Editiŋ Akpanikɔ: Mbiet Ido Christ
Ndidu uwem utiŋ akpanikɔ oyom nyin inam akpanikɔ inɔ Abasi, inɔ kiet eken, inyuŋ inam inɔ edisana uduot nyin
Ke mme akpatre ini ke utom Andiyaŋa, Enye ama aka obot Olives eduk inwang kiet emi ekotde Gethsemane ndien ɔdɔhɔ mbet Esie ete ebet. Nte enye odude ikpɔŋ idahaemi, enye ama ebeŋe Ete Esie “Edieke afo onyimede, men cup mi emi fep.” Ke odude ke ubiak, ndutuhɔ Esie ama anam Enye, “kpa Abasi, andikpon nkan ofuri nkpɔ, ndinyek oto ke ubiak ye iyip ediworo ke ndudu kiet-kiet, … onyuŋ ekere ete [Enye] okuwɔŋ ndot-ndot cup oro, nyuŋ nduɔ.” Edi kini akwa nnanenyin, Andiyaŋa ikifrɔke, edi amanam oyuŋ okure mbeŋe-idem [Esie] ɔnɔ nditɔ owo.”
Nte Ikpɔŋ-ikpɔŋ Eyen eke Ete, Jesus Christ ama enyene odudu akan mkpa, ubiak ye ndutuhɔ edi enye ikiduɔhɔ. Enye ama anam ediomi emi Enye akanamde ye Ete Esie, ke ndiam ntre, ayarade ido Christ kiet emi etimde eyom ke ererimbot emi nyin iduŋde—edu editiŋ akpanikɔ Enye ama anam akpanikɔ ɔnɔ Ete Esie, ɔnɔ nyin kiet kiet, onyuŋ ɔnɔ edisana uduot Esie.
Editiŋ Akpanikɔ
Jesus Christ edi uwutŋkpɔ nnyin. Ndidu uwem utiŋ akpanikɔ oyom nyin inam akpanikɔ inɔ Abasi, inɔ kiet eken, inyuŋ inam inɔ edisana uduot nyin Editiŋ akpanikɔ ɔfiɔrɔ oto akpa akwa mbet ndima Abasi. Koro afo amade Abasi, afo anam akpanikɔ ye Enye kpukpru ini. Afo ɔfiɔk ete ke eti ye idiɔk odu ndien ke ofuri akpanikɔ odu—Abasi edi akpanikɔ Editiŋ akpanikɔ ɔwɔrɔ ke nyin isuhɔkere nti ndaha nyin ndinem mbon efen esit mme ndiyom mbon efen enyime nyin. Afo “anam se ifɔnde” ndien ayak se “idiwɔrɔde etiene.” Mme ukpuhɔre emi enamde mmi-mmi ke Preach My Gospel nwed mme ɔkwɔrɔ ikɔabasi esine editiŋ akpanikɔ nte mbiet ido eke Christ
Ke ediwak isua ke edem, ema enɔ Elder Uchtdorf ubiɔŋ utom ndidi kpuhɔre ndaha ke stake nyin. Kini nyin isobode, enye ama obup mi mbume kiet emi Ami mmefreke “Ndi odu nkpɔ ndomokiet ke uwem fo, emi edieke edinamde mme owo efiɔk, ekeme ndida esuene nsɔk Ufɔk Abasi?” Idem ama akpa mi, ke usɔp Ami mma nkere mbaŋa ofuri uwem mi, nwana nditi mme ini oro emi Ami nkeduede nyuŋ mbup idem mi, edieke mbon efen edifiɔkde se Ami nkenamde, nso ke mmɔ edikere ibaŋa mi mme Ufɔk Abasi?
Kini oro, Ami nkekere nte ke Elder Uchtdorf oko obup abaŋa ndidot kpɔt, edi Ami mmedifiɔk nte ke mbume oro otim abaŋa editing akpanikɔ. Ndi Ami mmanam akpanikɔ mbaŋa se Ami mfiɔkde? Ndi ererimbot eyekut ete ke ikɔ inua mi ye edinam mi edi ukem? Ndi mbon efen eyekeme ndikut Abasi oto ke edinam mi?
President Spencer W. Kimball ama ekpep ete, “Editiŋ akpanikɔ” edi “ediyime ye ukeme nyin ndidu uwem ntiene se nyin inimde ke akpanikɔ ye se nyin ikibierede ndinam.”
Edinam Akpanikɔ ye Abasi
Ndidu uwem utiŋ akpanikɔ oyom nyin ke ata akpa ndinam akpanikɔ ye Abasi
Otɔŋɔde ke ata uyen nyin imaikpep ibaŋa mbuk Daniel ke obube ekpe. Daniel amasinam akpanikɔ ye Abasi kpukpru ini Mme efupe-ufup ufan esie ema “eyom ndikut ikɔ eke ekpedoride [enye]” ndien mmɔ enam obufa ewuhɔ emi anamde kpukpru owo ebɔŋ akan enɔ abasi mmɔ kpɔt. Daniel ama ɔfiɔk abaŋa ewuhɔ emi edi ɔnyɔŋ ufɔk ndien— “eberere window ubet esie”—ɔtɔŋɔ erɔŋ onyuŋ ɔbɔŋ akam utim ikata ɔnɔ Abasi Isreal Nte ibɔrɔ, ema etop Daniel esin ke obube ekpe. Ke usenubɔk, edidem amaokut ete ke Abasi Daniel ama afak enye ndien enye ama ɔnɔ obufa ewuhɔ ete kpukpru owo “ebak enyuŋ efehe Abasi Daniel: koro edi enye edi oduwem Abasi.”
Edidem ama edifiɔk Abasi oto ke edinam akpanikɔ eke Daniel. Mbon efen eyekut Abasi eto ke ikɔ inua ye edinam nyin. Ukem nte Daniel, ndinam akpanikɔ ye Abasi enye diangare nyin ɔkpɔŋ ererimbot
Andinyaŋa ama eti nyin ete, “Mbufo eyekut ukut ke ererimbot: edi esɔŋ esit; Ami nkakan ererimbot.” President Russell M. Nelson ama ekpep ete “[ndikan ererimbot] ɔwɔrɔ ndikan idomo ndikere mbaŋa mme ŋkpɔ ererimbot nkan nte ekerede abaŋa mme ŋkpɔ Abasi. Ɔwɔrɔ ndidori-enyin ke ukpep-ŋkpɔ Christ nkan mme ukpep-ŋkpɔ owo.” Ke ukem oro, ana nyin ikan idomo ndisaŋa “ke usuŋ idem [nyin], ye ke usuŋ mbiet abasi nyin, emi mbiet esie etiede nte eke ererimbot .”
Nduri ubiɔŋɔ ererimbot emi edi akpan ubak ke uduak eriyaŋa Abasi Nte nyin ibɔrɔde nduri emi edi ata ntak abaŋa owo emi nyin idide— ndidomo ndaha nyin kabaŋa editiŋ akpanikɔ Nduri ererimbot ekeme ndidi ata nnen-nnen nte ndibiat edinam-akpanikɔ ke ndɔ mme ke nkari-nkari usuŋ nte ndiwed etop unana-enyin emi abiatde ukpepnkpɔ mme edu ubononkpɔ ufɔk Abasi. Ndinam akpanikɔ ke mbumek nyin edi ndiwut anwa-anwa ubiere esit nyin nditiene Andiyaŋa Jesus Christ.
Ndinam Akpanikɔ ye Mbon Efen
Kpa nte editiŋ akpanikɔ ɔfiɔrɔde oto akpa akwa mbet ndima Abasi, ndinam akpanikɔ ye kiet eken ofiɔrɔ oto udiana akwa mbet, ndima mbɔhɔiduŋ nyin nte idem nyin. Ndidu uwem editiŋ akpanikɔ idighe ndidu nsana-mma uwem; enye edi ndidu uwem ediwana ukeme kpukpru usen ndinam akpanikɔ ke akpa ye Abasi ndien ke ukem ndaha oro nyin inam akpanikɔ ye kiet eken. President Oaks ama eti nyin ete , “Udɔŋ nyin ndinim ɔyɔhɔ mbet iba inaga anam nyin ifre akpa mbet.”
Ererimbot ke akakaiso ndiwana ye editiŋ akpanikɔ ke nditim mbono mme mbet edu uwem emi akarade ebuana ke ufɔt mbon owo ye mme nka-obio Nte emi ɔfɔnde, mbet emi ke ofuri-ofuri isikɔŋɔke ke ofuri akpanikɔ ndien mmɔ esikpuhɔre etiene nte ido-obio enyimede mmɔ. Ukem nte mbume emi Elder Uchtdorf ekebupde, ndusuk ufɔk utom ekpep mbon utom mmɔ ndikere se ubiere mmɔ edibietde edieke esinde enye ke oruk-ofim mme emiŋde enye esin ke akpa ikpanwed eke akwa nwed nkpɔntibe. Nte Ufɔk Abasi ɔwɔrɔde ke edidibe ye ke ekim, nyin mbon Ufɔk Abasi, ukem nte Daniel, ana idaha ikpon ikan idoroenyin ererimbot inyuŋ ikabare idi iso oduwem ye etiŋ akpanikɔ Abasi ke kpukpru ini ye ke kpukpru ebiet.
Nditiŋ nte ke nyin idi mme anam akpanikɔ ikemke edieke edinam nyin misaŋake ikikem ye ikɔ inua nyin. Kpa ntre, owo idaha mfon-ido nte anditiene Christ ikpuhɔre ye editiŋ akpanikɔ Nte mbon ediomo, ye nte mme adaibuot ke Ufɔk Abasi Esie, ana nyin ikan esuene inyuŋ inim mme ndaha emi Obɔŋ enimde.
Ndinam akpanikɔ obop mbuotidem ye iberedem onyuŋ ɔnɔ mbon efen ɔsɔŋɔ ete ke nyin iyom ndinam uduak Obɔŋ ikpɔŋ-ikpɔŋ. Ke mme esop nyin, nyin isin esen odudu inyuŋ itiene usuŋ emi Jehovah ayarade iyom ifiɔk ito nwan ye eren kiet kiet inyuŋ inam itiene eti ifiɔk emi nyin ibɔde.
Nyin iwuk enyin ise Andiyaŋa, ndien nyin itre mme edinam emi ekemede ndiwut ke nyin iyom ufɔn idem nyin, ufɔn ufɔkemana nyin, mme ndinam ɔfɔn ye owo kiet ke itie ntak-urua mbon efen. Nyin itre ndinam nkpɔ ndomokiet emi owutde ete ke nyin inam edinam oro iyom ukpono owo, man etoro nyin, inyene ediwak owo emi emade se nyin inamde, etiene etiŋ se nyin itiŋde, mme edisuan etop utom nyin.
Ndinam Akpanikɔ Nnɔ Edisana Uduot Nnyin.
Nte akpatre, ndidu uwem utiŋ akpanikɔ oyom nyin inam akpanikɔ inɔ edisana uduot nyin.
Nyin imɔfiɔk ndusuk mbon emi mikinamke emi. Kiet emi esinede akwa uwutnkpɔ edi Korihor andibiɔŋɔ Christ, emi akada esit ediwak owo efep, esemede ɔnɔ “ekikere obukidem” mmɔ. Edi, ke akpatre ini ke uwem esie, enye ema enyime ete, “Ami nkesuk mfɔfiɔk ke Abasi mmɔdo.” President Henry B. Eyring ama ekpep ete ke ndisu-nsu “isaŋake ukem ye uduot spirit nnyin,” edisana uduot nyin. Korihor ama abianga idem esie, ndien akpanikɔ ikiduhe enye ke idem.
Ke ukpuhɔde, Prophet Joseph Smith ke uko ama etiŋ ete, “Ami mmafiɔk enye, ndien Ami mmafiɔk nte ke Abasi ɔfiɔk, ndien Ami nkemeke ndikaŋ enye”
Jehovah ama ama Hyrum enyeneka Joseph ke “ntak editiŋ akpanikɔ eke esit esie” Enye ye Joseph Smith ema enam akpanikɔ tutu esim utit—enam akpanikɔ enɔ edisana uduot mmɔ, unwana ye ifɔk emi mmɔ ekebɔde, enam akpanikɔ eno utɔ owo emi mmɔ efiɔkde ke mmimɔ imikeme ndidi.
Akpatre
Yak nyin inam emem ke idem nyin “inɔ uduak Abasi” inyung ikɔri mbiet ido Christ nditiŋ akpanikɔ. Yak nyin itiene Andiwut nyin, Andiyaŋa ererimbot, ikuyuŋ ifurɔ edi yak idu uwem edinam Akpanikɔ ye Abasi, ye kiet eken, ye edisana uduot nyin.
Nte Job eketiŋde, “Yak edomo mi ke udomo-nkpɔ eke enede, man Abasi ɔnyuŋ ɔfiɔk ido akpanikɔ mi.” Ke edisana enyiŋ Jesus Christ, amen.