Bɔŋ Akam, Enye Mmɔdo
Ami nkoot mbufo ndibɔŋ man ediɔŋɔke Ete eke Heaven mmɔdo, ebɔŋ akam man ekɔriekabare etie nte Enye, ndien ebɔŋ akam ndida ima Esienwut mbon efen.
Nditɔ eka iren ye iban, Ami mmokop idaresit nte Ami mbɔrɔde ntuk nditiŋ ikɔ nnɔ mkpri nditɔ!
Mkpri nditɔ irenowo ye mkpri nditɔ iban, ebiet ekededi emi afo odude ke ererimbot, Ami nyom ndibuana nkpɔ ye mbufo.
Ete nnyin ke Heaven amama mbufo. Afo edi eyen Esie. Enye ɔfiɔk fi. Enye oyom ndidiɔng fi. Ami mmɔbɔŋ akam ke ofuri esit mi nte yak afo okop ima Esie.
Ndi afo omoyom ndibɔ enɔ? Ami nyom ndineme ye mbufo mbaŋa ata asaŋa-asaŋa enɔ kiet emi Ete eke Heaven ɔnɔde mbufo man anwam mbufo. Enye edi enɔ ubɔŋ akam. Nso edidiɔŋ ke akam edi ɔnɔ nyin! Nyin imikeme ndineme nneme ye Ete eke Heaven ke ini ekededi ye ke ebiet ekededi.
Ini emi Jesus okodude ke ererimbot, Enye ama ekpep nyin nte ebɔŋde akam. Enye ama ɔdɔhɔ ete, “Ebup, ke eyenɔ mbufo.”
Nso enɔ ke afo ekeme ndibɔŋ akam nyom? Mmɔ ewak, edi mfin Ami nyom nditiŋ mbaŋa utɔ ita
-
Bɔŋ akam man ɔfiɔk.
-
Bɔŋ akam man ɔkɔri.
-
Bɔŋ akam man owut.
Yak itiŋ ibaŋa mmɔ kiet kiet.
Akpa, Bɔŋ Akam man Ɔfiɔk
Nso ke ana nte afo ɔfiɔk?
Enyene ikwɔ abaŋade akam emi nditɔ primary ke ofuri ererimbot esikwɔde. Enye ɔtɔŋɔ ye mbume. Ndi afo ɔmɔfiɔk ikwɔ emi? Edieke Ami mkpetimde nyene uko, Ami mkpekwɔ enye nnɔ mbufo.
“Ete Heaven, ndi afo mmɔdo ke akpanikɔ? Ndi afo omokop onyuŋ ɔbɔrɔ akam kpukpru eyenɔwɔŋ?”
Didie ke afo ekeme ndifiɔk ke Ete Heaven mmɔdo ke akpanikɔ, okposukedi afo mukemeke ndikut Enye.
President Russell M. Nelson okot mbufo ete “enwaŋade esit mbufo enɔ Ete Heaven mbufo. … Ndien ekpaŋ utɔŋ.” Kpaŋ utɔŋ enɔ se mbufo okopde ke esit mbufo ye mme ekikere emi edide ke ibuot mbufo.
Ete eke Heaven enyene ediye ikpɔkidem eke obuk ye ɔkpɔ ndien Enye edi ete spirit fo Sia Ete eke Heaven enyenede kpukpru odudu onyung ɔfiɔkde kpukpru nkpɔ, Enye ekeme ndikut kpukpru nditɔ Esie ndien Enye ekeme ndikop nyung kpukpru akam. Afo emekeme ndidi fiɔk nnɔ idem fo ete ke Enye mmɔdo ndien ke Enye ama fi.
Kini afo ɔfiɔkde ete ke Ete Heaven odu ke akpanikɔ ndien ke Enye ama fi, afo emekeme ndidu uwem ke uko ye idoroenyin. “Bɔŋ akam, enye mmɔdo; ting, enye kekpang utɔng ”
Ndi afo amesikere ke odu ikpɔŋ? Usen kiet kini eyeyen nyin Ashly ekedide enyen isua itiokiet, Enye ekedi nkukure owo emi mikiyeneke ufan ndida mbre mbre ke anwa mbre ufɔkŋwed. Nte enye adade do, osuk ekere ke imɔ idighe nkpɔ ndien ke owo ikwe imɔ, ekikere kiet ama oduk esit esie: “Bet ise! Ami nduhe ikpɔŋ! Ami meyene Christ! Ashly ama ɔtɔŋɔ erɔŋ ke ufɔt anwa mbre, ofot ubɔk esie, ndien ɔbɔŋ akam eno Ete ke Enyoŋ. Kini enye atatde enyin, ekpri enyen emi edide ukem isua ye enye ama ada do ke obup enye mme enye oyom ndibre mbre. Ashly ama edifiɔk ete, “Nnyin idi akpan nkpɔ inɔ Abasi, ndien ke nyin iduhe ikpɔŋ ke akpanikɔ.”
Ndusuk ini afo emekeme ndiyom ndifiɔk ntak emi ɔkpɔsɔŋ nkpɔ etibide ke uwem fo mme ntak emi afo mubɔhɔ edidiɔŋ emi afo ɔkɔbɔŋde akam oyom. Ediwak ini ata eti mbume emi ikpibupde Ete eke Heaven idige nso ntak edi nso itibe.
Ndi afo emeti ini emei ye mbon ufɔkemana esie eke ekopde biɔŋ kini mmɔ ekesaŋade ke wilderness? Kini Nephi ye nditoete esie eke ekade ndiyom udia, Nephi ama obuŋ utigha esie. Edi enye ikibupke ntak.
Nephi ama anam obufa utigha ndien obup ete esie, Lehi, ebiet emi imɔ ikemede ndika man ida udia idi.7 Lehi ama ɔbɔŋ akam, ndien Ɔbɔŋ ama owut mmɔ ebiet emi Nephi ekemede ndika. Ete eke Heaven eyeda fi usuŋ kini afo obupde Enye se afo ekpenamde ye se afo ekpekpepde.
Udiana, Bɔŋ akam man Ɔkɔri
Ete eke Heaven oyom ndiwam fi ɔkɔri! Enye ama nnyin eti-eti ndien Enye ɔnɔ Eyen Esie, Jesus Christ, edi man ediwut nnyin usuŋ ididude uwem. Jesus ama ɔbɔ ufen, akpa, onyuŋ eset ke mkpa man ekeme ndifen mme idiɔknkpɔ nyin ndien ikɔri ndikabare ntie nte Enye.
Ndi afo omoyom ndikɔri ke ime ye ke editiŋ akpanikɔ? Ndi afo omoyom ndikɔri ke ifiɔk? Ekeme ndidi afo edi owo but ndien afo oyom ndikɔri ke uko. “Bɔŋ akam, enye mmɔdo”! otode ke Spirit Esie, esit fo ekeme ndikpuhɔre, ndien afo emekeme ndibɔ odudu.
Obufa ufan mi Jonah ama ewet ete, “Ami masikop ndik ke usuŋ nsaŋade nka ufɔk nwed ke usenubɔk. Ami masikere mbaŋa ndisim ufɔk nwed ke idiɔk ini, ndifre nkpɔ, ndiwet udomo. Kini Ami ndide enyen isua duop, Ami mmatɔŋɔ ndibɔŋ akam nte ami ŋwatde ye eka mi nka ufɔkŋwed. Ami mmabeŋe unwam emi Ami nyomde, nyuŋ mbɔŋ akam mbaŋa ufɔkemana mi nko. Ami nyuŋ nkere mbaŋa mme nkpɔ emi Ami nnɔde ekɔm mbaŋa. [Ndibɔŋ akam nnɔ Ete ke Enyɔŋ] anwam mi. Ndusuk ini Ami nsikopke ubɔhɔ kini nsuk nwɔrɔde ke moto, edi kini Ami ndude ke ubet ukpepŋkpɔ, Ami nkop emem.”
Mbuɔtidem Jonah ke ɔkɔri nte enye ɔbɔngde akam kpukpru usen onyung asanga ika iso.
Ɔyɔhɔ Ita, Bɔŋ akam man Owut
Afo emekeme ndibɔŋ akam nyom unwam ndida ima Ete ke Enyɔŋ nwut mbon efen. Otode ke Spirit Esie, Ete ke Enyɔŋ enye wam fi ndikut owo emi odude ke mfuhɔ man afo ekpekeme ndidɔŋ mmɔ esit. Enye ekeme ndiwam fi ndiwut ima Esie ke ndife nnɔ owo. Enye ekeme ndinɔ fi uko ndinam nkpɔ nnɔ owo nyuŋ mbuana ye mmɔ nte ke mmɔ edi nditɔ Abasi. Ukeme fo ekeme ndiwam mbon efen ndidifiɔk nyuŋ mma Jesus ye Ete ke Enyɔŋ nte afo anamde.
Ke ofuri uwem mi Ami mma mbɔŋ akam nte yak ete mi edi owo Ufok Abasi Jesus Christ eke Latter-day Saints. Kpa nte nkedide ekpri eyenanwan, ami mma mfiɔk ediwak edidiɔŋ emi enye ɔkpɔbɔde. Ufɔkemana nyin ekpebɔ edidiɔŋ edidian kiet ke nsinsi. Ufɔkemana mi, mme ufan mi, ye ufan mi imaisibɔŋ akam kpukpru ini inɔ enye, edi enye ikiduke ufɔk Abasi. Ete ke Enyɔŋ inyikke owo ndomokiet ete anam mbumek. Enye ekeme ndinɔ ibɔrɔ akam nyin esɔk nyin ke mme usuŋ efen.
Kini Ami nkponde nkem, Ami mmabɔ edidiɔng eke patriarch mi. Ke edidiɔŋ oro, patriarch ama ɔdɔhɔ mi ete ke mfɔn nkan nkpɔ emi Ami nkemede ndinam ndiwam ufɔkemana mi ndidu ɔtɔkiet ke enyɔŋ edi ndidi uwutŋkpɔ mbaŋa ikɔabasi Jesus Christ. Se Ami nkemede ndinam edi oro!
Ete mi ama odu uwem esim isua Anaŋ-ye-itiokiet. Ke usen ition ebede ke enye akpade, Ami mma-ŋkop ekikere edisana idara. Ete ke Enyɔŋ otode ke Spirit Esie ama anam mi mfiɔk nte ke ete mi oyom ndibɔ edidiɔŋ eke ikɔabasi Jesus Christ. Ami ndifreke usen oro Ami ye nditɔ-eka mi itɔŋɔde-edɔŋ ke altar temple man edian nnyin enɔ ete ye eka mi. Ami nketɔŋɔ ndibɔŋ akam nyom edidiɔŋ emi tɔŋɔ kini emi Ami ndude ke primary, ndien Ami nkebɔ enye kini Ami ndide eka-eka.
Ndusuk afo ɔbɔŋ akam oyom edidiɔŋ ɔnɔ ufɔkemana fo ye mbon efen emi afo amade. Ku ukpa mba! Ete ke Heaven eye wut fi se afo ekemede ndinam.
Buana ye Ete eke Heaven se idude fi ke esit . Nte afo ebeŋede uŋwam Esie ke ofuri esit, afo eyebɔ Spirit Esie ndida fi usuŋ. Ndibɔŋ akam kpukpru usen eyeyɔhɔ fi ye ima ɔnɔ Ete eke Heaven ye Jesus Christ. Emi eyeŋwam fi nditiene Mmɔ ke ofuri eyo uwem fo.
Kere baŋa se ikemede nditibe edieke kpukpru mkpri nditɔ ke Africa, South America, Asia, Europe, North America, ye Australia ebɔŋde akam kpukpru usen. Ekpediɔŋ ofuri ererimbot ye ekese ima Abasi!
Ami nkoot mbufo ndibɔŋ man ediɔŋɔ ke Ete eke Heaven mmɔdo, ebɔŋ akam man ekɔri ekabare etie nte Enye, ndien ebɔŋ akam ndida ima Esie nwut mbon efen. Ami mmediɔŋɔ ke Enye odu-uwem onyuŋ ama fi. “Bɔŋ akam, enye mmɔdo.” Ke edisana enyiŋ Jesus Christ, amen.