Ikɔ-ntiense Jesus
Ikoot mi edi ndinam ŋkpɔ idahaemi man omum itie fo enim nte owo kiet emi ɔsɔŋɔke ada ke ikɔ-ntiense Jesus.
Ke 1832, Joseph Smith ye Sidney Rigdon ema ebɔ utibede nkukut kabaŋa nsinsi akaŋa eke nditɔ Abasi. Eriyarare emi eketiŋ abaŋa mme obio-ubɔŋ heaven ita. President Dallin H. Oaks ama etiŋ abaŋa “mme obio-ubɔŋ eke ubɔŋ” emi ke akpatre October oko, ete ke “otode ke edikan ye ubɔŋ eke Eyenerɔŋ,” kpukpru owo edi ata esisit ibat owo ke erifak ke akpatre ida isin ke kiet kotu mme obio-ubɔŋ emi, “nte asaŋade ye mme udɔŋ eke owutde idem oto mme mbumek mmɔ.” Uduak ufak eke Abasi esine akpakip ufaŋ ɔnɔ kpukpru nditɔ Esie, ke ini ekededi ye ebiet ekededi emi mmɔ eduŋde ke isɔŋ.
Kini ubɔŋ mkpri-nkan kotu obio-ubɔŋ ita emi, eke telestial, “akande kpukpru ifiɔk owo,“ idorenyin eke Ete nnyin edi ke nnyin iyemek—ndien, otode ke mfɔn Eyen Esie, idot edibɔ—mkpon-nkan ye ata enyene-ubɔŋ kotu mme obio-ubɔŋ emi, eke celestial, emi nnyin ididarake ke nsinsi nte “mme enyene-udeme ye Christ.“ President Russell M. Nelson ama eteme nnyin ete “ikere ibaŋa celestial,” anamde obio-ubɔŋ celestial edi nsinsi ekikere nnyin ndien “itim ekere ebiet eke ubiere [nnyin] kiet kiet ke ini osuk odude mi ke isɔŋ edidade [nnyin] ika ke ererimbot efen.”
Mbon ekedude ke obio-ubɔŋ celestial edi “mmɔ emi ebɔde ikɔ ntiense eke Jesus, … edide ndinen owo enamde esana-ema oto ke Jesus etie-ubiɔŋ eke obufa ediomi.” Ewut mme andiduŋ ke udiana, mme obio-ubɔŋ terrestrial, nte nti owo, esinede “mbon ukpono ke isɔŋ, emi ekedade mbufiɔk ŋkari eke mbonowo ekim mmɔ enyin.” Ata akpan ubiɔŋɔ mmɔ edi ke mmɔ “ikinyeneke nsɔŋɔ nda ke ikɔ ntiense Jesus.” Ke edida-ndomo, mme andiddu ke nsuhɔde-nkan, obio-ubɔŋ telestial edi mbio emi “mibɔhɔ ikɔ Abasi, mme ikɔ ntiense Jesus.”
Eti ke nwɔrɔ nda edu eke mme andiduŋ ke obio-ubɔŋ kiet-kiet edi nte mmɔ ebuanade ke “ikɔ-ntiense Jesus,” ɔtɔŋɔde ke (Akpa) edi-sin idem ke ofuri-esit ikisim (Udiana) inyeneke nsɔŋɔ-nda ikisim (Ɔyɔhɔ Ita) ata edibin-nduɔk. Nsinsi ini iso nnyin ɔkɔŋɔ ke edinam eke owo kiet-kiet.
I.
Nso idi ikɔ ntiense Jesus
Oro edi ntiense eke Edisana Spirit ke Enye edi edisana Eyen Abasi, Messiah ye Andifak. Edi ikɔ ntiense eke John ke Jesus okodu ke eritɔŋɔ ye Abasi, ke Enye edi Andibot enyɔŋ ye isɔŋ, ndien ke “gospel ekesine ke enye, ndien gospel edi uwem, ndien uwem ekedi uŋwana owo.” Edi “ikɔ ntiense eke mme Apostle ye Prophet, … ke Enye amakpa, enyuŋ ebuuk, onyuŋ afiak eset ke ɔyɔhɔ usen ita, ndien ɔdɔk aka heaven.” Edi edifiɔk ke “iduhe enyiŋ efen enɔde emi erinyaŋa-ukpɔŋ edidie.” Edi “ikɔ-ntiense, akpatre edi emi,” emi Prophet Joseph Smith, etiŋde “ke enye odu uwem! Ke enye edi Ikpɔŋ-ikpɔŋ Eye emi Ete Obonde—oto ke enye, ye abaŋade enye, ye ke enye, ke ekenam enyuŋ ebot mme ererimbot, ndien mme andiduŋ ŋko edi obobon nditɔ iren ye iban enɔ Abasi.”
II.
Ebede ikɔ-ntiense emi edi mbume, Nso ke nnyin idinam kabaŋa ŋkpɔ emi?
Mme andinyene-udeme ke obio-ubɔŋ celestial “ebɔ” ikɔ-ntiense Jesus ke ɔyɔhɔ ndaha ke edina uduɔkmmɔŋ, ebɔ Edisana Spirit, enyuŋ ekan ke mbuɔtidem. Mme ukpep ye akpanikɔ eke ikɔ Abasi Jesus Christ akara mme akpa akpan-ŋkpɔ ye mbumek. Ikɔ-ntiense Jesus ediwut idem ke se mmɔ edide ye se mmɔ edikabare idi. Udɔŋ mmɔ edi ata-ima, “edisana ima Christ.” Mmɔ eyire ke edisim “ofuri idaha uyɔhɔ Christ.”
Nte ededi ubak mbio emi edikutde ke obio-ubɔŋ terrestrial ŋko enyime ikɔ-ntiense Jesus, edi ebahade mmɔ eto se mmɔ minam ke kabaŋa ikɔ-ntiense Jesus. Misɔŋɔke-ida ke ntiense Andinyaŋa owut ndaha isɔŋesit mme mbubru—edide “ndebe”— emi mibietke mbio Ammon eduke ke Ŋwed Mormon, nte uwutŋkpɔ, emi “ekefiɔkde mmɔ eto ke ntak nsinsifik mmɔ nnɔ Abasi.”
Mme andiduŋ eke obio-ubɔŋ telestial edi mbio emi esinde ikɔ-ntiense Jesus diana ye ikɔ Abasi Esie, ediomi Esie, ye mme prophet Esie. Abinadi emen mmɔ owut nte “mbio esopde etiene mme obukpo uduak ye udɔŋ mmɔ; emi mikikotke Abasi kini ekeyande ubɔk mbɔm enɔ mmɔ, koro ema enyan ubɔk mbɔm enɔ mmɔ, ndien mmɔ inyimeke ndimum.”
III.
Nso ke ɔwɔrɔ ndisɔŋɔ nda ke ikɔ-ntiense Jesus?
Odu ediwak ŋkpɔ emi ekemede edikere-mbaŋa kini ebɔrɔde mbume emi. Ami nyesiak esisit. Ndisɔŋɔ-nda ke ikɔ-ntiense Jesus enehede esine ndibɔk nyuŋ nsɔŋɔ ikɔ-ntiense oro. Nti mbet isisinke sibietde mkpri ŋkpɔ emi akamade onyuŋ ɔsɔŋɔke ikɔ-ntiense mmɔ kabaŋa Jesus, oruk nte akam, ediduŋɔ ŋwed Abasi, edikpono Sabbath, edidia udia-ɔbɔŋ, erikabare-esit, edinɔ-uŋwam, ye edituak-ibuot ke ufɔk Jehovah. President Nelson editi nnyin ete “ke ata edisɔsɔp, ikɔ-ntiense emi mibɔk-ke enye kusen kusen ‘ye eti ikɔ Abasi’ [Moroni 6:4] ekeme ndikpa. Ntem, … nnyin iyom ofuri usen ifiɔk-ukpep edituak-ibuot nnɔ Abasi ye ediduŋɔde ikɔ Abasi Esie.” Ekem ami ndian ke: “Mebeŋe nte yak mbufo eyak Abasi akara uwem mbufo. Enɔ Enye akamba ini mbufo. Nte enamde emi, se se itibede inɔ eti ndaha ukeme spirit mbufo.”
Ndisɔŋɔ-nda ŋko owut nditiŋ iŋwaŋ-iŋwaŋ ye ke anwa-anwa kabaŋa ntiense emi enyenede. Ke uduɔkmmɔŋ, nnyin imisɔŋɔ unyime nnyin “ndida nte mme ntiense nnɔ Abasi ke kpukpru ini ye ke kpukpru ŋkpɔ, ye ke kpukpru ebiet emi [nnyin] ididude, tutu ke mkpa.” Ke ini Easter emi akpan-akpan, nnyin ke uyɔhɔ idara, anwa-anwa, inyuŋ idipke ŋkpɔ ndomokiet ifiori ntiense nnyin kabaŋa eriset, odu-uwem Christ.
Ntak kiet ke edisɔŋɔ nda ke ikɔ-ntiense Jesus edi ndikpaŋ-utɔŋ nnɔ mme isuŋutom Esie. Abasi ikpak-ke-kpak nnyin isin ke eti usuŋ, usuŋ ediomi, edi Enye eyeteme mme prophet Esie ete enam nnyin itim ifiɔk mme utip eke mbumek nnyin. Ndien oro itimke idi kabaŋa mbon Ufɔk Abasi Esie ikpɔŋ. Otode ke mme prophet ye apostle Esie, Enye ke ima kebeŋe ofuri ererimbot ete ekpaŋ-utɔŋ enɔ akpanikɔ eke edinamde mmɔ ewɔrɔ ke ufin, edisiode mmɔ ke ukut, onyuŋ ada edibighe idara ɔsɔk mmɔ.
Ndisɔŋɔ-nda ke ikɔ-ntiense Jesus ɔwɔrɔ ndisɔŋɔ mbon efen idem, ke ik ye ke uwutŋkpɔ, man ŋko isɔŋɔ-ida, akpan-akpan mbon eke ufɔkemana nnyin. Inikiet Elder Neal A. Maxwell eketiŋ abaŋa “mme akpan ‘mbon-ukpono’ [eke Ufɔk Abasi] emi esede enyɔŋ-enyɔŋ ekpɔŋde edise ntotuŋɔ ido mbet mmɔ ye ndibubure mbuana akan ‘ndinehede nsin-idem’ [Doctrine ye Covenants 76:75; 58:27].” Ediɔŋɔ ke kpukpru owo enyene ukeme ndimek, Elder Maxwell ediseme ke: “Ke ndiɔkiso, nte ededi, ini emi ubak owo emekde mfiak-edem, mmɔ imek-ke inɔ idem mmɔ kpɔt, edi emek enɔ emana efen ye emana efen. Mme ete ye eka editiŋ mkpri ikɔ abiaŋa ekeme ndisin akamba ubahade kotu nditɔ mmɔ! Mme ebe-iso emana ke ufɔkemana ekeme edinyene nsinifik, kini usuk ke emana idahaemi ewutde idiɔŋɔ ikɔ abiaŋa. Ke mbɔm, ke emana efen, ubakowo ekeme edimek eneni ke nte ndubiara abiatde akade iso.”
Ke mme isua ekebede, Elder John H. Groberg eketiŋ mbuk kiet abaŋade ekpri ufɔkemana kiet emi ekeduŋde ke ekpri branch ufɔk Abasi ke Hawaii ke early 1900s. Mmɔ ekedi mbon Ufɔk Abasi ke ŋkpɔ nte isua iba kini kiet kotu eyen-aŋwan mmɔ ɔkɔduɔde udɔŋɔ eke owo mifiɔk-ke ndien ema eda enye eka ufɔkibɔk. Ke Sunday efen ke ufɔk Abasi, ete ye eyen ekebeŋe udia-ɔbɔŋ enim nte mmɔ esinamde ke ediwak udua, edi nte ekpri ete emi ɔtɔŋɔke edɔŋ ndidiɔŋ uyo, president branch oro, ɔsɔpde okut owo emi odude ke okpokoro udia-ɔbɔŋ, ama atama osioro-mkpo ete, “Tre. Inaha nte afo otuk udia-ɔbɔŋ. Eyen-aŋwan fo enyene udɔŋɔ emi owo mifiɔk-ke. Daha mi ke usɔp man owo efen edibeŋe obufa uyo udia-ɔbɔŋ. Nnyin inyimeke afo odu mi. Ka.” Akpaidem ete emi ɔwɔŋɔde ese president branch oro onyuŋ ese otuowo ndien, ke okutde adaŋa nnyekidem ye esuene otode kpukpru owo, okot ufɔkemana esie, ndien mmɔ suŋ-suŋ esaŋa ke udim ewɔrɔ ke chapel oro.
Owo ikitiŋke ikɔ ndomokiet, ufɔkemana oro ema esaŋa ke udim ekesim ekpri ufɔkiduŋ mmɔ. Do ke mmɔ eketie ke ekanare, ndien ete oro ete, “Mbɔk edobo tutu ami nam mbeŋeidem nditiŋ ikɔ.” Ekpri eyenerenedikere se mmɔ edinamde man esio usiene ke esuene emi ekenɔde mmɔŋ: ndi mmɔ ekpewot mme edi eke branch president oeo, mme ekpefɔp ufɔk esie, mme ekpeduk ufɔk Abasi efen? Minit ition, duop, efut, edip-ye-ition edibe ke ndobo.
Ete oro ama ofut mme ubɔk eie ndien ɔtɔŋɔ ndiduɔk-odudu, ndien mmɔŋeyet edikɔhɔ. Eka ama ɔtɔŋɔ editua eyet, ndien ibighike eyen kiet-kiet ema etua-eyet suŋ-suŋ. Ete ɔwɔŋɔde ese ŋwan ndien ete, “Ami mmema fi,” onyuŋ afiak etiŋ mme ikɔ oro ɔnɔ nditɔ mmɔ kiet-kiet. “Ami mmema kpukpru mbufo ndien ami nyom nnyin idu ɔtɔkiet, ke nsinsi, nte ufɔkemana. Ndien nkokure usuŋ oro ekemede edi-di ntre edi kpukpru nnyin edi-di nti mbon Ufɔk Abasi Jesus Christ Mme Ndisana Owo ke Ukperedem Usen nyuŋ ndian-nnyin oto ke edisana itie-oku emi odude ke temple. Emi idige ufɔk Abasi eke branch president. Emi edi Ufɔk Abasi Jesus Christ. Nnyin idinyimeke erenowo ndomokiet mme ubiak ndomokiet mme esuene mme ntaŋidem man etre nnyin ndidu ɔtɔkiet ke nsinsi. Sunday efen nnyin iyefiak ika ufɔk Abasi. Nnyin iyeit ke idem nnyin tutu edifiɔk se idi udɔŋɔ eyen-aŋwan nnyin, edi nnyin iyefiak ika.”
Mmɔ ema efiak eka, eyen-aŋwan mmɔ ama okop nsɔŋidem, ndien ufɔkemana oro ema ediana-ɔtɔkiet keTemple Laie Hawaii kini ekebɔpde ekure. Mfin emi, akande mme ukpɔŋ Ikie ekot ete, ete-ete, ye etebom mmɔ edidiɔŋ koro enye okowuk enyin esie ke ŋkpɔ nsinsi.
Akpatre ŋkpɔ kiet ke edisɔŋɔ-nda ke ikɔ-ntiense Jesus eke ami ndisiakde edi nnyin ediyom edisana eke idem nnyin. Jesus edi ata Andifak nnyin, ndien enye ke ebeŋe ete, “Ekabare esit, mbufo utit ererimbot, etiene Mi, enyuŋ ebɔ uduɔkmmɔŋ ke enyiŋ Mi, man enam mbufo esana eto ke edibɔ Edisana Spirit, man mbufo edi mme anana ndo ke iso Mi ke akpatre usen.”
Prophet Mormon ediwut eboho Ikɔt Abasi kiet emi ekesɔŋɔde-eda ke ido emi kesioho “mmɔ edikut ɔkpɔsɔŋ ukut”:
“Okposuk-edi ke mmɔ ema ewak editre-udia enyuŋ ebɔŋ-akam, enyene iwuk ke nsuhɔre-idem, etuak-eda ke mbuɔtidem ke Christ, ekesim ediyɔhɔ ukpɔŋ mmɔ ye idara ye idorenyin, edi ntre, kpa ekesim eriyet ye erinam-esit mmɔ asana, erinam-asana otode ke ediyak esit mmɔ nnɔ Abasi.” Enye edi akamba ukpuhɔde esit—ediyak esit nnyin nnɔ Abasi nyuŋ mfiak mmana obufa ke spirit oto ke mfɔn Andinyaŋa—emi nnyin iyomde.
Ikoot mi edi ndinam ŋkpɔ idahaemi man omum itie fo enim nte owo kiet emi ɔkɔsɔŋɔke ada ke ikɔ-ntiense Jesus. Nte ekpeyomde erikabare-esit, “ku sik usen erikabare-esit fo,” mbak “edi-di ke hour emi afo mukerede ndien ini-etuep edibe, ndien ini-idɔk edikure, ndien ukpɔŋ fo inyeneke erinyaŋa.” Esin-ifik ke edinim ediomi mbufo ye Abasi. Ekukop “iyatesit [eto] ke nduari ikɔ Abasi.” “Eti ke ndinim enyiŋ [Christ] emi ewetde ke esit mbufo kpukpru ini, … man mbufo [edi] kop enyuŋ ediɔŋɔ uyo emi edikotde mbufo, ŋko ye, enyiŋ emi enye edikotde mbufo.” Ndien akpatre, “ebiere emi ke esit mbufo, ke mbufo eyenam mme ŋkpɔ emi [Jesus] edikpepde, onyuŋ eteme mbufo.”
Ete nnyin oyom kpukpru nditɔ Esie emi edinyenede uwem nsinsi edu ye Enye ke obio-ubɔŋ celestial. Jesus ɔkɔbɔ ndutuhɔ, akpa, onyuŋ ediset man anam oro odu. Enye “ama ɔdɔk aka enyɔŋ, onyuŋ eketie ke ubɔk nnasia Abasi, man ɔbɔ Ete unen mbɔm esie emi enye enyenede ke ibuot nditɔ owo.” Ami mbeŋe yak kpukpru nnyin inyene ata ikɔ-ntiense eke Ɔbɔŋ Jesus Christ, idara inyuŋ isɔŋɔ ida ke ikɔ-ntiense oro, ndien ikaka-iso idia mfri mfɔn Esie ke uwem nnyin. Ke enying Jesus Chrst, amen.