Ena Tucake Tale ko Koya kei na Veivakabulai e Tabana:
E Rawa ni Yaco Meda Qaqa Vakalevucake Sara
Sa uabaleta na veivakalolomataki ni vuravura oqo o Jisu me rawa ni nomu na kaukauwa mo lako curuma, ka yaco me dua na siga, ena Vukuna, ko na rawa ni uabaleta ka qaqa mai kina.
Marin, o au o Elder Holland, ka sa na qai siro sara na veika o namaka.
Eda sa Uasivi Cake mai Vei Ira na Qaqa
Eda daga matua kece ki na italanoa ni gutanabula. Eda rogoca na italanoa baleti ira na qaravanua yaloqaqa kei ira na tamata wale ka ra sa rawa ni ra bula tikoga me vakacala na veika e veisaqati kei na nanamaki, ka da na tarogi keda, “E rawa beka niu cakava oqori?”
Au vakananuma totolo sara na daunivasaqara vanua ni Peretania o Ernest Shackleton kei ira nona kaimua ni waqa na HMS, Endurance, kasa tu ena waicevata ni Antarctic ka qai mai tao tu ena dua na yanuyanu lala me rauta e rua na yabaki. Na veiliutaki vakasakiti nei Shackleton kei na nona sega ni dauguce rawarawa e vakabulai ira na nona kaimua, e dina ga ni ituvaki dredre sara eratou sotava.
Kau qai vakananuma na kaimua ni Apollo 13 era sasaga mera mua ki na vula! Ia a yaco na leqa ni a kacabote e dua na taqe ni cagi, ka a vakadaroi kina na ilakolako. Ni sa lailai na cagi, era a vuki matau na kaimua kei ira na lewa na ilakolako ka ratou kau bula mai ki vuravura na dauvuka tolutolu.
Au qoroqoro e na nodra gubula veivakurabuitaki eso na tamata yadua kei na matavuvale era a vakaleqai ena ivalu, vesu tu ena keba, se o ira era yaco me ra isenivalu, era sa vakacaucautaki ka yaloqaqa ni irivaka na yameyame ni vakanuinui vei ira na wekadra era vakaleqai tu, ka ra wasea na yalovinaka ena gauna ni vakasaurara, ka ra rawata me vukei ira tale eso me ra vosota tale e dua na siga.
E rawa beka vei iko se o au me daru bula ena dua vei ira na ituvaki dredre dina oqo?
Ia, e rairai so beka vei kemuni, o ni vakasamataka na kedra itukutuku na gutakibula ka tagi na yalomuni ni o ni sa bulataka tiko e dua na italanoa ni gubula ena gauna oqo ni o ni mavoa ena vakalolomataki, biliraki, ivalavala kaukau e vale, se so tale na mataqali vakararawataki vakaoqo. O ni sa tu ena loma ni nomuni sasaga gubula mo ni bula mai na dua na ituvaki ka vakilai me vaka e dua na waqavoca rerevaki se e dua na ilakolako vakanamata vakadaroi vakasauri. O ni na vakabulai beka; o ni na rawa li ni bula ena nomuni italanoa ni gutakibula?
Na kena isau na io. E rawa ni o gubula. O ni sa vueti oti vakaidina; ko ni sa vakabulai oti—mai vei Koya sa sotava oti na vakararawataki sara ga o sotava tiko ka vosota na mosi sara ga o ni vosota tiko oqo.1 Sa valuta rawa o Jisu na veivakalolomataki ni vuravura oqo2 me solia vei iko na kaukauwa mo sega walega ni gubula ia ena dua na siga, mai Vua, me da vorata rawa ka qaqa me ulabaleta taucoko na mosi, na rarawa, na yaluma, ka raica ni sa vakaisosomitaki ena vakacegu.
E taroga na iApositolo o Paula:
“O cei me na tawasei keda mai na loloma i Karisito? A ka rarawa li se na yaluma, se na dauveivakacacani, se na dausiga, se na luvawale, se na dauveivakarerei, se nai seleiwau?
“E segai, e na ka kecega oqo eda sa gumatua sara kina, e na vuku i koya sa lomani keda.”3
Na Yalayala ni Veiyalayalati kei Isireli
Ko na nanuma na gauna a solia kina o Peresitedi Russell M. Nelson e dua na veisureti ena koniferedi. E kaya o koya: “Ni ko vulica tiko na nomu ivolanikalou, au vakayaloqaqataki kemuni mo ni cakava e dua na ituvatuva ni veika kece sa yalataka na Turaga ni na cakava ena vukudra na Isireli ni veiyalayalati. Au vakabauta ni ko na kurabui!”4
Oqo e vica walega na yalayala qaqa ka veivakacegui sa kunea na neitou matavuvale. Raitayaloyalotaka mada na Turaga ni tukuna tiko vei iko na veivosa oqo—kivei iko o ni bula tiko—baleta era sa baleti iko:
Kakua ni ko rere.5
N’iu sa kila na nodra rarawa, kau sa lako mai meu sereki kemuni.6
Au na sega ni biuti iko.7
Sa tu vei kemudou na yacaqu ka ra sa lewai kemudou na noqu agilosi.8
Au na kitaka na ka veivakurabuitaki ena kemudou maliwa.9
Lako vata kei au; mo vuli vei au; Au na vakacegui iko.10
Au sa tiko ena kemudou maliwa.11
O kemuni na noqu.12
Kivei Ira Era Bula Tiko
Ni sa tiko sara ena noqu vakasama na veivakadeitaki oqori, au vinakata meu vosa vakadodonu vei ira era nanuma ni sa sega ni dua na sala ni dro mai na nodra italanoa ni gutakibula mai na nodra ivalavala vakaloloma eso tale. Kevaka oqori na italanoa ni nomu gutakibula, keimami tagi vata kei iko. Keimami tagica mo ni ulabaleta na veilecayaki, madua, kei na rere, ka gadreva, ena vukui Jisu Karisito, mo ni qaqa.
Mai Vei Koya e Vakaleqai ki na Gubula ki na Qaqa
Kevaka o sa sotava oti e dua na mataqali veivakalolomataki, mavoa, veivakararawataki, se veivakasaurarataki, o na rairai biu tu mo nanuma ni veika a yaco oqo e nomu cala ka dodonu mo colata na madua kei na cala o vakila. Ena tu beka vei iko eso na vakasama me vaka oqo:
-
A rawa sara ga meu tarova na ka oqo.
-
Sa sega tale ni lomani au na Kalou.
-
Ena sega ni dua ena lomani au.
-
Au sa vakacacani ka sega ni vakavinakataki rawa.
-
Na Veisorovaki ni iVakabula e baleti ira tale eso, ia e sega vei au.
Na vakanananu kei na nanuma cala oqo a rawa ni dua na itatarovi ni vakasaqarai ni veivuke mai na matavuvale, itokani, iliuliu, se kenadau, o sa sotava duadua tiko ga na dredre. Kevaka o sa kerea na veivuke mai vei ira o vakararavi kina, o se sasagataka tikoga na vakasama ni madua kei na cati iko vakaiiko. Na revurevu ni veika a yaco oqo ena rawa ni tu me vuqa na yabaki. O nuitaka ni dua na siga o na vinaka cake mai kina, ia e vaka e se bera ni yaco mai na siga o ya.
Na veivakalolomatakii e a sega, e sega, ka sega tu ga ni nomu cala, se cava ga e tukuna o koya e veivakatotogani se dua tale me vakalasuya. Ena gauna o sa vakalolomataki kina ena ivalvala kaukauwa, lasamievale, se veivakalolomataki tale eso, e sega ni o iko o dodonu mo veivutuni; e sega ni nomu cala.
O ni sa sega ni kilikili vakalailai se yaga vakalailai se lomani vakalailai vaka e dua na tamata, se luvena yalewa se luvena tagane na Kalou, ena vuku ni ka e sa cakava vei iko e dua tale.
Na Kalou e se sega ni raici iko ena gauna oqo, se ena dua na gauna o Koya, me dua e beci. Se cava kecega sa yaco vei iko, e sega ni maduataki iko oKoya se cudruvi iko. E lomani iko oKoya ena dua na sala o se bera ni kunea. Ko na qai kunea ni ko sa vakararavi ga ki na Nona yalayala ka vulica mo vakabauti Koya ni sa kaya o Koya ni o sa “ka talei ena [Matana].”13
O ni sega ni vakamacalataki mai na veika rerevaki oqo ka sa vakayacori vei kemuni. O iko, ena dina lagilagi, o vakamacalataki mai na nomu ivakatakilakila tawamudu ni ko luvena tagane se yalewa na Kalou, mai na nona loloma kei na veisureti tawayalani, maucokona ni Dauveibuli ki na veivakabulai dina ka taucoko.
E dina ga ni na rairai dredre, vakila ni sega ni rawa, na veivakabulai e rawa ni yaco mai ena cakamana ni kaukauwa ni veivueti ni Veisorovaki i Jisu Karisito, ni sa tucaketale “kei na veivakabulai e tabana.”14
Na noda iVakabula dauloloma dina, ka qaqa mai na butobuto kei na ca, e tu vua na kaukauwa me vakadodonutaka kecega na cala, e dua na dina ni soli bula vei ira era vakacalai mai vei ira na tani.15
Yalovinaka mo kila ni sa lako curuma na veika kecega e lolovira na iVakabula, na veika sara madaga sa yaco ka o vakila o iko. Baleta na veika oqori, e kila vinaka tu o Koya na rere ni yaluma kei na madua o vakila kei na galili e dau yaco ni da vakuwai se vakila na yaluma.16 Mai na titobu ni yaluma ni Nona veisorovaki, e solia na iVakabula nai nuinui ko nanuma sa yali vakadua, na kaukauwa ko vakabauta ena sega ni rawa ni nomu, kei na veivakabulai ko sega ni nanuma rawa ni na yaco.
Na iTovo Veivakalolomataki e Vakacalai Vakamatata mai vua na Turaga kei ira na Nona Parofita
Me kua ni dua na vanua me caka kina na veivakalolomataki—vakayago, veiyacovi, ni lomada, se vosa—ena dua ga na vale, vanua cava ga, se itovo vakavanua cava ga. E sega ni dua na ka e rawa ni cakava se tukuna e dua na yalewa vakawati se gone me “dodonu” me ra kanakuita kina. E sega ni dua, ena dua na matanitu se itovo vakavanua, me dau “kerea tiko” na itovo veibeci se ivalavala kaukauwa mai vua e dua tale e lewa se mai vua e dua e levu cake ka kaukauwa cake.
O ira era veivakalolomataki ka segata me ra vunia na nodra ivalavala ca bibi e rawa beka ni ra vunia ena dua na gauna. Ia na Turaga ka raica na veika kece e kila na cakacaka kei na vakanananu kei na inaki ni yalo.17 OKoya na Kalou ni lewa dodonu, ka na qaravi na Nona lewa dodonu vakalou.18
E veivakurabuitaki, ni Turaga sa Kalou talega ni loloma veivueti kivei ira sa veivutuni dina. O ira na veivakatotogani—oka kina o ira era a vakatotogani vakai ira ena dua na gauna—era vakatusa, biuta tani na nodra ivalavala ca, ka cakava kece na nodra kaukauwa taucoko me ra sososomitaka ka sauma, sa rawa kina vei ira na veivosoti ena cakamana ni Veisorovaki i Karisito.
Vei koya e beitaki vakailasu, na vakasama sega ni vakamacalataki rawa ni veibeitaki oqo ena kauta mai na kena vakasavasavataki. Ia era vakalougatataki talega ena nona vakararawataki vakaveisosomitaki ni iVakabula ena vukudra kei na kila-ka ni na qaqa ga na dina.
Ia o ira era sega ni veivutuni era na tu ena mata ni Turaga me baleta na nodra cakacala butobuto.
Sa makare dina na Turaga ena Nona cudruvi ena mataqali veivakatotogani cava ga: “Ia ko cei ena vakacala e dua vei ira na lalai oqo, a vinaka vua kevaka ka vakarubeci e domona e dua na vatu i qaqi levu, ka vakadromutaki e na wasaliwa titobu.”19
iTinitini
Kemuni na itokani lomani ko ni sa vakamavoataki vakaca—kei kemuni talega o ni colata tu na na icolacola lewa tawadodonu ni bula—sa rawa ni ko tekivu tale me dua na itekiteki vou vei iko. Mai Kecisemani vakakina mai Kalivari, a “taura ko Jisu, na yaluma kei na veivakararawataki kece sa daru bau sotava oti,”20 ka sa valuta rawa o Koya na veika kece oqo! Ni sa dodoka tu yani na ligana, sa vakarautaka tu na iVakabula na isolisoli ni veivakabulai kivei iko. Ena yaloqaqa, vosota, kei na yalodina vakanamata Vua, e sega ni dede sa na rawa mo ciqoma taucoko na isolisoli oqo. Sa rawa mo biuta laivi na nomu mosi ka biuta tu e Yavana.
A vakaraitaka na nomuni iVakabula yalomalua, “Sa sega ni lako wale mai na daubutako, me butako ga, ka ravuravu, ka vakarusa: Au sa lako mai me rawa vei [iko] na bula, ia [mo] rawa vakalevu sara.”21 O iko e dua sa gubula, e rawa ni o vakabulai, ka rawa ni o nuitaka ni ena kaukauwa kei na loloma soliwale i Jisu Karisito, o na ulabaleta ka qaqa.
O Jisu e kenadau ena ka e vaka me sega ni rawa. E lako mai eke oKoya me cakava na ka e sega ni rawa me rawa, me vueta na ka e sega ni vueti rawa, me vakabula na ka sa sega ni bula rawa, me vakadodonutaka na ka sa sega ni vakadodonutaki rawa, me yalataka na ka sa sega ni yalataki rawa.22 Ka sa daumaka sara kina oKoya. E dina sara, ni sa uasivi sara kina oKoya. Ena yaca i Jisu Karisito, na noda Dauniveivueti, emeni.
Na ikuri ni itukutuku kei na ivurevure, raica na “Abuse” Help, Healing, and Protection” ena ChurchofJesusChrist.org kei na app ni Gospel Library.