Lav blong God: Glad we I Bigwan Olgeta long Sol
Yumi no faenem lav blong God long ol situesen blong laef blong yumi, be taem Hem i stap insaed long laef blong yumi.
Ol dia brata mo sista. ?Yufala i save hamas God, Papa blong yumi long Heven, i lavem yufala fulwan? ?Yufala i bin filim lav blong Hem dip insaed long sol blong yufala?
Taem yufala i save mo andastanem hamas Hem i lavem yu fulwan olsem wan pikinini blong God, hemia i jenisim evri samting. I jenisim wei we yu filim abaot yuwan taem yu mekem ol mistek. I jenisim olsem wanem yu filim taem ol had samting i hapen. I jenisim lukluk blong yu long ol komanmen blong God. I jenisim lukluk blong yu long nara man mo hamas yu save mekem blong samting i defren.
Elda Jeffrey R. Holland i tijim: “Fasfala hae komanmen blong ful taem we i no save finis i blong lavem God wetem evri hat, strong tingting, maen mo paoa blong yumi —hemia i fasfala hae komanmen. Be fasfala bigfala trutok blong ful taem we i no save finis we God i lavem yumi wetem evri hat, strong tingting, maen, mo paoa blong Hem”.1
?Olsem wanem nao wanwan long yumi i save dip insaed long sol blong yumi abaot bigfala trutok blong taem we i no save finis?
Profet Nifae i bin luk long visen, strong pruf ia we i soemaot lav blong God. Taem we hem i luk tri blong laef, Nifae i askem blong save mining blong hem. Olsem ansa, wan enjel i soem long Nifae wan bigtaon, wan mama, mo wan bebi. Taem Nifae i luk bigtaon blong Nasaret mo woman we i neva go wetem man yet, mama Meri, hem i stap holem pikinini ia Jisas long ol han blong hem, enjel i talemaot: “Luk! Smol Sipsip blong God, yes, hem i Pikinini blong Papa we i no Save Finis !”2
Long tabu taem ia, Nifae i andastanem se taem Sevya i bon, God i stap soemaot nao lav blong Hem we i klin mo i fulwan. Lav blong God, Nifae i testifae, “i seraotem hemwan i go long evri ples long hat blong ol pikinini blong ol man.”3
Yumi save pikjarem lav blong God olsem wan laet we i kamaot long tri ia blong laef, we i seraotem hemwan i go long evri ples long wol long hat blong ol pikinini blong ol man. Laet blong God mo lav blong hem i kavremap evri kriesen blong Hem.4
Samtaem yumi stap tingting rong se, yumi save filim lav blong God afta nomo we yumi folem aean rel mo tekem mo kakae frut. Be, lav blong God, i no olgeta nomo we oli go long tri we oli kasem lav ia, be lav ia i stret paoa ia we i pusum yumi blong lukaotem tri ia.
“Taswe, hem i samting we evri man i wantem moa i bitim evri narafala samting,” Nifae i tijim, mo enjel i tokbaot, “Yes, mo hem i wan glad we i bigwan olgeta long sol.”5
Twante yia i pas, wan gudfala memba blong wan famli i nomo kam long Jos. Hem i gat plante kwestin we hem i no gat ansa long hem. Waef blong Hem, wan konvet, i stap strong long fet blong hem. Tufala i wok had blong mekem mared laef blong tufala i stap strong nomata ol defdefren situesen we i bin kam bitwin tufala.
Las yia hem i raetemdaon tri kwestin abaot Jos we i had tumas long hem blong akseptem, mo i sendem i go long tu kapol we oli bin gud fren blong hem blong sam yia finis. Hem i invaetem tufala blong lukluk tru long ol kwestin ia, mo kam serem tingting blong tufala long dina wetem hem.
Afta long visit ia wetem ol fren, hem i go long rum mo stat blong wok long wan projek. Lav we ol fren blong hem oli soem long hem i long taem blong storian long naet ia i kam long fored blong tingting blong hem. Hem i bin raetem afta se, oli fosem hem blong stopem wok blong hem. Hem i se: “Wan laet we i saen gud i fulumap sol blong mi. … Mi harem save strong filing ia blong andastaning we mi kasem, be long taem ia, hem i gohed blong gro strong bitim bifo mo i stap blong sam minit. Mi sidaon kwaet wetem filing ia, we afta, mi kam blong andastanem olsem wan saen we i soemaot lav we God i gat long mi. … Mi filim spirit i talem long mi se mi save gobak long jos mo talemaot lav blong God long wanem mi bin mekem longwe.”
Afta, hem i stap tingbaot ol kwestin blong hem. Filing we hem i kasem, i we God i respektem ol kwestin blong hem, be blong no kasem ol stret ansa i no sud stopem hem blong stap go fored.6 Hem i sud serem lav blong God wetem evriwan taem hem i stap gohed blong lukluk mo tingting long ol samting. Taem hem i tekem aksen folem filing mo tingting we hem i kasem, hem i filim se hem i kolosap wetem Josef Smit, we i tokbaot afta long visen blong hem: “Sol blong mi i bin fulap wetem lav, mo blong plante dei glad blong mi i fulap.”7
Mi bin sapraes, se sam manis afta, memba blong famli ia i kasem semmak koling we hem i bin holem 20 yia bifo. Fas taem we hem i holem koling ia, hem i mekem gud wok blong hem olsem wan memba blong Jos. Naoia kwestin blong hem i nomo kam olsem: “?Olsem wanem nao mi save mekem koling ia i hapen?” be: “?Olsem wanem nao mi save soem lav blong God tru long seves blong mi?” Wetem niufala lukluk ia, hem i filim glad, mining, mo stamba tingting long evri lukluk long koling blong hem.
Ol sista mo brata. ?Olsem wanem yumi save kasem paoa ia blong lav blong God we i save jenisim man? Profet Momon i stap invaetem yumi blong prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong Hem, Jisas Kraes.”8 Momon i no stap invaetem yumi nomo blong prea blong save filim lav we God i gat long ol narafala man be, blong prea blong yumi save long saed blong klin lav ia blong God yumiwan.9
Taem yumi kasem lav blong Hem, yumi faenem bigfala glad blong stap lavem mo givim seves olsem we Hem i bin mekem, blong kam ol “tru man blong folem Pikinini blong hem, Jisas Kraes.”10
Yumi no faenem lav blong God long ol situesen blong laef blong yumi be long Hem we i stap long laef blong yumi. Yumi save long lav blong Hem taem yumi kasem paoa we i bitim paoa blong yumiwan, mo taem Spirit blong Hem i givim pis, kamfot, mo daereksen. Samtaem bae i had blong save filim lav blong Hem. Yumi save prea blong gat ol ae we oli open blong luk han blong Hem long laef blong yumi, mo blong luk lav blong Hem long naesfala kriesen blong Hem.
Taem yumi stap tingting hevi long laef blong Sevya mo sakrifaes blong Hem we i no save finis, yumi stat blong andastanem lav blong Hem long yumi. Yumi singsing wetem respek long ol toktok blong Eliza R. Snow: “Jisas i bin givim laef blong hem, taem hem i ded long kros.”11 Fasin blong Jisas blong gat tingting we i stap daon taem Hem i bin safa from yumi, hem i draon sloslo insaed long sol blong yumi, mo openem hat blong yumi blong lukaotem fogivnes long han blong Hem, mo Hem i fulumap yumi wetem filing ia blong laef olsem Hem.12
Presiden Russell M. Nelson i raetem: “Moa yumi komitim yumi blong mekem laef blong yumi olsem Hem, moa bae laef blong yumi i kam klin gud mo i kam tabu.”13
Boe blong mitufala i talem: “Taem mi gat 11 yia, mi mo ol fren blong mi i disaed blong haed long tija blong mifala mo no go long fas pat blong Praemeri klas. Taem mitufala i kam kamaot, wetem sapraes, tija i welkamem mitufala. Hem i bin mekem wan prea we i kam long hat mo talem tangkyu long Lod from mitufala i jusum blong kam long klas, mitufalawan nomo Mi no save tingbaot wanem lesen oli tokbaot o iven nem blong tija blong mifala, be naoia, kolosap 30 yia i pas nao, mi stil filim klin lav ia we hem i bin soem long mi long dei ia.”
Faef yia i pas, mi bin luk wan eksampol blong tabu lav taem mi bin go long Praemeri long Rasia. Mi luk wan fetful sista i nildaon long fored blong tufala pikinini blong hem mo testifae long tufala se, iven sapos tufala nomo i stap laef long wol ia, Jisas bae i safa mo ded from tufala nomo.
Mi testifae se Lod mo Sevya i bin ded from wanwan mo evriwan long yumi. Hem i soemaot lav blong Hem we i no save finis from yumi mo Papa blong Hem.
“Mi save Ridima Hem i laef. !Olsem evri samting i oraet! … Hem i laef blong blesem [yumi] wetem lav blong Hem.”14
Bae yumi openem hat blong yumi mo kasem klin lav ia we God i gat blong yumi, mo blong serem lav ia long evri samting we yumi stap mekem mo huia yumi. Long tabu nem blong Jisas Kraes, amen.