Pagwali sang Ebanghelyo sang Paghidaet
May sagrado kita nga responsibilidad nga ipaambit ang gahum kag paghidaet ni Jesucristo sa tanan nga magapamati.
Pinalangga kong kauturan, ginaabiabi ko kamo sa pangkabilogan nga komperensya! Ginpaabot ko gid ining adlaw nga may kalangkag. Ginapangamuyo ko kamo adlaw-adlaw. Ginpangamuyo ko man nga ining komperensya mangin tion sang espirituhanon nga pagpabaskog para sa kada isa sa inyo.
Halin sang nagligad nga komperensya, ang mga kabudlayan sa kalibutan nagapadayon. Ang pangkalibutanon nga pandemya nagaapekto gihapon sa aton mga kabuhi. Kag karon ang kalibutan gintay-og sang kagamo nga nagadala sang kahadlok sa minilyon ka mga inosente nga mga lalaki, babayi, kag kabataan.
Nakita na ngadaan sang mga propeta ang aton panahon, nga may mga giyera kag mga huring-huring parte sa mga giyera kag ang bilog nga duta magginamo.1 Bilang mga sumulunod ni Jesucristo, nagapangabay kita sa mga lider sang mga nasyon nga magpangita sang malinong nga solusyon sang ila mga pagsumpakilay. Ginapanawagan namon sa katawhan sa bisan diin nga magpangamuyo para sa mga nagakinahanglan, nga himuon ang ila masarangan sa pagbulig sa mga ginabudlayan, kag sa pagpangayo sang bulig sang Ginuo agud matapos ang bisan ano nga dalagko nga inaway.
Mga kauturan, ang ebanghelyo ni Jesucristo mas labi nga ginakinahanglan sa karon. Ang pag-ilinaway nagalapas sa tanan nga ginatindugan kag ginatudlo sang Manluluwas. Palangga ko ang Ginuong Jesucristo kag nagapamatuod nga ang Iya ebanghelyo amo lamang ang nagadugay nga solusyon para sa kalinong. Ang Iya ebanghelyo, ebanghelyo sang paghidaet.2
Ang Iya ebanghelyo amo lamang ang sabat kon ang kadam-an sa kalibutan nagakaudom sa kahadlok.3 Ginapadako sini ang kakinahanglanon gilayon nga sundon naton ang ginsugo sang Ginuo sa Iya mga disipulo nga “[mag]lakat … sa bug-os nga kalibutan, kag iwali ang maayong balita sa tanan nga tinuga.”3 May sagrado kita nga responsibilidad nga ipaambit ang gahum kag paghidaet ni Jesucristo sa tanan nga magapamati kag magatugot sa Dios nga magpangibabaw sa ila mga kabuhi.
Ang tagsa ka tawo nga naghimo sang mga kasugtanan sa Dios nagpromisa nga atipanon ang iban kag alagaran ang mga nagakinahanglan. Mahimo naton ipakita ang aton pagtuo sa Dios kag mangin handa pirme sa pagsabat sa mga nagapamangkot parte sa “paglaum nga ara sa [aton].”5 Ang kada isa sa aton may papel sa pagtipon sang Israel.
Subong mabaskog ko nga ginasulit ang pangabay sang Ginuo nga ang tagsa ka takos, makasarang nga pamatan-on maghanda kag maglakat sa misyon. Para sa mga pamatan-on nga Santos sa Ulihing mga Adlaw, ang pagserbisyo sa misyon isa ka responsibilidad sang priesthood. Kamo nga mga pamatan-on ginreserba sa sini nga panahon kon san-o nagakatabo ang ginpromisa nga pagtipon sang Israel. Sa inyo pag-alagad sa mga misyon, ginatungdan ninyo ang kritikal nga papel sa sining wala sing pareho nga hitabo.
Para sa inyo nga mga lamharon kag makasarang nga mga sisters, ang misyon isa man ka mabaskog, pero opsyunal, nga oportunidad. Palangga namon ang mga sister missionaries kag ginaabiabi namon sila sing hugot sa buot. Ang inyo mabulig sa sining buluhaton dalayawon! Magpangamuyo para mahibal-an kon gusto sang Ginuo nga maglakat kamo sa misyon, kag ang Balaan nga Espiritu magasabat sa inyo tagipusuon kag kaisipan.
Pinalangga kong mga lamharon nga kaabyanan, ang kada isa sa inyo importante sa Ginuo. Ginreserba niya kamo tubtob sa karon sa pagbulig tipon sang Israel. Ang inyo desisyon nga magserbisyo sa misyon, bisan sa pagpangwali ukon sa service mission, magabugay sa inyo kag sa madamo nga iban pa. Ginaabiabi man namon ang mga gulang na nga mag-asawa nga magserbisyo kon itugot sang ila mga sirkumstansya. Indi mabayluhan ang ila mga pagpangabudlay.
Ang tanan nga mga misyonero nagatudlo kag nagapamatuod parte sa Manluluwas. Tungod sang espirituhanon nga kadulom sa kalibutan mas ginakinahanglan pa gid karon ang kasanag ni Jesucristo. Ang kada isa dapat makabaton sang tsansa nga mahibal-an ang parte sa ginpanumbalik nga ebanghelyo ni Jesucristo. Ang kada tawo dapat makahibalo kon diin nila pwede makita ang paglaum kag paghidaet nga “[labaw] sa tanan nga paghangop.”6
Kabay nga ining komperensya mangin oras sang paghidaet kag espirituhanon nga pagpakabusog para sa inyo. Kabay nga pangitaon ninyo kag mabaton ang personal nga rebelasyon sa tion sining mga sesyon, ginapangamuyo ko sa sagrado nga ngalan ni Jesucristo, amen.