![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F47%2Fb7%2F47b77be4e11bc35202dc5559201fb8eb5d57bf07%2F47b77be4e11bc35202dc5559201fb8eb5d57bf07.jpeg/full/!250,/0/default)
Lmuut el mo Oumerang
A moumerang er a Dios me a rebebil eng mo er ngii a klengeltengat er a babeluades.
Se er ak kekerei, eng mle ta el kumedasu el chemiis er a blik. Sel teletelel a kekerei el buik, ea kulmelchesiu el dimlak a chad el betik a rengul er ngak.
A sekutab el delak a ulerrenges e killungii a renguk. Ak mle selbechakl el nga er a blik.
Ng mla ta el momdasu el soam el chemiis er a blim? Ng blechoel, se el mchiis er a blai a belkul a klaumera a mla mo mechitechut a lechub eng mla metemall—el klaumera el nga er kid, me a rebebil, me a Dios. Se el bo dekurusii el kirel a klaumerang, e kede mo omdednger el kmo ke de mekera el lmuut el mo oumerang.
A cheldechedechak er a chelecha el sils a kmo, meng diak el iior a teletelel a klengar, a Dios a mo ngosukid e oubeltikereng el merkid . 1 Ngokiu Ngii e kedemetik a klaumera me a duch el reng, llomeselreng e mo ungil melilt el lmuut el mo oumerang. Osisiu, e Ngii a olengit er kid me de kaubeltikereng e dekaingeseu, e mo ousubes e diak desal omekringel er kid me a rebebil, me a Ikelesia er Ngii el bo leuai a blid el dungil nga er ngii, a le ketenged el mo er ngii a lechub e ke de luueta el me er ngii.
A oumerang a olchotel a klaumerang. A Dios a meskid a klaumerang. Eng di, a klaumera er a chad a sebechel mo mechitechut a lechub eng metemall se el:
-
A sechelei, chad er a ureor, a lechub a chad el doumerang er ngii a oumulak, tomelid, a lechub eng ousbech a btelul er kid. 2
-
A bechim a meruul a delboes el tekoi er a ikrel a chelebechiil.
-
A lechub eng kuk di kiul dubech, ea betik er a rengud a mo chemau a kodall, telemall, a lechub eng secher.
-
Ng mo er ngii a kerid el kirel a ebangkelio, a lechub eng kirel a reksi er a Ikelesia a lechub ng lechul a Ikelesia, el rebebil a dmul uasei a ikelsia er kid a ulemart a lechub ng dimlak el ouchais a klemerang.
A bebil er a teletael a locha diak el sal bleketakl eng di dirrek el nga er ngii a cheokl er kirel.
Ng locha diak desekid el mo er a Ikelesia, ng diak de ulecherangel, e omelchesiu er a rebebil el mesaod el kired.
A lechub, e ke de mla remuul a ikel kired el meruul, eng di diak el se el soad a rellel. Meng diak el iior er a teletael bla deruul el obengkel a Chedaol Reng, eng locha diak dodengei el kmo a Dios a ngar a lechub a ebangkelio a merang.
Te betok er a chelecha taem a omelchesiu el kirel lmuut el mo er a ngii a klaumerang er a deliongel er a rechad me a buai er chelechal taem. 3
Me se el domdasu el kirel a oumerang, e ke de medengei el kmo a Dios a Dios er a klemerang e“diak el sebechel loumulak.” 4 Ke de medengei el kmo a klemerang a klemedengei er kid er a tekoi er chelechang, me a chelii, me a klukuk. 5 Ke de medengei a chedaol ocholt me a llomes a sebechel a ikel diak el mengodech el klemerang el mo mengodech el teletael.
Ke de medengei el kmo a telemall el telbiil a tomall a reng. “Ak rirelii a klebelung el tekoi,” ngii a dilung. “Ng sebechem el ousubes er ngak?” A robekl a mo kaiuereked chim, e sorir lmuut el mo oumerang er a ta me a tang. A kuk ngodech el teletael, ea chad el ngara kelbus a omdasu el uase, “A lsekum e ak bai mle oltirakl er a Llach er a Omengedmeklel a Bedenged, eng bai diak ngar tiang”
Ke de medengei el kmo a deurreng el nga er sel telbilel a Rubak me a okedong el mo mesiou er a Ikelesia er Ngii a ongit el mo omelechesiu er a klemera me a beltkil a rengul a Dios el merkid me a rebebil. Rechad er a ikelesia, luldimukl er a remesobil, a mesiou er a Ikelesia me a buai.
Ngokiu a llomes, e a bishopric a ulemekedong er a ngeasek el obekl el mo mesiou er a nursery. A kot, ea bechiil el sechal a di dengchokl, el ngar cheroid. Ng mekokil el mong, eng omechelang el loutelechell el obengterir tirka el rengalek. A uriul, e tirka el obekl a uluureng a saul. Se er a uchei, e te milekoi el uasei, ngkal redil a mle soal a mo oungalek, eng di a sechal a dimlak el soal. Me chelecha, tia el omesiou a ngildecheterir e ulemak er tir. Ng dirrek el tia el deurreng er a rengalek a mlo er a chelsel a chebechilir me a blirir.
A ta er a beluu, a ngeasek el chedil el nga er ngii a mekekerei el rengelekel a ko er a mlo mechas a rengrir ngii me a bechil eng di te kilengi el ngkal redil a mo mesiou el Relief Society president. Di mle chelsel a kedeb el taem, eng mlo er ngii a klou el mekelkolt el sesel iolt meng mlo diak a dengkii, a tana er a stouang a mlo bechachau ea obliil a kmal mlo mekelekolt el uai a chaisbaks. E leng mle kmard a dengchii e mekeald a blirir, tirka el ngeasek el telungalek a milkengii a blirir el mo er a rebebil er a telungalek me a dersta el chad el me soiseb er a blirir.
Oumerang a mo meral nga er ngii se el doruul a meringel el tekoi el obang a klaumerang. Omesiou me a ringel a mo smisiich e miich a reng. A moumerang er a Dios me a rebebil eng mo er ngii a klengeltengat er a babeluades.
Uriul er a lsobel er a kasinoma, ea kedung el odam a miltuchel er a mlai. Ng dimlak el loumekikngit el reng el kirel, ngbai miluluuch e uleker, “Ngera a sebechek el subii er tia el teletael?” Nga er a osbitar, eng ulmelchesiu er a odubech el kirel a nurse el bekikl er a bechil me a rengelekel. Ngkal odam el miltulech er a mlai a miltik a nger se er a loumerang er a Dios e mo olngeseu er a rebebil.
Ea kuk odam el mengiil el mo omes er a stake president e leng uchul a delboes el siasiang, ea stake president a meluluuch me bo lodengei el kmo ng mekerang e mo ngoseuir. A bleketakl el uldasu a mlei: “Mbekengii a chesimer e becherei me beltuu.” Ngoba a klaumerang e oumerang er a Dios a mo ngosukii, me ngika el merreder er a priesthood a milkengii a chesimer e mechulii ngika el odam. Te mlo omelchesiu er a beltikereng me a klaumera er a Dios me a tir el dirrek. Ngmesisichang, e ngika el odam a omchela el mo er a ouchel reng e mo mengodech.
Maleuaisei ea dersta el omeruul a kuk kmal di kirel a chad, ea osisecheklel a ebangkelio me a Chedaol Reng a ngosukid el mo medengei el kmo ke de mekera el lmuut el mo oumerang er a rebebil. Se el oumerang a metemall a lechub eng mechebelad, ea klengit el reng a mo er ngii; me se el usbechelel a omelilt el mo medengelii a klaumerang me a duch el reng a kirel mo er ngii me bo el sebechel lmuut el mo oumerang a deleuill er a rechad.
Ngobengkel sel omengull el mo er a Dios me a chedaol ocholt, a President Russell M. Nelson a menglou a rengud se ra ledu, “Ng diak el kirem el omedednger el kmo ngtecha kirem el oumerang er ngii.” 6 Ng sebeched el blechoel el oumerang er a Dios. A Rubak ungil medengelkid e betik a rengul er kid er a bai ikel kuk dodengei a lechub eng betik a rengud er kid. Se el diak a ulebengelel beltkil a rengul me a cherrungel el klemdengei er a mla mo merek, chelechang, me a ngarmedal taem a rulii a Telbilel me a yaksok el di osisiu e klemerang.
Moumera a se el chedaol llechukl a omekedong sel cherengel a taem. 7 Ngokiu a klengeltengat er a Dios, se el cherengel a taem, ea klaumera me a olngesenges, a ngosukid el mo metik a blak el reng me a budech.
A Rubak a mengelaod:
“A langel a di nga er ngii se el kesus, eng di a deurreng a mei se el bo el tutau.” 8
“Berraod el molab modars [el mo] er a Rubak e moumerang er se el omengedmeklel” 9
“A Rubak a sebechel omekungil a rokui el klengit el reng me a ringel el nga er tia el beluulechad.” 10
Moumerang er a Dios 11 me a tekoi el chelid er Ngii. Kid me a deluill er kid a sebechel mengodech. Ngokiu a Tngakireng er a Rubak el Kristo, eng sesbeched el chemoit a mekngit el teleteled e mo bai ngelekel a Dios, el, chubechub, ngariou a rengud, 12 e mui a klaumerang e oumerang. Se el douchel a rengud, e mo ocholt e obes a kengtid, a Rubak a dilu el kmo Ngii a mo diak el lolbedebek. 13 Ng diak el lobes; ng bai, Ngii a melilt el diak el bo lolbedebek,me kid el dirrek.
Moumerang er a chedaol llemesel a Dios el mo ungil melilt. Ng sebeched el ousubes er a rebebil er sel ungil temel me a teletael el Dios a dilu el kmo ng kmal kired, 14 el uai a “mellomes el bersoech, me a diak el lolemall el suebek el charm.” 15
A le bebil er a taem el kmal telemall a rengud, e seikid eng soad a olodel me a omengetikaik er a Chedaol Reng. 16 Omerrob me a klausubes a mo er ngii se el motebengii a chelbirukel el teletael. Blechoel taem e a omerrob a kirel a mla mo merek el taem. Ea klasubes a kirel a ngarmedal taem. “A Dios a dimlak el lodureklii a Ngelekel el mo merrob er a beluulechad; ng bai okiu Ngii e a beluulechad a mo suobel.” 17
A Apostol Paulus a uleker, “Ng techa ngkel mo mengeroid er kid er a beltkil a rengul a Kristo?” Ng ulenger, “Ng diak el kodall, a lechub eng klengar, … kldidiul, a lechub a delechel … a sebechel el mo mengeroid er kid er a beltkil a rengul a Dios, el ngii a nga er a Kristo el Jesus el Rubak er kid.” 18 Eng di, nga er ngii a chad el sebechel choridid er a Dios me a Jesus Kristo—eng ngkal chad a kid. A Isaia dilu, “A kengtim a mla mertau.” 19
Ngokiu a chedaol beltik el reng me a llach, e ngercheled el kirel a ikel dolilt me a kekka er ngii. Eng di se el melngakireng el beltkil a Rengul a Osobel a “diak a ulebengelel el mo cherechar.” 20 Se el bo de keldmokl el me remei, el locha ke de“dirk ke cheroid,” 21 ea Dios a keldmokl el obang a klou el beltik el reng el me mengemedaol er kid, el obang a deurreng. 22
President J. Reuben Clark a dilu, “A kumerang el kmo a Demad er a Babeluades a soal el mo olsobel er a bek el Rengelekel, … e sel kerekeriil me a chubechub er ngii a mo meskid a ngarbab el nguked el kirel a teleteled, ng meskid a ikel ngii a sebechel, e sel debiteklii, ea kumerang el kmo ng mo meskid a mekekerei el kelebsenged el ngii a beot er ngii.” 23
Nga er a kerus, e sel ongtil a Osebeled el mo er a Demal a mla er ngii a belkul “Chedam, mosubes er tir” ng bai mle uase “Chedam, mousubes er tir; e leng diak lodengei a ikel loruul.” 24 A mimokl el omelilt me a klisiched a ngarngii a belkul e le ngercheled er a medal a Dios me kid, el kirel a ikel dodengei me a doruul. Meng ungil, eng sebeched el oumerang er a Dios er a cherrungel el kerkeriil me a chubechub el mo ungil el loukerkeriil a moktek er kid me a omerelled.
Kede merma er a ulebongel er a dulemuchel er ngii—ngokiu a beltkil a rengul a Dios e ke de me remei el me er Ngii me a rebebil.
Ke lotkii se el cheldechedal a Jesus Kristo el kirir ngkel chad me a reteru el ngelekel sechal? 25 A chimo er a ngelekel sechal a milrael e uluusbech a rokui el dikesel. Meng mocha ungil mesa teletelel, eng mlo soal lmuut el mo remei. Ngkel ta er a ngelekel sechal, el ultirakl a llach “a, mlo betok el rak,” 26 el dimlak el soal el mengemedaol er ngka el odam er ngii el me remei.
Rodam me a rodos, eng sebechiu el omadus er a Jesus el olengit er kid el mo omok a rengud, klemedengei er kid, beltik el reng, me a ngariou el reng, el sebeched el mesekid el meruul a ikal teblong el teletael?
Di ua ngkal kot el ngalek sechal a lechub eng redil, ke de locha di merorael ea uriul eng soad el lmuut el mo remei. A Dios a mengiil el mo mengemedaol er kid.
E di uai ngkel ngalek el sechal a lechub eng redil, a Dios a soal bo doldeu a rengud sel dedak el mo remei el mo er Ngii. Ng olengit er kid el mo remuul a ikelesia, quorum, class, me a omilil el, ungil, e selbechakl—el basio el mo er a dersta chad. Ngoba ungil blekeradel, klemedengei, omengull, e ke de oba ngariou el reng el osiik er a Rubak e meluluuch e mengemedaol er a mla moluut el ebangkelio er Ngii el mo omekngeltengat er kid rokui.
A omerolel a klengar er kid a kuk kirel a dersta el chad, eng di ngsebeched el lmuut el me er a Dios el Demad me a Betik er a Rengul Ngelekel lokiu a klaumera er a Dios, rebebil, me a kid. 27 A Jesus ulengit, “Lak ko medakt, bai di moumerang.” 28 El di ua Profet Joseph, lak ko medakt e moumerang er a omengedmeklel a Chedam er a Babeluades. 29 Rodam, Rodos, sechelei, kulengit me mluut el osiik er a klaumerang e moumerang—er a tekoi el chelid el Ngii a mle yaksok er kau er a chelechal sils. El ngara chedaol ngklel a Jesus Kristo, amen.