Ndikpono Enying Esie
Ye idiongo ediomo ye edibuana, ekot nnyin ke enying Jesus Christ.
Nte Ete ye Eka ebengede idem ke inemesit ebanga emana nsek eyen,mmo enyene ibiong utom ndimek enying enode obufa nsek eyen mmo. Midighe ini akamanade,ema esio fi enying emi okodude ke ekpuk mbufo ke mme emana. Mme enying ekesiode fi ekedi oworo etop ke isua mme ebiet emi afo akamanade.
Prophet Heleman ye nwan esie ema eno ndito irenowo mmo inem enying ekpuk Nephi ye Lehi. Ekem Helaman eting ono ndito iren esie ete:
“Ami nsio mbufo enying akpa ete ye eka nnyin … man ema eti enying mbufo ekpeti mmo; nko ema eti mmo eti mme utom mmo … se etingde ebanga, se ewetde, emi okofonde.
“Ke ntre, ndito mi, Ami mkpama mbufo enam mkpo emi ofonde.”1
Enying Nephi ye Lehi ama anwam mmo nditi nti utom mme etete mmo onyung ono mmo udong ndinam eti nko.
Ndito eka iban,ebiet ekededi nnyin idude, uto usem emi nnyin isemde, mme idi isua Itiaita mme Ikie-ye-itiaita, kpukpru nnyin ibuana asanga-sanga enying kiet emi enyenede ukem uduak.
“Kadanga nte ediwak [nnyin] inade uduok mong ke Christ … koro [nnyin] kpukpru idi kiet ke Christ Jesus.”2
Nte mbon ufok Abasi Jesus Christ eke Latter-day Saints, “nnyin ke akpa ima inyime ndimen enying Christ ndori ke idem nnyin … ke edinam uduok mmong.”3 Oto ke ediomi emi, nnyin inwongo kpukpru ini nditi Enye, nim mme mbet esie, nyung nwam mbon efen. Udong nnyin ndinim ediomo emi edi ndibuana ke usen Sabbath ndia sacrament inyung inemesit ibanga edidiong nditongo ntak “nsa[nga] ke obufa edu uwem.”4
Enying enode nnyin ini imanade ono nnyin kiet kiet idiongo onyung nnyin isine ke mme ufokemana ererimbot. Okposuk edi, ke ini nnyin “imanade obufa” ke inade uduok mmong, ifiok nnyin ndifiok se nnyin idide ama okpon. “Ke ntak ediomo ekenyenede eyekot mbufo ndito Christ, … sese, … enye obon mbufo ke spirit; koro mbufo etingde ete ke esit mbufo okpuhode oto ke mbuotidem ke enying esie; ntre mbufo emana ke enye.”5
Nko, ye idiongo ediomo ye edibuana , ekot nnyin ke enying Jesus Christ. Ndien “baba enying efen iduhe mme usung efen mme odudu efen ekemede ndinam erinyanga esim ndito owo, ibohoke oto ke enying Christ,Obong Andikpon Nkan.”6
Ema efiok enying Jesus mbemiso enye amana. Angel kiet,odoho King Benjamin ke nkukut, “Ndien eyekot enye Jesus Christ, eyen Abasi Ibom, … nko eka esie edikere Mary.”7 Utom “ima erifak”8 esie ama anwanga ndito Abasi ini emi ekworode iko-Abasi ke ererimbot, tongo ke eyo Adam ye Eve tutu osim eyo emi, man otodo mmo eyom itie ebode “ifiok ebanga edifen midiok mkpo mmo.”9
Isua oko, President Russell M. Nelson ama “enim ebenge” ono iban ufok Abasi emi “ete yak emum ini iso mmo ke ndinwam mbok nsuana Israel.” Enye oyom nnyin ikot nwed Mormon nko “inim idiongo kiet kiet ke mme ufang emi etingde mme abangade Andinyanga.” Enye ete nnyin “isongo iting ibanga Christ,idara ke Christ, inyung ikworo Christ ino [ufokemana] ye mme ufan nnyin.” Ndusuk emekeme ndikut mme mfri enwongo esie eteke “mbufo ye mmo eyekpere Andinyanga. … Ndien ukpuhore, kpa utibe-nkpo, eyetongo nditibe.”10
Enwongo nnyin nditi Andinyanga kpukpru ini ono nnyin uko ndida ke akpaniko ye edinen ido—mme nnyin idu ke akwa otu,mme ebiet owo midiongoke mme edinam nnyin ibohoke Abasi. Nnyin ima iti Enye ye enying esie emi nnyin ibiomde, nnyin inyeneke ini ino usuene idem udomo idem mme nsongido ubiere ikpe. Ke iwukde enyin nnyin ise Andinyanga,nnyin imofiok se nnyin idide—edima eyen eke Abasi.
Ediomo nnyin eti ndobo mfina ererimbot,owongore eyighe esin ke uko, onyung ono idorenyin ke ini idomo.
Ndien nnyin ima iduo ke ini isangade ke usung ediomo,nnyin inyene nditi enying esie ye utibe ima esie ye nnyin. Koro enye enyene kpukpru odudu,kpukpru ifiok , ye ikike; enye odiongo kpukpru mkpo,nko enye edi atua owo mbom … ono mmo emi etuade mkpofiok enyung enim ke enying esie.”11 Ntem inem uyo ndomokiet iduhe nte enying Jesus ono mmo oro ye mbungo esit ye editua mkpofiok, nyom “ndinam eti nyung mfon.”12
President Nelson ekpep: “Usen ebe kini mbufo edopde uyo ekop inem nditiene Christ. Iko Abasi mbufo idihe ndika ke ufok Abasi ke Sunday. Edi abanga ndiwut nte eti mbet tongo ke usenubok Sunday tutu osim okoneyo Saturday. … Iduhe nkpo nte ndidi ‘ubak’ mbet eke Obong Jesus Christ.”13
Udong nnyin ndimen enying Christ mbiom okpon akan nditing iko. Idighe ikpukpu akanga mme ido edinam. Idighe unen ndi-be mme enying itoride ke ofong emi isinede. Idighe nditing ite nnyin idori ke shelf mme ndikong ke ibibene. Esie edi enying “esinde,”14 ewetde ke esit nnyin, enyung “ewetde [nnyin] ke okpo iso.”15
Uwa usio isop Andinyanga edi mkpo emi itide, kpukpru ini, oto ke ekikere nnyin, mme edinam, ye mme ebuana nnyin ye mbon efen. Enye itighe enyin nnyin ikpong, edi enye eti nnyin kpukpru ini. Andinyanga odoho ete:
“Nte eka ekeme ndifre eyen eba esie,tutu enye ikemeke ndinyene mbom mbanga eyen esit idibi esie? Ih, mmo ekeme ndifre, edi Ami mfreke fi, O ufok isreal.
Sese, Ami mekap mbufo nsin ke eka ubok mi.”16
President George Albert Smith ekpep,“Kpono mme enying emi afo ekerede, koro usen kiet mbufo eyenyene ufang ye ifet nditing nno … Ete nnyin ke enyong se afo akanamde ye [ mme enying oro].”17
Nte ndimek enying Nephi ye Lehi, ekeme nditing mme nwed ndian nnyin nte ata nti mbet Obong Jesus Christ? Nte nnyin imokpono enying Jesus Christ emi nnyin imende ikama ke idem nnyin? Nte nnyin imedi “andikworo ye ntiense”18 mfon ido ye odudu ufak Esie?
Ibighike, Ami nkakpang utong nno Nwed Mormon. Ke akpatre chapter 2 Nephi, ami ekop Nephi etingde mkpo emi mme nkot-ke ke ukem usung emi akpa. Ke kpukpru nwed esie, enye ekpep nko eting iko ntiense eke “Andifak,” “Edisana Owo Israel,” “Eyenerong Abasi,” ye “Messiah.” Edi nte enye etrede nwed esie, Ami nkop mme iko emi; “Ami nnem esit ke anwanga-nkpo; nnem esit ke akpaniko; nnem esit ke Jesus mi, koro enye afakde ukpong mi.”19 Ke nkopde mme iko emi, esit mi oyoho ye idara ndien nyene ndikpang utong ke ini ke ini. Ami mmofiok nnyung nyere ikot udim oro nte ami mfiokde nnyung nyere ikot enying mi.
Abasi ete,“Se, ofofon ono mmo emi enyenede udong ndikere enying mi; koro ke enying mi eyefiok mmo; nko mmo edi okim.”20
Nte mbon Ufok Abasi Jesus Christ eke Latter-day Saints, yak nnyin “ke inemesit [ibiom] enying Christ”21 ndikpono enying esie ke ima, akam, ye mme nti utom. Ami nno iko ntiense nte Enye edi “Eyenerong Abasi, Eyen Nsinsi Ete nnyin.”22 Ke enying edisana eyen Esie, Jesus Christ, amen.