![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd5%2Fa5%2Fd5a500c931c1cbd53b240b535f19365b5cd86fa1%2Fd5a500c931c1cbd53b240b535f19365b5cd86fa1.jpeg/full/!250,/0/default)
Beltkil a Rengul a Dios
A Demad me a Osobeled, a mla omekngeltengat er kid lolab a llach, me sel doltirakl a ikal Llecherir, e kede mo omelchesiu er a cherrungel el beltkil a Rengrir el mui e dmolech.
A Demad er a Babeluades a dmolech e cherrungel loubetik el reng el merkid. 1 Ngokiu tial beltkil a rengul, eng milkdebechii a uldasu, el uldasu er a mo olsobel me a deurreng el mo mekengii el merkid a rokui el techall me a deurreng el kid a sebeched el mo melai, el mo lmuut er a ikel rokui el Lolab. 2 Sel mo melai a ikang, e Ngii a milecherei me bol modars a dital Ngelekel, el Jesus Kristo, el mo Osobeled. “Beltkil a rengul a Dios a uchul, e nguldureklii a di ta el Ngelekel, me a tirke el rokui el mo oumera er ngii a diak el bol riid e bai mo nguu a diak a ulebengelel klengar.” 3 Tiang a mechellins el beltkil a rengul a Chedam—lomerk el mora rokui me a dirrek a derta el chad.
A Jesus Kristo a dmak loba tial cherrungel el beltikelreng ngii me a Chedam. A Chedam sera lekot el lolecholt er tial klou el uldesuel kirel a deurreng, eng ulmekedong er a tang el ngii a mo Osobel el mo olsobel er kid—tia ea klou a ultutelel tebedechel tial uldasu. A Jesus a uldersii, “Ngak tiang, modureklak” 4 Jesus Kristo a diak a ngeral loruul el diak el bol klungiolir a rechad ra beluuelchad; le ngii el betik a rengul er a beluulechad, meng mle tongetengii a klengar ngii me a rechad bol sobel. El uaisei, ngii a diak lolekebai er a ngidi el chad el soal mo suobel. 5
Tial chedaol beltikelreng a kirel meskid a mui longelaod me a klou el reng sel doluluuch el mo er a Chedam el ngara ngklel a Kristo. Ngdiak a dersta er kid el ngodech el chad el mo er Tir. Ng diak el kired el mechikid me lak domekedong er a Dios, ngii mesel domelchesiu el diak de klikiid. Kid a sebeched el ultuir er a krasia me a urerel a Jesus Kristo. 6 Me sel kid a kiei loba beltkil a rengul a Dios, e kid a di merael el mo diak dultuir er a uldesuir a chad el mo omekrael er kid.
A Beltkil a Rengul a Dios a Diak Lomsa Techall a Klengit; Ng Bai, Omsa Omengikiid
E le uchul a beltkil a rengul a Dios a mora rokuil chad, e a rebebil a mesaod er ngii “diak a telkelel,” sel chelsel a uldesuir, e tomes er ngii el belkul a kmo a klengeltengater a Dios a “diak a telkelel,” me a mo suobela diak a “a telkelel.” Ng diak el uaisei. A rebebil a melekoi el kmo, “a Osobel a betik a rengul er ngak el kuk di uaisei el chad,” e tiang a meral klemerang. Eng di Ngii a diak el sebechel ngoikid el mora rengedel el di uaisei el chad, “e leng diak a mekikiongel el mo risei, malechub eng kiei e lobengkel.” 7 A kngtid a kired el ma kot el chemoit.
A Professor el Hugh Nibley a tal bla lolekoi el kmo a rengedel a Dios a diak el meketeket alsekum eng osisebii a kmal di kekerei el klengit: “Ng kmal di ngimech er a chelbirukel eng belkul a kmo sel tara beluulechad a diak el lak el bol metemall ma ka lolemolem el mo cherechar. Sel kmal di telkib el telemellel a okedecheraol, skuul, llach, malechub a blekeradel a di merael mol oitechetur omerael el mora diak a ulebengelel.” 8 A llechul a Dios a “meringel” 9 le a uchul a Rengedel me a rechedal a sebechir el dechor a lsekum tir a sebechir el blechoel el otngakl a mekngit e melilt er a ungil, e diak a ngodech. 10
A Elder Jeffrey R. Holland a ulemtab, “A Jesus a mle ungil medengei a tekoi el betok er a rechad er chelechang a mla obes: el kmo ngarngii a klekakerous er a delongelel a llach el mo ousubes a klengit (el Ngii a kmal medeel sebechel rulii) me a uleklatk el kirel omechei a klengit (el Ngii a dirkak a ta ra taem el relii el tekoi).” 11
Me aika el dolab el ngelsengesed, eng uaisei, el dirk sebeched el oureng el mo nguu a “a ngakl me a delecherud,” 12 er a basio, er a Ikelesia er Ngii me a sel kot el ngarbab el renged er a babeluades. A uriul er a le beketeklii el kmo ng diak el sebechel mechei a klengit, ea Rubak a mle menglou a rengud:
“Mal uaisei, ngike el chad el mo ouchel a rengul e meruul loltirakl a llechul a Rubak a bo lousubes er ngii.” 13
“Me sel blechoel a rechedak el mo ouuchel a rengrir er a kngterir e Ngak a mo ousubes aikel lurruul lomtok er ngak.” 14
A ouchel reng me a chedaol krasia a mo meledaes a ikal tekoi.
Dirrek el bo molatk a tekingel a Amulek lullekoi el mora Zeezrom, er a beluu er a Ammonihah, leng dilu er ngii el kmo a Rubak a meral mei el mo olsobel er a rechedal, eng di ngii a diak el mei el mo olsobel er tirkel tir a ngara chelsela klengit, ng bai mo olsobel er tir er a kngterir.
E le ngii a ngarngii a klisichel el ngiluu er a Demal el mo olsobel er tir er a kngterir leng ouchel reng a uchul; maleuaisei e ngii a mla odurekleterir a re anghel er Ngii el mo omerk a ungil klumech el kirel a ikel tekoi ra ouchelreng, el mo mengai lokiu a klisichel a Olsobel, me bolsobel a delbengir. 15
Ng obengkel a sel mo kedmekill er a ouchel el reng, e a Dios a sebechel lodersii a klechubechub e diak bo lolas er a llach, me a “Dios a diak bolak el Dios.” 16
A teletelel a beluulechad, el modengelii, a omtok-er a Kristo malechub a “te ngmai a ngiidi el ngarang ngii di lak el Kristo.” A sils er kid a diua blechebechel a cheldecheduch el ngara reksi er a Babier er a Mormon el rechad el klou a klisichir a osiik a diak el melemalt el klisiich el bedul a rebebil, e outkeu a kengei er a deleboes, e oldubech a ilteet el ngii a ual mokted er kid er tial klengar. A osisecheklir a kmo ngdi ungil a de relii a telkib el klengit 17 malechub a klou el klengit, e ngdi diak a sebechel lolsobel. El denguu lokiu a rsechel a Ngelekel a Sib. Sel kot lungil el sebechir lodersii sel seked el kmo “ngidi el ngerang ngii di lak el Kristo” malechub a “ngidi el ngerang ngii di lak el ouchel reng” a diak a ngeral lulsirs er ngii sel lolekoi el kmo ng diak a klengit malechub a le ngarngii, eng diak a ngera el temelii. Ng diak kisa tial ultok el sebechel merael mo mesisiich sel lemei sel Ulebongel el Kerekeriil. 18
Ng diak a belkul bo doruul a diak el sebechel tekoi el melasem el meruul a kngtid malekong di ungil besul. Me a kuk tang, ng diak a belkul dolasem a diak el sebechel mesuld el telemellel a klengit lokiu a urered el di kid el tang. A ikelesia er kid a diak el klechelid er a omechei a klengit malechub eng ikelesia er a diak a telemellel ngbai klechelid er a olsobel—olsobel lokiu a Jesus Kristo. Alsekum me kid a obengterir a rouchel, e ngokiu a Tngakireng er Ngii ea kngtid a mildeed er a kerus er Ngii, me sel “chelebed el mlo er Ngii a omekungil er kid.” 19
A Ngarngii el Beltik el Reng er a re Profet a Di Uai a Beltkil a Rengul a Dios
Ak meketeketa el smiich a renguk, e dirrek el mla melchesuar er ngii, sel ngarngii el beltikelreng er a re profet er a Dios er a chelsel a tekingir lomeklakl el kirel ultekengel a klengit. Tir a diak el modubech lokiu a rengrir el mo melbeakel. A meral ngara rengrir a oltirakl er a belktil a rengul a Dios; ea mera er ngii, tiang a beltik el reng er a Dios. Te betik a rengrir er tirkel le modurch el mo er tir, e tiang a mora ngii di el chad malechub eng ngii di el blekaredel. El kmal di uai a Rubak, el re mesiungel a diak el sorir el mesa di tal chad el ucharm er a klengit me a diak lungil lomelilt er tir. 20
A Alma a mlodurokl el mo ouchais a klumech er a ouchelreng me a mo suobel el mora re mekngit el chad el sorir el oltutakl, omekcharm, e dirrek lomekoad er a re oumerang el Kristiano, luldimukl er a Alma. Engdi ngii a mle oubeltikelreng el mo er tir e mle soal a bolsobel. A uriul er a bol merek el ouchais er a Tngakireng er a Kristo el mora rechad er a Ammonihah, ea Alma ullengit: “Elechang, e rodam er ngak, a kuureng er a kmal chelsel a renguk, oi, el lulis el bekikl me ak ngara ringel, me bo morrenges a ikal tekingek, e bo mchoit a kngtemiu, e lak mongeteket er a sils er kau er a ouchel reng, … me bol sebechiu el mengai el morbab er sel uriul el klebesei me bom siseb er a ulengull el ngara [Dios].” 21
Sel denguu er a tekingel a President Russell M. Nelson, “Tia meral uaisei e le kid el meral omekerreu el kirir a rokui el ngelekel a Dios me kede ouchais a klemerang el mla er Ngii.” 22
A Dios a Betik a Rengul er Kau; Kau Ke Betik a Rengum er Ngii?
Sel beltikelreng er a Chedam me a Ngalek a mimokl el merkid el uldimukl er ngii aikel doureng e mengerechir. Ak lemuut el melekoi er a tekingel a President Nelson el kmo, “A llechul a Dios a mesisiich lurrekodel er sel cherrungel el bletikereng er Ngii el kired me a blakereng er Ngii el kired el mo er sel ngii a kired el morngii.” 8
E le uchul Tir el betik a rengrir er kau, Tir a diak el sorir el choitau “me kedi osisiu.” E le Tir el betik a rengrir er kau, Te sorir kau a bom nguu a deureng e bo lungil besum. E le uchul Tir a betik a rengrir er kau, Tir a sorir kau a bo mouchel a rengum e le tiaikid a rael el mora deurreng. Engdi tiang a kau a melilt el kirel—Tir a mengull er a llemeltem el melilt. Kau a kirem el melilt el mo oubeltikelreng el mo er Tir, mesiou er Tir, e oltirakl a Llecherir. Me Tir a mo meskau el betok el klengeltengat e dirrek eloubeltikelreng er kau.
Me a sel kot el longerchir er ngii a kmo kid a dirrek el mo oubeltikelreng. “Ngikel diak loubeltikelreng a diak lodengelii a Dios; e le a Dios a beltiklereng.” 24 A Johanes a lilechesii el kmo, “Betik ra renguk, alsekum ea Dios a betik a rengul er kid, eng kired el mo kaubeltikelreng.” 25
A mle Primary General President el Joy D. Jones a dilbedebekii er sera le mekekerei el obekel, e ngii me a bechil a mlokedong el mo oldingel er a telungalek el dirkak a tang mel bora ikelesia el mla mo betok el rak. Ng di mle mereched el mo bleketakl er sera kot el odngelir el kmo ng dimlak el sorir a loldingel er tir. A uriul er a lmuut el bebil ra odngelir el dimlak bol tekoi e a Brother me a Sister Jones a ngiluu a nger el mor sel ngii a kmal uchula omesiungir lokiu tial bades el ngara Doctrine and Covenants el kmo: Kau a kirem el oubeltikelreng el mora Dios er kau, el meral ngara rengum, ma rokui el molab, uldesuem, ma klisichem; el ngara ngklel a Jesus Kristoe kau a mo mesiou er ngii. 26 A Sister Jones a millekoi:
“A ki mocha medengei el kmo a ki meral blak a rengmam el mo mesiou er tial telungalek me a dirrek el bishop er kemau, engdi ng mle kiram loker rekemam el kmo a ki meral mesiou loba beltikelreng el mora Rubak. …
“… A ki mocha mad el tmuil el kirel odngelam el mor tial telungalek le uchul a beltikelreng er kemam el mora Rubak [mesa 1 Nephi 11:22]. A ki milruul er tiang el mo er Ngii. Meng rirelii sel ringelel el mlo diak le meringel. A uriul er a betok el buil el kim dechor er a medal a tuangel, e tial telungalek a mocha osisebemam. Me a, ki mocha blechoel meluluuch e dmak el mesaod a ebangkelio. A mlo kemangel el klausechelei a dilubech. A ki oldanges e oubeltikelreng el mo er Ngii sel ki moubeltikelreng el mora Rengelekel.” 27
Sel de kengei el kmo a Dios a cherrungel el oubeltikelreng er kid, e bo doker, “Ng uangera a beltkil a renguk el mora Dios? Ngii ng sebechel ultuil er a beltkil a renguk el uaisel kultuil er a belktil a rengul? Tiang diak el kora ungil uldasu el de kiei me a Dios el sebechel loubeltik el reng er kid ngii mesel ngarngii a chelitechetud e dirrek a uchul kid a merael bedul sel kired el mo uai ngii? Omko, eng sebechel kmu er kid el uaikel le dilu el mora Hyrum Smith, el uatiang, “Ngak, el Rubak a betik a renguk er ngii e le a rengul a melemalt.” 28 Mei e dolatk er sel uleklatk el mlara Johanes “E le tiaikid a beltik el reng er a Dios, el kid a oltirakl er a llechul: ea llechul a diak el meringel.” 29
Ng uaisei, el llechul a diak el meringel—tia bai blitokl. Aikang a olangch er a rael er a omekungil, deurreng, budech, me a duil a reng. A Demad me a Osobeled, a mla omekngeltengat er kid lolab a llach, me sel doltirakl a ikal Llecherir, e kede mo omelchesiu er a cherrungel el beltkil a Rengrir el mui e dmolech. 30
Tiaikid a nger el dousbech er ngii el kirel a ikel klautok er kid—sel beltik el reng er a Dios. Sel taem er a Babier er a Mormon el blo loldingel a Osobel, eng llechukl el kmo “ng dimlak a klautoker a beluu, e le uchul a beltik el reng er a Diosel ngii a kiliei er a rengrir a rechad.” 31 Chelechal dolasem el bedul a Zion, e kede melatk er sel yaksok el ngar Ocholt: “Te ngeltengak tirke el oltirakl a llechul, e leng morngii a llemeltir el mora kerrekar er a klengar, e mo soiseb er a siseball el mora chelsel a [chedaol] beluu.” 32
Ak sioning er a Demad el ngara babeluades me a Osobeled, el Jesus Kristo el kmo te mara el ngarngii, me sel di ngarngii, el diak el mad el beltikelreng er Tir. El ngara a ngklel a Jesus Kristo, amen.