Budech er a Dersta el Chad er a chelsel a Meringel Taem
Ng kmal menga el klunga belkul el dersta el chad osiik er a budech.
Ak dirke mlokedong el mo olterekokl er a telkib er a reksi er a Nauvoo. A mle tebechedel tial urerek, eng mlo sebechek el mo odngelii a Liberty Jail er a Missouri. Sera kumes er tial blil a kelebus, eng mlo melcheluches er a udlesuek aikel dilubech el tekoi el rulii meng klou a ultutelel telengtengil a reksi er a Ikelesia. A klegar er a Resanto a mlo nga er a dakt er sel tilobed el meirei er a kabenor er a Missouri el mo oldik el tir. Osisiu, e a Profet Joseph me a rebebil er a rulbengkel a mla motutakl e mekelbus er a Liberty Jail. A ta er a kmal mle uchul a ultok el kirir a rechedal a ikelesia er kid a sel ultekengir el kirel a klsibai er a rechad. 1 A klungel odechelakl el mlo er a Joseph Smith me tirke lulbengkel a mesisiich lolchotel a diak el melemalt lomelilt el ngii a klou a letemelii er a remelemalt el chad. A temel a Joseph el ngara Liberty Jail a ochotii el kmo a mekngit a diak de du el kmo ng mo er tirkel cheterochel er a Rubak a lechub el cheroid a klengeltengat er Ngii.
Ng mlo mechas a renguk er a kunguiu a tekingel a Profet Joseph Smith er a lechelsimer er a Liberty Jail: Rubak ke nga er ker? E ngar ker a kateng el melenget er a omngarngii el basio?” 2 A Joseph a uleker el kmo ng uangera klemanget el rechedal a Rubak a ngara ringel er a chelbirukel me a diak el melemalt lodechelakl.” 3
Sera kdechor er a chelsel a Liberty Jail eng kmal mlo botech a renguk er a kchiuii a nger er a Rubak el kmo Rungalek, a budech le ko er kau, a ongarm me a ringel el mnga er ngii a di telkib el taem, e lsekum e kungil lotekangel, e a Dios a mo kobkellau er bab. 4 Ng bleketakl el ultok a smisichid el kirel a diak a ulebengelel, lomerolled el mo er a celestial. 5
A mekreos el tekingel Osobel el kmo Rungalek, a budech le ko er kau 6 a kurrekodel er ngii e kmal klou a belkul er chelechal sils er kid. Ng mekletkak er a osischeklel el mo er a rulbengkel er sera le Temel lolsisechakl ra le ngara beluulechad.
Uchei er a le bo er a ringel a Kristo er a Sers er a Gethsemane me a kerus, eng dilu er a re Apostol er Ngii el mo “kaubeltikereng; el uai Ngak el betik a renguk er kemiu” 7 e mlengelaod er tir lolab aikakid el tekoi: “A budech ak beskemiu, budech el kubang ak beskemiu: el diak el beluulechad a meskemiu, ngak a meskemiu. Lak louedikel a rengmiu, e lak ko medakt.” 8
A ta er a mekreos el dial a Rubak e Osobeled, el Jesus Kristo, a “Prince er a Budech.” 9 A Rengedel a mo oberk uldimukl a budech me a beltikelreng. 10 Kede olsingch er sel sils er a tal telael rak el Mesiah a mengedereder.
Ng uaisei el osenged a bedul tiaikid el tal telael rak er a omerredel, eng di kede medengei el kmo a budech er a beluulechad me a kltalreng a diak de ues er chelechal sils er kid. 11 Chelsel a klengar ngak el rokir, eng dirkak a ta el kisa a klou el ngelsonges er a ungil klechad. Kede iliuekl er a ngasechereng, ultok me a mekngit el tekoi, mekngit lomeruul el ngii a tomelii a budech me a kltalreng.
A budech er a beluulechad a diak bo denguu di merekmo Ongeru Lemei a Jesus Kristo. A Osobel a mle olisechakl er a re Apostol er Ngii el kmo a temel lolisechakl el ngar tial beluulechad a diak el bol kdmeklii a budech er a er a rokui el beluu. Ng ulisechakl el kmo, “Lak momdasou el kmo ak mlei loba budech el mei er a beluuelchad.” 12 A budech er a beluulechad a dimlak el telengtengil a urerel Osobel. A budech er a beluulechad a diak le nga er ngii er chelechal sils.
Eng di, a budech er a dersta el chada sebechel mo er ngii el diak el iior er a ngasechereng, ultok, me a klekakeakl el ngii a melemall er tial beluulechad er kid er chelechal sils. Ng kmal menga el klunga belkul el dersta el chad osiik er a budech. A klebokel e soad el beches el chelitakl el kirir a rengeasek el delbechelel a Brother Nik Day, el dai er ngii a kmo “Peace in Christ” a kmo, “Sel lak a budech er a beluulechad, e nga er ngii a budech er a Kristo.” 13 Kede ngeltengat er tial chelitakl el mlo er ngii ruchei er tial bekoiuiull rakt er a COVID-19.
Tial chelitakl ochotii a klebokel el teletael er a budech e meketeklii el kmo a budech a delalm er a klengar me a urerel a Jesus Kristo. A President Joseph F. Smith a millekoi, “Ng diak el sebechel mo er ngii a reng er a budech me a beltikereng er a beluulechad … el di merekmo a chad lenguu a klemerang er a Dios me a klemechel a Dios … e le kengei er a klisichel me a deruchellel el chedaol.” 14
Ng uaisei el diak bo dikrii a blakereng er kid el kirel a budech er a beluuelchad, eng di kede mla mo medengelii a budech el kirir a dersta el chad, el Kristo olisechakl kirel. Tial osisechakl a ulecholt er a chelsel a Doctrine and Covenants. Ngike el meruul a urerel a llemalt a mo nguu a ngkedel, el ngii a budech er tial beluulechad, me sel merael mei el beluuelchad. 15
Ngera bebil er a “urerel a llemalt” el mo ngosukid er a mondai e kosadel a ultok me bo debetik er a budech er tial beluulechad? A rokui el osischeklel a Kristo a melutk el kirel tiaikid el rael. Ak masech a bebil el kuumera el kmo ng meklou a ultutelel.
A kot, Moubeltikereng er a Dios, Moltirakl a Llechul, e Mousubes er a Rokui el Chad
A President George Albert Smith a mlo merredel er a Ikelesia er sera 1945. Ng mirael chisel er a ikel rak le Apostol el kmo ng soal a budech el chad. Aikel teruich me a eim el rak ruchei er a bo lorredel, e a ongarm me a ringel er a beluulechad el rokir, lobengkel a kodall me a telmellem a Ongeru el Mekemad ruriul, a dimlak a tal budech.
A mocha ulebongel er a Ongeru el Mekemad, er a temel a kot longdibel er ngii el Merredel er sera October 1945, e a President Smith a ulemeklatk er a Resanto el kirel ongtil Osobel el mo oubeltikereng er a retonari e mo ousubes er a recherarou e ulisechakl, “Tiaikid a reng el rokui el Uriul-klebesei el Santo a kirir losiik el mo obang a lsekum e te oureng el ta er a klebesei e te mo dechor er a Rengedel e nguu er a Chimal a klebokel lomengemedaol er tir el me remei.” 16
Ongerung: Mosiik a Rdechel Chedaol Reng
Sel babilengel a Apostol Paulus el mo er a rechad er a Galatia a masech a urerel a llemalt el ngii a osisebid er a rengedel a Dios me a tekoi el sebechel, el lak douchel a rengud el kirel, eng diak el sebeched el soiseb. A bebil er a ikaikid el tekoi a ikel a redechel a Reng el: “beltikereng, deureng, budech, kemanget el ngara ringel, blekokouii, klungiaol, klaumerang, delemdemk, [me a] ulserechakl reng.” 17 A Paulus a dirrek luldekiar a mesebechakl er a tang er a chelngelel e diak bo el mesaul a rengud er a ungil lomeruul. 18 A kuk bebil er a ikel tekoi el diak el melemalt a nguldekiar a ouketui, ngasechereng, me a mondai. 19
A ta er a kot el klou el suobel er a taem er a Uodel Renged a mesaod el kirel a Chedam er a Abraham. A Abraham me a Lot, el chebedel a kesol er ngii, a mle meteet eng di dimlak el sebechir el dmak el kiei. Sel mo oridii a mondai er tir, e a Abraham a milchere Lot meng di ngii el melilt er a basio el soal mo kiei er ngii. A Lot a ngileltii a oberberk el basio er a Jordan, el klou a ralm er ngii e klebokel. A Abraham a ngiluu sel diak el sal ungil a chetemel basio er a Mamre. A chedaol llechukl a kmo a Abraham a milkedecherur a tento er ngii e rulii a “altar er a Rubak.” 20 Ea Lot, a kuk bai, milkedecherur a tento e rngii el chemau a Sodom.” 21 Me le bo er ngii a budech er a deliongel, ng bleketakl a suobel el denguu er tiang el kmo: ng kired el choroid a mondai e oba omengull el kirel a tekoi el melutk er a llemalt luchul a budech er a deleuill. El ua osischeklel a King Benjamin el kmo, “Lak molekoi a mekngit el kirel a ta er a rechad, e bai bom kiei el ngara budech.” 22 Eng di sel kuk doasod a tekoi el kirel a llemalt me a osisechakl, eng kired el mo mesisiich e diak demesim.
A lsekum eng soad el mo nguu a budech el ngii a ngkedel a llemalt, eng diak dokedechor a tento er kid el bedul a beluulechad. Kede mekedechor a tento er kid el bedul a templo.
Ongedei: Mousbech el Melilt er a Llemalt
A budech me a omelit a kabekbuk el tekoi e meklou a ultutelel er a chelsel a uldasou er a mo suobel. El uai ikel kleuadel el suobel er a ebangkelio el “Omelilt me a Ngerachel,” “A mimokl melilt a techall el Dios a meskid el di kid el melilt a doruul.” 23 A leuaisei, e a mimokl melilt a ngii a kmal chelsel a ulekerulel a chad me a tekoi doruul el mo omekngeltengat er kid sel doltirakl er a Osobel. 24
A mimokl lomelilt a mle klou el tekoi er sel Ongdibel er a Babeluades ma mondai er tirkel millilt el mo oltirakl er a Kristo me a tirkel loltirakl er a Diablong. 25 A bo debechei a kldidai el reng me a omengedereder e bai dolilt er a Osobel eng uchul e kede mo nguu a llomes me a budech er Ngii. Eng di a budech er a dersta el chad a sebechel meringel sel sekum a rebebil a melilt el mo omekringel e omekcharm er a rebebil.
Ak mui el medengei el kmo a budech el dulchesuar er a rengud a mlo mesisiich lokiu a klemedengei er kid er a ikel riruul a Osobelel a beluulechad el kired. Tia kmal klebokel el medung er a chelsel a Preach My Gospel: “Sel dultuil er a Tngakireng er a Jesus Kristo, e Ngii a sebechel ngosukid lotekangel ongarm, secher, me a ringel el mei er kid. Ng sebeched el mo mui er a deureng, budech, me a ulserechakl reng. A ikel rokui el metacher besul er a klengar a sebechel mo ungil besul lokiu a Tngakireng er a Jesus Kristo.” 26
Ongeuang: Toketekii a Zion er a Rengud me a Rekeblid
Kid a ngelekel a Dios e tebechedel a telungalek er Ngii. Kede dirrek el tebechedel a telungalek el demechell er a chelsel. A teketekel a telungalek a ngii a dodai er a deureng me a budech. A President Russell M. Nelson a mla olisechakl er kid—e dirrek chelecha el taem er tial omekodall el rakt e kede mla subii—el kmo a osischakl er a Ikelesia er a blai, a sebechel “msa klisichel a telungalek … el remuul a [rekeblirir] el mo basio er a klaumerang.” 27 Omko kede oba tiaikid el teletael er a klechelid er a rekeblid, e kede dirrek el mo nguu a budech er a Osobel. 28 Aki medengei el kmo te betok er kemiu a diak aikaikid el klengeltengat er a llemalt er a rekeblimiu e blechoel kautok kemiu me tirkel diak loruul a llemalt. A Osobel a sebechel lomecheliu e meskemiu a budech el mo omekrael er kemiu el mo selbechakl er a ses el eolt er a klengar.
Bo modengei el kmo a deureng, beltikereng, me a mui el rellel a beltikelreng, llemalt er a chelsel a telungalek a mekdebechii a budech me a deureng. A beltikereng me a blekokeuii a ngii a kma uchul a zion er a chelsel a rengud me a rekeblid. 29
Ongeim: Moltirakl a Tekingel a Profet er Chelechang
A budech el dobang a mo klou sel doltirakl er a profet er a Rubak, el President Russell M. Nelson. Ng di telkib eng morngii a techelled el mo rongesii. Ngii a mle kldmokl er a uchelel a beluulechad el kirel tial okedong. A kedmeklel kirel tiang a kmal mechas a rengud er ngii. 30
Ngii a mla olisechakl er kid el kmo ng sebeched el “melchesuar a budech me a deureng er a chelsel a meringel taem,” sel dolasm el merael mo uaia Osobeled, el Jesus Kristo. 31 Ngii a mla melekoi er kid me bo “ douchel a rengud er a bek el sils” me denguu sel “omekbeches, omekungil, e melisiich el klisichel a Rubak.” 32 Ngak a sioning el kmo a chedaol ocholt a mla mo er ngii e melemolem el ngara babeluades el mei lokiu a betik er a rengud el profet.
Ng uaisei el dongull e kongei er ngii el profet er kid, eng di kid a mengull er a Demad er a Babeluades me a Osobeled, el Jesus Kristo. Kede modingel lokiu Chedaol Reng.
A kuuchais e otii a sioning er ngak el apostol el kmo a Jesus Kristo, el Osobel e Osebelel a beluulechad, a omekrael er a mla moluut el Ikelesia er Ngii. A klengar Ngii me a tngakireng a meral uchul a budech. Ngii a Prince er a Budech. A kuchotii a meral sioning er ngak el kmo Ngii a ngar. El ngara a ngklel a Jesus Kristo, amen.