Sel Budech er a Kristo a Mekodir a Klsibelreng
A beltikelreng er a Kristo sel siseb er a klengar er kid, ke de mo chemau a mondai loba delmedemek el reng, kllou el reng, me a blekokouii.
Rodam me a rodos er ngak, e sel temel a exercise er a skeng er a ringel, e sel urerel a chaidireng a mo klou. A chaidireng el sebechel a kuk di omerael a ual bol muri er ngii a rurt er a ngesachel. Ngokiu tial teletael, ea skeng er a ringel a sebechel locholt a secher el ngarngii el diak le meues. Me a ikel medangch el secher a sebechel mukar ruchei ra le borngii a telemellel er a klengar ra bek el sils.
Tial COVID-19 el secher a meral mocha skeng er a ringel er a beluulechad! Tial skeng a ulecholt a kakngodech el kekka. A ungil e bedochel el kar a mla mekedmokl. 1 A resemmong er a kar, resensei, obetiterir a rsmecher, ma lmuut el bebil a mla chemoit a temir—e melemolem el meruul uaisei. Te rebetok el chad a mla me chemolt a klungiolel a rengrir—e melemolem el meruul el uaisei. Engdi, ngarngii a diak lungil teletael el mla mechemolt. A remechitechut el dertal chad a mla ngara ringel—e melemolem el uaisei. Tirkel tir oureor el mesaod aika el ngarngii el diak el tabesul a kired el chemat e mereng a sulir.
Tial bekoiuiuul secher a dirrek el omekberaod er a reng er a Ikelesia er a Osobel me a rechedal tial ikelesia. A kekka a dirrek el mle kakngodech. A klengar er kid a mla mukngeltengat lokiu a oldingel loba “ngarbab e chedaol teletael,” 2 me sel Mei, Moltirakl er Ngak el suobel, mesel a kot-a blai, Ikelesia-lolngeseu omesubel ebangkelio. Te betok a mla olngeseu loba chubechub ma ongelaod er a chelsel aika el kmal meringel el taem e melemolem el uaisei. 3
Engdi, a bebil er a taem, ea skeng er a ringelel chedaol klengar a olecholt er a blekeradel el chemau a ultok me a omeleakl. Tia ouchais er kid el mo oureor el melodech a rengud me bol tang el meral oltirakl er a Osobel. Tia diak el beches lolibesongel, engdi tia a kmal klou a ultutelel. 4
A Osobel er a loldingel er a rechad er a Nephi, eng ulsisechakl, “Ng diak el kirel ngarngii a klautok er a delongeliu … Ngkel loba reng er a klautok a diak el chedak, ngbai chedal a diablong, el ngii a demerir a rumtok, me ngoldurch er a rengrir a rechad el mo kautok loba ngasechereng, er a ta el mora tang.” 5 Sel bode kautok kid ma tang loba ngasechereng, ea Diablong a ocherechur ea Dios er a babeluades a lmangel. 6
A Diablong a ocherechur e a Dios a lmangel el kmeed el erul tekoi a uchul. A kot, a klautok a choitechetur a uldekial a sioning er kid el mora beluulechad el kirel Jesus Kristo me sel omekbeches el ngii a duubech lokiu a “urerel, …klechubechub, me a krasia.” 7 A Osobel a millekoi: “Beches el llach ak beskemiu, El mo kaubeltikelreng. … Me tia ikid e a rokui el chad a mo medengei el kmo kom oltirakl er ngak, a lsekum e kom kaubeltikelreng.” 8 Tial tekoi a dirrek el klemerang—a rokui el chad a medengei el kmo ngdiak doltirakl er Ngii alsekum eng diak doubeltikelreng el mora tang. A urerel er a uriul-klebesei a mo chetituokel sel sekum me a klautok me a klsibelreng 9 a duubech er a delongelir a roltirakl er Ngii. 10 Ongerung, a klautok a diak lungil er a chedaol ulekerulir a rederta el chad. Ng mo diak de ngara budech, deureng, me a ulenguul, me a domelchesiu er a Chedaol Reng a mo chetituokel.
A Jesus Kristo a silodii el kmo a osisecheklel a diak el bo “lolekiis a rengrir a rechad loba ngasechereng, el mora tang; ng bai [tial ] osisecheklel [a] uase a chouaikal tekoi a kirel mechoit.” 11 A lsekum me ak mereched el metirm a renguk malechub ak omtok a kuk ngodech er a uldesuek me ak mo kesib a renguk malechub ak merritel, e ak mla “ngmanget” er sel skeng er a chedaol klengar. Ak nganget er tial skeng eng diak el belkul a kmo ng dikea rolel er ngak. Ng bai, ochotii el merngak el kmo ngkirek el mengodech. Me tia ungil bo dodengelii.
A uriul er a odngelel Osobel el mora Merikel, e a rechad er ngii a mlo tang; “e mlo diak a klautok er a rokui el beluu.” 12 Omomdasu e tirkal chad a mlo tang e le tir el mle osisiu, malechub e tir el dimlak el kakerous a uldesuir? Ng diak kuumerang el kmong uaisei. Ng bai, klautok me a klsibelreng a mlo nguemed e le tir el ngiluu a otireklir er a Osobel el morbab er a rokui el tekoi. A klekakerous er tir a kmal ngariou sel dongaisisiu er a loba el beltikelreng el mora Osobel, me tir a mle tang “er a dikesir er a rengedel a Dios.” 13 A olechotel tiang “eng meral dimlak a re ngara deureng el chad … el mo uai tir er a chelsir a rokui el chad el mla obeob er a chimal a Dios” 14
A kltalreng a ultuil er a blak el reng. 15 Tia mokdubech sel domkeroul er a beltikelreng el mora Dios er a chelsel a rengud 16 e omdalem el kirel sel diak a ulebengelel klengar kid. 17 Kid a tang lokiu sel de kot el kaisisiu er ngii, el olengcheled el ngelekel a Dios 18 me a blak el reng er kid el kirel a klemerang er a mla moluut el ebangkelio. Se le uaisei, e a beltkil a rengud el mora Dios me a otirekled el mora Jesus Kristo a meskid sel meral ngara rengud lomekerreu er a rebebil. Kede mengeluolu a klekakerous el teletelir a rebebil, osengir, me a duch er tir. 19 A lsekum eng diak el sebeched el nguu a otirekled er a Jesus Kristo el morbab er a ikel soad me a uldesued, eng kired el lemuut el mo omes aikel ual meklou a ultutelel er kid e ngmodech.
Ng locha mo soad el melekoi el kmo, “Adang, kid a sebeched el mo tang—alsekum kau a kongei lobengkek!” Se lungil dokiungii a bai oker, “Ngerang sebechek el rulii el mo omekeroul er a kltalreng? Ng mekerang a kunger el mo ngosouir ngkal chad me bol keed er a Kristo? Ngera ak rulii el mo ngosengesii a klautok e meleketek er a klechubechub me a kaukerreu er a chelechad er a Ikelesia?”
A beltikelreng er a Kristo sel siseb er a klengar er kid, 20 e ke de mo chemau a kebosech ra uldasu loba delmedemek el reng, klouel reng, me a blekokouii. 21 Mo diak di de simbai el kired e bai mo kirel a ngar bita er kid. Ke de “ousbech loba tabesul lomeruul e oldak a reng.” 22 Ng diak de teloi er a “doumededenger el klautitekangel,” merritel, malechub e dolasem el melibas er tir. 23 Ke debai, omes er tirkel diak doldubech a uldesuir el tir a uai a loruul er sel kot el ngarbab el sebecherir lokiu aikel lodengei er a klengar.
A bechik a mle chad ra llach el betok er a lluich el rak. Me a urerel chad er a llach, eng blechoel loureor lobengterir a rechad el chemolt lolngeseu a uldasu el bechik a diak loldubech. Meng mlo meduch el mes a uldesuir e dimlak el mekngit omerellel malechub el kesib a rengul kirir. Ng sebechel melekoi el mora chad ra llach er a bitang, “Ak mesang el diak bol ta uldesued er tial tekoi. Ng soak kau. Ak mengull er a uldesuem. E oureng el kmo ng sebechem el meskak a osisiu el omengull.” Betok el taem eng rulleterir el mo kakull e dirrek el mo kausechelei ngii mesel ngarngii a le kakerous er ngii.
Ngii me tirkel mle kauketui a sebecherir el mo tang er a chesel a otireklir er a Osobel. 24 Sera 2016, e ak mlo teloi er sel oterkeklel a Templo er a Helsinki Finland el mo kulii a demak me a demal me a delal el ta er tirkel mle kot el obult el mo chedal a Ikelesia er a Finland. A re Finns, uldimukl er a demak, a mle berrusir el kemanget el taem a mo dechor a templo er a Finland. Seikid el taem, ea beluu lousbech ra osisiu el templo a mla er ngii a Finland, Estonia, Latvia, Lithuania, Belarus, me a Rosia.
Sera bocha lolterekokl, e ak silubii a tal ongasireng el tekoi. Sera kot el sils er a bo loureor a templo eng mlo moterekokl el sils el mora rechad er a Rosia el mo mengedmokl a chedaol ruoll. Ng meringel er kid a mesaod er sel chilsir a rengud er ngii. A Rosia me a Finland a mle kaumekemad el betok el taem er a irechar el mei. A demak a dimlak loumerang er a Rosia me a rechad er tial beluu el rokui. Ng mle mesisiich lolecholt aikal lomelchesiu el tekoi, ea ikal lomelchesiu a di osisiu er a bek el Finish er a ngesechel a rengrir el kirel a Rosia. Ng mla mo ungil medengei a llechukl el kirel sel rak er a 1900 er a mekemad er a delongelel a Finns me a Rosia. Sel lesiliseb er ngii el tekoi er sera Ongeru el Mekemad, er a Finland me a Rosia er a le kautok, a dimlak a ngeral relii el mo ngodechii a uldesuel.
Sel rak ruchei er a oterkeklel a Templo er a Helsinki Finland, ea chelechad er a templo, el oumesinnd a re chedal a ikelesia er a Finland, a mlo kadecheduch el kirel a mo ruoll er sel temel oterkeklel a templo. Sera loumiting, ea tara chad a milsa el kmo a re Santo er a Rosia a mo merael el telal klebesei el me er tial oterkeklel a templo e locha sorir el mo ngmai a klengeltengat er a templo ruchei er ra lorael mo remei. Ngkel loungerachel er tial chelechad, el Odam el Sven Eklund, a millekoi me a re Finns longiil el telkib, me a rechad ra Rosia bol kot el chedal a ikelesia el mo kudmokl a chedaol ruoll er a templo. A rokui el chedal tial chelechad a kilengei. A re blak a rengrir el Finns el Uriul-klebesei el Santo a mlo mechei el telkib a klengeltengat er a templo e mesterir a techall a rechad er a Rosia.
A Area President el mla er tial miting er a chelechad er a templo, el Elder Dennis B. Neuenschwander, a uriul eng milluches: “Ng dirkak a ta el taem mel siich a rengud er a re Finns el ua seikid el taem. A chetituokel el resksi er a Finland me a re tonari er tir el ngara bedul ongos … me a klemeriar el reng el kol mocha ngar ngii [a templo] el dechor er a chetemir a mlo medechel. Sel kongei er a rechad ra Rosia el mo soiseb el kot er a templo a [mle] olechotel a beltikelreng me a uldars.” 25
Sera kuchais er tial bekokouii lomeruul el mora demak, ng mlo medemedemek a rengul e lilangel, el kmal dertang el boluaisei ngikal chelemekl a rengul el Finn. Seikid el taem el mor er sera lemad er a edei el rak ruriul, eng dimlak a tang mel lochotii a di chimol mekngit luldesuel el kirel a Rosia. Ng mlukellomes er a okesiul a rebebil er ngii er a Finns, ea demak a millilt el nguu a otireklel er a Jesus Kristo el mo er bab er a rokui el uldasu. A re Finns a dimlak el monganget el Finnish; ma rechad er a Rosia meng dimlak el monganget el chad ra Rosia; ngii el erul chelechad a dimlak el choit a siukang, reski, malechub aikel lodengei el mo rulleterir el chemoit a klsibelreng. Ng dimlak a belkul le boloruul aikang. Te bai, millilt el rulii a otireklir er a Jesus Kristo el mo kot el ngara uldesuir. 26
A lsekum eng sebechir el rulii tiang, e kid meng dirrek el sebeched. Ng sebeched el nguu a dikesed, siukang, me a dodengei el tekoi el mora Ikelesia er a Jesus Kristo. A Samuel a dimlak el bolcheroid er a dikesel el Lamanite, 27 dirrek a Mormon a dimlak el bol cheroid er sel ngii a chad er a Nephi. 28 Eng di a derta er tir a ngiluu a otireklir er a Osobel el mo kot.
Alsekum eng diak el ta rengud, eng diak dulcherangel el Chedal. 29 Ak kulengit er kid el mo mesisiich el nguu a beltikelreng er kid er a Dios me a otirekled er a Osobel el morbab er a rokui el uldasu. 30 Mei e bo durrekodel a telbiil in ngii a ulecholt er a chad el oltirakl—el telbiil el mo ta rengud.
Mei e doltirakl er a okesiul a re Santo el meliuekl er a beluulechad el tir a mla mo ulterekokl el oltirakl er a Kristo. Ng sebeched el ultuil er a Jesus Kristo, el ngii a “budech el ngar kid, e ngii a … a mla ngubetii orars er a delongeled; e ngii a mla oriidii lokiu a [tengetengel a tngakireng] a kle kauketui.” 31 A sioning er kid er a Jesus Kristo el mora beluulechad a mengai el mo mesisiich, e kid a mo ungil a chedaol ulekeruled. 32 Ak kuuchais el kmo sel bo “dikrii a klautok” e merael mo “diua-luldesuel a Rubak er a beltikelreng e mo ta lobengkel er a klemerang,” ea budech er Ngii a me er kid. 33 El ngara a ngklel a Jesus Kristo, amen.