![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F47%2Fbe%2F47bebe3accac9928a60cebd3cf5863cc5d3cc7f9%2F47bebe3accac9928a60cebd3cf5863cc5d3cc7f9.jpeg/full/!250,/0/default)
A Ngklel A Ikelesia a Diak Dolengdangch er Ngii
Sel blak a rengud el oltirakl a omelkingel a Rubak el mla mocholt lokiu a ngar el profet er Ngii, el omko ngii a ngodech er a ikel uldesued, e kirel ousbech a ngariou el reng me a ringel, ea Rubak a mo omekngeltengat er kid loba chedaol klisiich.
Sera ongdibel er August 16, 2018, ea President Russel M. Nelson a dilul kmo: “A Rubak a mla meketeklii er a uldesuek a klou el ultutelel a ngklel a Ikelesia, el ngii a Ikelesia er a Jesus Kristo er a Uriul-klebesei el Santo. 1 A ureor el de chelbangel er ngii el mo ngara kltalreng el reng er sel Ngii a soal.” 2
Erul klebesei ruriul, er a August 18, ea kulbengkel a President Nelson er a Montreal, Canada. Uriul er a miting er kemam el mla er a klebokel el Palais de Congrés, ea President Nelson a ulenger a ker er a rechad er a chais. Ng dilu el kmo “ng mo meringel a deluut el [mesmechokl er a ngklel a Ikelesia e] [dolodech] er a uldelid el teletael el mla mo ngara dart el rak.” E, dilchelii el kmo, “A ngklel a Ikelesia a diak dolengdangch el kirel.” 3
Euid el sandei ruriul, eng mlengedecheduch er a klou longdibel: “A Rubak a mla meketeklii er a uldesuek a klou el ultutelel a ngakl el Ngii a mla dulii el kirel a Ikelesia er Ngii, el Ikelesia er a Jesus Kristo er a Uriul klebesei el Santo. … A Osobel a Ngii a dilu el kmo, ‘Tiaikid a mo ngklel a ikelesia er ngak.’” A President Nelson a liluut lomelekl el kmo, “A ngklel a Ikelesia a diak dolengdangch el kirel.” 4
A Ungil Ker
A ungil ker a me duum: Ngera meng chelechang, e a betok el rak er a memong e kede ulebang a ngakl el “Mormon”? “A Mormon Tabernacle Choir,” eng chemolt er a video a “Ngak a Mormon,” a chelitakl er a Primary el “Ngak a Buik er a Mormon”?
A osischeklel a Kristo a diak el mengodech e diak a ulebengelel. Eng di a tokubets e meklou a belkul dauch er a urerel Osobel a mocholt er sel ungil temel. Tial tutau ea President Nelson a dilu, “A Oluut a melemolem el ngarngii, ngdiak el dil ta el omeruul.” 5 Me a Rubak a dilu el kmo, “A rokui el tekoi a mo mocholt er sel temel.” 6 Me a chelechang temed, el deluut el toketekii a mla mocholt el ngklel a Ikelesia.
A olengchelel me a ulebongel lomerollel a Ikelesia er a Jesus Kristo er a Uriul-klebesei el Santo a kired el mo okedongall er a Ngklel. Ak dirke mla er a Kirtland, Ohio, el basio el Profet Joseph Smith, me a re mle kesai el chedal a Ikelesia, a ulemlaoch, “Tial Ikelesia a mo mekekii a Diluches me a Dims er a Merikel—e mo mekekii a beluulechad.” 7 A Rubak a milsaod a ureor er chelchal taem el “meang e mengasireng lureor.” 8 Ng milsaod a “telbiil [el mo] mekedmokl ra ikel uriul klebesei,” el mo uchul “a rokir … beluulechad [el] mo ngeltengat.” 9
A cheldecheduch er tial ongdibel a mla moiuid er a okeim me a eim el omelekoi er a beluuelchad. A uriul, e a ikal tekoi a mo morenges e mechuiu er a oketiu me a eai lomelekoi er a chelsel a betok er a eru el dart me a lluich el meklou me a mekekerei el beluu.
Se luut el mei a Osobel loba klisiich me a klebkall, e a rechad er a Ikelesia er a Jesus Kristo er a Uriul-klebesei el Santo a mo teloi er a bek el beluu, bek el chad, me a kakerous el chad, me a siukang er a beluulechad.
Mukeroul el Ongetikaik er a Ikelesia
A ongetikaik er a mla moluut el Ikelesia er a Jesus Kristo a diak di lebo er a rechad er a Ikelesia el merekong. E leng uchul a ocholt er a babeluades er chelechal sils, e a chedaol llechukl el mla moluut el me er a beluulechad me a mesisiich el sengk er a Chedaol Reng, e kid a mo llomes el ngara bukl e a iilkolk a mo mechubel er a beluulechad er tirke el diak loumera er a Jesus Kristo. Ng uaisei el betok a mo mechere ilkelkel a beluulechad meng mo mchelubel er a klaumera er tir er a Osobel, eng di kid a “diak bo demesim er sel basio el [kid] a nga er ngii.” 10 A Rekristiano el diak el chedal a ikelesia er kid a mo outkeu er sel deruchelled me a mera el sioning er kid er a Kristo. Nguldimukl er tirkel Kristiano el ko er a ngodech osengir er kid a mo outkeu el sechelid. Aika el merael mei el sils, e kid a mo okedongall er a ngklel a Jesus Kristo.
Ko mesulang er a blakereng er kemiu lolsiich er a meral ngklel a Ikelesia. Sel ongdibel er a edei el rak er a memong, e a President Nelson a mle yaksok er kid el kmo “sel blakereng er kid lousbech er a meral ngklel a Ikelesia er a Osobel … [a mo choisisii] a klaumerang me a lmuut el mesisiich el chedaol klisiich.” 11
Tial yaksok a mla mutab er a rebetok el blak a rengrir loltirakl el chad er a beluulechad el rokir. 12
A Brother Lauri Ahola er a Beluu er a Merikel a dilu el kmo sel bebil er a taem eng meringel er ngii lousbech er a meral ngklel a Ikelesia. Engdi, se osischeklel a profet, eng melemolm lousbech er ngii. A ta er a taem, eng mle oldingel er a sechelil el kuk chad er a tara klechelid. Aikakid a tekingel:
A kudengelii el chad a uleker, “Kau ke Mormon?”
“‘Ngak a chedal a Ikelesia er a Jesus Kristo er a Uriul-klebesei el Santo, choi,’ ak dilung. Ngulemuchel loker ngak a bebil er ker el dersta er ngii el ker omuchel el kmo: ‘A Ikelesia er a Mormon ngoumera el … ?’ E bek el taem loker, e a kumuchel er a nger ngak el kmo: ‘Chelsel a mla moluut el Ikelesia er a [Jesus] Kristo, e a ki oumerang …’
“… A bocha lodengei el kmo ng diak kulekoi er a tekoi el Mormon,’ eng mle bleketakl loker el kmo, ‘Kau ng diakom Mormon?’
“Ak mocha oker ngii el kmo ng mle medengei el kmo ng techa Mormon—eng dimlak lodengelii. Ak silbedii el kmo a Mormon a mle profet … [e ngak] a dmeu a renguk el mlo medengelii el [chad].
“‘Ng di, ak millemolem, ‘A Mormon a dimlak el mad el kirel a kngtik. A Mormon a dimlak … el bo er a ringel er a Gethsemane a lechub e lemad er a kerus el [kirek]. … A Jesus Kristo a Dios er ngak e Osobelek. … E okiu a ngklel eng soak a bo lodengelkak. …’
“… Uriul er a sesei el bung el diak longerodech, [eng ngkal kudngelii a dula el kmo], ‘Kau a Kristiano!’” 13
Kom lematk a tekingel a President Nelson? “Ak yasksok er kemiu el kmo a lsekum e kede mo er sel tkul er bab el sebeched lolutii a meral ngklel a Ikelesia er a Rubak, e Ngii a mo otengelii a Klisichel me a klengeltengat er Ngii el mo er a Uriul-klebesei el Santo, el dirkak a tal deues.” 14
A Rubak a Blechoel Mekengii a Rael
A Rubak a blechoel lotireklii a yasksok er Ngii. A Rubak a blechoel mekengii a rael el kired sel doruul a Urerel.
Ng tela el rak el ki mullasm lomechar er a internet domain sites el ChurchofJesusChrist.org me a ChurchofJesusChrist.com. Ng dimlak a ta er ngii loteruul. E sekid el taem er a louchais a President Nelson, engii el teblong a mocha mededaes. Ng mle mengasireng. 15
A Rubak a dirrek el mla smisiich a blakereng er kemam el sumechokl a ngakl lousbech a Ikelesia.
Loba a klaumera e merael mo ruchei, ea ngklel a Mormon Tabernacle Choir a mlengodech el di mo Tabernacle Choir er a Temple Square. A website el LDS.org, el melai a betok er a 21 million lodingel er a bek el buil, a mlengodech el mo ChurchofJesusChrist.org. 16 A LDS Business College a mlengodech el mo Ensign College. A website el Mormon.org a mlengodch el mo ChurchofJesusChrist.org. A betok er a tal telael klalou el ngarngii a ngakl el “Mormon” a lechub eng “LDS” el bereked er ngii a mla mengodech. Ar mesisiich a klaumerang er tir el Uriul-klebesei el Santo a mla mengodch a website, podcasts, me a Twitter tir.
Kede ngiluu a beches el olangch el kirel a Jesus Kristo.
“A ngara belngel tia lolangch a llecheklel a bad el dilukai er a Thorvaldsen el Kristus. Ngolecholt er a mla mekiis er a kodall e, ngarel Rubak lomerk a chimal mo er tirkel rokui el mei er Ngii.
“Ngolengchelel, a Jesus Kristo el dechor cheungel a arch [lomeklatk] er kid er a mla mekiis er a kodall el Osobel el tobeda er a debull.” 17
A Ikelesia er a Jesus Kristo er a Uriul-klebesei el Santo a mla nguu a llecheklel er a betok er a okeim lomelekoi. A beches el ngakl er a domain a bla bo lousbech er ngii er a beluulechad rokir.
Omereng el saul el kirel a Ngelsuil a Rebebil
Aki mereng a sulir a rebetok lungil e bekerurau el chad el mengull er a blakereng er kid el mokedong er a meral ngkled. Ak iliuii a tara bades el uluuchais el kirel a cardinal er a Katolik el milsaod rar “Uriul-klebesei el Santo.” 18 Sera kuldingel er a mengeteklel a ikelesia er a Rekristiano er a tal buil er a memong er a Beluu er a Merikel, eng millekoi er a Ikelesia er sel cherrungel ngklel, e liluut el dulii lobengkel a “Ikelesia er a Jesus Kristo.”
Aki mlo mtebngar el kmo a dechel a kllolem el tekoi el mo er a ngkled a locha diak el sal ungil er a media, eng di a President Nelson a millekoi, “a remeral chad er a media a mo kongei ongtid.” 19 Ko mesulang el kongei er kemam osisiu el teletael el mkengei er a rebebil lokiu a siukang, tekoi er a klekool, balatiks, a lechub a cheldebechel er a beluu lousbech er sel somam el ngakl.
Ngarngii tirkel kesai, el melasm el melemall er a klou el ultutelel el urered, e mo melemolem lomekedong er kid el “Mormons” a lechub “Ikelesia er a Mormon.” Aki oba omengull, e lmuut lolengit er a media me bo longull er sel blakereng er kemam el mo okedongall er a ngakl el mla mo erul dart el rak a temel.
Blakereng er a Uriul-klebesei el Santo
Ngarngii a retelael el Uriul-klebesei el Santo el meral lomerk er a ngklel a Ikelesia. Sel doruul a ngercheled, e a rebebil a mo oltirakl. Ng soak tial cheldecheduch er a Tahiti.
A teruich a rekil Iriura Jean a kildmeklii er a rengul mo oltirakl a tekingel a President Nelson.
“Ng mlara skuul e te mesaod a luruul er a weekend … e a Iriura milsaod el kirel a … ikelesia.
“A senesei er ngii, Vaite Pifao, a dilung, ‘Oh, kau a Mormon?’
“A Iriura a mle bleketakl el kmo, ‘Ng diak, … ngak a chedal a Ikelesia er a Jesus Kristo er a Uriul-klebesei el Santo!’
“A sensei er ngii a ulenger, ‘Choi, … ke Mormon.’
“A Iriura a millemolem el kmo, ‘Ng diak e sensei, ngak a chedal a Ikelesia er a Jesus Kristo er a Uriul-klebesei el Santo!’
“A Ms. Pifao a mlo mechas a rengul er a mesisiich el tekingel a Iriura e rrau a rengul el kmo ngera meng di ollechelch lousbech er a [kmal] kemanget el ngklel a ikelesia. [Ng mocha rulii er a rengul a mo mesuub a betok el kirel a Ikelesia.]
“[Uriul, er a Sister] Vaite Pifao er a lemetecholb e [ngulchotii omereng el saul] el Iriura ulerenges a tekingel a President Nelson.” 20
“A Ngklel A Ikelesia a diak dolengdangch er Ngii.” Ng di domakes el bedul uchei loba klaumerang. Sel blak a rengud el oltirakl a omelkingel a Rubak el mla mocholt lokiu a ngar el profet er Ngii, el omko ngii a ngodech er a ikel uldesued, e kirel ousbech a ngariou el reng me a ringel, ea Rubak a mo omekngeltengat er kid loba chedaol klisiich e odurekelterir a reanghel er Ngii el me olngeseu er kid e dechor lobengked. 21 Ke de mo nguu a beltkil a rengul a Rubak me a kengei er Ngii.
Ngak a sioning er a klisichel a babeluades loba betik er a rengud el profet er kid el, President Russell M. Nelson. Sel chimol kot el soal tekoi a mo mengeluch er a Rubak e omekngeltengat er a rengelekel a Chedam er a Babeluades. Mlara chedaol, blekeradel elk blarngii, ea kuuchais el kirel a beltkil a rengul a Dios el mor ngii. Ngii a profet er a Dios.
Ak sioning el kmo a Jesus a ngii a Kristo, el Ngelekel a Dios. El ngara a ngklel a Jesus Kristo, amen.