O Mea o Lo’u Agaga
O a mea na e manatunatu i ai? O a mea e taua moni ia te oe? O a mea o lou agaga?
Uso e ma tuafafine, a o ou toe tu atu foi i le tatou Maota Autu pele mo Konafesi, ua ou manatua ai upu a le Aposetolo o Peteru: “Le Alii e, e lelei pe a tatou nonofo iinei.”1
Ua faaautu o’u mafaufauga i le asō i upu a le perofeta o Nifae, o lē sa tausia faamaumauga a lona nuu ina ua mavae le maliu o lona Tama o Liae. Na tusia e Nifae, “Ma o luga o papatusi nei ua ou tusia ai mea o lo’u agaga.”2
Sa masani ona ou pasia lenei fuaiupu, ma mafaufau i le upu o mea sa lē faatamalii pe faaleagaga, e lē lava le malualii e o faatasi ma “lo’u agaga.” Ae sa ou a’oa’oina faapea o le upu o mea e faa-2,354 ona faaaoga i tusitusiga paia.3 Mo se faataitaiga, i le Mose: “O Au o le Amataga ma le Gataaga, o le Atua e ona le malosi uma; na ou faia e ala atu i lo’u Atalii e Toatasi na Fanaua nei mea.”4 O upu foi a Nifae: “Faauta, ua fiafia loʼu agaga i mea a le Alii; ma ua manatunatu loloto pea loʼu loto i mea sa ou vaaia ma faalogoina.”5
O upu a Nifae ua tulai mai ai le fesili “O a mea e te manatunatu loloto i ai?” O a mea e taua moni ia te oe?” O a mea o lou agaga?”
O mea o o tatou agaga e tele ina faamanino ma faalolotoina e ala i le faia o fesili.
I le taimi o le faama’ioti sa ou feiloai ai ma talavou mai le lalolagi atoa i le tele o faigalotu, tetele ma laiti, e ala i faasalalauga ma ala faaagafesootai, ma sa matou talanoaina ai a latou fesili.
Sa fai e Iosefa Samita e sefulufa-tausaga se fesili loloto i lona agaga, ma sa ia avatu i le Alii. Sa faamamafa mai e Peresitene Russell M. Nelson: “Avatu au fesili i le Alii ma i isi puna faatuatuaina. Su’esu’e faatasi ma se manao ia talitonu nai lo le faamoemoe e mafai ona e maua se measese na tupu i le soifuaga o se perofeta po o se mea faaletonu i tusitusiga paia. Taofi le faateleina o ou masalosaloga e ala i le talanoaina ma … tagata masalosalo. Faataga le Alii e ta’ita’i oe i lau malaga o le sailiga faaleagaga.”6
E tele ina fesili mai le autalavou ia te a’u pe o a mea ou te talitonu i ai ma pe aisea foi ou te talitonu ai.
Ou te manatua le talanoa latalata ai ma se tasi tamaitai talavou i lona fale. Sa ou fesili pe o le taimi muamua lea na i ai se Aposetolo i lona fale. Sa vave ona ataata o ia ma tali mai, “Ioe.” Sa lelei lana fesili mo au: “O a mea e sili ona taua e tatau ona ou iloa?”
Sa ou tali atu o mea o lo’u agaga, o mea e saunia ai a’u e faalogo i uunaiga, e siitia ai la’u vaai i talaatu o ala o le lalolagi, e aumaia ai le faamoemoega i la’u galuega i le talalelei ma i lo’u lava olaga.
Pe mafai ona ou faasoa atu nisi o mea o lo’u agaga? O nei mea e faatatau ia i latou uma o ē saili ia avea ma soo moni o Iesu Keriso. O le sefulu o se numera lelei, faigofie. O le a ou tuuina atu ia te oe le fitu ma le faamoemoe o le a e faamae’aina le valu, iva, ma le sefulu mai ou lava aafiaga.
Muamua, alofa i le Atua le Tama ma Iesu Keriso, lo tatou Faaola.
Ua poloai mai Iesu o le poloaiga muamua ma le sili: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.”7
Na tautino atu e Peresitene Nelson lona tuuto atu i le Atua, lo tatou Tama Faavavau, ma Lona Alo, o Iesu Keriso, ina ua valaauina o ia e taitai le Ekalesia a le Alii, i le faapea atu, “Ou te iloa i La’ua, alofa ia i La’ua, ma tauto atu e auauna ia te i La’ua—-ma outou—i mānava uma o totoe o lo’u ola.”8
O le mea muamua la, alofa i le Tama ma le Alo.
Lona lua, “E te alofa atu i lē lua te tuaoi.”9
Ua le na o se manatu lelei lea mea; o le poloaiga sili lona lua. O ou tuaoi o lou toalua ma le aiga, tagata o le uarota, paaga faigaluega, i latou e potu faatasi, o i latou o lo tatou faatuatuaga, o i latou e manaomia se lima fesoasoani, ma; o le mea moni, o tagata uma lava. O le ute o le “alofa i lou tuaoi” o loo faaleo mai i le viiga “Pei Ona Ou Alofa Atu.”10
Ua faamanatu mai e Peresitene Nelson ia i tatou, “A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi.”11
Lona tolu, alofa ia te oe lava.
O i e tauivi ai le toatele. Pe le o se mea uiga ese le faapea o le alofa ia i tatou lava e foliga e faigofie lava ona itiiti nai lo le alofa i isi? Ae, ua fetalai mai le Alii, “Alofa i lou tuaoi e pei o oe lava.”12 Na te faatauaina le paia faale-Atua i totonu o i tatou, ma e tatau foi ia i tatou. Pe a oo ina tatou mafatia i sese, lototiga, lagona o le lē agavaa, lē fiafia, ita, po o le agasala, o le mana o le Togiola a le Faaola, e ala i le mamanu faalelagi, o se tasi lea o mea na te siitiaina le agaga.
Lona fa, tausi poloaiga.
Ua uma ona faamanino mai e le Alii, “Afai tou te alofa mai ia te a’u, ia outou tausi mai i a’u poloaiga.”13 Ia tinoū i aso taitasi ia avea, ma ia faia sina lelei atili ma fetaomi atu i luma i le amiotonu.
Lona lima, Ia agavaa i taimi uma e auai i le malumalu.
Ou te faaigoaina o le fautuaina atu i le Alii. Pe o mafai ona e maua se malumalu pe leai, o le agavaa mo se pepa faataga o le malumalu o loo aoga e te taulai mausali ai i mea e taua, o le ala o feagaiga.
Lona ono, ia olioli ma fiafia.
“Ia fiafia, ma aua le fefefe.”14 na fetalai mai ai le Alii. Aisea? E faapefea, pe a tatou fetaia’i ma lu’itau i soo se mea e faliu i ai? Ona o le folafolaga na faia e Iesu Keriso: “O Aʼu o le Alii ua Ou faatasi ma outou, ma o le a tu i tafatafa o outou.”15
Ua faamatalaina e Peresitene Nelson le talalelei toefuataiina o “se savali o le olioli!”16 Ma na ia faamalamalama mai, “O le olioli tatou te lagonaina e itiiti lava se aoga i tulaga o o tatou olaga ae e faatatau uma lava i le taulaiga o o tatou olaga.”17
Lona fitu, mulimuli i le perofeta soifua a le Atua.
Atonu o le lona fitu lea i la’u lisi o mea, ae o loo pito i luga o lo’u mafaufau e tusa ma lona taua i le taimi nei.
Ua i ai se perofeta a le Atua i le lalolagi i ona po nei. ‘Aua lava ne’i galo le uiga o lena mea ia te oe. Manatua le tamaitai talavou na ou ta’ua i le amataga. Sa ia fia iloa pe o a mea e sili ona taua. “Mulimuli i le perofeta soifua,” sa ou fai atu ai ma ua ou toe faamamafaina i le asō.
Ua tulagaese i tatou o se ekalesia e ta’ita’ia e perofeta, tagatavaai, ma talifaaaliga ua valaauina e le Atua mo lenei taimi. Ou te folafola atu a outou faalogologo ma mulimuli i a latou fautuaga, o le a lē taitaiseseina lava outou. Leai lava!
Ua tatou ola i se taimi ua “felafoa’iina ai i tatou,”18 i le taimi o loo osofa’ia ai le faaleagaga, tauagafau, amiosa’o, ma le faaaloalo. E tatau ona tatou faia filifiliga. Ua tatou maua le siufofoga o le Alii e ala mai i Ana perofeta e faato’afilemu le fefe ma faaleleia o tatou faamoemoega, aua a oo ina saunoa mai Peresitene Nelson, e saunoa o ia mo le Alii.
Ua faamanuiaina i tatou i tusitusiga paia ma a’oa’oga o loo faamanatu mai ai ia i tatou, “O o’u manatu e le o outou manatu, o o’u ala e le o outou ala, ua fetalai mai ai Ieova.”19
E faapena foi ia Naamanu, o se taitai’au sili faamiliteli i Suria, ae e lepela, o lē sa ta’u atu i ai e mafai e le perofeta o Elisaia ona faamalolo o ia. Na auina atu e Elisaia lana auauna e ta’u ia Naamanu e ta’ele faafitu i le Vai o Ioritana ma o le a faamamāina ai o ia. Sa lē fiafia Naamanu. E moni e i ai se vaitafe sili atu nai lo Ioritana, ma aisea ua auina mai ai se auauna a o la sa ia faamoemoe o Elisaia, o le perofeta, e faamaloloina o ia? Sa savali ese Naamanu, ae na i’u lava ina faatauanauina e le auauna: “Ana fai atu e le perofeta se mea tele ia te oe, e te lē faia ea?”20 Na i’u ina tofu faafitu Naamanu i le Ioritana ma sa faamaloloina ai.
O le tala ia Naamanu ua faamanatu mai ai ia i tatou le matautia o le piki ma filifili ia vaega o fautuaga faaperofeta e fetaui ma o tatou manatu, o tatou faamoemoega, po o aga masani o aso nei. E faasino atu pea i tatou e lo tatou perofeta i o tatou lava Vaitafe o Ioritana ina ia faamalolo ai.
O upu aupito taua e mafai ona tatou faalogo i ai, mafaufau loloto i ai, ma mulimuli ai o upu na ua faaalia e ala mai i lo tatou perofeta soifua. Ou te molimau atu ua ou saofai e fefautuaai ma Peresitene Nelson e talanoaina ni mataupu mamafa o le Ekalesia ma le lalolagi, ma ua ou vaai i faaaliga o tafe mai e ala mai ia te ia. Na te silafia le Alii, na te silafia Ona ala, ma e naunau o ia i fanau uma a le Atua ia faalogo ia te Ia, le Alii o Iesu Keriso.
Ua tele tausaga o tatou faalogo faalua i le tausaga mai le perofeta i konafesi aoao. Ae o le i ai o faafitauli lavelave o o tatou aso, ua saunoa soo mai ai Peresitene Nelson i fonotaga,21 faasalalauga faaagafesootai,22 faigalotu,23 e oo lava i feutagaiga ma le au faasalalau.24 Ua ou matauina o ia o sauniuni ma tolaulau mai ni sāvali loloto mai faaaliga ua uunaia atili ai le lotofaafetai, faalauiloa ai le faaaofia atili o o tatou uso ma tuafafine i le lalolagi, ma faateleina ai le filemu, faamoemoe, olioli, soifua maloloina, ma le faamaloloina o o tatou olaga taitasi.
O Peresitene Nelson o se sooupu talenia, ae o le mea e sili ona taua, o ia o se perofeta a le Atua. O se mea e maofa ai pe a e mafaufau i ai, ae e taua tele le iloa o lana taitaiga manino o le a puipuia ai i tatou uma mai le faa’ole’ole, taufaasese, ma ala faalelalolagi ua avea ma mea taatele i aso nei.25
O le mana, pule, ma tiutetauave faaperofeta, e faatatau uma i faaaliga. “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi,” na tuuina mai i le konafesi aoao ia Aperila 2020, o loo faamamafa mai ai faapea o loo taitaia e le Alii lenei galuega. I lea folafolaga, ua ta’u mai ai e le Au Peresitene Sili ma le Korama a Aposetolo e Toasefululua: “Matou te fiafia e tautino atu e faapea o le Toefuataiga folafolaina e agai pea i luma e ala i faaaliga faifai pea. O le a lē toe tutusa lava le lalolagi, auā o le a “faapotopoto faatasi [e le Atua] mea uma ia tasi ia Keriso.” (Efeso 1:10).”26
“O mea uma ia Keriso”27 ma “o mea uma o lo’u agaga”28 o mea ia e faatatau i ai lenei Ekalesia, lenei talalelei, ma lenei nuu.
Ou te faai’u atu i se valaaulia mo outou uma taitoatasi ina ia mafaufau i “mea e fitu o lo’u agaga” sa ou faasoa atu i le asō: alofa i le Atua le Tama ma Iesu Keriso, lo tatou Faaola; alofa i lou tuaoi; alofa ia te oe lava; tausi i poloaiga; ia agavaa e le aunoa mo se pepa faataga o le malumalu; ia olioli ma fiafia; ma mulimuli i le perofeta soifua a le Atua. Ou te valaaulia outou ia faailoa lau lava valu, iva, ma le sefulu. Mafaufau i auala e mafai ona e faasoa atu i isi au “mea” mai lou loto ma fautuaina i latou ia tatalo, manatunatu loloto, ma saili le taitaiga a le Alii.
O mea o lo’u agaga e taua tele ia te a’u e pei foi o āu mea ia te oe lava. O nei mea e faamalolosia ai la tatou auaunaga i le Ekalesia ma i vaega uma o le olaga. E tautino atu ai i tatou ia Iesu Keriso, e faamanatu mai ai ia i tatou a tatou feagaiga, ma e fesoasoani ai ia i tatou ia lagona le saogalemu i a’ao o le Alii. Ou te molimau atu e finagalo o Ia mo o tatou agaga “[ia] lē fiaai lava pe fiafeinu, ae ia faatumuina”29 i Lona alofa a o tatou saili atu ia avea ma Ona soo moni, ia tasi i tatou ma Ia e faapei o Ia ma le Tama. I le suafa o Iesu Keriso, amene.