Di, Tiene Mi—Ndutim Nkaiso Uduak ye Abasi Ndibiat Idioknkpo mfep
Abasi ebenge ikot Esie idem abanga enwan eke andidiok. Di, Tiene Mi edi Ndutim nkaiso Uduak ye Abasi ndibiat idioknkpo mfep.
Esit enem nnyin ndiboho otokiet ke akwa mboho Ufok Abasi Jesus Christ Mme Ndisana-Owo ke Ekpere Edem Usen. Edi nkpo edidiong ndibo ekikere ye uduak Obong nto ukpepnkpo eke mme prophet ye apostle Esie. President Russell M. Nelson edi oduwem prophet Abasi. Esit enem nnyin etieti ke mme item ye ndausung emi ibode mfin.
Mme dian iko ntiense mi ye se ekenode-no. Mmeno iko ntiense mi mbanga Abasi, Nsinsi Ete nnyin. Enye oduuwem onyung ama nnyin onyung ekpeme nnyin. Uduak inemesit Esie ono edidiong ke uwem emi ye nnyin ndifiak nnyong nka iso Esie.
Ami mmoyung nno iko ntiense mbanga Jesus Christ. Enye edi Ikpong-ikpong Eyen Abasi Obonde. Enye anyanga nnyin osio ke mkpa, Enye onyung afak nnyin osio ke idioknkpo nte nnyin inyenede mbuotidem ke Enye inyung ikabare esit. Nsinsi uwa isop Esie ke ibuot nnyin ono nnyin edidiong edikan mkpa ye nsinsi uwem. Ntre, “yak ino Abasi Ekom ke mfon-mma eno edisana eyen esie” (“The Living Christ: The Testimony of the Apostles,” Liahona, May 2017, inside front cover).
Mbon Latter-day Saints ke ofuri ekondo ebo edidiong ke ndikpono Jesus Christ ke temples Esie. Utom ndibop kiet kotu mme temple emi ke aka iso ke Winnipeg, Canada. Nwan mi, Anne Marie ye ami ima inyene ifet ndika ebiet emi ebopde enye ke Ofiong August Isua emi. Ndutim edibop temple emi eye eti-eti eyenyung owut akwa uyai ke ema ebop enye ema. Edi, afo ukemeke ndinyene ediye temple ke Winnipeg, mme ke itie efen, ke munyeneke akwa ye ata nsongonda.
Okposong mbitmbit ofum ye ndaha una-isong emi odude ke Winnipeg afina ke ndisin itiat-idak-isong eke temple oro. Ke ntak emi, ema enyime ete ke eyedong mme eboho ukwak Ata ye duop emi edifukde ye mbat edisin itiat-idak-isong eke temple emi. Eto-ukwak emi edi ikpat Ata (18 m) ke uniong ye inches Duopeba ke sim Edip (30 kesim 50 cm) ke ukpa. Eyenuk mmo edong ke isong tutu mmo ekesim itiat idakisong, emi esimde nkpo nte ikpat Aba ye duop (15 m) ke esit isong. Ntre, eboho eto-ukwak Ata ye duop eyebop akwa adaha, emi edidide se inode ediye temple Winnipeg nsongonda.
Nte mbon Latter-day Saints, nnyin imoyom ukem ukem nsongonda emi ke uwem nnyin—nsongonda eke spirit emi iyomde ke isang uwem emi ye ke ndifiak nnyong ufok nnyin ke heaven. Ebop nsongonda emi ke itiat edikabare esit ntiene Obong Jesus Christ.
“Ndien idahaemi, ndito mi, eti, eti ke edi ke itiat eke Andifak nnyin, emi edide Christ Eyen Abasi, ke mbufo enyene ndibop nsongo nda mbufo; man otodo kini andidiok edidongde idiok akwa ofum esie, ntre mme eto eduat esie ke esit idio, ntre, kini ofuri ofum itiat ye mkposong oyobio esie edimiade mbufo, oro idinyeneke odudu ndomo kiet ndiduri mbufo nkesin ke obube ntuanga ye unana utit ebiet ufen, koro ke ntak itiat emi ekebopde mbufoedori, emi edide itiat akpaniko, itiat idak isong emi mme owo ekebopde edori eke mikemeke ndiduo” (Helaman 5:12).
Ke mfoniso, nnyin idu kini emi mme prophet ye apostle ekpepde nnyin nkpo ebanga Jesus Christ Andinyanga. Nditiene item mmo eyenwam nnyin ndiwuk nsongo nda nnyin ke Christ.
Ke isua oko, ke ntongo etop esie eke Akwa Mboho Ofiong Duop isua 2018, President Russell M. Nelson ono mfiori ye ikpan eteke “Akpan ekikere eke Ufok Abasi edi ndinwam mbon ubon ufok Abasi ndikori mbuotidem mmo ke Obong Jesus Christ ye ke Erisio-isop Esie, man anwam mmo ndinam nnyung nim ediomi ye Abasi, man osongo onyungadian mmo nte ufokemana. Imemke ndinam emi, ke idiok ererimbot emi. Aandidiok ke kakaiso ndiwana ye mbuotidem ye nnyin nkoro ye mme ufokemana nnyin ke akwa usung. man nnyin idu uwem ke spirit, nnyin imoyom counterstrategies and proactive plans” (“Opening Remarks,” Liahona, Nov. 2018, 7; emphasis added).
Ndtiene etop President Nelson, Elder Quentin L. Cook eke Eboho mme Apostles Duopebe ada owut Di, Tiene Mi emi edinwamde mme owo ye mme ufokemana. Ndusuk se enye eketingde edi emi:
-
“Enam obufa nkpo-unwam ukpebnkpo ke ufok Di, Tiene Mi … man anwam mbon ufok Abasi ndikpep iko Abasi ke ufok.”
-
“‘Enam nkpo-unwam eno owo kiet-kiet ye ufokemana ke Ufok Abasi’ [Di, Tiene Mi—Eno Owo kiet-kiet ye Ufokemana (2019), vi].”
-
“Utom nnyin edi ndinam ukpeb Ufok Abasi ye eke ufok ekem ke usung emi edinehede inam mbuotidem yeido Abasi ye nkabare-esit nno Ete ke Heaven ye Obong Jesus Christ okori.” (“Deep and Lasting Conversion to Heavenly Father and the Lord Jesus Christ,” Liahona, Nov. 2018, 9–10.)
Togode ke Ofiong January isua emi, mbon Latter-day Saints ke ofuri ekondo ema etongo ndikpep nkpo ke Obufa Testament, ye Di, Tiene Mi nkpo-unwam nte ndausung nnyin. Ye ndinam ke udua kiet kiet, Di, Tiene Mi anwam nnyin ndikpep nkpo ke nwed Abasi, mme ukpebnkpo iko-Abasi ye mme ukpeb eke mme prophet ye apostle. Edi ediye nkpo-unwam ono kpukpru nnyin.
Ke ofiong usukiet ebede emi ofuri ererimbot esinde ifik ekpep nwed iko Abasi, nso ke nnyin ikut? Nnyin imokut mbon Latter-day Saints ke kpukpru ebiet nte ekoride ke mbuotidem ye ke nsinifik nno Obong Jesus Christ. Nnyin imokut mme owo ye ke ndaha ufokemana nte esiode ini enim ke ofuri udua man ekpep Iko Andinyanga nnyin. Nnyin imokut nkori ukpepnkpo ke Sunday classes nnyin ke nte nnyin ikotde nwed Abasi ke ufok inyung ibuana ke se ikpepde ke ufok Abasi. Nnyin imokut nkori idara ke ufokemana ye edidiana-kiet nte nnyin iworode ikpong ndikokot nwed Abasi inyung iduk ke ndikpekpep ke eti usung.
Ekedi ifet mi ndikise ediwak mbon Latter-day Saints nnyung nkop se mmo efiokde ebanga Di,Tiene Mi. Iko mbuotidem mmo oyoho esit mi ye idara. Emi edi esisit se nkekopde nto nsio-nsio mbon Ufok Abasi nnyin ke nsio-nsio ebiet ke ererimbot:
-
Ete kiet eting ete, “Ami mmema Di, Tiene Mi koro enye ono mi ifet nditing iko ntiense mbanga Andinyanga nno ndito mi.”
-
Ke ufok efen, eyenowong kiet odoho ete: “Emi edi ifet ndikop nte ete ye eka mi enode iko ntiense mmo.”
-
Eka efen eting ete: “Nnyin imibo ndausung nte idinimde Abasi nte akpa nkpo. Ini emi nnyin [ikikerede] ke nnyin ‘inyeneke’ omoyoho ye idorenyin, idaraesit, emem ye nkori ke usung emi nnyin mikifiokke ite ekeme nditibe.”
-
Nnwan ye ebe kiet eting ete: “Nnyin imikot nwed Abasi ke ata ukpuhore usung ofon akan nte nnyin ikisikotde mmo akpa. Nnyin imikpep ata ediwak nkpo ikan nte nnyin ikisi-kpepde akpa. Abasi oyom nnyin ikut nkpo ke ndaha efen. Abasi ke ebenge nnyin idem.”
-
Eka kiet eting ete: “Ami mmema koro kpukpru owo ekpep ukem-ukem nkpo otokiet. Ke ini akpa, nnyin ikisi-ikokot mmo. Mfin emi, nnyin ikpekpeb mmo.”
-
Eyeneka nnwan kiet ono akwa ukpebnkpo emi ete: “Ke ini akpa, mbufo ekeisiinyene ukpebnkpo, ndien nwed Abasi adiana do. Idahaemi, mbufo edinyene nwed Abasi, ndien ukpebnkpo akabare ososongo enye.“
-
Eyeneka nnwan efen odoho ete: “Mmenyene ukpuhore kini ami nnamde [ke ndidomo] ye ini emi ami mme nnamke. Emem ono mi nditing mbanga Jesus Christ ye se nnyin inimde ke akpaniko nno mbon efen.”
-
Eka- eka kiet eting ete, “Ami nkot ndito ye ndito-ndito mi ke usen Ederi, inyung ibuana ke se idude ke Di, Tiene Mi otokiet.”
-
Eyeneka nnwan kiet eting ete: “Di, Tiene Mi etie nte Andinyanga ke idem esie ke anwam mi. Ukpebnkpo enye emi oto heaven.”
-
Ete kiet eting ete, “Nte nnyin ikamade Di, Tiene Mi, nnyin itie nte ndito Isreal, emi enimde idiongo ke inua usung ufok nnyin, ndikpeme ufokemana nnyin nsio ke odudu andidiok.”
Ndito-ekairen ye iban, enem mi esit ndidu ye mbufo nyung nkop nte ukeme emi mbufo esinde ke Di, Tiene Mi odiongde uwem mbufo. Esosongo ke nsinifik mbufo.
Ndikot nwed Abasi ye Di, Tiene mi nte ada usung edi ndisongo edikabare esit nnyin ntiene Jesus Christ ye ukpebnkpo iko-Abasi Esie. Idighe nnyin ndinyam hour kiet nsio ke ufok Abasi ke usen Ederi nyung ndep hour kiet nsin ke ndikpep nwed Abasi ke ufok. Ukpep iko Abasi edi ndika iso nsin ifik ke ofuri udua. Nte eyen-eka kiet eketingdei ete, “Se eyomde idighe ndinam Ufok Abasi omuho ke hour kiet; edi ndinam ufok Abasi oniong ke usen itiokiet!”
Idahaemi, kere ndien banga ikpan emi prophet nnyin, President Nelson, okonode ke ini enye ekeberede akwa mboho eke ofiong Duop ke isua 2018 ete:
“Andidiok ke kakaiso ndinwana ye mbuotidem ye nnyin nkoro ye mme ufokemana nnyin ke akwa usung. Man isongo-ida ke spirit, nnyin imoyom ndutim ndibiat mfep ye nkaiso uduak.”(Opening Remarks,” 7).
Ndien (ke mkpo nte hour edip ye usukiet ebede) ke uwemeyo Sunday, enye ama eberi akwa mboho ye enwongo emi: “Edieke afo anamde utom ofon ke ndinam ufok fo akabare edi ebiet ukpep iko Abasi, odudu andidiok ke uwem fo ye ke ufok fo eyesuhore” (“Ndidi Uwutmkpo Edisana Owo Ke Ukperedem Usen,” Liahona, Nov. 2018, 113).
Ntak emi enwan andidiok akade iso ke akwa usung, ndien kpa ke ukem ini oro odudu andidiok ke enehede osuhore? Emi editibe, emi ke etetibe ke ofuri ufok Abasi, koro Obong ebenge ikot esie idem ndikan andidiok.. Di, Tiene Mi edi Ndutim Obong ndibiat-mfep ye nkaiso uduak. Nte President Nelson ekekpepde, “Obufa nkpo edikpep ke ufokemana, mbo unwam ke ufok Abasi enyene ukeme ndinam odudu ke ufokemana owut idem.” Edi, enye oyom ndien ana nnyin isin ifik eti eti; ana nnyin [itiene] enye mfon-mfon man inam ufok nnyin akabare edi edisana ebiet mbuotidem” (“Becoming Exemplary Latter-day Saints,” 113).
Ke oro ebede, nte President Nelson okonyung etingde ete, “Nnyin kiet kiet imiyene ubiong utom ke nkori spirit nnyin” (“Opening Remarks,” 8).
Ke ndikama nkpo-unwam Di, Tiene Mi Obong ke ebenge nnyin idem “ono idiok eyo emi nnyin idude mfin” (Quentin L. Cook, “Deep and Lasting Conversion,” 10). Enye ke awam nnyin ndibop “nsongonda oro,n songonda emi edieke owo obupde mididuoho” (Helaman 5:12)—nsongonda ke iko ntiense emi odude ke itiat idakisong ndikabare esit ntiene Obong Jesus Christ.
Yak ifik emi nnyin isinde ke ndikot nwed Abasi ofuri usen osongo nnyin idem onyung anam nnyin idot ndibo mme edidiong emi enwongode ndino nnyin. Ami mbenge emi, ke enying Jesus Christ, amen.