Anjo̧ Ioon laļ n̄an Lo Ami Kakkije
Lo ami kakkije jān pere, men ko jab jeļā kaki, im anjiwiwi ko an laļin n̄an anjo̧ ioonlaļin kōn bujen ko am̧ ippān Anij.s
Ro jeiū im jatū rejitōnbōro, ij kam̧m̧oolol bwe imaron̄ pād ippāmi ilo jibbon̄in Jabōt in eaiboojoj. Komij iien otemjej pād ilo kōļmenļo̧kjeņ eo aō. Ij bwilōn̄ kōn wāween an m̧ōkaj ami em̧akūt n̄e komij lo an ro jet pād ilo aikuj. Ej ļo̧kjeņ aō kōn tōmak im naan in kam̧ool eo kom̧ij bar kwaļo̧ke. Ij dānnin kōmjaaļal, eddodo, im inepata. Ij iakwe kom̧. Ijeļā bwe Jemedwōj Ilan̄ im Nejin Emake Wōt, Jisōs Kraist, rej iakwe kom̧. Rej lukkuun jeļā kōn jekjek ko ami, em̧m̧an eo ami, aikuj ko ami, im jar ko ami kōn jipan̄. Bar juon alen, ij jar bwe kom̧ naaj en̄jake iakwe eo Aer.
En̄jake iakwe eo Aer eaorōk, kōnke ilo ad bōjrak kajjojo raan kōn enaan ko kinōōr laļļo̧k kōj jen jab bōjrak. Ewōr raan ko kwoj kōtmene kwomaron̄ kajjieon̄ bōbrae, n̄an kakkije, im kajjitōk ippān juon n̄an karuj eok n̄e ejako tarpok kein.
Ak, ro jeiū im jatū rejitenbōro, elōn̄ men ko rem̧m̧an repād im̧aan. Ilo raan kane rej itok, jenaaj lo kajoor eo eļap an Rilo̧mo̧o̧r me laļ in ejjan̄in kar loe. Ikōtaan kiiō im iien eo Ej jepļaaktok “kōn kajoor im aiboojoj eļap,”1 Enaaj kwaļo̧k jim̧we ko ejjeļo̧k jon̄an, kōjeraam̧m̧an ko, im kabwilōn̄lōn̄ ko ioon ro rej tiljek.
Ijoke, jej mour ilo juon tōre eo ej make wōt pen ilo bwebwenatoin laļ in. Pen im apan̄ ko remaron̄ kōm̧m̧an an elōn̄ armej en̄jake eddodo im m̧ōk. Ijoke, ļōmņaki en̄jake ko kiiō me remaron̄ kwaļo̧k meram ilo wāween am̧ im n̄an maron̄ lo kakkije.
Ilo iien kōppeļļo̧k eo an Washington D.C Temple, juon uwaan kamiti in kōppeļļo̧k eo eaar kam̧ool juon en̄jake ke ej tōl jet iaan rikōm̧m̧an nuuj ro ilowaan tampeļ eo. Tokālik juon baam̧le eaar jino itok ippān ripija ro. Juon iaan rikōm̧m̧an nuuj ro ekar kajjitōk “iaļ” eo an juon tampeļ patron ilo an ito-itak ilo tampeļ eo. Eaar kōņaan jeļā n̄e iaļ eo an tampeļ ej juon kōkkaļļe in apan̄ ko ilo iaļ in mour an juon armej ilo mour in.
Ļaddik eo ilo baam̧le eo eaar ron̄ bwebwenato eo. Ke kurup in rialooj ro rej deļo̧n̄e ruum̧ in bōk menin letok kwojarjar eo, ļaddik eo ekar jitōn̄ļo̧k lokatok eo, ijo armej ro rej būkwelōlō n̄an kōm̧m̧ani bujen ko ippān Anij, im ekar ba, “O, em̧m̧an. Ijin ej juon jikin an armej ro kakkije ilo iaļ eo aer ilo tampeļ.”
Iaar pere ke ļaddik in ekar jeļā jon̄an kabwilōn̄lōn̄ in men ko ej loi. Ejjeļo̧k an jeļā kōn ekkejeļ eo ikōtaan kōm̧m̧ane juon bujen ippān Anij ilo tampeļ im kallim̧ur eo an Rilo̧mo̧o̧r.
“Koṃwin itok ñan Ippa, koṃ otemjej rej jerbal im ban, im Inaaj kakkijeik koṃ.
‟Kom̧win bōk Aō ine, im katak Ippa; … im kom̧ naaj lo ami kakkije.
“Bwe Aō ine ej emman, im men eo Ij ineke e mera.”2
Ro jeiū im jatū, ij būrom̧ōj kōn ro rej etal jān Kabun̄ in kōnke rej en̄jake bwe aer membōr ekanooj eddo n̄an er. Rejjan̄in loe n̄an kōm̧m̧ane im kōjparok bujen ko rej lukkuun kapidodoik mour! Kajjojo armej eo ej kōm̧m̧ani bujen ko ilo dānin peptaij im ilo tampeļ ko—im kōjparoki—ekar kōļapļo̧k an maron̄ bōk kajoor eo an Jisōs Kraist. Jouj ļōmņak kōn m̧ool in!
Nōbar eo kōn kōjparok bujen ko ippān Anij ej kajoor in lan̄—kajoor eo ej kōkajoor kōj n̄an jutak ņae apan̄ ko ad, kapo ko, im būrom̧ōj ko. Kajoor in ej kaenōm̧m̧an iaļ in ad. Ro rej mour kōn kien ko an Jisōs Kraist em̧ōj aer bōk kajoor eo An. Aaet, rikōjparok bujen ro remaron̄ bōk kain kakkije rot in me ej itok n̄an er kōn bujen eo aer ippān Anij.
Mokta jen an Rilo̧mo̧o̧r leļo̧k E Make n̄an en̄taan ilo Getsemane im Calvary, Eaar kwaļo̧k n̄an Rijilōk ro An, “Ilo laḷ koṃij eñtaan, a koṃwin ṃōṇōṇō; Ña Iar bōk anjọ ioon laḷ.”3 Ilo m̧ool, Jisōs kōm̧m̧an āindein n̄an kōj kajjojo n̄an kōm̧m̧ane ejja āinwōt ke Eaar ba, “I kōņaan bwe kom̧in anjo̧ ioon laļin.”4
Ro jeiū im jatū, ennaan eo aō rainin ej bwe Jisōs Kraist eaar anjo̧ ioon laļin im kōnke Eaar en̄taan kōn kōj kajjojo, kwomaron̄ bar anjo̧ ioon jerawiwi ko, an juon make, im anjo̧ ioon laļin.
Kōn Rilo̧mo̧o̧r eo, kōn Pinmuur eo An, kar kōtļo̧k kōj jān m̧ōjņo̧, likjab ko, im jerawiwi, im kōnke Eaar en̄jake aolep metak, inepata, im eddodo ko kwomaron̄ kar būki,5 innām, ilo am lukkuun ukweļo̧k im kappukot jipan̄ eo An, kwomaron̄ anjo̧ ioon ajiwiwi ko an mour in.
Kwomaron̄ anjo̧ jen eddodo ko an jetōb im kanniōk an laļin, ekoba kabbil, utiej bōro, illu, etto, kōjdāt, arōk, ebanban, im mijak. Joļo̧k menin kabweerer im kainepata ko rej jepooļ kōj, kwomaron̄ lo m̧ool in kakkije—meļeļein jokne im aenōm̧m̧an—em̧ool jako aolep būrabōļōm̧ ko am̧.
M̧ool in eaorōk ekwaļo̧k jilu pedped in kajjitōk ko:
Juon, ta meļeļein anjo̧ ioon laļin?
Ruo, elmen ad kōm̧m̧ane?
Im jilu, elmen an anjo̧ ioon laļin kōjeraam̧m̧an mour ko ad?
Ta meļeļein anjo̧ ioon laļin? Ej meļeļein anjo̧ ioon kapo eo me ej kwaļo̧k ke eļapļo̧k ad kea kōn men ko an laļin jān men ko an Anij. Ej meļeļein lōke katak eo an Kraist eļapļo̧k jen katak ko an armej. Ej meļeļein m̧ōņōņō ilo m̧ool, joļo̧k m̧ōņ, im erom̧ “ro rej ettā rikaļooran Kraist.”6 Ej meļeļein kālet n̄an dim wōt jān jabdewōt men eo ej kadiwōjļo̧k Jetōb. Ej meļeļein m̧ōņōņō “leļo̧k” em̧ool jerawiwi ko ad.7
Kiiō, anjo̧ ioon laļin ejjab meļeļein anjo̧ eo ewāppen ilo mour in, ejjab bar meļeļein bwe būrabōļōm̧ ko am renaaj kajju jako—kōnke reban. Im ejjab meļelein bwe koban kōm̧m̧an bōd. Ak anjo̧ ioon laļin ej meļeļein bwe enaaj ļapļo̧k am jum̧ae jerawiwi. Būruwōm̧ enaaj pidodo ilo an ļapļo̧k tōmak eo am̧ ilo Jisōs Kraist.8 Anjo̧ ioon laļin ej meļeļein ļapļo̧k n̄an iakwe Anij im Nejin Emake Wōt eļapļo̧k jen am̧ iakwe jabdewōt ak jabdewōt men.
Innām, elmen, ad anjo̧ ioon laļin? Kiin̄ Benjamin eaar katakin kōj elmen. Eaar ba bwe “bwe armej ilo lukkuun biktokin ej rikōjdat n̄an Anij” im pād wōt n̄an indeeo “m̧ae an naaj kōtļo̧k e n̄an karreelel ko an Jetōb Kwojarjar, im utūkļo̧k armej eo ilo lukkuun biktokin im erom juon rikwōjarjar kōn pinmuur eo an Kraist Irooj.”9 Kajjojo iien kwoj kappukote im ļoor im̧we ko an Jetōb, kajjojo iien kwoj kōm̧m̧an jabdewōt men rem̧m̧an—men ko me “armej ilo lukkuun biktokin” reban jerbal—kwoj anjo̧ ioon laļin.
Anjo̧ ioon laļin ejjab juon men bajjōk me waļo̧k juon ak ruo raan. Ej waļo̧k aolep iien ilo ad atbokwoje tok katak eo an Kraist. Jej kōļapļo̧k tōmak ilo Jisōs Kraist jen ukweļo̧k kajjojo raan im kōjparok bujen ko me raar kapelpel kōj kōn kajoor. Jej pād ilo iaļan bujen in im jej jeraam̧m̧an kōn kajoor in jetōb, revelesōn an juon make, kōļapļo̧k tōmak, im jerbal in karejar an enjeļ raņ. Mour kōn katak eo an Kraist emaron̄ kwaļo̧k eļap kajoor kōm̧m̧an ko rerreeo, kwaļo̧k kajoor in jetōb ilo mour ko ad.10
Ilo ad kajjieon̄ in mour kōn kien ko an Jisōs Kraist, būruwōd im kōm̧m̧an ko ad renaaj jino oktak. Rilo̧mo̧o̧r eo enaaj kotak kōj jen anjiwiwi ko an laļin n̄an kōjeraam̧m̧an kōj kōn eļap iakwe, ettā, meanwōr, jouj, rikaļooran, aenōm̧m̧an, im kakkije.
Kiiō, bōlen kwomaron̄ ļōmņak bwe jerbal in jetōb epen wōt kakkije. Ak en̄in ej m̧ool eo letok: ilo an laļin jab bōk kajoor in, m̧weie ko, bun̄bun̄ ko, im jeraam̧m̧an ko an kanniōk rej bōk m̧ōņōņō, rejjab! Rejjab maron̄! Ejjeļo̧k men rej kwaļo̧ke ak juon wāween ilo “jekjek eo ejeraam̧m̧an im ekam̧ōņōņō an [ro raar] kōjparok kien ko an Anij.”11
M̧ool eo ej bwe eļap jerbal n̄an kappukot m̧ōņōņō ijo kwojjab maron̄ loe! Ijoke, n̄e kwonaaj mour ippān Jisōs Kraist im kōm̧m̧ani jerbal in jetōb ko aikuji n̄an anjo̧ ioon laļin, E, im E make, ewōr kajoor n̄an kotak eok jen anjiwiwi in laļin.
Kiiō, elmen an anjo̧ ioon laļin kōjeraam̧m̧an mour ko ad? Uwaak in ealikkar: deļo̧n̄e juon bujen ippān Anij ej kapen kōj n̄an E ilo juon wāween ekōm̧m̧an bwe aolep men ilo mour ren pidodo. Jouj im jab kabōd eō: Ijjab ba kōm̧m̧ani bujen ko enaaj kapidodo mour. Ilo m̧ool, emaron̄ wōr jum̧ae, kōnke rikapo eo ejjab kōņaan bwe kwon lo kajoor eo an Jisōs Kraist. Ak juon wōt ippān Rilo̧mo̧o̧r ej meļeļe bōk An kajoor im kajoor in pinmuur.
Ij bar āliji katak eo an Būreejtōn Ezra Taft Benson: “Em̧m̧aan ro im kōra ro rej leļo̧k mour ko aer n̄an Anij renaaj lo bwe E emaron̄ kōm̧m̧an eļapļo̧k ilo mour ko aer jen n̄e remaron̄e. Enaaj kam̧wilaļļo̧k m̧ōņōņō eo aer, kōļapļo̧k visōn eo aer, kōm̧ōkajļo̧k kōļmenļo̧kjeņ ko aer, … kotak jetōb ko aer, kōļapļo̧k kōjeraam̧m̧an ko aer, kōļapļo̧k iien ko aer, kaneōm̧m̧an jetōb ko aer, kalōn̄ļo̧k ro m̧ōttaer, im lutōkleplep aenōm̧m̧an.”12
Men kein rej waļo̧k n̄an ro rej kappukot jipan̄ jān lan̄ n̄an jipan̄ er anjo̧ ioon laļin. N̄an kōjemļo̧ke, ij leļo̧k n̄an membōr ro ilo aolepen Kabun̄ in ejja naan ko wōt iaar leļo̧k n̄an ro rūm̧m̧an ded ilo Māe eo ļo̧k. Iien eo iaar kajjitōk ippāer—im Ij akweļap ippāmi kiiō—n̄an bōk eddoin naan in kam̧ool eo am make kōn Jisōs Kraist im gospel in An. Jerbale. Kajiririki bwe en eddōkļo̧k. Naajdik ilo m̧ool. Jab kattoone kōn katak ko rebōd an em̧m̧aan ro im kōrā ro ejjeļo̧k aer tōmak. Ilo am̧ kōm̧m̧an bwe en kajoor wōt naan in kam̧ool eo am̧ ilo Jisōs Kraist en im̧aantata, lale kabwilōn̄lōn̄ ko renaaj waļo̧k ilo mour eo am.13
Ij akweļap n̄an kom̧ jibbon̄in n̄an lo ami kakkije jān pere, men ko jab jeļā kaki, im anjiwiwi ko an laļin n̄an anjo̧ ioon laļin kōn bujen ko am̧ ippān Anij. Kōtļo̧k bwe En jeļā jān jar ko am̧ im kōm̧m̧an ko am̧ bwe kwoj lukkuun m̧ool n̄an anjo̧ ioon laļin. Kajjitōk Ippān n̄an kōmeramļo̧k kōļmenļo̧kjeņ eo am̧ im lewaj jipan̄ eo kwoj aikuji. Kajjojo raan, je ļōmņak ko me rej itok n̄an eok ilo am jar; innām lukkuun ļoori. Joļo̧k eļap iien ilo tampeļ im kappukot n̄an meļeļe elmen an tampeļ katakin eok n̄an jutak jān anjiwiwi an laļ.14
Āinwōt aō kar ba m̧oktaļo̧k, bwe aiintok Israel ej men eaorōktata ej bōk jikin ioon laļ in rainin. Juon iaan men eo eaorōktata ilo aiintok in ej kepooj armej ro rej maron̄, pojak, im erreeo n̄an bōk Irooj n̄e E enaaj bar ro̧o̧ļtok, armej eo em̧ōj an kālet Jisōs Kraist jān wijwan ko an mour in, armej eo ej lan̄lōn̄ ilo anemkwoj eo aer n̄an mour kake kien eo utiej, im ļap an Jisōs Kraist.
Ij kajjitōk ippāmi, ro jeiū im jatū rejitenbōro, n̄an erom̧ armej in ewānōk. Mōņōņō im kōjparok bujen ko am ilōn̄in aolep kien ko jet. Ilo am kōtļo̧k bwe Anij en anjo̧ ilo mour eo am, ij kallim̧uri eok kōn eļap aenōm̧m̧an, lōke, m̧ōņōņō, im aaet, kakkije.
Kōn kajoor eo ekwojarjar an rijilōk likūt ioō, ij kōjeraam̧m̧an eok ilo am kajjitōk n̄an anjo̧ ioon laļin. Ij kōjeraam̧m̧an eok n̄an kōļapļo̧k tōmak eo am̧ ilo Jisōs Kraist im katak kilen n̄an epaake kajoor eo An. Ij kōjeraam̧m̧an eok n̄an maron̄ kile m̧ool jān bōd. Ij kōjeraam̧m̧an eok n̄ān kea elapļo̧k kōn men ko an Anij jān men ko an laļin. Ij kōjeraam̧m̧an eok n̄an lo aikuj ko an ro ipeļakum̧ im kōkajoor ro kwoj iakwe. Kōnke Jisōs Kraist ekar anjo̧ ioon laļin, kwomaron̄ barāinwōt. Ij kwaļo̧k aō kam̧ool ilo et eo ekwojarjar etan Jisōs Kraist, amen.