Mme Utibe-ŋkpɔ, mme Angel, ye Odudu Itie-oku
Edieke mbufo eyomde edidiɔŋ itie-oku, esinede mme utibe-ŋkpɔ ye ukpep eke mme angel, ami nkot esaŋa ke usuŋ ediomi emi Abasi ɔnɔde.
Ediwak mfin emi edɔhɔ ete ke utibe ŋkpɔ iduhe aba, ke mme angel edi abiaŋa, nko ke ema eberi mme heaven. Ami metie ntiense nte ke utibe-ŋkpɔ itreke, ke mme angel mɔdo ke otu nnyin, ndien ke mme heaven ke akpanikɔ ana inwaŋ.
Ke ini Andinyaŋa nnyin, Jesus Christ, okodude ke isɔŋ, Enya ama ɔnɔ ada ibuot Apostle Esie, Peter ukpɔhɔde itie-oku. Otode ke mme ukpɔhɔde emi, Peter ye mme Apostle eken ema eda usuŋ ke Ufɔk Abasi Andinyaŋa. Edi ke ini mme Apostle ema ekekpaŋa, ema emen mme ukpɔhɔde itie-oku ekpɔŋ isɔŋ.
Ami nnɔ ikɔ ntiense nte ke ema efiak eda ukpɔhɔde itie-oku edi. Peter, James, ye John ye mme prophet eset ema edi nte mbon emi ekesetde edinɔ Prophet Joseph Smith ŋkpɔ Jehovah okotde mme ukpɔhɔde obio ubɔŋ, ye mme ini ikɔ Abasi.”
Mme ukem ukpɔhɔde oro ebe oto ke prophet esim prophet tutu mfin. Mme iren owo 15 emi nnyin imenede ubɔk inɔ nte mme prophet, mme asiak uduak, ye mme andiyarare ekama mmɔ eda usuŋ ke Ufɔk Abasi Andinyaŋa. Kpa nte ekedide ke ini eset, okodu akamba Apostle kiet emi akamade onyuŋ enyenede unen ndinam ŋkpɔ ke ofuri ukpɔhɔde. Enye edi President Russell M. Nelson, prophet ye President mfiak men ndi Ufok Abasi Jesus Christ Mme Ndisana Owo ke Ukperedem Usen.
Otode ke Ufɔk Abasi Andinyaŋa, nnyin imibɔ mme edidiɔŋ eke itie-oku—esinede odudu Abasi ke ndinwam nnyin ke uwem nnyin. Ke idak enyene unen ukpɔhɔde itie oku, nnyin inam mme ndisana ediomi ye Abasi inyuŋ ibɔ mme ndisana edinam emi otimde nnyn idem ndiduŋ ke iso Esie. Ɔtɔŋɔde ke uduɔk mmɔŋ ye udori ubɔk, ndien ke temple, nnyin ibe ika ke usuŋ ediomi emi adade nnyin afiak ɔsɔk Enye.
Ye ubɔk edoride ke ibuot nnyin, nnyin nko ibɔ mme edidiɔŋ itie-oku, esinede ndausuŋ, ndɔŋesit, item, edikɔk, ye odudu ke nditiene Jesus Christ. Ke ofuri eyo uwem mi ediɔŋ mi ye odudu emi. Nte ekeyarare ke ŋwed Abasi, nnyn ikoot enye ite odudu edisana Itie-oku Melchizedek.
Ke ini uyen mi ami mma nyene akamba ukpono nnɔ odudu emi, akpan akpan nte enye okowutde idem ke mme edidiɔŋ itie-oku. Ke ini nkenamde utom nte ekpri missionary ke Chile, ema emum owo nsaŋa mi ye ami enyuŋ ebahare. Owo ikitiŋke ntak inɔ nnyin. Ekedi ini akamba mfina mbre ukara. Military police ema emen tɔsin mbon owo ekedɔŋ ke ufɔk ndien owo ikikopkenkpɔ ibaŋa mmɔ aba.
Ke ema eke ekure nduŋɔre, ami nketie ikpɔŋ ke ufɔk mkpɔkɔbi, ke mikifiɔke mme ami nyefiak nkut mbon ima mi aba. Ami mbine Ete eke Heaven mi, ke ɔkpɔsɔŋ mkpeubɔk: “Ete kpukpru ini esikpep mi ete ke Afo ke ese abaŋa mme missionary Fo. Mbɔk, Ete, ami ndihe asaŋa saŋa ndomokiet, edi ami mmesuhɔhɔre idem ndien meyom unwam Fo ke okoneyo emi.”
Ema etɔ mme mkpasip unwam esie ke ediwak isua ke edem. Ke nduɔkde mmɔŋ mma, ema esɔŋɔ itie mi nte owo Ufɔk Abasi enyuŋ enɔ enɔ eke Edisana Spirit. Nte ami nkebɔŋde akam, ke ŋkpɔkɔbi, Edisana Spirit edi ke usɔp ebine mi onyuŋ ɔdɔŋ mi esit. Enye ama emen esin ke esit mi asaŋa asaŋa udim ikɔ eke edidiɔŋ patriarch mi, emi edide edidiɔŋ itie-oku efen. Ke enye, Abasi ɔnwɔŋɔ ɔnɔ mi ete otode ke mbuɔtidem fo ke ami nye enyene unen ndidian ke temple ke ini ye ofuri nsi nsi ye ŋwan emi ɔyɔhɔde ye uyai ye eti ido ye ima, ke nnyin iyedi ete ye eka nti nditɔ iren ye iban, ke eyediɔŋ enyuŋ enam mi mkpon nte ete ke Israel.
Mme enyene udɔŋ ikɔ oro kabaŋa ini iso mi ɔyɔhɔ ukpɔŋ mi ye emem. Ami mma mfiɔk nte ke mmɔ eto edima Ete eke Heaven mi, emi esinimde enwɔŋɔ Esie kpukpru ini. Ke ini oro, ami mma nyene ɔsɔŋɔ ke eyesio mi ke nyedu nnyuŋ nkut mme ediomi oro nte ɔwɔrɔre osu.
Ke ŋkpɔ nte isua kiet emi ekebede, Ete ke Heaven ama ɔdiɔŋ mi ye ŋwan emi ɔyɔhɔde ye uyai ye eti ido ye ima. Lynette ye ami ima idiana ke temple. Ediɔŋ nnyin ye nti nditɔ iren ita ye nditɔ iban inaŋ. Ami ndi ete, kpukpru kpa nte Abasi ɔkɔ ɔnwɔŋɔde ke edidiɔŋ patriarch ami nkebɔde ke ini ndide isua 17.
“Ke ntre, ndima nditɔ eka mi iren owo [ye iban], nte utibe ŋkpɔ etre ke ntak emi Christ ama ɔkɔdɔk ke enyɔŋ?
“… Idihe ntre, idighe nte mme angel etre ndiwam nditɔ owo.”
Ami metie ntiense nte ke utibe ŋkpɔ ye unwam eke angel ke aka iso nditibe ke mme uwem nnyin, ɔŋsɔp nte nenen ibɔrɔ eke odudu itie oku. Ndusuk mme edidiɔŋ itie-oku ɔwɔrɔ osu ke ndo ndo oro, ke mme usuŋ nnyin ikemede ndikut nnyuŋ mfiɔk. Ndusuk ɔwɔrɔ osu suŋ suŋ ndien owo ikemeke ndinehede mfiɔk ke uwem emi. Edi Abasi anam kpukpru mme enwɔŋɔ Esie, kpukpru ini, nte enamde ewut ke mbuk emi ke mbuk ufɔk emana nnyin.
Ete ete mi, Grant Reese Bowen, ekedi owo akwa mbuɔtidem. Ami menehede nti nte nkopde enye etiŋde nte enye ɔkɔbɔde edidiɔŋ patriarch esie. Ke ŋwed esie, enye ewet: “patriarch ama ɔnwɔŋɔ ɔnɔ mi enɔ edikɔk. Enye ɔkɔdɔhɔ ette: ‘Owo udɔŋɔ eyebɔ edikɔk. Iŋ, akpa mkpa eyeset otode ke ubɔk fo.’”
Ke mme isua ke iso, Etebom eke-kwat unwɔŋ ke ini enye ɔbɔde ntuk ete ɔnyɔŋ ufɔk. Enye ekesobo ye ete esie edide ebine enye. “Grant, eka fo osuk akpa idaha emi,” ete esie ɔkɔdɔhɔ.
Ami mfiak ntiŋ nto ŋwed Ete ete mi: “Ami nkitreke edi mma nsɔsɔp nduk ke ufɔk ndien ke ŋkpɔ itie iso ke ekenim enye ke ekpri ufɔk. Ami mma nse enye mfiɔk idiɔŋɔ uwem iduhe ke idem esie. Ami nti edidiɔŋ patriarch mi ye enwɔŋɔ ke edieke nyenede mbuɔtidem, otode ke mbuɔtidem mi ke owo udɔŋɔ eyebɔ edikɔk, ndien ke akpa mkpa eyeset. Ami mma ndori ubɔk mi ke ibuot esie, ndien ntiŋ nnɔ Ɔbɔŋ nte edieke enwɔŋɔ emi enye eke ɔnwɔŋɔde ɔnɔ mi otode ke patriarch edi akpanikɔ, yak anam enye ɔwɔrɔ osu ke ini emi onyuŋ anam eka mi eset edi uwem. Ami mma nwɔŋɔ nnɔŋ Enye edieke Enye edinamde emi, ke ami nditreke ndinam ke ofuri odudu mi ke ndibɔp obio ubɔŋ Esie. Nte ami nkebɔŋde akam, enye ama atad enyin esie onyuŋ ɔdɔhɔ ete, ‘Grant dibide mi ke enyɔŋ. Ami nkodu ke obio spirit, edi afo okoot mi mfiak ndi. Yak emi edi ikɔ ntiense ɔnɔ fi ye kpukpru ufɔŋk emana mi.
President Russell M. Nelson ekekpeb ete iyom inyuŋ inyene idorenyin ibaŋa utibe ŋkpɔ. Ami ndi ntiense nte ke ntak ekefiakde emen itie-oku edi, odudu ye unen Abasi mɔdo ke isɔŋ. Otode ke mme ikoot ye esop, iren owo ye iban, mkpri ye ikpɔ, ekeme ndibuana ke utom itie-oku. Enye edi utom utibe ŋkpɔ, emi mme angel enamde. Enye edi utom eke heaven, ndien enye ɔdiɔŋ kpukpru nditɔ Abasi.
Ke 1989, ufɔkemana nnyin edide owo Itiba ikinyɔŋ isaŋ eke ward. Eyo ama ɔsɔŋ . Lynette akana nte aman ɔyɔhɔ eyen itiokiet nnyin. Enye okop akamba ntuk ete esin uruk ŋkpɔ-itie esie, emi enye ama ekefre ndinam. Ke ekpri ini nnyin isim inuk ke usuŋ, moto ebe udim oduk ke ubɔk nnyin. Akade ke ŋkpɔ nte itiat Ata-ye-duop (112 km) ke awa, ami mfep man ntre editɔ moto emi ekedide kiso. Moto nnyin ama-ewere, ɔwɔrɔ ɔkpɔŋ usuŋ, onyuŋ ɔwɔrɔ ke usuŋ ke akpatre ekperede ebiet utre isaŋ, ɔduɔde ke nkaŋ emi owo esinede oduk mbat.
Ŋkpɔ efen ntide ekedi ndikop uyo Lynette: “Shyane, ana nte nnyin iwɔrɔ ke usuŋ fo.” Ami nkodu ke ofim otode ke uruk ŋkpɔ-itie mi. Ama ada mme second ndifiɔk se mkpenamde. Nnyin itɔŋɔ ndidibede nditɔ kiet kiet nsio ke moto ke window mi, emi idaha emi ekedide enyɔŋ eke moto oro. Mmɔ eketuaŋa, ekere se ikitibede.
Ibighike nnyin ifiɔk ite ke enyen anwan isua duop nnyin, Emily ama osop. Nnyin ikoot enyiŋ esie, edi ibɔrɔ ikeduhe. Mbon ward eken ekesaŋade ye nnyin ke usuŋ ema eyom enye ata eti eti. Eyo ama enehede okim. Mfiak nse ke esit moto ye ikaŋ ndien, ke ndik nkut ekpri idem Emily nte odude ke idak moto. Ami nkoot ke nyeŋidem, “Ana nte nnyin idibede moto isio ke idem Emily.” Ami nduri enyɔŋ nyuŋ nduri nka edem. Okodu ndusuk owo etienede emenere, edi moto ke utibe ɔwɔŋɔre ana ke wheel esie, owutde anana uwem idem Emily.
Emily ikinwekke-iŋwek. Iso esie ekedi nkem purple. Ami ndɔhɔ ke ana nte inɔ enye edidiɔŋ. Edima ufan ye owo ward ɔtɔŋɔ edɔŋ ye ami, ye ke unen Itie-oku Melchizedek, ke enyiŋ esus Christ, nnyin ikoot enye ite odu uwem. Ke ini oro, Emily ediŋwek anyan iŋwek.
Ke ŋkpɔ eketiede nte awa, moto ufɔkibɔk edisim. Ema emen Emily esɔp eka ke ufɔkibɔk. Enye ama enyene obufut emi abiarade ye akamba unan ke edɔŋ esie. Mbiara eke mfre ekedi se ekerede ke ntak ini emi enye okodude ke oxygen mikiduhe. Emily okodu ke unana edifiɔk idem ke usen kiet ye ubak. Nnyin ika iso ndibɔŋ akam inyung itre-udia inɔ enye. Ema ediɔŋ enye ye ɔyɔhɔ edikɔk. Mfin emi, Emily ye ebe esie, Kevin edi ete ye eka nditɔ iban itiokiet.
Ke utibe-usuŋ, kpukpru mbon eken ema ekeme ndisaŋa mbe. Enyen emi Lynette akakamade ekedi Tyson. Enye nko ikinyeneke mfina ndien akemana ke February eke adianade. Ke ɔfiɔŋ itiatita ebede, ke ini emi enye ama ɔkɔbɔ ikpɔk idem isɔŋ esie, Tyson ama afiak ɔnyɔŋ ufɔk ebine Ete ke Heaven. Enye edi angel ukpeme eyen eren nnyin. Nnyin imikop uteŋe esie ke ufɔk emana nnyin ndien idot enyin ndidu ye Enye inikiet efen.
Mbon oro ekemenere moto ekpɔŋ Emily ema ekut ke moto ikidobike. Ami mma mfiɔk ke mme angel eke heaven ema edian ubɔk ke ndidibede moto mkpɔŋ idem Emily. Ami mma mfiɔk nko ke Emily akefiak odu uwem oto ke odudu edisana itie oku.
Jehovah akayarade akpanikɔ emi ɔnɔ mme isuŋutom Esie: “ami nyeka ke iso mbufo. Ami nyedu ke ubɔk nnasia ye ubɔk ufien mbufo, ndien Spirit mi eyedu ke esit mbufo, ndien mme angels mi ekanare mbufo ekuk, ndikpeme mbufo.”
Ami metie ntiense nte ke “Edisana Itie-oku, ke ndaha eke eyen Abasi”—Itie OkuMelchizedek —ye ukpɔhɔde, unen ye odudu ke ema efiak emen edi ke isɔŋ ke mme, akpatre usen emi. Ami mɔfiɔk ntak kpukpru ndaha midihe nte nnyin ikerede mme ibɔŋde akam iyom, utibede ŋkpɔ Abasi eyesuk edi otode ke uduak Esie, ini Esie, ye ediomi esie kabaŋade nnyin.
Edieke mbufo eyomde edidiɔŋ itie-oku, esinede mme utibe-ŋkpɔ ye ukpep eke mme angel, ami nkot mbufo nte esaŋa ke usuŋ ediomi emi Abasi ɔnɔde nnyin kiet kiet. Mbon Ufɔk Abasi ye mme adausuŋ emi emade mbufo eyenwam mbufo ke ndida ke ndaha efen.
Ami metie ntiense ke Jesus Christ, Eyen Abasi, odu uwem onyuŋ ada usuŋ ke Ufɔk Abasi Esie otode ke mme oduwem prophet emi ekamade enyuŋ enam ŋkpɔ ke ukpɔhɔde itie-oku. Edisana Spirit edi akpanikɔ. Andinyaŋa ɔkɔnɔ uwem Esie man ɔkɔk nnyin, afiak enyene nnyin, onyuŋ emen nnyin osim ufɔk.
Ami metie ntiense nte ke utibe-ŋkpɔ itreke, ke mme angel mɔdo ke otu nnyin, ndien ke mme heaven ke akpanikɔ ana inwaŋ. Ndien, didie ke mmɔ enade inwaŋ! Ke enyiŋ Jesus Chrst, amen.