Ndima Ndito-iban

Etop otode Bonnie H. Cordon

Akwa Adaibuot eke Nkaiferi Iban

Akpan nkpo ke ofuri se nnyin inam ke eboho Nkaiferi Iban edi udong nnyin ndinwam mbufo man enyene osongo mbuotidem ke Obong Jesus Christ.

Ndima ndito-eka mi iban, edi nkpo idaresit ndidu ye mbufo! Nnyin imobo nti eriyarare emi anamde ukpong nnyin adara onyung enem esit.

Nte nnyin itongode, ami nyema ndida mbufo nwut esisit mme ufan nnyin; mmo edi nkaiferi iban emi edide isio-isio ke ndaha eno, edu, idem mmo ye ke ufokemana. Mmo kiet-kiet, ukem nte ofuri mbufo, enyene nde ke esit mi.

Bella

Akpa, esobo ye Bella. Enye enyene iwuk nte nkokure nkaiferi ke branch esie eke Iceland.

Josephine

Esobo ye esin-ifik Josephine emi otode Africa, emi afiakde enyime ndikot Nwed Mormon ofuri usen. Enye edikut odudu ye edidiong emi otode mmem-mmem, eti edinam emi.

Ashtyn

Nte akpatre, esobo ye edima ufan mi Ashtyn, osong-idem nkaiferi emi okoyode udongo cancer ke isua itiokiet mbemiso edikpa. Osongo iko ntiense esie kabanga Erisio-isop Jesus Christ osuk odo-du ke esit mi.

Mbufo kpukpru edi nti nkaiferi iban. Mbufo edi isio-isio, owo kiet-kiet ye mme eno ye ifiok-ukpeb mbufo enyung edi ukem-ukem ke ata eti ye nsinsi usung.

Kpukpru mbufo edi ata ndito-iban spirit eke mme Ete ye Eka eke Heaven, ndien iduhe nkpo ndomokiet emi edidianare mbufo osio ke ima Mmo ye ima eke Andinyanga mbufo.¹ Nte mbufo esangade ekpere Enye, ke ndisanga esisit nka iso, mbufo eyekut ata emem emi odukde ukpong mbufo nte nti mbet eke Andinyanga nnyin, Jesus Christ.

President Russell M. Nelson, edima prophet nnyin, ama odoho yak ami mbuana usuk nti edikpuho emi edinwamde mbufo “enyene edisana ndaha ke idem [mbufo]”² enyung ekori ke edinen usung. Ke okoneyo emi nyeting mbanga usung edinam-ekem inang.

Ibuot-iko eke Nkaiferi Iban

Akpa, akpan nkpo ke ofuri se nnyin inam ke Young Women edi udong nnyin ndinwam mbufo man enyene osongo mbuotidem ke Obong Jesus Christ³ ye mbufo ndinehede mfiok edisana akanga mbufo nte eyen-anwan eke Abasi.

Okoneyo emi, ami nyema ndisian edifiak-nse ibuot-iko eke Nkaiferi Iban. Ami mbenge yak mbufo ekop nte Edisana Spirit etingde akpaniko abanga iko emi ke nte ami ntingde obufa ibuot-iko emi:

Ami ndi edima eyenanwan eke ete ye eka eke heaven,⁴ ye edisana uduot-obot ye nsinsi akanga.⁵

Nte mbet Jesus Christ,⁶ ami mmedomo ndibiet Enye.⁷ Ami nyom nyung nam nkpo ye eriyarare eke idem mi⁸ nyung nwam mbon efen ke edisana enying Esie.⁹

Amii nyeda nte ntiense nno Abasi ke kpukpru ini ye ke kpukpru nkpo ye ke kpukpru ebiet.¹⁰

Nte ami nnwanade ndibo ubong,¹¹ ami mmema eno edikabare-esit¹² nyung nyom ndinam-ofon ku usen-ku usen.¹³ Ye mbuotidem,¹⁴ ami nyesongo ufok ye ufokemana mi idem,¹⁵ nam nyung nim ndisana ediomi,¹⁶ nyung mbo mme edinam iko-Abasi¹⁷ ye edidiong eke temple.¹⁸

Ekut edikpuho mkpong “nnyin” nka “ami.” Mme akpaniko emi edi ono mbufo owo kiet-kiet. Mbufo edi edima eyenanwan eno Ete ye Eka eke Heaven. Mbufo edi mbet ediomi eke Andinyanga nnyin, Jesus Christ. Ndoho nte yak ekot enyung ekere mme iko emi ke esit mbufo. Mmodiongo ke nte enamde, mbufo eyenyene iko ntiense kabanga akpaniko mmo. Ndifiok akpaniko emi eyekpuho usung nte mbufo ediyode ye mme afanikong. Ndidiongo ndaha ye ntak emi eyenam mbufo eyak uduak mbufo esin ke uduak eke Andinyanga.

Emem ye ndausung eyedi okuo ke nte mbufo etienede Jesus Christ.

Mme Class eke Nkaiferi Iban

Udiana nde edikpuho ebehe mme class eke Nkaiferi Iban. Elder Neal A. Maxwell odoho ete, “Ediwak ini se mme owo etimde eyom edi ndidu ke ebiet uboho kini oyobio uwem-isong etibede.”¹⁹ Ana nte mme class nnyin edi itie-uboho kini oyobio, ebiet ukpeme eke ima ye inyene. Ke ukeme man ibop akwa edidiana-kiet, osongo ufan, ye nkori ke ekikere inyene koto Nkaiferi Iban, nniyn ke inam ukpukode ke adaha class nnyin.

Ke awakde akan isua Ikie, esibahare nkaiferi iban esin ke mme class ita. Tongode idahaemi, nnyin ikoot mme adausung Nkaiferi Iban ye mme bishop ete ekere-ebanga unana nkaiferi nnwan kiet-kiet enyung enim mmo nte ndaha ward mmo edide. Se usuk uwutnkpo nte emi editiede mi.

• Edieke mbufo enyenede esisit ibat nkaiferi iban, mbufo eyenam class Nkaiferi Iban kiet esobo ye ofuri owo otokiet.

• Ndusuk mbufo emenyene akamba eboho eke nkaiferi iban emi eidde isua Duopeba ndien ekpri eboho eke nkaiferi iban emi ekopnde. Mbufo emekeme ndinyene class iba: Nkaiferi Iban isua Duopeba ye Nkaiferi Iban isua Duopeta kesim Efureta.

• Mme edieke enyenede akamba ward emi nkaiferi iban Ata edude, emekeme ndinyene mme class itiokiet, class kiet eno ndaha isua kiet, enim ke ndaha isua owo.

Nte ekpenimde mme class mbufo, mbufo nkaiferi iban edi akpan-nkpo ke ndibop edidiana-kiet. Edi unwana eno mbohidung mbufo. Edi usung ima ye ukpeme emi mbufo ekerede ndibo nto mbon efen. Ye akam ke esit mbufo, eka iso ndinwam enyung edi odudu oro ke ndinam sifon. Nte enamde ntre, uwem mbufo eyeyoho ye mfonido. Mbufo eyenyene eti ekikere eno mbon efen enyung etongo ndikut nti nkpo mmo ke usiene.

Mme Enying Class eke Nkaiferi Iban

Oyoho Ita, diana ye obufa edinim emi, edi-kot ofuri mme class enying kiet nte “Nkaiferi Iban.”²⁰ Nnyin iyeduok mme enying “Beehive,” “Mia Maid,” ye “Laurel.”

Ndisongo Presidencies eke Class

Akpatre nde eke ami nyomde nditing iko mbanga edi ufon eke mme class presidencies. Ke usung nte ekpenimde mme class eke Nkaiferi Iban, akpana ofuri class enyene class presidency!²¹ Oto ke edisana ubono-nkpo ete yak ekot nkaiferi iban man eda iwaad usung.

Enehede ewut enyung esongo utom ye ntak emi enyenede mme class presidencies. Utom erinyanga-ukpong edi ata akpan ubiong-utom emi kiet, akpan-akpan ke nde edisin-unwam, utom ukworo iko-Abasi, osongo, ye utom temple ye family history.²² Ihn, emi edi nte nnyin idibokde Israel²³—akwa utom anade ono nkaiferi iban nte iwaad mbon udim-ekong Jehovah.

Nte mbufo efiokde, ke ofuri ndaha ke Ufok Abasi, Abasi okot mme presidencies ete eda ikot Esie usung. Nkaiferi iban, ndidi owo class presidency kiet ekeme ndidi akpa ifet ono fi ndibuana ke eti ubono-nkpo ndausung emi. Mme ikpo adausung, enam ikoot class presidencies ebemiso ndien ediana ye mmo eda usung, ekpeb enyung ekpeme mmo man ekut unen.²⁴ Ke suto ndaha ifiok-ukpeb ndausung eke class kiet ekpedide, etongo ke ebiet emi mmo edude enyung enwam mmo ndinyene ifiok ye ukeme emi edinwamde mmo nte mme adausung. Edu ekpere mmo, edi ekubo utom mmo enam. Spirit eyenwam mbufo ke nte mbufo enwamde mmo.

Chloe

Man ewut akpan ubiong eke ete ye eka ye mme adausung nte mme anditeme, yak nno mbufo mbuk kiet. Ekekot Chloe ete edi class president kiet. Eti adausung itie-oku esie odoho enye ete obup Abasi mbon emi edidide presidency esie. Chloe obong akam onyung obo ifiok-spirit usop-usop ke mbon emi enye edisiakde nte mme onoitem esie. Nte enye akade-iso ndikere nyung mbong-akam mbanga owo emi ediwetde-nkpo, Spirit owut enye owo emi enye mikpekereke ibanga—owo emi misisopke ndidi Ufok Abasi.

Nte enye eyikde ntuuk oro, Chloe eneme ye eka esie, emi akanamde anwanga ete ke usung kiet emi nnyin ikemeke ndibo eriyarare edi ndifiak nnyene ukem ekikere oro. Ye obufa osongo emi, Chloe ekere ke imo imekeme ndisin enying nkaiferi emi. Bishop ono ikoot oro, nkaiferi oro onyung enyime. Ke ema ekedori-ubok ediong, ewet-nkpo emi ete, “Afo omokut, akananam nkekereke ke ebat mi nte nkpo, mme ke eyom mi ke ebiet ekededi. Ami nkekereke ke nyeduk otu. Oto ke ikoot emi, mmodiongo ke Ete ke Heaven enyene utom ye ebiet ono mi.” Nte Chloe ye eka esie ekpongde ebiet oro, Chloe ye mmongeyet ke enyin odoho eka esie ete, “Eriyarare edi akpaniko! Eriyarare enehede anam-utom!”

Mme class presidencies, Abasi okokt mbufo onyung enim ke mbufo eboho ndito-iban kiet Esie usung. “Abasi odongo mbufo. … Enye ekemek mbufo.”²⁵ Owo emi enyenede odudu itie-oku ama odori mbufo ubok odiong mbufo; emi oworode ke nte enamde utom ke ikoot mbufo, ke eda odudu itie-oku enam utom. Mbufo emeyene akpan utom ndinam. Eting-enyin enyung enam nkpo ke nte Edisana Spirit etemede. Nte enmade ntre, eyenam utom ye uko, koro mbufo inamke utom ikpong!

Class presidents, nnyin imoyom ikike, uyo ye odudu mbufo ke obufa ward youth council emi Elder Quentin L. Cook akasiande mfin emi. Mbufo edi akpan unwam eno ke ndiyo unana eke ndito-eka iren ye iban mbufo.²⁶

Mme ukpuhode ke adaha class ye ndausung emi ekeme nditongo usop-usop ke nte mme wards ye branches ebengeke idem edi enyene ndida-itie ke January 1, 2020.

Ndima ndito-eka mi iban, ami ndi ntiense nte ke mme edinam-ekem eke ami ntingde mbanga mfin emi edi nti ndausung emi otode Abasi. Nte nnyin inehede inam edinam-ekem emi, mbenge yak nnyin ikufre utom nnyin: ndisongo ubiere nnyin ke nditiene Jesus Christ nyung nwam mbon efen ke nditiene Enye. Ami iko ntiense nte ke emi edi Ufok Abasi Esie. Mmokop inemesit ke ami ke Enye ndinyime nnyin ndi-di ata akpan ubak ke edisana utom emi.

Ami mbenge yak ukem Spirit emi okonode edinam-ekem emi ekpeme mbufo ke nte mbufo esinde ifik eka iso ke usung ediomi. Ami nting iko ntiense emi ke enying Jesus Christ, amen.

Mkpri nwed

1. See Romans 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nov. 2019, 39.

3. See Proverbs 3:5–7; Jacob 7:5.

4. Se Romans 8:16–17; Doctrine and Covenants 76:24; “The Family: A Proclamation to the World,” Liahona, May 2017, 145.

5. Se 2 Peter 1:3–4; Alma 37:44; Doctrine and Covenants 78:18; “The Family: A Proclamation to the World.”

6. See John 13:14–15, 35.

7. See Matthew 22:37–39; 25:40; 3 Nephi 12:48.

8. See John 16:13; 3 Nephi 14:7–8; Moroni 7:13; 10:5; Doctrine and Covenants 8:2; 9:8; 11:13.

9. See Matthew 20:26–28; 22:37–39; 25:34–40; 3 Nephi 26:19.

10. See Isaiah 43:10; Mosiah 18:9; Doctrine and Covenants 14:8.

11. See Romans 8:17; 2 Nephi 9:18; 31:20; Doctrine and Covenants 84:38; 132:49; Moses 1:39.

12. Se ke Helaman 12:23; Moroni 10:33; Doctrine and Covenants 58:42.

13. Se Alma 34:33; Doctrine and Covenants 82:18.

14. Se Hebrews 11; 2 Nephi 31:19–20; Alma 32:21.

15. Se Joshua 24:15; Doctrine and Covenants 109:8; 132:19.

16. Se Exodus 19:5; 1 Nephi 14:14; 2 Nephi 11:5; Doctrine ye Covenants 54:6; 66:2; 90:24.

17. Se Mosiah 13:30; Alma 30:3; Doctrine ye Covenants 84:20–22; Articles of Faith 1:3.

18. Se Psalm 24:3; Isaiah 2:3; Ezekiel 37:26.

19. Neal A. Maxwell, All These Things Shall Give Thee Experience (1979), 55.

20. Akpana ekot mme classes ibuot enying kiet nte “Nkaifrei Iban.” To identify a specific class, include the age—for example, “Young Women 12–14”; “Young Women 15–18” (see Handbook 2: Administering the Church, 10.1.5, ChurchofJesusChrist.org).

21. Akpana ekot class presidency eno class nkaiferi iban kiet-kiet. Nte ekemde, akpana ekot oyoho class presidency kiet, ye president, onoitem mbiba, ye ewet-nkpo. Edieke enyimede, ekeme ndikot ubak presidency (se Handbook 2, 10.3.5).

22. Se Handbook 2, 10.3.5.

23. Se Russell M. Nelson, “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

24. Additional instruction is available for adult Young Women leaders in Handbook 2, chapter 10.

25. Henry B. Eyring, “Enam ekekem ye Ikoot Mbufo,” Liahona, Nov, 2002, 76.

26. Edieke mbufo enyenede class kiet ye class presidency kiet, oyoho presidency ekeme ndibuana ke youth council eke ward ye mme president eboho Itie-oku Aaron man ed ukem-ukem ono nkaiferi iban ye mkparawa iren(se Handbook 2, 18.2.9).