich er tir. Tia el telungalek a uluchais er a dmolech lomereng el saul el kirel a ringel er a klengar el sebechel rullid el mo uaia Demad er a Babeluades me a Osobeled, er a Jesus Kristo. A Dios a milsebechakl e ulemekngeltengat er tial telungalek loba Chedaol Reng el mlo kldemir e rirelii a blirir el mo chedaol el basio el uaia templo.
AK mla mesa llemalt me a klisichel a klebkellel a Dios, el mengai lokiu a telbiil me a chedaol ruoll, er a klengar er a chedal a Ikelesia el siliseb er a meringel dertel a chebechiil. A ringel el mlo er a rengul me a chedaol klengar ngika el odos a kmal mlo oberaod el kirel a diak el tabesul lomeruul me a telmellel a bechil er a chedaol telbiil me a terudel a chebechielir. Ng mle soal a melemalt lultutakl me a ngerchelel a bechil kirel.
Ngika el mui er a klaumera el dil er a le nga er a ringel el kirel aika el rokui el mla duubech el mo er ngii, eng kmal mlo mesisiich e dmolech a omesubel me a omelbedebek er ngii el kirel a Tngakireng er a Osobel el diak el uaia nga er a mong. Cherengel a taem, e a dmolech el klemedengei er ngii er a urerel a Kristo a chilleklii a rengul—a ringel le blo er Ngii el kirel a kngtid, me a dirrek el ringel el de nga er a chelsel, chelitechetud, kngtil a rengud, me a lengeled. E sola mlukrael el mo oker er a mesisiich el ker: a lsekum eng mla mekedmokl a ngkedel aika el klengit, e ngera me kemengerechir er a ongeru lomeluked? Ng mlo medengei el kmo tia el teletael longerchir ngii a diak el melemalt me a diak lokiu a chubechub.
Ngika el redil a mlo medengei el kmo sel lomak er ngii el mo er a Osobel lokiu a telbiil me a chedaol ruoll eng sebechel mo omekungil a telmellel a chad el mle mekngit el melilt e rulii el mo sebechel mo ousubes e mo nguu a budech, chubechub, me a beltikerreng.
Yaksok me a Klaumerang
A yaksok er a telbiil me a klengeltengat a sebechel me er kid el di okiu a Osobeled, el Jesus Kristo. Ngii a siotai er kid lomes el mo bedul Ngii, 13 e mei er Ngii, 14 e mesuub er Ngii, 15 e rongedid el mo er Ngii 16 lokiu a telbiil me a chedoal ruoll er a mla moluut el ebangkelio er Ngii. A kuuchais e yaksok el kmo a omengull er a telbiil a milid er a llemalt me a klisichel a klebkellel a Dios. E ngak a sioning el kmo a ngar el Rubak el Jesus Kristo a Osobeled. Ng dmeu a rneguk e ouchais aika el klemerang loba chedaol ngklel a Jesus Kristo, amen.