Ikɔ Enyene Odudu
Iko ono ndausung. Mmo eno ekikere nnyin uyo, ntutuk, ye ifiok nnyin, ke eti mme idiok.
Ndito eka iren, ndito eka iban, ye mme ufan ke ofuri ererimbot, edi nkpo ukpono ono mi nditing iko nno akwa otuowo emi, ediwak edide ikot Ufok-Abasi nnyin ye ediwak edide mme ufan ye mbufa owo ekpangde utong eno usuanetop mboho emi. Emedi!
Mme etop edibuanade ke enyɔŋ-mbot emi editiŋ ke ikɔ. Enɔ mmɔ ke Ikɔ-Mbakara enyuŋ ekabade esin ke ediwak nsio-nsio usem ekperede Ikie. Kpukpru ini ntɔŋɔ edi ukem. Mme Ikɔ. Ndien iko enyene odudu ata etieti. Yak mi mfiak nting ini kiet efen. Iko enyene odudu!
Mmo edi itiat-idak-isong emi owutde nte iyirede; mmo eda eno edu-ukpono , edu-uwem , ye edinam nnyin. Ndusuk ini nnyin itiŋ ikɔ; ini efen nnyin ikpaŋutɔŋ. Iko ono ndausung. Mmo eno ekikere nnyin uyo, ntutuk, ye ifiok nnyin, ke eti mme idiok.
Ke ndiok-iso, iko ekeme ndidi idiok, ososop, onyung ayat-esit. Ima iteting, nnyin ikemeke ndikot mmo mfiak. Mmo ekeme ndino-unan, emia, esibe enim ke isong, enyung ekeme ndinam owo akanam edinam afai. Mmo ekeme ndidi mbiomo ono nnyin.
Ke ubok enye eken, iko ekeme ndidara ntim-nnam, ono idorenyin, onyung ono uko. Mmo ekeme ndinam nnyin ifiak-ikere, ifak-itongo, onyung enehede usung nnyin. Iko ekeme nditat esit nnyin eno akpaniko.
ntak edi oro, akpa ye ada-iso, iko Obong Jesus ofonde.
Ke Eto Nwed Mormon, prophet Alma ye ikot esie ke akani America ema ekut anana-utit ekong ye mbon emi ekesinde iko Abasi, esong esit mmo, enyung ebiat edu-uwem mmo. Edi Alma eteme ete, Nti owo ikemeke ndiŋwana-eŋwan: “Idahaemi, nte ukworo iko enyenede akamba edida ye mme owo ndinam se inende—iŋ, enye enyene ata akwa odudu ke esit mme owo akan ofut, mme mkpo efen,emi eketibede ono mmo—ntre Alma ekere ke odot mmo ndinwana ndu uwem eke iko Abasi.”
“Iko Abasi okpon akan mme nkpo efen. Okosuk edi ntre ɔtɔŋɔde ke Edibot ererimbot ke ini Abasi eketingde iko: “Yak unwana odu: ndien unwana ama odu.”
Andinyanga eketing iko emem emi ke Obufa Testament: “Enyong ye isong eyebe efep, edi amadi iko mi idibehe ifep.”
Ye enye emi: “Owo ekededi eke amade mi, enye eye onim iko mi: Ete mi eyenyung ama enye, ndien nnyin iyedi ibine enye, inyung inam ebiet idung nnyin ye enye.”
Ndien otode Mary, eka Jesus okono inem iko-ntiense emi; “Sese, ɔfin-anwan Jehovah; akpakam osu ono mi kpasuk nte uyo fo edide.”
Ndinim ke akpaniko nyung nkop iko Abasi eyesik nnyin ekpere Enye. President Russell M. Nelson ama onwongo, “Edieke afo ekpepde iko Esie, ukeme fo nditie nte Enye eyekori.”
Ndi kpukpru nnyin iyomke ndidi, nte ikwo odohode, “uwak edidiong ye edisana —uwak, Andinyanga, nte afo”?
Ami nkut ekpri Joseph Smith nte otongode okop iko Ete esie ke Heaven: “[Joseph,] Emi edi Edima Eyen Mi. Kop enye!”
Nnyin “ikop Enye” ke iko nwed-Abasi, edi ndi nnyin iyak enye odu ke mfang-nwed, mme ndi nnyin imodiongo ke Enye keting iko ye nnyin? Ndi nnyin imikpuhode?
Nnyin “ikop Enye” ke ediyarade ibode ye ntuk eke Edisana Spirit, ke mme iboro akam, ye ke mme ini emi Jesus Christ kpot, oto ke odudu Uduok-Iyip Esie, ekeme ndidibede mbiomo nnyin, ono nnyin nfen-nno ye emem, onyung akama nnyin ke ubok ima Esie.”
Anam iba, iko mme prophet efon.
Mme prophet eno iko-ntiense ebanga edisana-uduot Jesus Christ. Mmo ekpep gospel Esie enyung ewut ima Esie ye nnyin kpukpru. Ami nting iko ntiense mi nte ke odu-uwem prophet,nnyin, President Russell M. Nelson, okop onyung eting iko Jehovah.
President Nelson odiongo ufon iko. Enye odoho ette, “Esanga ke usung ediomi,” “Etang Israel ebok,” “Eyak Abasi akara,” “Ebop mme ebop eti-ibuot,” “Eno ekom,” “Edibede mbuotidem mbufo ke Jesus Christ,” “Emum iko-ntiense mbufo ekama,” ndien “Edi mme anam emem.”
Ini isuk idude mmi, enye odoho nnyin, “ekere celestial.” “Ke ini mbufo esobode ye nnan-enyin,” enye ette, “ekere celestial! Ke ini idomo odomode,ekere celestial! Ke ini uwem mme mme ufan mbufo ebiangade mbufo, ekere celestial! Ke ini owo akpade ke ini mikemke, ekere ebaŋa celestial. …Ke ini oyobio uwem ofukde mbufo, ekere celestial! … Nte mbufo ekerede celestial, esit mbufo eyekabade sung-sung, … mbufo eyese idomo ye ubiongo ke obufa enyin, … [ndien] mbuotidem mbufo eyekori .”
Ke ini ikerede celestial, nnyin idikut nkpo nte mmo enehede edi, ye … nte edidide.” Ke ererimbot emi oyohode ye unana-ifiok ye utok, nnyin iyom uto ifiok oro.
Elder George Albert Smith, anyan-ini mbemiso edi-di President Ufɔk Abasi, eketiŋ abaŋa edinyime prophet nyuŋ nam ikɔ esie. Enye ete: “Ubiɔŋ emi nnyin inamde ke ini nnyin imenede ubɔk nnyin … edi ata akpan ubiɔŋ kiet. … Oworo … ke nnyin iyeda ke edem; iyebong akam ino enye; … iyenyung inwana ndikop uyo esie nte Jehovah edidade usung.” Ke iko efen, nnyin iyesin ifik inam uyo prophet nnyin.
Nte kiet ke otu mme prophet 15, mme okut nkukut, ye mme andiyarade uduak, emi Ufok-Abasi ofuri ererimbot nnyin ikenyimede mkpong, nyom nditing nno mbufo ifiok mi kiet ke ini nkenyimede prophet oro nyung ndade iko esie. Eketie nte prophet Jacob ono mi, emi okodohode, “Ami mma nkop uyo Jehovah etingde iko ono mi ke kpukpru iko.”
October emi ebede, ŋwan mi, Melanie, ye ami ikodu ke Bangkok, Thailand, nte nkebengede idem ndiberede se ididide oyoho temple185. Ke nkang mi, utom oro ekedi ata obufa onyung ono nsuhode idem. Enye ekedi akpa temple ke peninsula southeast Asia. Ema ebop enye eye eti-eti—enyɔŋ itiokiet, mme spire usuk-kiet, edaha mmɔ ke itie mmɔ” ada edi ufɔk Jehovah. Ke mme offiong mma nkere mbanga ediberede oro. Se ikodude mi ke ukpɔŋ ye esit ekedi ke idut oro ye temple ekesine ke ubɔk mme prophet ye apostle. President Thomas S. Monson akasian abanga temple oro ndien President Nelson ediberede.
Ami mma nwet akam ediberede oro nnim offiong kiet ke edem. Ema ekabare mme ndisana iko oro esin ke usem Duopeba. Nnyin ima ibengeidem. Mme nkekere ntre.
Okoneyo esierede ediberede oro, ami nkedemede idap ye nnyekidem, iwia ekikere kabanga akam ediberede oro. Mma nwana ndifre mbanga ntuk oro, nyung nkere ke akam oro etim ofon. Edi spirit ikimaha ndisana mi nyak. Ama otuk mi ke ndusuk iko ikoduhe, edi ke uduak Abasi, mma mbo mmo nto eriyarade, nyung nwet mmo nsin ke mkpere utit akam oro: “Yak nnyin ikere celestial, iyak spirit Fo ada-ukara ke uwem nnyin, inyung inwana ndidi mme anam emem kpukpru ini.” Jehovah eketi mi ndikop iko odu uwem prophet nnyin: “Ekere celestial,” “eyak Spirit akara,” “enwana ndidi anam emem. Iko prophet enyene odudu ono Jehovah ye nnyin.
Anam ita, onyung edi ata akpan, edi iko nnyin. Ke akpaniko, ke ererimbot nnyin emi mbiet-nkpo oyohode iko nnyin enyene odudu.
Iko nnyin ekeme ndino inemesit mme iyat-esit, ono idara mme emiom, owut ima mme osio enyin efep. Ke nsongo-nkpo idahaemi, iko ekeme nditop onyung osuhode oduk esit ukpong ke ubiak—onyung odung do. Iko nnyin ke internet, etop iwetde, etop otuowo, mme tweet esanga ke idem mmo. Ndien ekpeme se etingde ye nte etingde enye. Ke mme ekpuk nnyin, akpan-akpan mme ebe, nwan, ye ndito, iko nnyin ekeme ndibon nnyin oto-kiet mmidihe esin akamba ubahade ke ufot nnyin.
Yak nno mkpri udim-ikɔ ita emi ikemede ndida nsio ubiak mfep ke mfina ye utɔk, dibede, yuŋ sɔŋɔ kiet eken idem.
“Sosongo.”
“Kuyat esit.”
Ye “Mma-mma fi.”
Ku unim mme usuhore nkpri udim-iko emi ubet sanga-sanga edinam mme idioknkpo-ntibe. Kama mmo nnam nkpo kpukpru ini ye ke akpaniko, koro mmo ewut mbon efen ukpono. Nneme edi mme-mem, ekutiene uto usung oro.
Nnyin imekeme ndidoho “sosongo” ke elevator, ebiet ubehe nkpo-isang, ke urua, ke ubet ufok-utom, ke udim idade, mme idude ye mboho-idung mme ufan. Imikeme ndidoho “kuyat esit” ke inamde ndudue, mmidukke esop, ifrede usen-emana, owo odude ke ubiak. Imikeme ndidoho “mma-mma fi.” ndien mme iko oro ekama ukem etop “Ami mmekere mbanga fi,” “Ami mfreke fi,” “Ami mmodo ye afo,” mme “Afo edi kpukpru nkpo ono mi.”
Yak mbuana uwutmkpo eke idem mi. Mme ebe, ekpeme-idem. Nditɔ-eka iban, enye emi eyenwam mbufo nko. Mbemiso nkaka ndinam oyoho-ini utom ke Ufok-Abasi, mma nsasanga nka ediwak ebiet nno usiak-ifia mi. Ami mmaka mme anyan ebiet eke ini ke ererimbot. Ke utit usen mi, ke sutɔ ebiet eke ami mkpdude, ami mmesikot ufɔk kpukpru ini. Ke ini nwan mi, Melanie, ama esimen phone ndien ami mboro enye, nneme nnyin esida nnyin ekesim ebiet ididohode “Mma-mma fi.” Kpukpru usen, mme iko oro esidi andinyanga ono ukpong mi ye se nnamde; mmo ekedi ukpeme eno mi ke mme ndioi edinam. “Melanie, mma-mm fi” eting ata ima emi odude ke ufot nnyin.
President Thomas S. Monson ekesidoho, “Mme ikpat edu ndino nsongonda, mme ubok se emum, mme ekikere eke eyomde ndongesit, esit eke eyomde edimenede, ye mme ukpong eyomde edinyanga.” Ndidoho “Sosongo,” “Kuyat esit,” “Mma-mma fi” eyenam kpasuk ntre.
Nditɔ-eka iren ye nditɔ-eka iban, ikɔ enyene odudu.
Ami mmɔŋwɔŋɔ nte edieke nnyin “idarade ke ikɔ Christ” emi adade aka edinyaŋa, ikɔ prophet nnyin oro ekpemede onyuŋ ɔdɔŋde nnyin esit, ye ikɔ nnyin oro etiŋde se nnyin idide ye se nnyin imade, odudu otode heaven eyeduɔhɔ nnyin ke idem “Ikɔ Christ eyeteme fi kpukpru ŋkpɔ emi edinamde.” Nnyin idi nditɔ eke Ete Heaven, Enye onyuŋ edi Abasi nnyin, Enye onyuŋ oyom nnyin itiŋ ikɔ ke “edeme mme angel” ke odudu Edisana Spirit.
Ami mmema Ɔbɔŋ Jesus Christ. Enye edi, ke ikɔ Akani Ediomi eke prophet Isaiah, “Utibede, Ɔnɔitem, ɔkpɔsɔŋ Abasi, Nsinsi Ete, Ɔbɔŋ Emem.” Nte Apostle John anamde anwaŋa ete, Jesus Christ ke Idemesie edi “Ikɔ.”
Ke emi ke nnɔ ikɔ-ntiese nte Apostle kiet ekotde esin ke utom Abasi, enyuŋ ekotde ada nte saŋa-saŋa ntiense ɔnɔ Enye. Ke edisana enyiŋ Ɔbɔŋ Jesus Christ, amen.