Ol Samting we Oli blong Sol blong Mi
?Wanem samting nao yu stap tingting hevi long hem? “?Wanem samting i rili impoten long yu?” “?Wanem nao ol samting blong sol blong yu?”
Ol brata mo sista. Taem mi stanap long Konfrens Senta ia bakegen, mi tingbaot ol toktok blong Aposol Pita: “Masta. I gud we mifala i stap long ples ya.”1
Ol tingting blong mi tedei, oli lukluk nomo long ol toktok blong profet Nifae we i bin kipim histri blong pipol blong hem afta ded blong Papa Lihae. Nifae i raetem: “Mo long olgeta ia mi raetemdaon ol samting blong sol blong mi.”2
Mi stap pas ova long ves ia, wetem tingting se toktok ia, ol samting, i no naes tumas, o i no filim spirit, o i no naf blong go wetem toktok ia, “sol blong mi.” Yet, mi lanem se toktok ia, ol samting, oli yusum long ol skripja 2,354 taem.3 Eksampol, long Moses: “Mi mi Stat mo mi En, God ia we I Gat Olgeta Paoa; tru long Wan Stret Pikinini Ia Nomo blong mi, mi bin krietem olgeta samting ia.”4 Mo toktok blong Nifae: “Luk, sol blong mi i glad long ol samting blong Lod; mo hat blong mi i tingting hevi oltaem long ol samting we mi bin luk mo mi bin harem.”5
Ol toktok blong Nifae i mekem mi gat kwestin: “?Wanem samting blong tingting hevi long hem?” “?Wanem samting i rili impoten long yu?” “?Wanem nao ol samting blong sol blong yu?”
Ol samting blong sol blong yumi, oli kam klia mo dip taem yumi askem kwestin.
Long taem blong wol sik, mi bin mitim ol yut raon long ful wol long plante divosen, bigwan, smolwan, tru long ol brodkas, mo sosol media, mo mifala i bin toktok raon long kwestin blong olgeta.
Josef Smit we i gat fotin yia, i gat wan kwestin dip insaed long sol blong hem, mo hem i tekem i go long Lod. Presiden Russell M. Nelson i poenemaot: “Tekem ol kwestin blong yu i go long Lod mo ol nara fetful ples blong kasem ansa. Stadi wetem tru tingting blong biliv, be i no wetem hop se bae yu faenem wan rong long laef blong wan profet, o wan samting we i rong long ol skripja. Stop blong gat moa tu tingting taem yu stap wokem tokbaot olgeta wetem olgeta we oli gat tu tingting. Letem Lod i lidim yu long wokbaot ia blong faenem samting long saed blong spirit.”6
Ol yut oli askem plante taem wanem mi biliv long hem mo from wanem mi biliv.
Mi tingbaot se, onlaen, mi visitim wan yang woman long hom blong hem. Mi askem sapos hem i fas taem we wan Aposol i kam long hom blong hem. Kwiktaem hem i smael mo ansa: “Yes.” Hem i gat wan gud kwestin blong mi: “?Wanem nao ol samting we oli moa impoten we mi mas save?”
Mi ansa wetem ol samting blong sol blong mi, ol samting ia we oli mekem mi mi rere blong harem ol kwaet toktok, we oli leftemap lukluk blong mi i go bitim ol rod blong wol, we oli givim stamba tingting long wok blong mi insaed long gospel mo long laef blong mi stret.
?Mi save serem long yufala sam long ol “samting blong sol blong mi?” Ol samting ia oli blong yumi evriwan we oli stap lukaotem blong stap ol tru disaepol blong Jisas Kraes. Ten bae i wan gud namba, wan raon namba. Tedei, mi givim yufala seven, wetem hop se bae yu komplitim eit, naen, mo ten aot long eksperiens blong yu.
Faswan, lavem God we i Papa, mo Jisas Kraes, Sevya blong yumi.
Jisas i talem fas hae komanmen: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”7
Presiden Nelson i talem se hem i givim evri samting long God, Papa we I No Save Finis, mo long Pikinini blong Hem, Jisas Kraes, taem oli singaotem hem blong lidim Jos blong Lod, i talem: “Mi Save Tufala, lavem Tufala, mo mekem tabu promes blong wok blong Tufala—mo blong yufala—wetem evri win blong laef blong mi we i stap.”8
So, faswan, lavem Papa, mo Pikinini.
Mo sekenwan i blong “mas lavem neba blong yu.”9
Hemia i no jes wan gud aedia; hem i seken hae komanmen. Ol neba blong yu oli waef, hasban, mo famli, ol memba blong wod, fren long wok, fren long skul, olgeta blong defren jos, olgeta we oli nidim han blong help, mo, blong talem stret, evriwan. Stamba blong “lavem neba blong yu” i kamaot long hym ia, “Lavlavem Yufala.”10
Presiden Nelson i talem bakegen long yumi: “Taem yumi lavem God wetem ful hat blong yumi, Hem i tanem hat blong yumi long gudlaef blong ol narawan.”11
Nambatri, lavem yuwan.
Ples ia nao plante oli stap gat hadtaem long hem. ?I no defren lelebet se, blong lavem yumiwan bakegen, i no kam isi olsem blong lavem ol narawan? Yet, Lod i talem se “Yufala i mas lavem neba blong yufala olsem yufalawan bakegen.”12 Hem i tekem se wanem we i tabu insaed long yumi, i impoten tumas; so yumi tu, yumi mas mekem semmak. Taem yumi karem ol hevi samting olsem mistek, hat i harem nogud, filing se yumi no naf, tingting i no glad, kros, o sin, paoa blong Atonmen blong Sevya, tru long tabu plan ia, i wan samting we i leftemap sol.
Nambafo, obei olgeta komanmen.
Sevya i talem i klia: “Sapos yufala i lavem mi, bambae yufala i save obei long ol tok blong mi.”13 Traehad evri dei blong stap gud moa mo mekem gud moa, mo gohed long stret mo gud fasin.
Nambafaef, oltaem stap klin inaf blong go long tempol.
Mi singaot hemia se, blong oli putum nem blong yu i go long Lod. I nomata se yu save go long tempol o no, blong stap klin inaf blong holem wan tempol rekomen we i laef i kipim yu i fas strong long ol samting we oli impoten, we i kavenan rod.
Nambasikis, stap glad mo gat gud tingting.
“Taswe, yufala i stap glad, mo yufala i no fraet.”14 Lod i talem. ?From wanem? ?Bae hemia i olsem wanem taem ol jalenj oli fesem yumi long evri kona? From promes we i kam long Jisas Kraes: “Mi Lod, mi stap wetem yufala, mo bae mi stanap wetem yufala.”15
Presiden Nelson i tokbaot gospel we i kambak olsem “!wan mesej blong glad!”16 Mo Hem i eksplenem: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.”17
Nambaseven, folem profet blong God we i laef.
Hemia i nambaseven long lis blong mi, be hem i stap long top blong maen blong mi folem wanem i impoten tedei.
!Yumi gat wan profet blong God long wol ia tedei! Neva ting daon long wanem hemia i minim long yu. Tingbaot yang woman ia we mi tokbaot long stat. Hem i wantem save wanem samting we oli moa impoten. “Folem profet we i stap laef,” mi talem, mo stap poenemaot bakegen tedei.
Oli save yumi tedei, se yumi wan jos we ol profet, sia mo reveleta oli lidim, we God i singaotem olgeta from taem ia. Mi promesem yufala se taem yufala i stap lisin mo folem kaonsel blong olgeta, bae oli neva lidim yufala i go long rong rod. !Neva!
Yumi stap laef long wan taem we oli saksakem yumi i go i kam,18 taem fasin blong spirit, gud fasin, tru fasin mo respek, oli stap agensem. Yumi mas mekem ol joes. Yumi gat voes blong Lod, tru long profet blong yumi, blong mekem fraet i lus, mo leftemap hed, from se, taem Presiden Nelson i toktok, hem i stap toktok long bihaf blong Lod.
Yumi evriwan i gat blesing taem ol skripja mo ol tijing we oli mekem yumi tingbaot se: “Tingting blong mi i no olsem tingting blong yufala, mo fasin blong mi, i no olsem fasin blong yufala.”19
I bin olsem wetem Neman, wan strong ami lida long Siria, we i gat leprosi, we oli talem hem se profet Elisa i save hilim hem. Elisa i talem long wokman blong hem blong i go talem long Neman blong i wasem hem long Jodan reva seven taem, mo bae hem i kam oraet bakegen. Neman i tok strong. I mas gat wan bigfala moa reva bitim Jodan reva, mo ?from wanem bae i sendem wan wokman taem hem i wantem luk Elisa, we i profet, i kam stret blong hilim hem? Neman i wokbaot i go, be ol wokman blong hem oli winim tingting blong hem: “Sapos profet i askem yu blong mekem sam bigfala samting, ?bae yu no go mekem?”20 Neman i go, i go swim seven taem long Jodan reva mo i kam oraet.
Stori blong Neman i mekem yumi tingbaot denja blong poenem fingga mo jusum sam pat blong kaonsel blong profet, we i go stret wetem tingting blong yumi, wanem yumi wantem, o standet blong tedei. Profet blong yumi, oltaem i poen i go long Jodan Reva blong yumi blong kam oraet.
Ol moa impoten toktok we yumi save harem, tingting hevi, mo folem, oli ol toktok we Lod i givimaot olsem revelesen tru long profet we i stap laef. Mi witnes se mi bin sidaon long kaonsel wetem Presiden Nelson blong toktok raon long sam hevi samting long saed blong Jos mo wol, mo mi bin luk revelesen i kam tru long hem. Hem i save Lod, Hem i save ol wei blong Lod, mo hem i wantem yumi evri pikinini blong God blong lisin gud long Hem, we i Lod Jisas Kraes.
Blong plante yia, yumi harem profet tu taem long wan yia long jeneral konfrens. Be wetem ol samting we oli fasfas long taem tedei, Presiden Nelson i stap toktok moa long ol forom,21 sosol media,22 ol divosen,23 mo iven ol sot toktok long junalis.24 Mi bin luk hem i stap rere mo stap presentem ol big mesej blong revelesen we oli bin leftemap fasin blong talem tangkyu, i pusum fasin blong akseptem evri brata mo sista long wol ia, mo mekem i gat moa pis, hop, glad, helt mo hiling insaed long laef blong yumi.
Presiden Nelson i gat presen blong save toktok, be moa impoten, hem i wan profet blong God. Taem yu tingting long hem, i wan bigfala samting, be i impoten moa blong luksave se klia daereksen blong hem bae i blokem yumi long evri giaman trik, giaman plan, mo wei blong wol, we i mekem yumi win smol taem long wol tedei.25
Kaonsel blong profet we i blokem yumi, i abaot revelesen. “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol,” we oli givim long Eprel2020 jeneral konfrens, i talem gud se Lod i stap lidim wok ia. Long ofisol toktok ia, Fas Presidensi mo Kworom blong Olgeta Twelef Aposol oli talem: “Mifala i glad mo talemaot se Restoresen we God i promesem i stap go fored tru long revelesen we i gogohed. Wol ia bae i neva semmak bakegen, from se God bae i ‘putum evri samting i kam joen wanples long Kraes’ (Efesas 1:10).”26
“Evri samting long Kraes”27 mo “ol samting blong sol blong mi”28 oli wanem we Jos ia, gospel ia, mo pipol ia oli abaot.
Mi endem wetem wan invitesen i go long wanwan long yufala blong tingting long ol seven “samting blong sol blong mi” we mi bin serem tedei: lavem God we i Papa mo Jisas Kraes, Sevya blong yumi; lavem neba blong yu, lavem yuwan; obei ol komanmen, oltaem stap klin inaf blong gat wan tempol rekomen; stap glad mo gat gud tingting; mo folem profet blong God we i stap laef. Mi invaetem yu blong faenemaot namba eit, naen, mo ten samting blong sol blong yufala. Tingting long ol wei we yu save serem ol samting blong hat blong yu wetem ol narawan mo leftemap tingting blong olgeta blong prea, tingting hevi, mo lukaotem blong Lod i lidim yu.
Ol samting blong sol blong mi, oli sas tumas long mi, semmak hemia blong yu oli impoten long yu. Ol samting ia oli mekem seves blong yumi long Jos i kam strong moa, mo i semmak long evri eria blong laef blong yumi. Oli komitim yumi long Jisas Kraes, oli mekem yumi tingbaot ol kavenan blong yumi, mo oli helpem yumi blong filim sef insaed long ol han blong Lod. Mi testifae se Hem i wantem tumas blong sol blong yumi i neva hanggri o tosta, be bae i fulap29 wetem lav blong Hem taem yumi lukaot blong kam ol tru disaepol blong Hem, blong stap wan wetem Hem olsem Hem i wan wetem Papa. Long nem blong Jisas Kraes, amen.