Sel Klaumerang el Oker e Mo Meruul
A klaumerang er a Jesus Kristo sei a mo uchul a omelai el ocholt el kirel a klemerang.
Rodam me a rodos er ngak, ak mereng a saul er a techall el mengedecheduch el obengkemiu er tia el miting er a kebesengei er a Sabadong er tia el klou el ongdibel. Chelsel sel cheldechedechal er a uchelel tia el klou el ongdibel er chelecha el tutau, ea President Russell M. Nelson a milekoi el kmo “a klikiid el ocholt el kirel a ker er a chelsel a rengud a mo rullii tia el klou el ongdibel el mo kot el mekreos e diak dobes er ngii. A lsekum eng dirkak mosiik er a Chedaol Reng el mo ngosukau el remenges aikel soal a Rubak omrenges er a ika el eru el klebesei, e a kulengit me bo moruul er ngii er chelechang.” 1 Ak mla osiik er tial klengeltengat er a kungedmokl er ngak el mo melai a ocholt er tia el odingelek el obengkemiu. Sel kmal ngara renguk el nglunguchek a kmo bolsebechem el ngmai a ocholt el ngara Dios.
A teletelel a omelai el ocholt er a Dios a dirkak el mengodch er a team er a Adam me a Eva. Ng kmal dirk osisiu el mo er a rokui el mla mekodong el mesiungel a Rubak er a uchelel el me er chelecha el taem. Ng osisiu el mo er kau me a ngak. Ng kmal oumesingd el mekedmokl el okiu a klaumerang. 2
A ngeasek el Joseph Smith a mla er ngii a kmal medeel el klaumerang er ngii el mo oker a ker er a Dios, loumerang el kom a Dios a mo onger er sel kmal ngara rengul el ousbech er ngii. Sel nger el mlei a ngildechii a beluulechad. Ng mle soal mo medengelii a kmo ngera el ikelesia a bo le teloi er ngii e mo klikiid er a klengit. Tia el nger el lengiluu a milngesuseu er ngii el muut el oker a lmuut el ungil el ker e mo meruul aike el melemolem el omaoch el ocholt el ngii a kmal dirk ulemuchel. 3
Tia el osisiu el blekeradel a sebechel el mekedmokl el mo er kau er tia el ongdibel. Ng ngar er ngii a kerim el mosiik a nger el kirel. Ng ngar er ngii a kmal di ungil a idisel el klaumerang er kau el mo ngmai aika el nger er a Rubak el okiu a Remesiungel. 4 Ng diak a techellem el mo melekoi el oker er a remengedecheduch, e ng di ng sebechem el oker er a oubeltikelreng el Chedam er kau el ngara nglunguuch.
Ak medengei el okiu a tekoi el dilubech el me er ngak el kmo a nger a mei el mo kudmokl aike el om ngesonges er ngii me a dirrek el omengedmeklel a chedaol tekoi. Okmo ke ousbech a nger el ngii a klou a ultutelel el kirel a diak a ulebengelel el mo klungiolem me a lechub a rebebil, e sel nger a klou a techellel el mei. E uaisei el dirrek, ke locha mo nguu—el uaia Joseph Smith—a nger el mo oba klou el reng. 5
A lsekum e a klaumerang er kau er a Jesus Kristo a mla mekrolau el mo medemedemek a rengum el okiu aike el rellel a Tngakireng er Ngii, e ng oumesingd el mo sebechem el mo melechesuar a ongelulau er a Chedaol Reng el mo onger a kerim. A kuk denguu er ngak e se el chelellakl, e kekerei el ngor—el ngii a merang—e bleketakl e mechellins er a uldesuek a kulechesuar el ngara chelsel a renguk el chellelakl e kongei a urungulel a Rubak. Tia el omelechesuar a klengariou el reng a sebechel el dolekoi er ngii el kmo “Ng diak el urungulek, ng bai urungulem, bo lemekedmokl.” 6
Tia el teletael er a ocholt a uchul e ke mo orrenges er a remengedecheduch el olisechakl er tia el ongdibel el domekedong er ngii el kmo ng osisecheklel a Kristo. 7 A ocholt a me er kid el ngara bliongel e telkael loltirakl er a sked er a osisecheklel Kristo el mera chelsel a rengud e oltirakl el meruul er a chelsel a klengar er kid.
Ke medengelii el ngara Babier er a Mormon el Nephi a ulsisechakl er kid el kmo a klaumera er a Jesus Kristo sei a kiis el mo er a ocholt er a klemerang e kisel a klemeriar el reng el kmo kid a oltirakl er a Osobel. A Nephi a liluches aika el bldukl el tekoi er a betok el rak er a mla memong ruchei er a cherellel a Jesus Kristo er tia el klechad:
“A reanghel a mengedecheduch lokiu a klisichel Chedaol Reng; a leuaisei, e te melekoi a tekingel a Kristo. A leuaisei, ak melekoi er kau, momekeek er kau er a tekingel a Kristo; le momes, a tekingel a Kristo a mo ouchais er kau a rokui el kirem el meruul.
“A leuaisei, er chelecha el bla kuuchais aika el tekoi, a lsekum e kau a diak el sebechem el mo omtab aika el tekoi e ng belekul a kmo ng dirkak moker, me a lechub e molengod; el uaisei, e kau a diak mengai el mo er a llomes, e bai mo nguemed er a ilkolk.
“El uaisei, ak muut el melekoi el kmo a lsekum e ke mo soiiseb er a rael, e nguu a Chedaol Reng, e ngii a mo ocholt er kau a rokui el tekoi el kau a kirem el meruul.
“Al uaisei, tia e a osisecheklel a Kristo, e diak a lmuut el osisechakl el di merekmo sel team el ngii a mo ochotii a bedengel er kau. E se el bol mocholt er kau a bedengel, e a ike el tekoi el ngii a bo louchais er kau a bo moltirakl el meruul.” 8
A Rubak a mo ouchais a tekoi el mo er a Remesiungel el mo er kau me a ngak er chelecha el sils me a ngar medad el taem. Ngii a mo ouchais er kid a tekoi el kid a kired el mo meruul. 9 A Osobel a diak bo loldiu a llechul el me er kau me ngak. El ua osischeklel el mo er a Elijah:
“E ng dilu, Morael, e bom dechor er a rois er a medal a Rubak. E, mesang, a Rubak a mlo engelakl, e a klou e mesisiich el eolt a mo melmesim er a rois, e mechedii el di mlo chibekbad er a medal a Rubak; e ng di a Rubak a dimlak el ngar tia el eolt; e a uriul er tia el eolt eng mlo er ngii a desiu; e ng di a Rubak a dimlak el ngar tia el desiu:
“E a uriul er a desiu e ng mlo er ngii a ngau; e ng di a Rubak a dimlak el ngar sei el ngau: e a uriul er sel ngau e ng chelellchakl el kekerel ngor.” 10
Orrenges er sel ngor a mei el okiu a klaumerang er kid er Ngii. Sel ngar er ngii a sesei el klaumerang, e kede mo oker er a rael el oba blakelreng el kmo kede mong e meruul aike el rokui el Ngii a olengit er kid. 11 E kid a mo oba a mla mukeroul el klaumerang el mo medengei el kmo a ngidi el ngerang el Ngii a olengit er kid el mo omekngeltengat er a rebebil e kid a sebeched el mo mukbeches lokiu tial teletael e le a uchul sel Beltkil a Rengul el me er kid.
Me sel klaumerang er kid er a Jesus Kristo a mo mengetikaik er kid el mo oker er a Chedam a nger, sel klaumerang a dirrek el mo nguu sel delemedemek er a Osobel el mer kid luchul eng mo sebeched el Rongesii otireklel e mo rullii er a rengud e semeriar el mo oltirakl. E kid a mo mengitakl aika el tekoi er a chelitakl loba deureng, osisiu sel meringel a ureor: “Ng ungil a ureor, Dios er Ngak, e King er ngak.” 12
Cherengel a team el doba osisecheklel a Kristo er a chelsel a klengar er kid me a rengud, e ng le muut el menglou a beltkil a rengud me a ulekerreuid el mo er tirke el bebil dirkak el nguu sel klengeltengat er a klaumerang er a Jesus Kristo me a lechub e te meringel er tir a obang. Ng meringel sel doltirakl a llechul a Rubak sel lak a klaumerang er kid e lak doumerang er Ngii. A rebebil a remiid a klaumerang er tir er a Osobel, me te locha mo oldechelakl a omellach er Ngii, el omekedong a ungil el mekngit me a mekngit el ungil. 13 Sel uchul e kede mochib er tia el cheleuid, e ng klou a ultutelel el ocholt el dengai a ultuil er a osischeklel a Rubak me a reptofet er Ngii.
Rodam me a rodos, ng ultuil er a klaumerang el mo olngesenges a llechul a Rubak. Ng ultuil er a klaumerang er a Jesus Kristo el mo mesiou er a rebebil el Kirel. Ng ultuil er a klaumerang el mo merael el olsisechakl er a ebangkelio er Ngii e omerk er ngii el mo er tirke el tir a diak lolechesuar er a ngerel a Chedaol Reng e kotouar er a klemerang er aika el klumech. E ng di sel dultuil er a klaumera er kid er a Kristo—e doltirakl er a ngar el profet er Ngii—e a klaumerang a meleketek er a beluulechad el meliuekl. Ng tekoi er a technology uchul, eng locha betok el ngelkel a Dios a mo rongesii e mtab a tekingel a Dios er a chelechal ongelolem me a ongeuid el klebesei er a chelsel a ngii di leru el klebesei er a reksi.
El cherengel a klaumerang el kmo tia e a merang el Ikelesia er a Rubak e rengedel er a beluulechad, me a betok el rechad er a ikelesia a mo harau a tenget e olengeseu er tirke el tir a ngesool, osisiu el mo er tirke el rechedal a ikelesia el tir a dirrek el chelbangel a ringel. Ngokiu a klaumerang e tir a mokedongl er a Jesus Kristo, a remisionari el meliuekl er a beluulechad a mla metik a teletael mo ngoriakl er a ringel er tial lomekodall el secher a uchul, el mesisiich a rengrir e ngara deureng. E okiu a lmuut el omelasm, e a klaumerang er tir a mla lmuut el mo mesisiich.
A ultok me a ringel a meketeket er a le blil a tane el kirel a ulekerulel a klaumerang. Tiang a di mla blechoel el klemerang, tokuni sera taem er a uchelel a Olutel me a dirrek el omeleketek er a Ikelesia er a Rubak . 14
Aike el tekoi el dilung a President George Q. Cannon er a ngara mong el team a kmal dirk klemerang er chelecha el taem e uaisei el di merekmo Osobel a mei e oungerachel er a Ikelesia er Ngii me a Rechedal: “Olngesenges er a Ebangkelio a mengideb er a [rechad] el mo kmeed e ngara ungil deleuill lobengekel a Rubak. Ng mukdebechii a kmeed el deliongel er a delongelir a rechad er tia el beluulechad me a Klou el Ulemeob el ngara babeluades. Ng rulleterir a rechad el mo omdasu e omelechesiu e ungil medengei el ngikel Olab a Rokui el Klisiich a soal lorrenges e onger a nglunguchir tirke el tir a oumerang er Ngii. Chelsel a taem er a ringel me a metarchebesul tekoi e tia el chelellakl el reng a diak el muchar. A ongarm a mei er a tang me a lechub e te rechad, a kerior a sebchel mo omekngringel er sel reng er a rechad me te locha mo melechesuar el mla mo mechitechut, e uaisei, e tirke el [chad] el kuk mla nguu tial techall el oltirakl er a Ebangkelio, tir a mo ngarngii a kltukl el basio er tir; el ocherir a dechor er a bad el diak el mesim.” 15
Ng klaumerang er ngak el kmo sel bad el kid a dechor er ngii a sioning el kmo a Jesus ngii a Kristo; e tiaia Ikelesia er Ngii, el Ngii a omekrael er ngii; e a President Russell M. Nelson a ngar el profet er Ngii er chelechang.
President Nelson a osiik e melai a otirkeklel er a Rubak. Ngii a denguu er ngak a oskesiul a osiik er sel otireklel e loia er a rengul el mo oltirakl er ngii. Sel osisiu el blak el reng el mo olengesenges er a otirkelel a Rubak a ngara rengrir tirke el tir a mla mengedecheduch me a tirkel mo mengedecheduch, meluluuch, me a lechub e te mengitakl er tia el klou el ongdibel er a Ikelesia er Ngii.
Ak meluluuch me tirke el meliuekl er a beluulechad el omes e orrenges er tial ongdibel bo el olechesuar er a beltkil a rengul a Rubak el mo er tir. A Chedam er Babeluades a mla onger a nglunguchek el bo el sebechek el melechesuar er a di le kekerei el beltkil a rengul a Osobel el mo er kau me a Beltkil a Rengul el mo er a Demal er a Babeluades, el ngii a Demad er a Babeluades.
A kuuchais el kmo a Jesus Kristo a ngar. Ngii a Osobel e Osobeled. Tia Ikelesia er Ngii. Ngii a bdelul a ikelesia. Ngii, el obengkel a Demal er a Babeluades, a duum er a Joseph Smith er a chelsel a oreomel er a New York. A ebangkelio er a Jesus Kristo me a priesthood er Ngii a mloluut el okiu a re chedaol el roderchelel. 16 El okiu a klisichel a Chedaol Reng, ak medengei el kmo aika a klemerang.
Ak meluluuch el kmo kau me bo moba tia el osisiu el sioning. Ak meluluuch el kmo bo moker er a Chedam er Babeluades el kirel a klaumerang er a Jesus Kristo el bo er ngii er a rengum e bo mobang el mo oltirakl a chedaol telbiil el ngii a mo uchul e a Chedaol el Reng a mo blechoel el chelmengem. Ak mechei a beltkil a renguk me a klaumerang er ngak el obengkem el ngara chedaol el ngklel a Jesus Kristo, amen.