Ikpo Mbet Iba
Ana nte nnyin idomo ndinim mme ikpo mbet iba emi. Ndinam ntre, ana nte nnyin isanga ke usung mbet ye ima.
Ndima ndito-eka mi iban ke gospel Jesus Christ, mekom mbufo nte ndisana mbon ukpeme eke nsinsi ufokemana. President Russell M. Nelson ekpep nnyin ete, “Ke ekefiak eda ufok Abasi emi edi man mme ufok edu, ediana kiet, enyung edemere ke nsinsi.“1 Ukpep mkpo emi edi akpan ono mme owo emi emade mbiet idem mmo emi efiokde nte LGBT2 President Nelson eti nnyin nko ete ke inaha nte nnyin “inyime [ofuri ini] ye kiet eken ke ndima kiet eken.“3 Mme ukpep mkpo prophet emi efon ke mme ukpep mkpo ke ufok ke ndiboro mme mbume mkpri ndito. Mmebong akam mbenge ifiok nditing iko emi ye mme owo emi koro mme mkpo emi ebanga mbufo, emi abangade ofuri ufokemana ke ufok Abasi.
I.
Ami nyetongo ye se Jesus ekekpepde nte edi ikpo mbet iba.
“Ma Jehovah Abasi fo ke ofuri esit fo, ye ke ofuri ukpong fo, ye ke ofuri ekikere fo.
“Emi edi akamba ye ebe-iso item.
“Udiana onyung ebiet enye, ete, Ma mbohoidung fo nte idem fo.”4
Emi oworo ete ke eno nnyin uyo ete ima kiet eken, koro mbuk Jesus abangade eti owo Samaria ekpepde ete ke kpukpru owo edi mboho-idung nnyin.5 Edi udong nnyin ndinim akpa mbet emi inaha anam nnyin ifre akpa mbet, ndima Abasi ye ofuri esit, ukpong, ye ekikere nnyin. Nnyin iwut ima oro ke “ndinim mme ibet [Esie].“6 Abasi oyom nnyin inim ibet Esie koro oto ke nkopitem oro, ye erikabare esit, ke nnyin idifiak inyong ika iso Esie inyung ifon-ima nte Enye ofonde.
Ke iko esie ono mme iwaad eke Ufok Abasi, President Russell M. Nelson ama eting iko abanga se enye okokotde “okposong ebuana eke ima Abasi ye mme ibet Esie.“7 Ibet kabanga mme nkpo emi asangade ye se efiokde nte LGBT edi ibet Abasi emi abangade ndo ye nsanga esie ibet mafareke idem. Mbiba edi akpan-nkpo ono uduak Ete nnyin ke Heaven kabanga uduak erinyanga eke ndito Esie. Nte President Nelson ekekpepde,“Ima Abasi oto unana utit ima emi Enye enyenede ono nnyin ye uduak Esie ono nnyin ndidi se nnyin iyomde.“8
President Nelson ekpeb ete: “Ediwak obio … enyime ete mme owo edo mbiet idem mmo. Nte mbon ufok Abasi, nnyin imikpono mbet obio oro … , emi esinede mbet ndo. Akpaniko edi, nte ededi, ke Abasi ekenim … ndo tongo ke eritongo! Ndien tutu esim emi Enye ofiok enye nte ke edi ke ufot eren ye nnwan. Abasi ikpuhoke ifiok Esie kabanga ndo.”
President Nelson aka iso eting ete ke: “Abasi nko ikpuhoke ewuho Esie kabanga mfara ke idem. Se eyomde man eduk temple ikpuhoke.“9
President Nelson eti nnyin ete ke “Utom nnyin nte mme Apostle edi ndikpep akpaniko. Utom oro inoho [mme Apostle] unen ndikpuho edisana mbet.”10 Ke ntre, ndito-eka mi iban, mme adausung ke ufok Abasi ana ekpep ufon ndo ke ufot eren ye anwan ye mbet mfarake idem emi asangade do.
II.
Utom ufok Abasi edi ndibenge ndito Abasi idem nno obio ubong celestial, akpan akpan ye obio ubong emi okponde akan, emi edide edimenere mme nsinsi uwem. Ndaha oro okponde akan emi edi-to ndo eke nsinsi uwem kpot.11 Nsinsi uwem esine ke odudu emi esinede ke ebuana eren ye nnwan12—se obufa eriyarare okotde “edika iso mkpasip ke nsinsi.“13
Ke iko esie onode mme iwaad, President Nelson ama ekpep ete,“Ndinim mme ibet Abasi eyekpeme mbufo nte ekade nsinsi uwem.“14—emi edide, ndikabare ntie nte Abasi, nnyene uwem ubong ye edisana ndaha eke Ete ye Eka Heaven nnyin. Emi edi ebenge emi nnyin iyomde ino kpukpru mbon emi nnyin imade. Ke ntak ima oro, nnyin idiyakke ima nnyin okpon akan ibet ye uduak ye utom Abasi, emi nnyin ifiokde ke eyeda ima osok mbon emi nnyin imade.
Edi ediwak edu emi nnyin imade, usuk edi mbon emi enyenede mfiak-ndandi gospel, emi minim-ke mme emi mimekke ndinam ibet Abasi emi abangade ndo ye mbet mfarake idem. Nso nkpo ibanga mmo?
Ukpepnkpo Abasi owut ete ke kpukpru nnyin idi ndito Esie ndien ke Enye okobot nnyin man inyene inemesit.15 Obufa eriyarare ekpep ete ke Abasi ono mme owo usung emi kpukpru owo ekemede ndimek nkop-item man eyom mme edidiong Esie mme ndinam ndumek emi adade owo aka ekpri obio ubong kiet mme eken.16 Ke ntak akwa ima emi Abasi enyenede ono kpukpru ndito Esie, mkpri obio ubong oro efon ekan se mme owo ekerede.17 Erisio-isop Jesus Christ anam mkpo emi akan etibe, nte Enye “okponode Ete, onyung anyangade ofuri utom ubok esie.“18
III.
Ami meting mbanga akpa ibet, edi yak ise oyoho iba? Didie ke nnyin idinim ibet ndima mboho-idung nnyin? Ana nnyin ikpep mbon Ufok Abasi nnyin ite ke ana mmo ema mbon emi emade mbiet idem mmo ye ukem ima emi Andinyanga odohode nnyin ete ima mme mboho-idung nnyin. Ntem, kini ekenyimede ndo mbiet idem ke United States, First Presidency ye Eboho Duopeba edoho ke: “Gospel Jesus Christ ekpep nnyin ete yak ima inyung idu uwem emi ofonde ye kpukpru owo—okposuk edi ke nnyin imaha se mmo enamde. Nnyin idoho ite yak owo ukusua mbon emi enamde uyo esop emi ayakde owo odo mbiet idem esie.“19
Nko, yak nnyin ukukobo mbon emi mimaha se nnyin imade.20 Edi, usuk mbon emi enyenede mfina ye mme mkpo emi ekere ke usuk owo ye mme ada usung ke ufok, ward, ye stake imaha mmimo. Ana nte kpukpru nnyin idomo ndima nyung mfon-ido.
IV.
Ke mme ntak emi nnyin mifiokke, nnyin iminyene nsio-nsio mfina ke uwem nnyin mi ke isong. Edi nnyin imifiok ke Abasi eyenyanga nnyin kiet kiet ndikan mme mfina emi edieke nnyin iyomde unwam Esie. Ke ini ima ikiyo inyung ikabare esit ibanga mme mbet emi ikibiatde ekpep nnyin ete, ke kpukpru nnyin iyika obio ubong. Edi Abasi enyene akpatre ubiere ikpe, enye ikpong enyene ifiok, oniong, ye mfon ndibiere ikpe nno nnyin kiet kiet.
Edi, ana nte nnyin idomo ndinim mme ikpo mbet iba emi. Ke ndinam ntre, nnyin isanga ke ufot mbet ye ima—ndinim mme mbet ye ndisanga ke usung ediomi, ke ini isuk ikade iso ndima mboho-idung nnyin. Isang emi oyom edisana unwam kabanga se anade nte ima mme isin ye nte idimade inyung ikpangde utong inyung ikpepde mme owo mkpo nte ikade iso. Isang nnyin oyom ete yak nnyin ikufep-enyin kabanga mme mbet edi yak iwut oyoho ifiok ye ima. Isang nnyin ana ekere-abanga ndito-owong emi mifiokke ndaha ebuana mmo, edi ono-ikpan abanga ndisosop mbiat, sia, ke ediwak ndito-owong, oruk unana edifiok oro enehede osuhore nte ini akade iso.21 Isang nnyin oworo-okpong se idade nnyin ikpong usung ediomi, inyung inyimeke ino mkpo ndomokiet emi adade nnyin okpong Abasi. Ke kpukpru emi ana nte nnyin iti ite ke Abasi onwongo ndino kpupru mbon emi enimde mme ibet Esie idorienyin ye idaresit ye mme edidiong.
V.
Mme eka ye mme ete ye kpukpru nnyin iminyene ubiong utom ndikpep ikpo mbet iba oro. Kabanga iban ke Ufok Abasi, President Spencer W. Kimball emen utom akwa prophecy emi owut ete ke: “Ediwak nkori emi edidukde Ufok Abasi ke mme akpatre usen edidi koro ediwak nti iban ke ererimbot … eyediduk Ufok Abasi ke ediwak ibat. Emi editibe ke edieke iban Ufok Abasi edinyenede edinen ido ye nting-enyin ke uwem mmo ye ke edieke edikutde iban oro nte ke mmo eworo eda ekpong enyung ekpuhore … ekpong mme iban efe ken ererimbot. … Ke ntem eyedi ete ke iban Ufok Abasi eyedi mme akpan uwut-mkpo ke ibat oro ye ke nkori spirit eke Ufok Abasi ke mme akpatre usen oro.”22
Ke etingde iko abanga prophecy oro, President Russell M. Nelson ama odoho ete ke “usen oro emi President Kimball ekekutde edi mfin emi. Mbufo edi iban oro emi enye okokutde!“23 Nnyin emi ikikopde prophecy oro ke isua 40 emi ekebede ikifiokke ite ke mbon emi iban Ufok Abasi emi edinyangade edidi mme ufan mmo ye mbon ufok mmo emi ndumek ererimbot ye nkari satan edibiangade. Akam ye edidiong mi edi ke mbufo eyekpep enyung enam prophecy oro etibe, ke enying Jesus Christ, amen.