Uko Ediomi eketode Jesus Christ
Ke ini nnyin idukde ke ufɔk Ɔbɔŋ, ke nnyin itɔŋɔ edisana isaŋ emi ikpepde ndidi nkoŋ nkan ye mme ndisana mbet Christ.
Ndima nditɔ eka iren mme iban, ami mebɔŋ akam ke nnyin iyefiak idi obufa ke mme enyene ntuk etop emi otode mme adaibuot nnyin ke utit udua emi inyuŋ idara ke ŋkpɔ emi ami nkotde “uko ediomi eke otode Jesus Christ.” Uko emi edi suŋ suŋ edi ndusuk ɔsɔŋɔ eke ndibɔ mme edidiɔŋ emi Abasi ɔnwɔŋɔde ɔnɔ mbon emi enimde mme ediomi mmɔ ndien eyom enye ke ndaha mfina ke usen nnyin.
Ndibɔp obufa ufɔk Jehovah ke ofuri ereimbot, ke idak ndausuŋ enyene udɔŋ ukara eke President Russell M. Nelson anam akamba idara odu ke otu mbon Ufɔk Abasi onyuŋ ada ɔnɔ akpan uwut ŋkpɔ eke ndinam obio ubɔŋ Abasi okpon.
Nditi mbaŋa ke mkpaidem mbufiɔk nkenyenede ke ndidiɔŋ Feather River California Temple ke Ɔfiɔŋ duop emi ekebede, ama akpa mi idem mme ke ndusuk ndaha mme nnyin imisi isop usuŋ ke inem eke edinyene mme obufa temple ke mme obio nnyin ye mme iduŋ inyuŋ ifre ibaŋa edisana ntak emi mme ndisana ediomi ikinamde ke temple ɔnɔde.
Ewetde ke iso temple kiet kiet edi enyene uteŋe ikɔ: “Edisana ɔnɔ Ɔbɔŋ.” Mme enyene udɔŋ ikɔ emi edi ata ikoot ete ke ini nnyin idukde ke ufɔk Ɔbɔŋ, ke nnyin itɔŋɔ edisana isaŋ emi ikpepde ndidi nkoŋ nkan ye mme ndisana mbet Christ. Nte nnyin inamde mme ediomi ke edisanake iso Abasi ye ndiyime nditiene Andinyaŋa, nnyin ibɔ odudu ndikpuhɔre esit nnyin, inam spirit nnyin edi obufa, inyuŋ inam euana nnyin okpon ye Enye. Utɔ edinam oro emen ndinam asana ɔsɔk ukpɔŋ nnyin onyuŋ anam edisana ediyire kiet ye Abasi ye Jesus Christ emi ekenwɔŋɔde ke nnyin imikeme ndinyene enɔ nsinsi uwem. Ibɔrɔ edisana isaŋ emi edi ke nnyin inyene edisana ye nkon nkan uko ke mme usen ke usen ke uwem nnyin ke ediomi nnyin inamde otode ke Jesus Christ.
Utɔ uko oro edi adaha eke edisana ediyire nnyin ye Abasi ndien anwam nnyin ndikɔri nwaidem nnyin ke ye ndibe nnɔ Jesus Christ ye Uwa-usi-isop Esie. Enye otim ukeme nnyin ke ndima nnyuŋ nam ɔŋkɔ nnɔ mbon efen, ndien eyesɔŋɔ ukpɔŋ nnyin ke ndiduŋ ke edisana ererimbot emi enehekede ekim ye unana udɔŋ. Enye ɔŋɔ nnyin ukeme ndikan mme mkpasip ediyik ye nyeŋidem, ndik ye edikpu, unyik esit ye unana idorenyin emi asua anwanade ndimen nsin otuŋɔ ke mme esit nnyin akpan akpan ke ini uwem ɔsɔŋde, idomo ɔniɔŋde, mme ke ini ndaha ɔsɔŋde. Ibuot ikɔ ke bible ɔnɔ nnyn kiet kiet ata eti item nte nnyin idukde ke ɔkpɔsɔŋ ofim idomo ererimbot mfin: “Kuduɔk ndien uko fo.”
Ndima nditɔ eka iren ye iban, mbon oro enyenede eti uko ke ediomi emi mmɔ ekenamde ke ufɔk Ɔbɔŋ otode ke Jesus Christ enyene kiet ke otu enyene odudu ofim emi nnyin ikemede ndibɔ ke uwem emi.
Nte nnyin ikpepde ke Ŋwed Mormon ke Edi, Tiene Mi isua emi, nnyin imokut adanŋa nte Nephi owutde ediye uwutŋkpɔ eke utɔ ediomi uko emi otode ke mbuɔtidem ke ini enye okokutde mfiakedem ye mme idomo ke ndibɔ usan nte Ɔbɔŋ okowukde. Okposukedi nte Nephi, eke enehede odu ke mfuhɔ kabaŋa ndik ye unana mbuɔtidem eke Laman ye Lemuel, ama osuk enyeneuko ke Ɔbɔŋ eye ayak usan oro ɔnɔ mmɔ. Enye etiŋ ɔŋɔ nditɔ eka ese iren ete, “kpa nte Ɔbɔŋ odude uwem, ye kpa nte nnyin idude uwem, nnyin idisuhɔkere ika ibine ete nnyin ke wilderness tutu nnyin inam se Ɔbɔŋ eke owukde nnyin.” Ke ntak uko Nephi ke enwɔŋɔ Ɔbɔŋ, enye ama ekeme ndinam se ekewukde enye ete anam. Ke ebede, ke nkukut esie, Nephi ama okut uteŋe uto uko emi, ewetde, “ami, Nephi, mekut odudu eke Eyen erɔŋ Abasi, emi ekesuhɔde ebine mme ndisana owo ufɔk Abasi eke eyenrɔŋ, ye ke mme mbon ediomi Ɔbɔŋ, … ndien mmɔ ema etumidem ye edinenido ye odudu Abasi ke akwa ubɔŋ.”
Ami mekut ke akpa ubɔk edima enwɔŋɔ Obong , ye odudu ofiorode ke uwem ndito Abasi , ɔsɔŋɔre mmɔ idem ndiyɔ mme ndaha uwem emi. Ke usen eken ŋwan mi ɔyɔŋ edi ufɔk ke ama okokure ke temple onyuŋ ɔdɔhɔ mi adaŋa nte enye okopde ntuk ke se enye eke okutde. Nte enye odukde ke ufɔk Ɔbɔŋ, enye ama okut eren emi okodude ke ŋkpɔ isaŋ asaŋade ata suŋ suŋ ye ŋwan emi asaŋade ye akwa edikak akamade esaŋ, mbiba ye uko edide ndituak ibuot ye Ɔbɔŋ ke ufɔk Esie. Nte ŋwan mi asaŋade oduk ebiet ndansin, enye okut ediye eyen eka emi mi ikinyeneke ubɔk kiet—ndien enyene ibio ubɔk eken—ediye ye ke ubɔŋ anamde ŋkpɔ ekededi emi ekenɔde enye.
Nte ŋwan mi ye ami itiŋde ibaŋa ifiɔk-ukpep oro, nnyin ibiere ite ke eti ye esit uko kabaŋa nsinsi ediomi Abasi ɔnɔde oto ke edisana ediomi enamde ye Enye ke ufɔk Esie ekeme ndinam mme utibe mbet Christ ekpɔŋ ufɔk mmɔ ke utɔ ndedeŋ usen oro, ke imisehe mme ndaha uwem mmɔ.
Mme ndima ufan mi, edieke odude ŋkpɔ nyin ikpinyenede—ye ŋkpɔ kiet nnyin ikpinɔde nditɔ nnyin ye nditɔ-nditɔ nnyin ekemede ndinwam mmɔ ke udomo ye idomo edide ke iso —enye edi uko ke ediomi inamde ito ke Jesus Christ. Ndibɔ utɔ eti ndaha oro eyewam mmɔ edu nte Ɔbɔŋ ɔkɔ ɔŋwɔŋɔde ɔnɔ mme enyene mbuɔtidem mbet Esie: “Mme mbet Mi eyeda ke mme edisana ebiet, ndien idi isigke.”
Didie ke nnyi idinyene utɔ uko oro otode Jesus Christ? Enye edi oto ke nsuhɔre idem, ɔkɔŋɔde ke ndisin uwem nnyin ke Andinyaŋa, ndidu ke mme ndaha eke ikɔ Abasi Jesus Chrst, ndibɔ mme edinam erinyaŋa ukpɔŋ ye edimenere, ye ndikpono mme ediomi emi nnyin inamde ye Abas ke edisana ufɔk Esie.
Ke utre ikɔ esie ke akwa mbono eke Ɔfiɔŋ duop ke 2019, edima prophet nnyin ama eti nnyin abaŋa mme akpan nkpɔ ke ndibɔ uko ediomi, ɔdɔhɔde ete, “Edinen ido eke idem owo ke ndiduk ke ufɔk Ɔbɔŋ enehede oyom mbeŋeidem spirit eke idem owo. … Edinen ido eke idem owo oyom ata nkabare esit ke ekikere ye ke esit man etie nte Abasi, ke ndidi anditiŋ akpan ikɔ owo obio, ke ndidi eti uwut ŋkpɔ, ye ke ndidi edisana owo.” Ke ntre, edieke nnyin ikpuhɔre mbeŋeidem nnyin ke ndiduk temple, nnyin iyekpuhɔ ifiɔk ukpep ke temple, emi edikpuhɔre uwem nnyin ke ima iwɔrɔ ke temple. “Do ke uko mbufo edisɔŋɔ ke iso Abasi; ndien edu ukpep nkpo itie oku eyesio mfit ɔduɔk ke ukpɔŋ mbufo nte ntuhube emi otode heaven.”
Bishop kiet emi mfiɔkde etiŋ abaŋa mkpon nkan ubet ukpep Primary idihe nte ubet ukpep “Primary” edi nte “mbeŋe idem ubet ukpep temple.” Ke January bishop ama okoot mbon ubet ukpep ye mme andikpep mmɔ edi ke office, esie emi mmɔ eketiŋde ebaŋa adaŋa nte edibiatde ini ke ofuri isua ke ndibeŋeidem ndika temple. Bishop ada ini ndimen nwut mme mbume temple recommend, emi idaha oro ekesinede ke mme ukpep ŋkpɔ Primary mmɔ. Enye okoot nditɔ ŋwɔŋ ete ebeŋe idem mman ke ini mmɔ edide ke office bishop ke isua kiet, mmɔ enyene uko, uko ediomi, ebeŋeidem ndibɔ temple recommend enyuŋ eduk ke ufɔk Ɔbɔŋ. Isua emi bishop enyene mkpri nditɔ iban inaŋ emi ekopde inem, ebeŋeidem, ye uko ndika temple edi ke mmɔ eyom bishop emiŋ recommend mmɔŋ ke Usen Obufa Isua ke 12:01 a.m.
Mbeŋeidem idihe kpɔt inɔ mbon oro ekade temple ke akpa ini. Ana nte nnyin ibeŋeidem kpukpru ini ke ndika ke ufɔk Ɔbɔŋ. Stake kiet emi mfiɔkde enam motto “Ɔkɔŋɔ ke ufɔk, Ufɔk Abasi anwam, ndien temple adian.” Adidian edi inem ikɔ ke oro enye ada ɔnɔ ndiwuk nse ke ebiet, edi nko ada ɔnɔ ndisɔp nka mme ndikpeme nto, ndibioro,ye ndinyime, ndisɔŋɔ. Ndien ke ndidi andidian ke temple ekpeme nnyin ɔnɔ Andinyaŋa, ɔnɔ nnyin eti nwut usuŋ ye edisɔŋɔ ke ini ɔfiɔkde ete ke nnyin iminyene uko ediomi eke otode Jesus Christ. Ke emi, kpukpru nnyin ana ifɔfiɔk inam oro ke ndinyene ndiduak ndiba ye Ɔbɔŋ ke edisa ufɔk Esie, ekpedi temple ekpere mme ɔniɔŋ usuŋ.
Edima prophet nnyin, President Russell M. Nelson, ama eti nnyin abaŋa mme akpan ukpep emi ke nditiŋde ete ke: “Temple ana ke ufɔt edisɔŋɔ mbuɔtidem nnyin ye ukeme ŋkpɔ-spirit koro ke Andinyaŋa ye ukpepnkpɔ Esie edi ata akpan-ntak emi temple odude. Kpukpru mme ŋkpɔ emi ekpepde ke temple, oto ke item ye ke Spirit, enam ifiɔk nnyin abaŋade Jesus Christ ɔkɔri. Mme akpan edinam Esie edian nnyin ye Enye oto ke mme ediomi itie oku. Nte nnyin inimde ediomi nnyin, Enye ɔdiɔŋ nnyin ye ɔsɔŋɔ erikɔk, odudu Esie . Ndien oh, nte nnyin idiyomde odudu Esie ke mme usen iso.”
Andinyaŋa oyom ete nnyin ibeŋeidem ndifiɔk, ye akamba edinwaŋa, adaŋa nte idinamde ke nte nnyin inamde ediomi ye Ete eke Heaven nnyin ke Enyiŋ Esie. Enye oyom nnyin ibeŋe-idem ndinyene unen nnyin, mme enwɔŋɔ, ye mme ubiɔŋ utom; ke ndibeŋeidem ndinyene ifɔk eke spirit ye edidemede emi nnyin iyomde ke uwem emi. Ami mmefiɔk nte ke ini Ɔbɔŋ edikutde kɔm nduwai udɔŋ mme ekpri ukeme edinen ido ke unyime nnyin ke ndiwuk uwem nnyin ke Enye ndien ke mme edinam ye mme ediomi nnyin inamde ke ufɔk Esie, Enye eyediɔŋ nnyin, ke ediye usuŋ Esie, ye mme utibe ŋkpɔ ye suŋ-suŋ mbɔm nnyin iyomde.
Ufɔk Ɔbɔŋ edi ebiet emi nnyin ikemede ndikpuhɔre ke nkoŋkoŋ ye ndisana usuŋ. Ntre, ke ini nnyin isaŋde iwɔrɔ ke temple, obufa ke idorenyin ke mme enwɔŋɔ eke mme ediomi, isinede ye odudu otode enyɔŋ, nnyin ida temple ye nnyin iduk ke ufɔk ye uwem nnyin. Ami metŋ nnɔ mbufo nte ke ndinyene spirit eke ufɔk Jehovah ke idem nnyin okpuhɔre nyin, ofuri ofuri.
Nnyin nko imifiɔk otode ke temple edieke nnyin iyomde Spirit Jehovah ndika iso ke uwem nnyin, inaha nte nnyin inyene idiɔk ekikere ibaŋa owo eke edidi. Ndinɔ idiɔŋk ekikere ke esit nnyin mme ekikere eyemen mme idiɔk ikɔ ye edinam edi, ekpedi ke ofim mme ke ufɔk nnyin, anamde Spirit Jehovah ɔwɔrɔ ke esit nnyin. Ntem, mbɔk kubin uko fo uduɔk, edi, yak uko fo ɔsɔŋɔ ada.
Nkaiso ye usɔp usɔp edibɔp mm temple eyeka iso ndinɔ inem, udɔŋ, onyuŋ ɔdiɔŋ nnyin. Edi ata akpan ŋkpɔ, nte nnyin ikpuhɔre mbeŋeidem nnyin ke ndiduk temple, nnyin iyekpuhɔ ifiɔk ukpep ke temple, emi edikpuhɔre uwem nnyin ke ima iwɔrɔ ke temple. Yak edikpuhɔre emi ɔyɔhɔ nnyin ye uko ke mme ndisana ediomi nnyin inamde ye Abasi otode ke Jesus Christ. Abasi odu uwem, Jesus Christ edi Andinyaŋa nnyin, ndien emi edi mfiak mendi Ufɔk Abasi Esie ke isɔŋ. Ami ke uteŋe ntiŋ mme akpanikɔ emi ke edisana enyiŋ eke Andinyaŋa nnyin, Jesus Christ, amen.