Ndida ke Enwongo ye Ediomi Nnyin
Ami nkot mbufo nte ekere-ebanga enwongo ye ediomi emi mbufo ekenamde ye Abasi, ye mbon efen, ke ata akpaniko, efiok ete ke iko mbufo edi ubiong mbufo.
Ndito-eka iren ye iban, nte nnyin itrede ikpehe emi, yak nnyin owo kiet-kiet imum ke esit nnyin ntiense emi ikopde mfin emi kabanga akpaniko eke gospel Jesus Christ. Nnyin imefon iso ndinyene edisana ini emi otokiet man isongo enwongo nnyin ino Obong JesusChrist ite ke nnyin idi isungutom Esie ndien Enye edi Andinyanga nnyin.
Ufon ke ndinam nyung nim enwongo ye ediomi efighe mi ke ke ekikere. Ofon didie ke mbufo edinim iko mbufo? ke edidambufo nte mbon akpaniko? ke edi-nam se mbufo edohode ete eyenam? ke edidomo edi-nam edisana ediomi mbufo? ke edinyene akpaniko? Ke ndinam akpaniko ke enwongo nnyin nno Abasi ye mbon efen, nnyin ida ediomi oro ifiak itiene Ete ke Heaven inyung ikop ima Esie ke uwem nnyin.
Andinyanga nnyin, Jesus Christ edi akwa Uwutnkpo ke edi-nam nyung nim enwongo ye ediomi. Enye ekedi isong onwongo ndinam uduak Ete. Enye ekekpeb gospel ke iko ye edinam. Enye okosio-isop ono idioknkpo nnyin man nnyin ikpefiak idu uwem. Enye ama anam ofuri enwongo Esie.
Nte ekeme nditing ukem oro ye nnyin owo kiet-kiet? Nso idioknkpo idu edieke nnyin itukde-owo esisit, iduede-idem esisit, mme mikemeke ndinam ubiere nnyin ofon ama? Nso iditibe edieke nnyin isinde ndinam ediomi nnyin? Ndi mbon efen eyetiene Christ oto ke uwutnkpo nnyin? Ndi mbufo emesida ke iko mbufo? Ndinim ediomi idige ido; edi edu-uwem ke edi-di mbet Jesus Christ.
Jehovah ke ama okofiok mmemidem nnyin ke uwem isong onwongo ete, “Esong esit, ekufehe ndik, koro Ami Jehovah ndu-du ye mbufo, nyeyung ndu ye mbufo.” Ami mmekop odudu Esie kini nyomde nsongo-nda, idongesit, mme akamba ifiok mme osongo, ndien ami mmetim nsuhode-idem nyung nno ekom ke edisana nsanga Esie.
Jehovah odoho ete, “Ofuri ukpong eke esinde idioknkpo enyung etiene Mi, ekot enying Mi, ekop uyio Mi, enyung enim mbet Mi, eyekut iso Mi enyung efiok ke Ami ndi Abasi.” Ekeme ndidi akpatre enwongo Esie edi oro.
Ami nkekpeb ufon edi-nam iko mitongo ke uyen mi. Uwutnkpo kiet oro edi kini ami ndade nde-kiet man nting Enwongo Scout ke ibuot. Ebuana nnyin ye Boys Scout eke America, nte etrede idahaemi, eyesuk edi nkpo editi ono mi ye Ufok Abasi emi. Eke nka Scout, eke ediwak iren ye iban emi esinde ifik enm utom nte mme adausung Scout, eke mme eka—ata itoro ebine mmo—ye eke mkparawa emi ebuanade ke nkpo Scout, ami ndoho nte “Esosongo.”
Ke ikpehe enye emi, edima prophet nnyin, President Russell M. Nelson, ye Elder Quentin L. Cook enam ukpuhode emi edinamde nnyin ifiak ise mme iwaad inyung inam mme nka nnyin esanga ke akpaniko emi ekeyarade. Ke ndidian do, ke Sunday emi ekebede, President Russell M.Nelson ye President M. Russell Ballard anam anwanga obufa edinam eke Ndito-nwong ye Iwaad eke Ufok Abasi Jesus Christ eke Ndisana Owo ke Ekpere Edem Usen eno Ufok Abasi. Edi ntongo-nkpo emi ewukde-enyin ke Obong ye Andinyanga nnyin, Jesus Christ. First Presidency ye Eboho Duopeba ediana kiet ke obufa ndausung emi, ndien ami ndi ntiense nte ke Abasi ono ndausung ke ofuri se enamde. Ami mmenem esit ye ndito-nwong ye iwaad eke Ufok Abasi ke edibo oruk ntingenyin nno mmo ke ufok ye ke Ufok Abasi—otode ke ukpeb iko-Abasi, utom-unwam ye edinam, ye nkori mmo.
Ibuot iko eke iwaad ke isua, 2020, emi edide eting abanga akwa enwongo eke Nephi ete “ka nyung kanam.” Enye ewet ete, “Ekem ami, Nephi ndoho ete mi nte: Ami nyeka nkanam se Jehovah etemede mi, koro ami mmofiok nte ke Jehovah inoho ndito owo ibet, ibohoke enye odiong usung ono mmo man mmo ekeme ndinam se Enye odohode mmo.” Okposuk nte eketingde oro ke anyan ini ko, nnyin ke Ufok Abasi ida ke enwongo oro mfin emi.
Man “ika inyung ikanam” oworo ndikong nka usung ererimbot, ndibo nyung nam nkpo ke eriyarare eke idem nnyin, ndidu edinen uwem ye idorenyin ye mbuotidem ke iniso, ndinam nyung nim ediomi nditiene Jesus Christ, ndien ekem ikori ke ima nnyin ino Enye, Andinyanga ererimbot.
Ediomi edi enwongo usung iba ke ufot nnyin ye Abasi. Nte mbon Ufok Abasi, nnyin imediomo ke ini baptism ndida enying Jesus Christ ndori ke idem nnyin, man idu uwem nte Enye odude. Ukem nte mbon emi ekenade baptism ke Mmong Mormon, nnyin idiomo ite ke iyekabare idi ikot Esie, “man ibiom mbiomo kiet eken, man mmo efere; … nditua ye mmo emi etuangade; … ndidong mmo emi efuhode esit, ye ndida nte mme ntiense Abasi ke kpukpru ini ye ke kpukpru nkpo, ye ke kpukpru ebiet.” Unwam emi nnyin inode kiet eken ke Ufok Abasi owut ubiere nnyin ke ndikpono mme enwongo oro.
Ini emi nnyin idiade udia-Obong, nnyin ifiak iti ediomi oro ke ndida enying Esie ndori ke idem nnyin nyung nam mme enwongo efen man inam ofon. Ekikereye edinam nnyin kusen-kusen, akamba ye ekpri, owut nsinifik nnyin ono Enye. Edisana enwongo Esie nte utip edi, “Edieke mbufo ekade iso nditi mi kpukpru ini Spirit mi eyedu ye mbufo.”
Mbume mi mfin emi edi, ndi nnyin imeda ke enwongo ye ediomi nnyin, mme mmo ke ndusuk ini edi ubiere ke ubak-esit, emi inamde ke iseri ndien isop ndibiat? Ini emi nnyin idohode owo ite, “Ami nyebong akam nno fi,” nte imenam oro? Ini emi nnyin inyimede, “Ami nyedu man nnwam fi,” nte nnyin iyenam oro? Ini emi nnyin ibiereke ke idem nnyin ndikpe ison, nte nnyin imenam oro? Ini emi nnyin imenede ubok nnyin man ibere ye owo efen ke obufa ikoot, emi oworode ndino unwam, nte nnyin imenam oro?
Mbubreyo usen kiet kini uyen mi eka mi etie ye ami ke ukot bed esie onyung eting ufon ndinim Iko Ifiok sung-sung ono mi. Enye odoho ete, “Ami mmefiok nto ifiok-ukpeb eke mbon efen, ke mme isua ekebede kabanga unana ido-Abasi ye nting-enyin emi otode nditre editiene Iko Ifiok.” Enye ese mi ke enyin ndien ami nkop nte iko esie odukde esit mi: “Wongo nno mi, Ronnie, mfin emi [enye ekesikot mi Ronnie], ete kpukpru ini ke afo eyenim Iko Ifiok.” Ami mma nehehde nam enwongo oro nno enye, ndien ami nsuk nnenim oro ke ofuri mme isua emi.
Ubiere oro enehede anwam mi kini ami nkedude kini uyen mi ye ke mme isua eken kini ami nkanamde mbubehe emi inyene akawakde eti-eti. Ami mma nam ubiere kiet kiso nditiene ewuho Abasi, ndien inaha nte ami mfiak nkanam oro. Jehovah odoho ete, “Ami, Jehovah, nyenam kini mbufo enamde se Ami ndohode nte mbufo enam; edi kini mbufo minamke, mbufo inyeneke enwongo.” Nso ke Enye eting ono mbon emi enimde Iko Ifiok? Ete ke nnyin iyenyene enwongo nsong-idem, osongo, ikike, ifiok, ye mme angel ndikpeme nnyin.
Esisit isua emi ekebede, ami ye Sister Rasband ikodu ke Temple Salt Lake ke sealing eyenanwan nnyin kiet. Nte nnyin idade ke anwa temple ye ekpri eyenanwan nnyin kiet emi misimke isua ndiduk edinam oro, nnyin ineme ibanga ufon ndibo sealing eke edisana temple Abasi. Nte eka mi ekepkpebde mi ke mme isua ke edem, nnyin iting ino eyenanwan nnyin ite, “Nnyinn iyom fi enehede obo sealing ke temple, ndien nnyin iyom fi onwongo ono nnyin ete kini afo odode ebe, ke afo eyenim usen kiet ye enye man akanam sealing ke temple.” Enye ama onwongo ntre.
Tongo oro enye eting ete ke iko nnyin ye enwongo esie esikpeme onyung eti enye se “inehede idi ata akpan-nkpo.” Ekem enye ama anam edisana ediomi ke nte enye akanamde sealing ye ebe esie ke temple.
President Nelson ekekpeb ete: “Nnyin … inam odudu Andiynagake uwem nnyin okori kini nnyin inamde ndisana ediomi inyung itim inim ediomi oro.” Ediomi nnyin obop nnyin adian Enye onyung ono nnyin odudu Abasi.”
Ini emi nnyin inimde mme enwongo ye kiet eken, nnyin ndien iyenim enwongo ye Abasi. Ti iko Jehovah ete: “Adanga nte mbufo ekenamde nkpo emi eno kiet ke otu ndito-ete Mi,mbufo ekanam eno Mi.”
Efiak ese ye ami ke mme uwutnkpo enwong emi odude ke nwed Abasi. Ammon ye ndito-iren Mosiah ke Nwed Mormon ema ebiere “ndikworo iko Abasi” Ini emi mbon ekong Laman ekemumde Ammon, mmo eda enye eka iso owo Laman Edidem Lamoni. Enye onwongo ono edidem ete, “Ami nyedi isungutom fo.” Ini emi mbon ino edide ndiyip erong edidem, Ammon esibe ubok mmo osio. Ntre edidem okodu ke mkpaidem, enye akpang-utong ono etop iko-Abasi onyung akabare esit.
Ruth, ke Akani Testament, onwongo ono eka ebe esie ete, “Koro nyeka ke ebiet eke afo akade.” Enye ama anam iko esie. Eti owo Samaria, emi odude ke mbuk-nke ke Obufa Testament, onwongo ono ete-ufok ete edieke enye edikpemede enyene-unan owo isang oro, “Ndien mma mfiak ndi, nyesio se edibistde akan oro nno fi.” Zoram, ke Nwed Mormon, onwongo ndisanga ye Nephi ye ndito-ete esie nka wilderness. Nephi ewet ete, “Ekem ke Zoram ama akanam enwongo ono nnyin, ndik emi nnyin inyenede ye enye okokure.”
Nso kabanga enwongo ini eset “emiekanamde eno mme ete” nte ewutde ke nwed Abasi ete “eyekabare esit ndito eno mme ete mmo?” Ke uwem mbemiso ekisong kini ikemekde uduak Abasi, nnyin imainam enwongo ndiwam ke nditang Israel mbok ke edem ikpehe mbiba. Elder John A. Widtsoe anam anwanga eke ke “Nnyin ikoduk ediomi ye Abasi.” “Edinam uduak oro akabare ndien idige uduak eke utom Ete, ye utom utom Andinyanga, edi edi utom nnyin nko.”
President Nelson eketing ke nte enye anamde isang akanare ererimbot ete “[Ndi] bok edi ata akpan-nkpo emi adade itie ke isong mfin emi.” “Ini emi nnyin itingde ibanga ndibok, nnyin inehede iting ibanga ana-isong akpaniko emi ite ke: kpukpru ndito Ete nnyin ke Heaven, ke nkang veil mbiba, edot ndikop etop eke mfiak-nda-ndi iko-Abasi Jesus Christ.”
Nte Apostle Obong Jesus Christ kiet, ami nyetre ye ikoot ye enwongo kiet. Ke akpa, Ke Ikot: Ami nkot mbufo nte ekere-ebanga enwongo ye ediomi emi mbufo ekenamde ye Abasi, ye mbon efen, ke ata akpaniko, efiok ete ke iko mbufo edi ubiong mbufo. Udiana, amo nnwongo nno mbufo, nte ke mbufo enamde emi, Abasi eyewuk iko mbufo onyung odiong edinam mbufo ke nte mbufo edomode ye ofuri nting-enyin man ebop uwem mbufo, eke ufokemama mbufo, ye Ufok Abasi Jesus Christ mme Ndisana Owo Ekpere Edem Usen. Enye eyedu ye mbufo, ndima ndito-eka mi iren ye iban, ndien mbufo eyekeme, ye uko ese iso man “ekpebo mbufo esin ke heaven, man [mbufo] nko ekpedung ye Abasi ke ebiet emi utit inemesit miduhe … koro Johovah Abasi ama eketing.”
K’emi ke ami nting-iko ntiense nyung nnwongo ke enying Jesus Christ, amen.